Jon 10
10
Jisas ye yagl ta sipsip sugl wakai moglkwa mere yegl mole dugwa
1 Jisas ka ta ama yegl dugwa, Na ene di pogl tenaglka i, yoba ta sipsip togl suna meglmara togl dra yomara ukre, togl bage ere ede suna ogwa i, i kunogl gogl yoba ogwa. 2Ba yoba ta togl dra yomara unabuka i, ye kaima sipsip sugl moglkwa yagl ogwa pre 3togl sugl moglkwa yagl ta morabuka i, togl dra yauro tenan, ye ede suna enabuka. Ye ede sipsip meglmara pidre, ye sipsipmo swara swarade kagno daran, ye nugu ebrie prisre, sika sibi, ye auro i ede togl meda enabuka. 4Ye togl meda edidre, ede okna ogo, ye sipsipmo nugu ebrie prisre, sika si ede enaiglkwa. 5Ba yoba pere ta u agle dinan, sipsip i, ye nugu ebrie prikrikwa pre kudugl gogl, moglmara teke ede pere pere enaiglmiwe dugwa. 6Jisas ka padum yegl dugwa ba yoba pre meglkwa i, ka ebriemo pre pogl sikrikwa.
7Yegl pre Jisas ka ebrie ikra di pogl tedre, yegl dugwa, Na ene ka kaima di teiga, sipsip togl dra mere yegl na moluwa. 8Yoba na ta ukrika igne okna wigwa i, mudu kunogl gogl yoba meglkwa ba sipsip i, ye kano prikrikwa. 9Na wiga i, na nana togl dra moglka. Yoba na wagle ede suna wibi, God ye ere inabuka. Ye ere inan, yoba i ye sipsip gun yei, u ikne ikne pi wan mogl, kugl wakai ne mogl pai erimere mere yegl, wakai moraiglkwa. 10Ana kunogl yoba we, ye kunogl nedre, si goglsre, ere kide keme eramnedi wigwa ba na we, na yoba kwiano kor enan, kor meglkwa mabuno ye meglmara kau kaima sinabuka pre wiga.
11Na sipsip sugl wakai moglkwa yagl ta moglka. Yagl ta sipsip sugl wakai morabuka i, ye ama sipsip ere inagledi gorabuka. 12-13Yoba ta sipsip nem moglkre, kogon yoba yoko ta morabuka i, mogl enabuka ba agl are unabuka igne, sipsip wakai moraiglmo mo moglkraiglkwa i, nomane sikrabuka. Ye yene we di prisre, kide kodo ede enabuka. I siragl pre ye sipsip sugl moglkwa yagle kaima ta moglkrukwa pre teke ede enabuka. Teke ede enan, agl are udre, sipsip ere si kike, pia si, pere pere edenabuka.
14Na ka kaima sipsip sugl wakai moglkwa yoba moluwa. Na sipsipna meglkwa i, na pre kan eriko, ye ama na pre kan erikwa. 15Nono ikne ikne pre kan erumnere mere yegl, na Nina na pre kan eruko, na ama ye pre kan erika. Te, na sipsip i ere inagledi goragliwe dugwa.
16Jisas aglke yegl dugwa, Na sipsipna tau ama meglkwa i, ene meglmara suna i ta moglkrikwa ba bage tau meglkwa. Na ye meglmara pi agle dibo, nuguna ebrie pre wibi, ene pra pra mudu togl swara moraiglkwa. Meglbi, na ene mudu sugl moraglka.
17Na gogl, adigl u kor enaglka pre goraglka i, na Nina wakai prisre, dem muduo narukwa. 18Yoba ta na si goraiglkwa ta moglkrikwa ba na nana primere goragledi prika. Na goraglka ya adigl u kor enaglka i, na moglmara nana mina yogwa. Na Nina, Yegl ero! dugwa pre nana mina yogwa. 19Ana Jisas ka yegl di kodugo, yoba ye ka dugwa pre meglkwa i, yene buno di u suo eigwa. 20Yoba mere digwa i, ye ka dugwa i, murubuglo kide suna moglko, dumiwa. Du eruma, kide kodio digwa. 21Ba tau digwa i, I ta manumiwa. Murubuglo kide morabuka yoba ka yegl ta dikraiglkwa. Te, murubuglo kide yoba gumuglno kin yogwa i, ere wakai erekraiglmiwe digwa.
Juda yoba tau kobuglo idre, Jisas si goramnedi erikwa
22Ana igne i bi erukwa ege yogo, Juda yoba egeno kade ta ugwa. Ege kade i, okna ibo tawa teigwa yugu i, God yugumo yomedi i nogugl edinamnedi pre meglkwa egemo yogo, yoba makai si meglkwa. 23Ege i, Jisas tawa teigwa yugu yomara togl suna udre, yugu dramugl teka ta Solomon verandamo we dimara i wan moglko, 24Juda yoba kade u ye moglmara mogl winabo didre, yegl di prikwa, No kanana sugl muniwa. Ene God Kere Yugwa Yagl motn, erme nogugl di noro! digwa.
25Ana yegl digo, Jisas di ikne ede, yegl dugwa, Na ene di te kodiga ba ene na pre mediglkrikwa. Te, na Nina kagie mina kogon kane kane erika i, ama i nogugl edugwa. 26Ba ene na sipsipna moglkrikwa pre na pre mediglkrikwa.
27Na sipsipna ira meglkwa i, na ye pre kan eriko, na nuguna ebrie prisre, na sika sigwa. 28-29Na sika sigo, ye aimadi kamin kor moraiglkwa i, teiga. Na teigo, ye idre, ta goglkraiglkwa. Te, na Nina sipsip ogona mina yogwa i, ye yobuglomo pai kawa togwa pre na ogona mina meglkwa i, yoba ta i eglke edekrisre, na Nina ogo mina yogwa i, ama i eglke edenaiglkwa ama kuno erekrukwa. 30Na Nina bogl swara kaima mugliwe di, Jisas yegl dugwa.
31Ana Jisas ka yegl dugo, Juda yoba kade wagle ye okna erimere yegl, aglke kor Jisas kobuglo si, si goramnedi kobuglo akigwa. 32Kobuglo akigo, Jisas ye di te, yegl dugwa, Na Nina di narumere, na kogon wakai kane kane ene ere teiga i, kogon swara ta kide prisre, na kobuglo sinamnedi erikwa i, di nario! dugwa.
33Ana Jisas yegl dugo, Juda yoba di ikne ede, yegl digwa, Ene kogon wakai ta etnga pre no ene kobuglo ta sikramga ba ene God kagie ere kide etnga pre no ene sinamnedi prumga. I siragl pre ene yoba keme motnga ba ene God moluwe diniwe digwa.
34Yegl digo, Jisas aglke kor yegl dugwa, Ene kowanoma God kamo swara ta togo, beglkwa i mina God yegl dugwa, Ene god meglmiwe#10.34 Giglage 82.6 dugwa. 35Ana God kamo aimadi panabuka i mina Ene god meglmiwe dugwa ta panan, 36siragl eruko, Na God Wam mole diga i, pre aglau erime? I aglau ta paikrukwa. Na Nina yene na i pere edidre, na ede makandigle enatnedi na dedugwa pre God kagie ere kide etniwe ta dikraiglme dugwa.
37Na Nina kogonmo ta erekrika panan, pra, ene na pre mediglkraiglkwa. 38Ba ye kogonmo erika panan, ka dimara pre kide prisre, na pre mediglkraiglkwa ba kimagl erika i, kandre, ka kaima pre medraiglkwa paugwa. Ene nomane yegl ibi, na Nina na moglmara suna moglko, na ama ye moglmara suna moglmedi kan pogl sinaiglmiwe di, Jisas yegl dugwa.
39Jisas yegl dugo, ye aglke kor ye si akenamnedi erikwa ba siragl mere ede meda ogwa i, kankrikwa.
40Ana Jisas aglke dumo i kide kodidre, ede nigl Jordan koglo ibo ogwa. Ye ede pi Jon okna yoba nigl bugl te moglmara pidre, dumo i pai moglkwa. 41Pai moglko, yoba tau mere ye moglmara udre, yegl digwa, Jon okna kimagl swara ta eruko, ta kankrumga ba ye yagl i pre ka mere dugwa i, mudu plau dumiwe digwa. 42Te, dumo i, yoba tau mere Jisas pre mediglkwa.
Currently Selected:
Jon 10: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
