Jon 12

Maria kugo nuglo toide Jisas kagle mina edugwa

(Matyu 26.6-13, Mak 14.3-9)

1Ana God Israel yoba oglo sugwa ege yenabuka 6-pela de pai moglko, Jisas ede dumo Betani ogwa. Betani i, Lasarus gogl pai moglko, Jisas ere i kor edugwa ikra ye yugomugl yogwa. 2Ana dumo i ogwa pre Lasarus abauglo suo bogl di gaglsre, kaya mokna podo erikwa. Eriko, Marta kaya mokna ere wakai ere si moglko, Lasaras ye yoba bogl ame di, ka denbi di, kaya mokna ne meglkwa. 3Ame di meglko, Maria ye kugo nuglo demene wakai erukwa ta mige podo boglkwa i, wan kilo ikne mere yegl ta yogwa yudre, Jisas kagle mina toide edidre, bre yugo mina ye kagle koko edugwa. Yegl eruko, demene wakai wai di, yugugl i si kau sugwa.

4Ana Maria yegl eruko, Judas Iskariot, ye Jisas duglo beglkwa yagl ta Jisas i pi kudamo ikne ogono mina yenabuka ikra ere mogl, 5Ene siragl eruko, kugo nuglo i pi topo boglkrime? Topo beglma, nono mige silva 300 mere imna, goduglme yoba tomgo we dugwa. 6Judas yegl dugwa i, ye nomanemo i ye goduglme yoba tenaiglkwa pre ta dikrukwa. Ye duglo beglkwa yoba mige gade igwa i, sugl moglsre, ama kunogl nedre, tebe atne edugwa yagle moglkwa pre ye ka yegl dugwa.

7Ana Judas ka yegl dugo, Jisas ere mogl, Ene ye kanige erio dugwa. Na maugl mina enaglka pre ye na ere kuno ere narukwa. 8Goduglme yoba ene meglmara bogl ege ege moraiglkwa ba na ene bogl ta akie ege ege moglkramniwe dugwa.

Tawa teigwa yoba bitno meglkwa i, ye Lasarus si goramnedi ka di keglkwa

9Ana yoba mere kide Jisas dumo Betani ume digo, yoba mudu oidi ede eigwa. Jisas igle moglmedi kanamnedi pidre, te, Jisas siragl mere Lasarus ere i kor edugwa i, i ama gumuglno mina kanamnedi ede eigwa. 10-11Ba tawa teigwa bitno yoba kandre, prikwa i, No ka dumga i, ye pre morakirimiwa. Pra pra Lasarus Jisas ere i kor edugwa i pi kandre, Jisas pre mediglkwa pre mogl, deno kubro, Lasarus ama si goramnedi ka di keglkwa.

Jisas king mere yegl mogl, ede Jerusalem suna ugwa

(Matyu 21.1-11, Mak 11.1-11, Luk 19.28-40)

12Ana tagna ta i, yoba mere kide ege kade pre Jerusalem meglkwa i, Jisas ede Jerusalem ume digo, ye prisre, 13ede pam yogagle buko di idre, Jisas unan, tegigl yenamnedi ede eigwa. Ye pi mogl, ka kade di, yegl digwa, God kagie kade tomniwa! Yagl ta Yagl Kade dedugo, ugwa i, God ye ere wakai ere tenabiwa.#12.13 Giglage 118.25-26 Ye nono Israel yoba kingno moglmiwe! di, yegl digwa.

14Ana Jisas ye donki kulu ta doko idre, donki moko bolamugl ame didre, ede ogwa. Ye yegl erumara i God kamo mina ka ta okna yegl beglkwa i, plau dugwa,

15Ene Saion yoba meglkwa i, kudugl goglkrio. Ene kingno moglkwa i, uma, kanio! Ye donki kulu ta moglkwa au sidre, ede umiwe#12.15 Sekaraia 9.9

di, yegl beglkwa. 16Komno kana Jisas duglo beglkwa yoba God kamo i ta plau dumedi prikrikwa. Prikrikwa ba okuo ime God ye Jisas kagie kade te kodugwa igne, ye pre ikne edidre, ege i, ka i ye pre beglkwa pamedi nomane igwa.

17Ana okna Lasarus goglko, Jisas ye agle di, ere i kor edugwa i, yoba mere kan meglko, erukwa pre yoba mudu meglmara i, di wai digwa. 18Yoba Jisas kimagl podo yegl erume di, di wai digwa pre yoba mere kide ye kanamnedi ede eigwa. 19Yegl pre Farisi yoba kandre, yegl digwa, Yoba uglo koglo koglo ye duglo bogl ede eigwa pre nono di inamga mere manugwa. Kodinamniwe di, yegl digwa.

Grik yagl tau ye Jisas kanamnedi prikwa

20Ana yoba tau mere ege kade yomedi prisre, God kagie kade tenamnedi ede Jerusalem eimara suna i, Grik yagl tau ama eigwa. 21Grik yagl i eigwa, ede Filip moglmara pi di prisre, Yagl kade yo, no Jisas kanamnedi umniwe digwa. Ana Filip i, ye dumo Betsaida, distrik Galili suna yogwa i, nem ta moglkwa. 22Yegl digo, Filip prisre, ede pi Andru moglmara pi dugo, ye Andru bogl akie ede Jisas moglmara pi di pribrika.

23Ye pi di pribriko, Jisas ye di ikne ede yegl dugwa, Na Yoba Wam moglka i, kagna kade inaglka ege i, ede magigl u kodumiwe dugwa. 24Na ene ka kaima di teiga, wit mogo koglko kanumnere mere yegl wit mogo ta yage makadigle sugwa i, goran, pra pare wi si, mogo mere kide korabuka. Ba yage si, goglkran, mogo ta koglkrisre, yene yoko yei pai morabuka. 25Kuno yegl mere yoba erme goraiglkwa nomane ta sikraiglkwa i, okuo wakai kaima mogl, ye aimadi kor moraiglkwa. Ba yoba makadigle wakai moramnedi pre mitna edenaiglkwa i, okuo wau boraiglmiwe dugwa.

26Yoba ta na niglna kogona eragledi prabuka i, ye na enaglmara duglo borabuka paugwa. I siragl pre na aglo mere moraglmara i, na niglna kogona yoba ama moraiglkwa paugwa. Te, yoba ta na niglna kogona erabuka i, na Nina ye kagie kade tenabiwe di, Jisas yegl dugwa.

Jisas dugwa i, Yoba na ake i mitna edinaiglkwa pamiwe dugwa

27Ana Jisas ka yegl di kodidre, ka ta ama yegl dugwa, Na dena muduna erme yubun dogwa ba na siragl eragle? Na Nina kamage ere, Ege kide i, na moglmara plau di dinabedi ero! dinaglo? Ta manugwa. Na ege kide i unabedi pre ede makadigle wiga. 28Nina yo, enene kagn ake mitna edo! di, Jisas yegl dugwa. Yegl dugwa igne, ka ta heven ibo ugwa i, yegl dugwa, I praiwa. Na kagna ake i mitna ediwa. Te, na okuo ama ake i mitna edinaluwe dugwa. 29Yegl dugo de, yoba mere kide magigl adigl meglkwa prikwa i, tau Kamun gur dume digo, tau Angelo ta ye ka ta di togwa pamiwe digwa.

30Ana yoba ka yegl digo, Jisas di ikne ede, yegl dugwa, Ka ta ugwa i, na pre ta ukrukwa ba ene pre medraiglkwa pre umiwe dugwa. 31God makandigle yoba ka tage tenabuka i, kwande ede magigl u kodugwa. U kodugo, te yagl kide bitno moglsre, dumo makan sugl moglkwa i, God ama ka tage tedre, si meda edenabuka i, ama magigl erumiwe dugwa. 32Yegl didre, ama yegl dugwa, Na makadigle egre dinatnedi na ake i mitna edibi, paibo, yoba mudu ede u na moglmara unaiglmiwe dugwa. 33Jisas ka yegl dugwa i, ye kuri ta mogl, ede prak mina siragl mere gorabere di poglkwa.

34Ana Jisas yegl dugo, yoba magigl meglkwa i, aglke kor yegl digwa, No God lomo mina kere prumga i, God Kere Yugwa Yagl aimadi kamun morabe dugwa paugwa. Ba ene dinga i, yoba ere mogl, Yoba Wam ake i mitna edidre, ede prak mina sinaiglme diniwa. Yegl eraiglkwa panan, ene Yoba Wam i, ira pre dine? di, yegl digwa. 35Yegl digo, Jisas ye di te, yegl dugwa, Abuglage ene meglmara sugwa i, kuri ta mogl, dudunabuka. Abuglage kuri ta si pai morabara wan meglbi, mim u ene i atne edekrabuka. Yoba mim erumara wan meglkwa i, eimara dumo i, kan pogl sikraiglkwa. 36Ene abuglage kuri ta sinabuka pai moglmara i, pre medilo! Abuglage i pre mediglbi, ene abuglage sumara gak moraiglmiwe di, Jisas yegl dugwa. Jisas ka yegl di kodidre, yoba i kide kodo, ye kan dinaiglmedi ede ogwa.

Juda yoba tau mere Jisas pre mediglkrikwa

37Ana Jisas yoba i gumuglno mina kimagl mere kaima i nogugl ede togwa ba ye pre medrakirikwa. 38Ye pre mediglkrimara i mina ka kep yagl Aisaia ka ta okna boglkwa i, pai yugwa. Ye boglkwa i, yegl boglkwa, Yagl Kade yo, no ene kanen yoba di tomga i, ira pre mediglme? Ene kogon yobuglo etnga i, yoba okna kankrimere ye kanigwa ba ye pre mediglkrime#12.38 Aisaia 53.1 dugwa. 39Yegl boglko, yoba i Jisas pre medraiglkwa i, kuno ta erekrukwa. Kuno yegl mere Aisaia ka ta ama boglmere yegl, ye meglmara plau dugwa. Ye ka i, yegl boglkwa, 40God ye gumuglno kin yenabedi ersre, nomano si gigle di togwa. Ye yegl erukwa i, ye gumuglno mina kankribi, nomano gigle dinan, nomano yake tekribi, na ye kideno ere wakai ere te dinagledi erumiwe di, Aisaia yegl boglkwa.#12.40 Aisaia 6.9-10 41Aisaia ka yegl boglkwa i, i siragl pre okna ibo ye Jisas abuglagemo podo sugo, kanugwa pre ka yegl boglkwa.

42Juda yoba mere yegl erikwa ba yoba tau mere Jisas pre mediglko, te Juda yoba kade tau ama ye pre mediglkwa. Yoba kade i pre mediglkwa ba Di nogugl edumun we, Farisi yoba no ka mabuno yugu di meda ede dinaiglmedi prisre, kudugl gogl, pre mediglkwa i, ake i atne edigwa. 43I siragl pre yoba ye wakai kanaiglkwa i, pre i mitna edidre, God ye wakai kanabuka i, pre i atne edigwa.

Yoba na kana prikrikwa i mina ka inaiglkwa

44Ana Jisas ka kade di, yegl dugwa, Yoba ta na pre meduglkwa i, ye na swara keme pre mediglkrukwa ba yoba ta na dedugwa i ama pre meduglkwa. 45Te, yoba ta na kanugwa i, na swara kankrukwa ba yoba ta na dedugwa i ama kanugwa. 46Na ede makadigle wiga i, abuglage mere yegl wiga. Yegl pre yoba ta na pre medrabuka i, mim mina ta pai moglkrabiwe dugwa.

47Yoba ta na kana prisre, duglo boglkrikwa i, na erme kot ere tekraglka. I siragl pre na makandigle wiga i, yoba kot ere tenagledi ukrika ba ye ere inagledi wiga. 48Ba okuo ibo ka tage inaiglkwa ege i unan, na mokna nare, kana mokono teigwa yobamo i, na kana kaima pamara i mina ye ka tage tenabuka. 49I siragl pre na ka diga i, na nana primere ta dikrika ba na Nina na dedugwa i, Ka yegl yegl do! di, na dedumere keme diga.

50Te, ka do dugwa i, yoba prisre, aimadi kamin kor moriaglmedi na pre kan erika. Mem kaima yegl paugwa pre na Nina do dumere i keme ene di teiwe di, Jisas yegl dugwa.

Currently Selected:

Jon 12: KB

Highlight

Compare

Copy