Oknayene Ibo 49
49
Jekop ere mogl, ye wama mina siragl taragl okuo plau dinabuka i, di nogugl ede togwa
1Ana Jekop ere mogl, ye wama mudu di makai sidre, yegl dugwa, Na ene wagle siragl taragl okuo plau dinabuka i, di nogugl ede tenaglka. Ene u magigl mogl, praiglma wio! 2Na kagna Jekop we didre, Israel we ama digwa. Ene na wanama meglkwa i, ede magigl ya udre, ka dinaglka i prio!
3Ana Ruben we, ene na wana komono motnga. Na kulu moglka igne, na yobuglna wagle ene kuglka. Na ene kuglko, ene u kade pidre, yagl kade mogl agiglnma mudu tedre, yobuglo ere agiglnma mudu ama tenga. 4Yegl etnga ba ene ka prikitnga. Nigl podo sugwa igne, yoba Yegl moglo dibi, kuno erabo? Ta manugwa. Nigl i yoba ta kano prikrumere ene ama ka prikitnga. Ene ka prikre, na boglna wagle ebina ta bogl, bogl swara pabrika. Ene na agai goraglka mabuno etnga pre ene erme yagl komono mere moglkratniwa.
5Te, Simeon ya Livai we, ene komono okuo miurka. Ene bainet idre, yoba gua gua si giurka. 6Ene deno kubro, yoba si goglsre, enene wakai pribrere kau kaglno gogono si keglu sibrika. Yegl pre ene atne teke mogl, ka di padrabrara i, na moglkribo, ene ka di padrabrika i, na dena mudna ama yei tekraglka. 7Ene deno podo kubrsre, yoba mitno goglkre, si giurka pre enene u kide enabrika. Na erme di padiglka i, ene gawanoma dumo swara moglkre, Israel yoba mudu kipai moraiglmara suna bage bage kipai moraiglmiwa.
8Te, Juda we, ene agiglnma ene debin sidre, bitno magide ene tenaiglmiwa. Te, ene kuda ikne kuda bogl tedre, yobuglo eratniwa. 9Ene laion yobuglno podo pamere yegl yobugln podo paugwa. Laion ere mogl, taragl ere sidre, neigwa. Ne kodidre, ye ede ikne ugl paimara dumo pi, ugl paigwa. Ye ugl paigwa igne, yoba ta ere mogl, uglno yokinaiglkwa, kudugl geglkwa. Ene ama yobugln podo yegl mere paugwa pre yoba mabuno gua gua ene ere tenaiglkwa i, ye ama kudugl goraiglkwa pre diga. 10Te, ene gawanma we, ye aimadi king muglbono ake moglsre, yoba kingno moraiglkwa. Yegl ere meglbi, okuo gawan swara ta udre, muglbo akidre, king kaima morabuka. Ye king moran, yoba yugobuno pere pere moraiglkwa i, ye kamo duglo boraiglkwa. 11Ana ene we, u wakai en, edenen wain mere kide panaiglkwa. Mere kide panaiglkwa pre ene donkinen ede wain mina kane kogln, tau nenabuka i pre yubun dekratniwa. Te, wain nuglo i we, mere kide moran, ene tau kogl i pi kugugl gaglnen wain nuglo mina nigl edinatnga, i ama kuno erabuka. 12Wain nuglo mere kide morabuka pre ene nen, gumugln u gogl enabuka. Te, kau ame nuglo ama mere kide duko idre, nen, sign u kruo kaima enabiwa.
13Te, Sebulun we, ene gawanma mudi nigl bina kipai moraiglmiwa. Ki pai meglbi, ye dumono yoba sipno u panaiglkwa pre wakai yenabiwa. Te, ye makano Numa ta we, taun ta Saidon we dimara yenabuka.
14Te, Isakar we, ene gawanma donki ta yobuglo podo paugwa ba yoba bek ya ki donki moko bolamugl edigo, donki i yoko dane wagle ugl pai moglkwa mere yegl moraiglkwa. Yobuglno podo panabuka ba ye oglka eraiglmiwa. 15Oglka eraiglkwa ba okuo ye makano ya kipanaiglmara wakai kandre, dumo i moramnedi donki ta kogon erukwa mere yegl yoba pere niglno kogono ere tenaiglmiwa.
16Te, Dan we, ene gawanma Israel yoba kotno pre yubu sinaiglkwa. Te, ye Israel yoba suna i yugobuno swara ta moraiglkwa. 17Ye kudano ikne ye toki kide no sugwa mere yegl meglmedi kanaiglkwa. Toki kide ta konbauna bina moglsre, yoba ta hos au sidre ugwa igne ye hos kagle mina sugo, yoba hos au sugwa i ye moko wagle yage maginagle sugwa, ene gawanma ye kudano ikne yegl mere sinaiglkwa pre die di, Jekop yegl dugwa.
18Jekop ka yegl didre, ye ere mogl, Yawe God ka yegl di togwa, Yawe yo, ene na ere inatnga pre sugl moluwe di, yegl dugwa.
19Ye ka yegl didre, ye aglke kor wama di te, yegl dugwa, Ana Gat we, kunogl yoba ene gawanma moraiglmara u kuda bogl tenaiglmiwa. Kuda bogl tenaiglkwa ba ene gawanma ye sika sidre, kuda bogl te ikne edinaiglmiwa.
20Te, Aser we, ene gawanma makano wagle kaya mokna wakai kaima borabuka. King kaya mokna wakai kaima neimere yegl borabiwa.
21Te, Naptali we, ene dia are ta yene prumere wan moglsre, gagigle kuglkwa yoba wakai kaima kanigwa kuglmere mere yegl motniwa.
22Te, Josep we, ene ede mogo koglkwa mere yegl motniwa. Ede ta nigl ogo beimara bina ere yaiglko, yogagle ede u eglke pidre, togl erimara ede meda pidre, mogo mere koglkwa mere yegl motniwa. 23Te, kuda yoba tau deno kubro ene tedre, kibr kogl, ene sinamnedi erikwa. 24Yegl erikwa ba ene kibrnen ake gi didre, ogon nuglo dikre, teke pikitnga. Na Godna Yobuglo Podo Paugwa i, ene yobugln panabedi ene ake ple di togwa pre yegl etnga. God, ye sipsip sugl meglkwa yoba mere yegl Israel sugl moglsre, ye kugl bogl te moglkwa. 25Na Godna, God Yobuglo Podo Paugwa i, ye ene ake ple di tedre, ere wakai ere togwa. Ye ene kaya mokna ere yaglnara kamun sinabedi dedidre, nigl makan atne moglkwa ama makan ake tomunabedi dedidre, ene ebin gak kuraiglmedi dedugwa. 26God na kowana awanama ere wakai ere togwa ba ye na ka kaima ere wakai ere narukwa. Na siragl mere ye na ere wakai ere narabedi prika i, ere narukwa. Ana God na ere wakai ere narumere ene ama ere wakai ere tenabiwa. Ene agiglnma meglmara suna i, ene swara yagl kade motniwa.
27Te, Benjamin we, ene agl are podo, taragl are ere sugwa mere yegl motniwa. Ene tagna mogl kuda ikne si goglsre, eduer ye taraglno yoba tenagledi yubu siniwe di, Jekop ka yegl dugwa.
28Ana Jekop wama 12-pela i, ye gawama ama okuo kagie Israel mina atne yugobuno 12-pela meglkwa. Jekop siragl taragl okuo plau dinabuka ye wama di togwa i, ye wama swara swarade ka ta di tenabuka kuno erabere yegl di togwa.
Jekop goglko, ye i pi kobuglo mur yeigwa
29Ana Jekop ye wama swara swarade siragl taragl ye meglmara okuo plau dinabuka i di tedre, ye ama ere mogl, ye wama yegl di togwa, Na kuri kaima ta mogl, goraglka. Na goglbo, na i pi, na nina ya yagl awana kobuglo mur atne yeimara yeo! Kobuglo mur i, okna Hit yoba Efron makanmo wagle yogwa. 30Makan i, dumo Kenan suna, dumo kebra ta Makpela we dimara yogwa. Te, Makpela i, dumo Mamre we dimara ta magigl yogwa. Abraham okna Hit yoba Efron ikra mige tedre, dumo makan i, ye giglmo pene yenabedi topo sugwa. 31Kobuglo mur i, yoba Abraham ya ye ebie Sara yedre, Aisak ya ye ebie Rebeka ama yeigwa. Te, na kobuglo mur i wagle ebina Lea ama yeiga. 32Dumo makan i ya kobuglo mur i, okna Hit yoba makano yogwa ba Abraham topo sumiwe di, Jekop yegl dugwa.
33Jekop ye wama ka yegl di te kodidre, ye bogl mina ugl moko kra pai mogl, goglkwa.
Currently Selected:
Oknayene Ibo 49: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
