Jon 5

Nigl nubun Betesda bina Jisas yagl ta kide sugwa ere wakai erukwa

1Okuo, Juda yoba kaya mokna podo ta nenaiglkwa ege ta yogo, Jisas ege i ede Jerusalem ogwa. 2Dumo Jerusalem i, kobuglo togl ere winabo dimara, togl dra ta yogwa, kagie Sipsip Togl Dra we digwa. Togl dra yomara magigl i, nigl nubun ta waiglkwa moglkwa. Nigl nubun i, ka Hibru mina kagie Betesda we digo, nigl nubun bina yugu teka 5-pela si winabo digo, yeigwa. 3-4Ana yugu teka si yeimara i, yoba kide sugwa ya gumuglno kin yogwa mo ogono kaglno kide erukwa mo mawa sugwa i, mere kide yugugl i pai meglkwa.

5Ana nigl nubun Betesda moglmara i, yagl ta bugla yugu 38-pela kide sugwa igle pai moglkwa. 6Pai moglko, Jisas wan u kanugwa. Kandre, yagl i kamun kuade kide sumedi pre kan ersre, ye di pre, yegl dugwa, Kidenen aragan erabedi pitno? dugwa.

7Di pruko, yagl kide sugwa i di ikne ede, yegl dugwa, Yagl Kade yo, na kidena aragan erabuka ba na kabaglena ta moglsre, na auro i pi nigle edenabuka i ta moglkrukwa pre nigl magigl i si tobuno yake make togwa igine, na ede nigl atne enagledi eriba yoba pere ege ege ede okna pidre, ede nigl atne eimiwe dugwa. 8Yegl dugo, Jisas ye di tedre, Ene adigl, kuguglnen ake idre, konbauna ede po! dugwa. 9Dugo, yagl i oglade aragan eruko, ye kugugl mina pai moglkwa ikra ake idre, adigl ede ogwa.

Ana ege i wakan kade ege yogwa 10pre Juda yoba kade yagl i kandre, di te, Erme wakan kade ege yogwa. Ene kuguglnen ake konbauna wanga i, lo si biglke diniwe digwa. 11Yegl digwa ba yagl i di ikne ede, yegl dugwa, Na kide na sugo, yagl ta na ere wakai ere narukwa i, ye na di nare, Kuguglnen ake idre, konbauna ede po dugo, na ye dumere keme erie dugwa. 12Dugo, Juda yoba kade i ye di pre, Ira ene yegl di tome? digwa. 13Ye yegl di prikwa ba yagl i ira ye ere wakai ere togwa i pre kan erekrukwa. I siragl pre Jisas ye ere wakai ere togwa igne, yoba mere kide magigl magigl meglko, Jisas ye ere wakai ere tedre, tabre kana ye kide kodo, yoba mere meglmara ede suna pi ede ogwa.

14Ana okuo yagl kide sugwa i ye tawa teigwa yugu togl suna moglko, Jisas ye kandre, ye moglmara pi, ye yegl di togwa, Ene pro! Kide ene okna sugwa i, na ere wakai ere teigo, ene aragan erukwa. Ba ene tadaglme ere motnga i kide kodo. Ene ere pai motn, kide ene okna sugwa i taragl kebra pamedi pratnga. Ba ene motnara yubun ta okuo plau dinabuka i, podo kaima panabiwe di, Jisas yegl dugwa. 15Yegl dugo, yagl i ere mogl, yagl ta na ere wakai ere narukwa i, Jisas moglkwa pamiwedi prisre, ye ede pi Juda yoba kade ikra meglmara di pogl togwa.

16Ana Jisas yagl kide sugwa ere wakai ere togwa i, wakan kade ege erukwa pre Juda yoba kade meglkwa i, kide prisre, Jisas kenaglmo si, ye di kide yei meglkwa. 17Di kide yei meglko, Jisas prisre, ye meglmara u ye yegl di togwa, Na Nina moglkwa i, ye kogon ege ege ersre, ede u erme pra, kogon ere moglkwa. Te, na moglka i, ama ege ege kogon ere moluwe di, Jisas yegl dugwa. 18Yegl dugwa pre Juda yoba kade ye kide kaima pre, Jisas si goramnedi prikwa. I siragl pre ye prikwa i, ye wakan kade ege yagl ta ere wakai ere togwa i, ye lo mane dumara kogon erumedi prisre, lo si biglke dumedi prikwa. Te, Jisas ye God kagie daglsre, Na Nina we dugwa i, ye God bogl kuno kaima muluwe dugwa pre Juda yoba kade ama kide pre, ye si goramnedi prikwa.

Jisas kagie kade paugwa

19Ana Jisas aglke kor yegl dugwa, Na ene ka kaima di teiga, na God Wam moglka i, na nana primere kogon eribo, i kuno ta erekrabuka. Na Nina kogon siragl mere erukwa i, na kandre, ye erumere keme erika. 20I siragl pre na Nina na dem muduo narsre, kogon erumere mudu obuno di narukwa. Te, okuo Na Nina ere mogl, ene nagino koraiglmedi na kogon podo tau eratnedi obuno di naran, na eraluwe dugwa.

21Jisas yegl didre, ama yegl dugwa, Na Nina ye yoba geglkwa i, ere i kor edumere yegl, na ye Wam moglka i, nana primere yoba kor moraiglkwa i, teiga. 22Te, Na Nina moglkwa i, ye yoba kotno prisre, pre yubu si, yegl ta erekrukwa. I siragl pre na ye Wam moglka i, kogon yegl mere nare kodugwa pre nana yoba mudu kotno prisre, pre yubu sinaglka. 23Na Nina kogon yegl mere narukwa i, yoba ye kagie kade teimere yegl, na ama kagna kade naraiglmedi pre kogon yegl narukwa. Yoba ta na kagna kade narekran, ye God na dedugwa i ama kagie kade tekrumiwe di, Jisas yegl dugwa.

24Jisas ka yegl didre, ama yegl dugwa, Na ene ka kaima di teiga, Yoba ta na kana prisre, God na dedugwa i kaima dumedi pre meduglkwa i, ye aimadi kamin kor morabuka i, i kodugwa. Ye geglkwa yugobunomo kide kodidre, ede pi kor meglkwa yugobunomo i mina pi kodugwa. Te, God ye okuo yoba ka tage tenabuka i, ye yoba i ta ka tage tekrabiwe dugwa.

25Ana Jisas ka yegl di kodidre, ama yegl dugwa, Na ene ka kaima di teiga, Ege okuo ta unan, Na God Wam moglka i, ka ta dibo, yoba geglkwa i prisre, adigl u kor enaiglkwa. Te, erme pra, yoba geglkwa tau ama na kana prisre, adigl u kor pi kodigwa. 26I siragl pre Na Nina ye kor meglkwa mabuno moglmere yegl, ye na kor meglkwa mabuno nare kodugwa pre yoba kor aimadi moraiglkwa mabuno i, na moglka.

27Jisas yegl didre, ama yegl dugwa, Na Yoba Wam moglka i pre God na yoba mudu kotno pratnedi kagna kade nare kodugwa. 28-29Na erme ka diga i, ene prisre, nagino koglkrio! I siragl pre ege okuo ta unan, na Yoba Wam moglka i ka ta dibo, yoba geglkwa i mudu prisre, adigl u kor enaiglkwa. Ye adigl u kor enaiglkwa i, yoba wakai ta erikwa i, aimadi kamin kor meglbi, kide ta erikwa i ka tage inaiglmiwe di, Jisas yegl dugwa.

Jisas ira moglkwa i, nogugl paugwa

30Ana Jisas ka yegl di kodidre, ka ta ama yegl dugwa, Na nana primere kogon ta eraglka i, kuno ta erekrukwa. God prumere i keme erika. Te, na taragl kane kane pre yubu siga i, God na di narumere keme pre yubu siga. Na nana primere kogon ta erekrika ba God na dedugwa i keme prumere erika pre na taragl kane kane kuno keme pre yubu siwe dugwa.

31Ana na ira moglka i, nana swara keme ene di pogl tebo, ene na kibi dumedi praiglkwa. 32Yegl praiglkwa ba na nana swara keme ene di pogl tekrika. Yoba ta ama na ira moglka i, ene di pogl te moglkwa.#5.32 Jisas ye yoba swara pre dugwa i, God Nem pre dugwa paugwa. Te, na prika i, ye na pre dugwa i, ka kaima keme dumiwe di, Jisas yegl dugwa.

33Ana Jisas ka yegl didre, ama yegl dugwa, Na ira moglka i, yagl Jon ama ene di pogl togwa. Ene yoba tau ye Jon kira pogl praiglmedi dedigo, ye pi, kira peglko, Jon na pre ka kaima di ikne edugwa igne i pre diga. 34Yoba ka siragl mere na pre digwa i na ta pre yubun dekrika ba na erme Jon ka yegl dume diga i, God ene ere inabedi prisre, ene praiglmedi ene yegl di teiga. 35Jon moglkwa i, ye ken abuglage mere yegl sugo, ene ege sugunagle ye kamo prisre, gun yeigwa ba okuo ene ye kamo kide kodimiwe di, yegl dugwa.

36Jon ye na pre dugwa i, kaima dugwa ba taragl swara ta ye dugwa i, win si togwa. Na diga i, na kogon siragl mere erika i pre diga. Na Nina yene kogon tau na ere kodinatnedi naruko, na ere moglka pre na kogon ere wiga i ene kandre, God na dedugo, umedi kanaiglkwa i, nogugl paugwa. 37Te, na ira moglka i, Na Nina na dedugwa i, ye ama ene di pogl togwa. Ene di pogl togwa ba ene ye ka dugwa prikre, ye siragl mere moglkwa i kankre, erimiwe dugwa.

38Jisas yegl didre, ama yegl dugwa, Te, God kamo ene deno muduno mina paikrukwa i, nogugl paugwa. I siragl pre ye na dedugo, wiga ba ene na ta pre mediglkrikwa. 39Ene God kamo pre pogl sinamnedi kere moglsre, kerimara i mina ene wakai munedi prisre, aimadi kamin kor moraiglkwa i, ene i kodumnedi prikwa ba God kamo i, na ira moglka i, i nogugl edugwa. 40Yegl pre ene God kamo kersre, na moglmara u aimadi kamin kor moraiglkwa i, ibi, kuno erukwa ba ene na moglmara unaiglkwa i, enene mane dimiwe dugwa.

41Jisas ka yegl di kodidre, ama yegl dugwa, Yoba ta kagna kade naraiglkwa mo narekraiglkwa mo i, na pre yubun dekrika. 42-44Ba ene siragl mere meglkwa i, na kan pogl siga. Ene deno muduno God tekre, yoba kagno kade noraiglmedi prikwa. Ene God deno muduno tekrikwa i, nogugl paugwa. I siragl pre na Nina kagie mina wiga ba ene na di ikrikwa. Ene na di ikrikwa ba yoba ta yene kagie mina unan, ene yoba i di inaiglkwa. Te, ene yoba kagno kade noraiglmedi prisre, God swara kaima moglkwa i, no wakai erume dinabuka mo dikrabuka i, ene pre yubun dekrikwa. Ene yegl mere meglkwa pre ene na pre medraiglkwa i, kuno ta erekrabiwe di, Jisas yegl dugwa.

45Jisas yegl didre, ka swara ta ama yegl dugwa, Na Nina gumuglo mina adigl moglsre, ene kot ere tekraglka. Ene na yegl erabedi prikrio. I siragl pre yoba swara ta God gumuglo adigl moglsre, ene kot ere tenabuka i, Moses yegl erabuka. Moses ka bogl atne edugwa i, ene duglo boglsre, aimadi kamun moramnedi prikwa ba i ta kuno erekrukwa. 46Moses ye na pre dugwa pre ene ye kamo pre mediglma, ene na ama pre mediglko. 47Ba ene Moses ka boglkwa i ta pre mediglkrikwa. Yegl pre ene na kana pre medraiglkwa i ama kuno ta erekrumiwe di, Jisas yegl dugwa.

Currently Selected:

Jon 5: KB

Highlight

Compare

Copy