Jon 18

Judas ye Jisas kudamo ikne auro yugwa

(Matyu 26.47-56, Mak 14.43-50, Luk 22.47-53)

1Ana Jisas ka yegl di kodugo, ye duglo beglkwa yagl bogl ede taun meda pidre, nigl kebra ta Kidron we dimara ede koglo eigwa. Ede koglo pidre, dumo ta yoba ede oliv ere yaiglmara ede suna eigwa. 2Te, dumo i, Jisas ye duglo beglkwa yagl bogl okna ege mere makai simara pre Judas, Jisas i pi kudamo ikne ogono mina yenabuka yaglmo i, dumo i ama pre kan ersre, 3ye ere mogl, soldia, ya tawa teigwa yoba kibr nem meglkwa i, ye auro i ede dumo i ogwa. Kibr nem i, Farisi ya tawa teigwa bitno yoba Judas bogl pio digo, eigwa. Pidre, ye ken lam ya ken idre, kuda taragl idre, ede eigwa.

4Yegl eriko, Jisas siragl taragl ye moglmara plau dinabuka i pre kan ere kodidre, yoba wigwa i tegigl yedre, ye di pre, yegl dugwa, Ene ira dokime? dugwa. 5Yegl dugo, ye di ikne ede, yegl digwa, Jisas Nasaret nem moglkwa ikra, ye dokumniwe digwa. Te, yagl Judas kudamo ikne ogono mina yenabuka i, bogl akie adigl meglkwa. Yegl digo, Jisas ye di tedre, Na Moluwe dugwa. 6Ana Jisas ye Na Moluwe dugo, yoba wigwa i prikwa igne, ye mogl eglke edidre, yage makandigle sigwa.

7Ana yage makandigle sigo, Jisas aglke kor ye di pre, Ene ira dokime? dugwa. Yegl dugo, ye di ikne ede, Jisas Nasaret nem moglkwa ikra, ye dokumniwe digwa. 8Yegl digo, Jisas aglke kor yegl dugwa, Na yagl i moliwe di, ene di te kodiga. Yegl pre ene na dokigwa panan, yoba tau na bogl akie meglkwa i, kanige erio dugwa. 9Jisas ka yegl dugwa i, ye ka ta okna dugwa i pai inabedi pre dugwa. Ye ka ta okna dugwa i, yegl dugwa, Ene yoba tau natnga i, suglno moglko, swara ta wau boglkrume#18.9 Jon 17.12 dugwa.

10Ana Saimon Pita ye bainet ta paduglkwa i, i meda edidre, yagl ta kina wo kra paugwa i, si keglu sugwa. Yagl i kagie Malkus we digwa, ye tawa teigwa bitno yoba niglno kogono yoba ta moglkwa. 11Ana Pita yegl eruko, Jisas ye di te, yegl dugwa, Ene bainet aglke kor paus mina edo! Na Nina nigl ta kogl narukwa i, na ta nedre, ibun ikraglo? di, Jisas yegl dugwa.

Ye Jisas si kane si i pi Anas moglmara edigwa

12Ana soldia tau ye bitno yagl bogl yeigo, Juda yoba kibr nem tau dedigwa i yeigo, ye Jisas si akidre, ye si kane sigwa. 13Ye si kane sidre, komono kana ye i pi yagl ta Anas we digwa i moglmara edigwa. Anas ye Kaiafas bawamo moglkwa. Te, Kaiafas, ye bugla yugu igne i tawa teigwa yoba bitno moglkwa. 14Kaiafas i, ye okna Juda yoba di togwa i, Israel yoba mudu ta wau bogl dinaiglmedi, yoba swara ta ye pre goran, wakai panabiwe dugwa ikra moglkwa.

Pita Jisas pre kan erekriwe dugwa

(Matyu 26.69-70, Mak 14.66-68, Luk 22.55-57)

15Ana ye Jisas si kane si ede eigwa igne, Saimon Pita ya Jisas duglo boglkwa yagl ta bogl ye duglo bogl ede ebrika. Ana duglo boglkwa yagl ta akie ebrika ikra, tawa teigwa bitno yagl moglkwa i, ye guma dra kanugwa pre yagl i swara Jisas duglo bogl ede pi bitno yagl kipamara ede togl suna ogwa. 16Ye ede togl suna ogwa ba Pita togl dra meda adigl moglkwa. Ye meda adigl moglkwa pre Jisas duglo boglkwa yagl ta bitno yagl guma dra kanugwa i, ede meda u abai ta togl dra sugl moglkwa i, ka di tedre, Pita agre i ede togl suna ogwa. 17Ubriko, nigl kogon abai togl dra sugl moglkwa i, Pita di te, yegl dugwa, Ene yagl i duglo beglkwa yagl meglmara suna i, motnkana we dugwa. Yegl dugo, Pita di ikne ede, Na ta moglkriwe dugwa. 18Ana togl suna i, nigl kogon yoba ya kibr nem meglkwa i, ir erukwa pre ede ere gagl, pre meglkwa. Yegl ere meglmara Pita ede suna ogo, ye akie adigl mogl, ede pre meglkwa.

Juda yoba kade Jisas kot ere teigwa

(Matyu 26.59-66, Mak 14.55-64, Luk 22.66-71)

19 Ana igne i tawa teigwa yoba bitno moglkwa i, ye Jisas duglo beglkwa yoba siragl mere meglkwa i pre Jisas kira pogl prisre, Jisas ka siragl mere yoba beke togwa i pre ama kira pogl prukwa. 20Di pruko, Jisas di ikne ede, yegl dugwa, Na yoba mudu ka nogugl keme di tedre, ege ege yoba ka mabuno yugu kei yeimara ya tawa teigwa yugu yomara moglsre, yoba ka beke teiga. Na atne teke ta mogl, ka swara ta dikrika. 21Yegl pre siragl eruko, ene kira mere pogl natne? Na ka siragl mere diga i, yoba tau prikwa i di pro! Na ka siragl mere diga i, ye pre kan erimiwe dugwa.

22Ana Jisas yegl dugo, kibr nem swara ta magigl adigl moglkwa i, Jisas agl dage sidre, yegl dugwa, Tawa teigwa yoba bitno moglkwa i, ene ka yegl mere di ikne ede tenatnga kuno erumo? dugwa. 23Yegl dugo, Jisas di ikne ede, yegl dugwa, Na ka kide ta diga panan, ene na ka kide siragl mere diga i, di nogugl edo. Ba na ka wakai ta diga panan, ene siragl pre na sine? dugwa.

24Ana Jisas kane sigwa i, pai moglko, Anas ye Jisas i pi tawa teigwa yoba bitno yagl, Kaiafas i, moglmara edinaiglmedi dedugo, ede eigwa.

Pita aglke kor Jisas pre kan erekriwe dugwa

(Matyu 26.71-75, Mak 14.69-72, Luk 22.58-62)

25Ana Pita adigl moglsre, ede pre moglko, yoba tau ye yegl di prikwa, Ene ama yagl i duglo beglkwa yoba meglmara suna motnkana digwa. Yegl digo, Pita mane didre, Na ta moglkriwe dugwa. 26Ana tawa teigwa bitno moglkwa i, niglmo kogonmo yagl ta mogl, Pita kira pogl prukwa. Yagl i Pita yagl ta kina si bugl di edugwa i, bormai swara miurka ta moglkwa. Ye Pita yegl di prukwa, Ede oliv ere yaiglmara na ene Jisas bogl akie miurko, kanie di priwe dugwa. 27Yegl dugo, Pita aglke kor, Na ta manumiwe dugo, koduwagle kumugl swara ta tabre kaima wi sugwa.

Jisas agre i pi, Pailat moglmara eigwa

(Matyu 27.1-2, 27.11-14, Mak 15.1-5, Luk 23.1-5)

28Ana kamun tagna kide mogl, Juda yoba kade wagle Kaiafas kipamara kide kodidre, ede Rom gavana kipamara enamnedi Jisas auro ede edigwa. Ye Jisas i pi teigwa ba ye togl suna pikrikwa. Ye suna enaiglkwa i, ye Juda yoba moglkrikwa pre ye yene si deglbi yenaiglkwa. Si deglbi yebi, God nono kowano awano oglo sugwa pre kaya mokna nenamga i, ta nekramga pamedi prisre, togl meda meglkwa. 29Togl meda meglkwa pre Pailat ye ede meda u ye meglmara udre, yegl dugwa, Yagl i siragl aglau erukwa pre ye kot ere tenamnedi prime? dugwa. 30Yegl dugo, ye di ikne ede, yegl digwa, Ye mabuno kide ta erekruma, ye ta yu ene motnara ukrumgo we digwa.

31Ana Juda yoba kade wagle yegl digo, Pailat ye di te, yegl dugwa, Enene ye i pi ene lono mina kot ere te, praiglmere erio dugwa. Yegl dugo, ye di ikne ede, No yoba ta kot ere tedre, si goramga i, ene Rom yoba mane dimiwe digwa. 32Ana ye ka dimara i mina Jisas okna siragl mere goragle di paduglmere ikra pai yugwa.

33Ana Pailat aglke kor ye yugumo toglmo ede suna pidre, Jisas agle dugo, ugwa. Ugo, Pailat ye di pre yegl dugwa, Ene Juda yoba kingno motno? dugwa. 34Yegl dugo, Jisas di ikne ede, Dinga i, enene pitnere dino mo yoba na yegl moglme digo, dine? dugwa. 35Dugo, Pailat di ikne ede, yegl dugwa, Na Juda moglmedi pitno? Enene yugobunonen, Juda yoba ya tawa teigwa bitno yoba ene kot ere tenatnedi yu na moglmara edigwa. Ene siragl mabuno etne? dugwa.

36Dugo, Jisas di ikne ede, Na king moglsre, yoba suglno moglka i, makandigle igle ta yeikrukwa. Igle ta yoma, na niglna kogona yoba kudana erima, Juda yoba na si kane sikriko. Ba erme na king moglsre, sugl moraglka dumo i, makandigle i ta yeikrumiwe dugwa. 37Jisas yegl dugo, Pailat ye di pre, Ene dinga i, kaima king ta moglnga pre dino? dugwa. Yegl dugo, Jisas di ikne ede, Ene dinga i, kuno diniwa. Na mana kugl yogo, ede makandigle wiga i, ka mem kaima paugwa i, di nogugl ede tenagledi wiga. Yoba ta mabuno kaima duglo boramnedi erikwa i, mudu na kana primiwe dugwa. 38Dugo, Pailat ye di te, Ka kaima we dinga i, i siragl ne? dugwa.

Jisas si goglsre, yagl kide Barabas i meda ede noro digwa

(Matyu 27.15-26, Mak 15.6-15, Luk 23.13-25)

Ana Pailat ka yegl di kodidre, aglke ede meda pi Juda yoba meglmara pidre, ye yegl di togwa, Na yagl i aglau ta erekrumedi kaniga. 39Ba ene mabuno ta bogl, bogl erikwa i, God ene kowano awano oglo sugwa ege, ene kane yoba paigwa i, swarano ta i meda ede noro digo, te, te, erika. Yegl pre ene siragl we di prime? Na ene Juda yoba kingno i meda edibo, wakai praiglmo? dugwa. 40Pailat yegl dugo, Juda yoba aglke kor ka podo didre, Yagl i, i meda ede norokro! Yagl ta Barabas we digwa i, i meda ede noro! digwa. Yagl Barabas i, ye kunogl gogl yoba ta moglkwa.

Currently Selected:

Jon 18: KB

Highlight

Compare

Copy