Ibru 2
2
Krais kamo kodumun, ibun inamga
1Ana God Wam ye mogl mitna ede, angelo mudu togwa pre nono ye kamo prumga i, ake gi di moramga. Ake gi di moglsre, ye kamo i ta kide kodo, ede eglke pi dinamnedi eramga paugwa.
2God okna ye lomo i, angeloma di togo, angelo i pi Moses di teigwa. God lomo i, gigledi paugo, yoba God lomo swara swarade si biglke dimere topo kide kuno ere te ikne edugwa. 3Prio. Okna yegl erukwa ba erme God nono ere yugwa ka taragl mudu egre atne edugwa pre mokono tomin, ibun ikramnedi prikramga. Yubun podo kaima inamga. God nono ere yugwa ka i, Yaglno Kade yene dra mina komono kana dugwa. Dugo, yoba tau prisre, ka kaima yegl yegl dumiwedi nono di noriko, prumga. 4Te, God yene wakai prumere ama kamo wakai yogwa i pre medraiglmedi kimagl ya diu kane kane ersre te, i ama gigledi panabedi Mudu Murubuglo mina ye yobama yobuglo ya nomane kane kane togwa. Yegl paugwa pre ye nono ere yugwa ka i, mokono tomun, ibun inamga.
Jisas swara nono ere yugwa yagle moglkwa
5Ana Krais okuo dumo makan kor ere yenabuka pre dumga i, God angelo tebo, sugl moraiglme ta dikrukwa. 6Prio. Yoba ta mem i pre bage swara ta yegl boglkwa,
God yo, no yoba munga i, ene siragl pre no pre i mitna ede motne?
No yoba yoko munga ba ene no suglno wakai motniwa.
7No ege sugunagle angelo meglmara mogl atne edinaiglmedi edinga
Ba no ama ake mitna edidre, kagno kade notniwa.
8Ene taragl kane kane ere yenga i,
No yoba mogl mitna edidre, bitno molo di notniwe#2.8 Giglage 8.4-6
di, yegl dugwa.
Ana God ye yoba taragl kane kane bitno moraiglmedi edugwa i, ye taragl swara ta kina yeikrukwa ba yoba taragl mudu kaima bitno moraiglmedi edugwa. Ye yegl mere edugwa ba nono erme kamga i, nono yoba taragl tau sugl munga ba taragl tau sugl moglkrumga.
9Erme nono yoba taragl mudu sugl moglkrumnedi kamga ba yoba swara ta ede okna pidre, kagie podo kide yumedi kamga i, Jisas swara yugo, kamga. Jisas u yoba pidre, ege sugunagle angelo meglmara mogl atne ede moglkwa. I siragl pre Jisas yoba mudu againo idre, goran, God yoba mudu ere wakai ere tenagledi prukwa. Ana Jisas giugl podo kaima prisre, goglkwa pre ye kagie podo kide togo, erme Jisas kagie kade i kodugwa.
10Ana God moglkwa i, ye taragl mudu ere yedre, ama mudu bitno moglkwa. Ye yegl mere moglsre, prukwa i, yoba mere kaima na gagrama meglbi, na ye auro i ede heven ibo ebo, wakai kaima moraiglmedi prukwa. Yegl pre ye Jisas giugl prisre, yoba ere inabedi dedugwa i, kuno erukwa. Jisas giugl prumara i mina ye yene u wakai kaima pidre, nono ere yugwa yagle moglkwa. 11Ana Jisas, nono ere i God yobama edugwa yagle yogo, nono God yobama erme munga yomgo, Neno swara keme moglkwa. Swara moglkwa pre Jisas ere mogl, Ene na agrama abarama meglme dinabuka i, ye agai ta goglkrukwa.
12Agai goglkrisre, ka yegl dugwa,
God yo, ene kagn siragl mere paugwa i, na agrama abarama di tedre,
na giglage mina ye makai sinaiglmara i, ene kagn kade tenaluwe#2.12 Giglage 22.22
dugwa.
13Te, ye ama yegl dugwa,
Na God kaima dumedi pre medigl moraluwe#2.13 Aisaia 8.17
dugwa.
Te, ye ama yegl dugwa,
God ye gagiglma yu na ogona mina edugo, na ye bogl akie muniwe#2.13 Aisaia 8.18
dugwa.
14-15Ana Jisas ye God gagiglma pre dugwa i, nono yoba ogono nagino padre, bormaino moglkwa yoba i pre dugwa. Nono yoba yegl mere munga pre Jisas ama u yoba ogwa i, yoba ogo nagie yugwa. Jisas u yoba ogwa i, Satan yobuglomo si dudu kodo, yoba Satan moglmara atne kane pai meglkwa i, i meda edenagledi pre u yoba ogwa. Yoba makandigle wan meglkwa igne i ye gogl dinamnedi kudugl podo geglkwa pre Satan moglmara atne kane pai meglkwa. Satan moglkwa i, ye geglkwa mabuno ake moglkwa ba Jisas ye i meda edenagledi goglkwa.
16 Ana nono kwande pre kodumga i, Jisas u ye angelo ake ple di tenagledi ukrukwa ba nono Abraham gawama munga i, ake ple di noragledi ugwa. 17Yegl pre ye u yoba pidre, agiglema munere kuno yegl morabuka paugwa. Ye u yoba ogwa i, nono mitno goglsre, tawa teigwa yoba bitno mere yegl mogl, God kogonmo kuno kaima eragledi pre u yoba ogwa. Ye u yoba omara i, yoba tadaglmeno gugl ede, topono tenagledi u yoba ogwa.
18Ana Jisas makandigle wan moglkwa igne, ye yubun mere yugo, Satan ama ye kina sinagledi erukwa. Yegl pre nono yoba yubun imga igne mo Satan nono kinano sugwa igne, Jisas nono ake ple di norabuka i, kuno erumedi pramga.
Currently Selected:
Ibru 2: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission