Oknayene Ibo 44
44
1Ana Josep ya ye agiglema kaya mokna ya wain nuglo ne kodigo, Josep ere mogl, ye nigl kogonmo yagl ta ye yugumo sugl moglkwa i, yegl di togwa, Yagl wagle i bek tau yuigwa i, ene kugl mogo bek mina atne ede, si kau suo! Te, ye migeno ama gre ikne ede bek mina atne padiglsre, 2na kapnana, silva mina bekigwa i, ye agro okuo bekmo mina ye migemo bogl akie bek mina atne gre padiglo! di, yegl dugwa. Yegl dugo, ye nigl kogonmo yagl i ye dumere erukwa. 3Eruko, Josep agiglema eduer ugl padre, kamun tagugwa igne adiglkwa. Adiglko, Josep nigl kogonmo yoba ye dedigo, ye donkino idre ede eigwa. 4Ye ede taun bina pidre, eglke pikriko, Josep ere mogl, ye nigl kogon yagl ta ye yugumo sugl moglkwa i, yegl di togwa, Ene yagl wagle i sika si ede po! Sika si ede pi ene ye eimara pi ake idre, yegl dinatniwa, Na yaglna kade ene ere wakai ere togwa. Ene siragl pre ye ere kide ere teime? 5Ene siragl pre kapmo kunogl ime? Kap i mina na yaglna kade wain nuglo ya ki toide nogwa. Te, ye ama kap i mina taragl tau okuo plau dinabuka i, i nogugl ede kanugwa. Ene kunogl igwa i, aglau podo erimiwe di, ene yegl dinatniwe dugwa.
6Ana Josep ye ka yegl di kodugo, ye nigl kogonmo yagl i ye agiglema sika si pidre, ye eimara pi ake yugwa. Ye eimara pi ake idre, Josep ye Ka yegl dinatniwe dugwa i, ye di togwa. 7Ye yegl di togo, Josep agiglema di ikne ede, yegl digwa, Ene siragl pre ka yegl dine? No taragl yegl ta erekramga. 8No okna umga igne, mige tau bekno wagle atne paugo, kanumga ikra we, no te ikne edinamnedi yumga. Ene pitnga, no yegl ersre, yaglnen kade golmo mo silvamo yugugl yogwa i no kunogl nemedi pitno? 9Yagl kade yo, ene kap i doko kano! Yagl swara ta kunogl yugwa panan, yagl i si goratniwa. Yagl i si gogln, no mudu ene nigl kogonen yoba moramniwe di, yegl digwa. 10Yegl digo, Josep nigl kogonmo yagl i yegl dugwa, Ana prawa, ene dimere yegl eraglka. Ene swara ta kunogl yunga panan, yagl i na niglna kogona yagl moran, ene tau yoko ede enaiglmiwe dugwa. 11Yegl dugo, Josep agiglema tabre bekno i atne edidre, yaurikwa. 12Yauriko, Josep nigl kogonmo yagl i bek swara swarade mina atne kanugwa. Ye Josep agiglema bugla yugu nemere nemere bekno mina atne kan ogwa. Josep agigle komono bekmo, komono kana kandre, ede pi okuo kaima Benjamin bekmo mina kanugwa. Benjamin bekmo atne kanugo, kap ikra yogo, kanugwa. 13Kanugo, Josep agiglema kide prisre, kuguglno gaglno ake argla didre, bekno aglke kor donkino wagle padiglsre, aglke ede ikne taun suna wigwa.
14Ana Juda ye agiglema bogl aglke ede ikne taun suna udre, ede Josep yugumo eigo, ye yugugl mogl pai moglkwa. Mogl pai moglko, ye agiglema mudu ye moglmara pidre, kudugl goglsre, yage kobragai paigwa. 15Ye makandigle kobragai paigo, Josep ye yegl di prukwa, Ene mabuno kide ere narikwa i, siragl pre erime? Yagl kade na moglmere yegl meglkwa i, yoba kunogl neigwa ya ki kan i nogugl edigwa i, ene prikrimo? di, yegl di prukwa. 16Yegl di pruko, Juda di ikne ede, yegl dugwa, Yagl kade yo, no Kunogl ikrumne dinamga i, siragl mere dinamne? God no tadaglmeno i nogugl edugwa. Yegl pre no agro okuo ene kapnen ake moglkwa ya te, no mudu ama erme ene nigl kogonen yoba muniwe di, yegl dugwa.
17Juda yegl dugwa ba Josep di ikne ede, yegl dugwa, Na ene mudu ta si kane sikraglka. Yagl swara ta kap ake moglko, kanigwa i, ye swara na nigl kogona yagl morabuka. Ba ene tau we, ene deno muduno wida dinan, ede ikne pi, neno moglmara ede enaiglmiwe di, yegl dugwa.
Juda ye Benjamin agaimo inagle dugwa
18Ana Josep ka yegl di kodugo, Juda ye moglmara magigl pidre, aglke kor yegl dugwa, Yagl kade yo, ene king moglmere yegl motniwa. Na ene nigl kogonen yoba moluwa. Na ka ta dibo, ene kubrokro. 19Ene okna no di pre, Ene neno kidagl mo agro ta moglmo? dinga. 20Dingo, no di ikne ede, yegl dumga, No neno kidagl moglkwa. Te, no agro okuo kaima ta ama moglkwa. No agro okuo i, no neno, kidagl yei kodugwa igne kuglkwa. Ye agigle ta mano swara kuglkwa i, goglkwa pre erme ye wam swara i moglkwa. Ye neno kidagl muduo suna moglmiwe di, yegl dumga. 21No yegl dumgo, ene no di noro, Na ene agro okuo i kanaluwe dinga. Ene agre yu, na moglmara edio! di, yegl dinga. 22Ene yegl dingo, no aglke kor dumga, No agro okuo i, nem moglmara kide kodokrabuka paugwa. Ye ta kide kodidre, ede unan, ye nem gorabiwe di, yegl dumga. 23No yegl dumga ba ene aglke kor dinga, Ene agro okuo i, ene bogl akie ukribi, ene na gumana ta kankraiglmiwe di, yegl dinga.
24Ana yagl kade yo, no okna ede ikne pi, no neno, ene nigl kogonen yagl mere yegl moglkwa i, moglmara omga igne, no ene dinere i ye di tomga. 25No di tomgo, ye ere mogl, okuo no di noro, Ene ede ikne pi, kugl mogo kuri ta nono nenamga pre topo sio! di, yegl dugwa. 26Yegl dugwa ba no di ikne ede, No ta pikramniwe dumga. No agro okuo bogl akie enaiglmedi dedin, enamga. Ba ta manan, yagl ikra guma kankramniwe di, yegl dumga. 27Yegl dumgo, no neno, ene nigl kogonen yagl mere yegl moglkwa i, aglke kor dugwa, Na ebina wana suo keme kuglkwa i, ene pre kan erikwa. 28Swara ta ede pi ikne ukruko, na Agl bugla are ye si paglke neigwa pame di, yegl diga. 29Te, ta yoko moglkwa i, ene ye idre, ede Isip ebi, ye konbauna bage ta goran, na kidagl yedre, bitna ikan ugwa pre na ene ye idre, eimara i mirie goglsre, goraluwe di, neno yegl dugwa.
30-31Yagl kade yo, no erme ede ikne pi, no neno moglmara ta omun, ye wam okuo i ta enan kankran, yagl gak i ye nem muduo suna moglkwa pre ye nem gorabuka. Yegl pre no yagl gak i agre i ede ikne pikrumun, neno kidagl, bre ikan ugwa i, no yubun ye tomga pre gorabuka. 32Te, na ama ka giglede ta nina di te, yegl diga, Na Benjamin agre i ede ikne u, ene motnara ta edekribo, ene gumugln wagle aimadi kamin na mabuno moraluwe diga. 33Yegl pre na ene erme di prika, Ene pra we din, na agra okuo i agaimo idre, ene nigl kogonen yoba moraluwa. Na ye agaimo ibo, na agra okuo agiglema bogl akie ede ikne enaiglmedi prika. 34Ye no bogl akie pikrumun, na siragl mere ede ikne pi, nina moglmara enagle? Na nina mirie gogl, gorabuka i kanakrika pre die di, Juda yegl dugwa.
Currently Selected:
Oknayene Ibo 44: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
