Jon 20

Jisas adigl u kor ogwa

(Matyu 28.1-8, Mak 16.1-8, Luk 24.1-12)

1Ana Sande kamun tage kuno erekruko, Maria dumo Makdala mam ikra, ede kobuglo mur pidre, kanugwa i, kobuglo podo maugl dra si kegl digwa i, i eglke ede kodigo, kanugwa. 2Kandre, muku di ede pi Saimon Pita ya Jisas duglo boglkwa yagl ta Jisas wakai kanugwa ikra, di te, yegl dugwa, Yoba tau ede kobuglo mur udre, Yaglno Kade ogo nagie i eglke edidre, aglo mere yeigwa i, na ta kankriwe dugwa.

3Ana Maria ka yegl dugo, Pita ya Jisas duglo boglkwa yagl ta moglkwa i, akie kobuglo mur enabugledi 4muku dibrika ba Jisas duglo boglkwa yagl ta moglkwa i, ye tabre muku dugwa pre ye Pita kide kodo, ede okna pi kobuglo mur yomara plau dugwa. 5Ye plau didre, magi di, kan atne edugwa ba ede yugugl pikrukwa. Ye kan atne edidre, kanugwa i, ye lap kruo mina Jisas ogo nagie werikwa lap i yogo, kanugwa. 6Kanugo, Saimon Pita ye mokomugl udre, ede kobuglo mur yugugl pi kanugwa lap kruo ikra yogo, kanugwa. 7Ye lap kruo yogo, kandre, lap ta Jisas bre mina werikwa i ama kuri ta eglke iro yogo, kanugwa. Lap i, yoba ta ake perukwa mere yegl kanugwa. 8Ana Pita yegl kanugo, Jisas duglo boglkwa yagl ta ede okna ugwa i, ama ede yugugl pi kandre, Jisas kaima adigl u kor omedi pre meduglkwa. 9Igne i, God kamo bage ta Jisas adigl u kor enabe dugwa i, ye prikrikwa. 10Ana Jisas duglo biurka yagl suo i, ye kobuglo mur kan kodidre, aglke ede ikne pi yugugl ta miurara ebrika.

Maria, dumo Makdala mam ikra Jisas kanugwa

(Matyu 28.9-10, Mak 16.9-11)

11Ana Maria ikra, ye kobuglo mur meda adigl mogl, kai ere moglkwa. Ye kai ere mogl, magi didre, kan yugugl ede, 12kanugwa i, angelo suo kugugl gagl kruo edidre, ame di miurko, kanugwa. Angelo ta Jisas bre yeimara ame di moglko, ta kagle yeimara ame di moglkwa. 13Angelo suo i Maria di pre, Abu yo, siragl eruko kai etne? dibrika. Yegl dibriko, Maria di ikne ede, Yoba na Yaglna Kade ogo nagie i pi aglo mere yeigwa i, na ta kankriwe dugwa. 14Maria ka yegl didre, kan ake te, Jisas meda adigl moglkwa kanugwa. Ba ye Jisas moglmedi kankrukwa.

15Ana Jisas Maria di pre, yegl dugwa, Abu yo, ene siragl pre kai etne? Ene ira dokine? dugwa. Ana Maria prukwa i, ye gaden sugl moglkwa yagl ta moglmedi prisre, ye di te, yegl dugwa, Yagl kade yo, ene ye ogo nagie i pi bage ta edinga panan, ene dumo i di natn, na pi ogo nagie inaluwe dugwa. 16Yegl dugo, Jisas ye kagie dagl, Maria we dugwa. Yegl dugo, Maria kan ake tedre, ka Hibru mina Rabonai! we dugwa. Ka Rabonai i, mem paugwa i, Neno Yagle. 17Ana Maria yegl dugo, Jisas ye di te, yegl dugwa, Na kugrokro. Na ede Nina moglmara ibo enaglka i, pai moglkwa. Ba ene ede pi na agrama wagle Jisas yegl dumiwe di to, Na ede pi na Nina ya ene Neno moglmara ede eiga. Te, ye na Godna moglsre, ene Godno ama moglmiwe di, na yegl dumiwe do! dugwa. 18Jisas yegl dugo, Maria dumo Makdala mam ede pi Jisas duglo beglkwa yagl yegl di togwa, Na Yagl Kade kanigo, ye ka yegl yegl di narumiwe dugwa.

Jisas duglo beglkwa yagl ye Jisas kanigwa

(Matyu 28.16-20, Mak 16.14-18, Luk 24.36-49)

19Ana Sande min paugo, Jisas duglo beglkwa yagl i, Juda yoba kade kuduglno goglsre, dua lok sidre, yugugl meglkwa. Yugugl meglko, Jisas u ye meglmara suna adigl moglsre, yegl dugwa, Ene deno muduno wida dinabiwe dugwa. 20Jisas yegl didre, ye ogo ya dagigle kanaiglmedi obuno di togwa. Obuno di togo, ye duglo beglkwa yagl i, Yagl Kade kanimara i pre gun yeigwa.

21Jisas ye aglke kor yegl di togwa, Ene deno muduno wida di yenabuka. Na Nina na dedumere yegl, na ene ama dediwe dugwa. 22Jisas yegl didre, dra mur pu di ye meglmara edidre, Ene Mudu Murubuglo io dugwa. 23Yegl didre, ama yegl dugwa, Ene yoba ta tadaglmeno kide kodinaiglkwa i, tadaglmeno kaima dudunabuka. Te, ene yoba ta tadaglmeno kide kodokraiglkwa i, ye tadaglmeno kaima pai morabiwe dugwa.

Tomas ye Jisas kanugwa

24Ana Jisas duglo beglkwa yagl 12-pela swarano ta Tomas, kagie ta Gak Pikagl we digwa i, Jisas okna ye meglmara plau dugwa igne, moglkrukwa. 25Yegl pre Jisas duglo beglkwa yagl ye di tedre, No Yagl Kade kanumniwe digwa. Digwa ba Tomas ye yegl di togwa, Nana gumuglna mina ye ogo bro pamara kandre, ake prisre, ya dagigle mina bro pamara i, ama ake pribo keme, ye adigl u kor omedi pre medraglka. Ta manan, na ta pre mediglkraluwe dugwa.

26Ana ege 8-pela de ede ogo, Jisas duglo beglkwa yagl aglke kor yugugl meglko, Tomas ye meglmara bogl akie meglkwa. Ye yugugl moglsre, dua lok sigwa ba Jisas u ye meglmara suna adigl moglsre, yegl dugwa, Ene deno muduno wida di yenabiwe dugwa. 27Jisas ye yegl didre, Tomas yegl di togwa, Ene u na ogona ake prisre, kano. Te, ene ogon yu dagra ama ake pro. Ene pre mediglkre, motnga i kide kodidre, na pre mediglo dugwa. 28Dugo, Tomas di ikne ede, yegl dugwa, Na Yaglna Kade ya Godna motniwe dugwa. 29Dugo, Jisas ka yegl dugwa, Ene na kandre keme pre mediglnga ba yoba ta na kankre, pre medraiglkwa i, God ye ere wakai kaima ere tenabiwe dugwa.

Jon ye buk i siragl pre boglkwa

30Ana Jisas ye duglo beglkwa yagl gumuglno mina kimagl tau mere erukwa i, na mudu pepa magigl i mina ta boglkrika. 31Na ye kimagl mudu erukwa i ta boglkrika ba tau boglka i, ene prisre, Jisas ye God Kere Yugwa Yagl moglsre, God Wam moglmedi pre medraiglkwa pre boglka. Te, ene pre mediglbi, ye kagie mina aimadi kamun kor moraiglkwa pre boglka.

Currently Selected:

Jon 20: KB

Highlight

Compare

Copy