Luk 16
16
Kogon yagl ta yaglmo kade migemo kunogl nogwa ka ebrie
1Ana Jisas ye duglo beglkwa yagl ka ebrie ta di togwa, Yagl ta mige podo kan nogwa ta moglko, ye nigl kogonmo yagl swara ta ye taraglmo mudu sugl moglkwa. Ana ege swara ta yoba u, Ene nigl kogonen yagl i, ene taraglnen kunogl ne moglmiwe di, nem yagl yegl di teigwa. 2Yegl digo, yagl i prisre, ye kogonmo yagl i agle dugo, ugo, yegl di togwa, Ene na taraglna kunogl ne motne digo, prika pre ene si meda edinariwa. Yegl pre taragl mudu sugl motnere siragl mere yogwa i, di naratnga pre yuo dugwa.
3Ana yagl i yegl dugo, ye niglmo kogonmo yagl i ede meda pidre, yegl prukwa, Aya, na siragl eragledi prukwa. Bitna yagl i, na si meda edenan, Na savol akidre, yoba kogono ere tedre, mige inaglka i, yobra ta paikruko, te, na ogona kugl, mige pre yana di moraglka i, ama agai goliwa. 4Goglka ba erme na siragl mere eribo, na bitna yagl na si meda edenabuka igne yoba okuo na i yugugl edidre, suglna moraiglkwa i, na nomane ta iga. 5Nigl kogon yagl i nomane yegl idre, ye yaglmo kade yoba tau dina ere togwa yobamo i, mudu agle dugo, wigwa. Wigo, ye swara ta yegl di prukwa, Ene dinanen siramna pame? dugwa. 6Yegl dugo, yagl ta dina erukwa i, yegl dugwa, na oliv nuglo dram 100 dina erika, pai moglmiwe dugwa. Yegl dugo, nigl kogon yagl i yegl dugwa, Ene dinanen pepa mina bogl atne edigwa i, idre, tabre magigl ame di mogl, dram 50-pela keme pai moglmedi boglo dugwa. 7Ye yegl didre, yagl ta ama di pre, Ene dinanen siramna pame? dugwa. Yegl dugo, yagl i di ikne ede, Wit 100 bek dina erika pai moglmiwe dugwa. Yegl dugo, nigl kogon yagl i, ye yegl di togwa, Ene dinanen pepa mina bogl atne edigwa i idre, bek 80-pela keme pai moglmedi boglo dugwa.
8Ana okuo, mige podo kan nogwa yagl i, ye kogonmo yagl yegl mere erumiwe digo, prukwa igne, ye kogonmo yagl mabunomo kide paugwa ba nomanemo olto pamiwe dugwa. Jisas yegl didre, ama yegl dugwa, Makadigle yoba we, erme wakai moramnedi konbauna mere pre kan ere, yoba abuglage mina meglkwa i, egre atne edimiwe di, Jisas yegl dugwa.
9Ana Jisas yegl didre, Na ene yegl di teiwe dugwa, Ene mige moninen yoba mere ake ple di ten, okuo yoba i ene kabeglenen mere yegl moglsre, kogl kare di idre, ene yugu ta aimadi kipanatnara auro i suna edinaiglmiwe di, Jisas yegl dugwa.
10Yoba ta taragl kebra ta sugl wakai moran, ye taragl podo ama sugl wakai morabuka. Ba yoba ta taragl kebra ta sugl wakai moglkran, ye ama taragl podo ta sugl wakai moglkrabuka. 11Yegl pre ene mige moni erme kan nenga i mina wakai erekitn, heven ibo taragl ta yenabuka i, God ene ogon mina yekrabuka. 12Te, ene yoba pere kogonmo wakai ere tekitn, God taragl tau enene pre yenabedi tekrabuka.
13Nigl kogon yoba ta yoba suo kogono ere tenabuka, kuno ta erekrabuka. Ye yaglmo kade ta wakai kandre, ta wakai kankrabuka. Te, ye yagl swara ta bogl si dakagl miur, ta moko tenabuka. Kuno yegl mere ene God kogonmo ersre, mige moni ama pre i mitna edinamnedi eribi, kuno ta erekrabuka.
14Ana Farisi yoba Jisas mige moni pre ka dugwa i, prisre, gaugl podo erikwa. Ye mige moni wakai kanigwa pre gaugl erikwa. 15Gauglmo eriko, Jisas ye yegl di togwa, Ene meglkwa i, yoba gumuglno mina no yoba du muniwedi erikwa ba ene deno muduno mina siragl mere paugwa i, God pre kan erukwa. Yoba taragl tau wakai yomedi pre, pre i mitna edigwa i, God kide kaima yomedi kanugwa.
Jisas ye God lomo ya God yoba kingno morabuka pre dugwa
16God lomo ya ye kamo kep yoba ka okna beglkwa i, kep ere di wigo, ene ama pre ede wigwa. Ba God yoba kingno mogl, suglno morabuka ka i, na Jon bogl dubuglko, yoba mere kide yobuglo ere, God ye kingno morabara ede suna enamnedi erimiwa.
17Dumo makan ya kamun mitna ibo dudibr, kuno erabuka ba God lomo bage swara kaima ta dudukrabiwe dugwa.
Jisas yagl abu si bugl dinaiglkwa pre dugwa
(Matyu 5.31-32, 19.9, Mak 10.11-12)
18Yagl ta ye ebie sedidre, abu kor ta yunan, ye abu i kunogl nogwa. Te, yagl ta ye ebie sedinan, yagl pere ta ere mogl, ye abu sedugwa i inan, ye ama abu i kunogl nomiwe dugwa.
Yagl ta mige mere kan nogwa ya yagl ta goduglme moglkwa ka ebrie
19Ana Jisas ka ta yegl dugwa, Mige moni mere kan nogwa yagl ta okna moglme dugwa. Ye mige moni mere kan nedre, kugugl gagl gogl ya kruo wakai kaima ersre, kaya mokna wakai kaima keme nei, gun yei moglkwa. 20Ye yegl ere moglko, yagl goduglme ta ama moglkwa, kagie Lasarus we digwa. Yoba ege ege yagl Lasarus i boglo ere i pi ye ogo kugl, mige ki yana dinabedi mige moni mere kan nogwa yagl ikra kipamara togl pgla meda kra edigo, pai moglkwa. Lasarus ogo nagie mina num mere kide dogwa. 21Ana Lasarus togl pgla meda kra pai moglsre, kidan gogl, yagl mige mere kan nogwa i kaya mokna nogwa tau yage maginagle sugwa i nenagledi prukwa. Te, ye ogo nagie num domara we, agl ege ege u bare neime dugwa.
22 Ana okuo yagl goduglme moglkwa ikra goglko, angelo tau u, ye boglo ere i pi Abraham moglmara edigwa. Te, mige mere kan nogwa yagl ikra ye ama goglko, yoba ye maugl sigwa. 23Ye maugl sigo, ye ede dumo kidile pi giugl podo prisre, kan eglke iro ede, Abraham ya Lasarus akie miurko, kanugwa. 24Ye kandre, agle di, yegl dugwa, Nina Abraham yo, ene na mitna goglo! dugwa. Na doga domara mogl, giugl podo kide prika. Ene Lasarus di ten, ye ogo mogo nigl kor mina edidre, yu na drabna mina si banan, kuri ta bi yenabiwe di, yegl agle dume dugwa.
25Yagl i yegl dugwa ba Abraham di ikne ede te, yegl dugwa, Wana yo, ene pro! Ene kor mogl, taragl wakai kane kane inga igne, Lasarus taragl kide keme yugwa. Ba erme we, ye dem muduo aragan eruko, wakai moglko, ene giugl podo pitnga. 26Te, Lasarus ene motnara unabuka i, kuno erekrukwa. No muglara ya ene motnara suna i, God bidai podo sugwa, paugwa. Ye bidai sugwa i, yoba no muglara yegl mogl, ene motnara enamnedi pribi, ye ta pikraiglkwa pre, ya te, yoba ene motnara meglkwa i no muglara ta ukraiglkwa pre bidai podo si paduglme di, Abraham yegl dume dugwa.
27Abraham ka yegl dugo, yagl i aglke kor dugwa, Nina yo, yegl panan, na ene yegl di praglka, ene Lasarus dedin, ye na nina agrama meglmara enabuka. 28Na agrama 5-pela meglkwa pre diga. Ye na agrama meglmara pi, ka giglede di tenan, na agrama prisre, dumo kidile na moglmara i ta ukraiglmiwe di, yegl dugwa. 29Ye yegl dugo, Abraham aglke kor dugwa, Moses ka tau bogl atne edugwa i ya ka kep yoba pere pere ka bogl atne edigwa i, ene agiglnma kersre, ka i praiglkwa pamiwe di, yegl dugwa. 30Abraham yegl dugwa ba yagl mige mere kan nogwa i di ikne ede, yegl dugwa, I ta kuno erekrabuka. Ba yoba goglkwa ta ede ikne pi ye meglmara pidre, ye ka di tenan, ye nomano yake tenaiglmiwe dugwa. 31Yegl dugwa ba Abraham aglke kor dugwa, Ene agiglnma Moses kamo ya ka kep yoba pere pere kano i prikribi, yoba goglkwa ta ede ikne pi ye meglmara pidre, ka di tenan, ye pre mediglkraiglmiwe di, Abraham yegl dumiwe di, Jisas yegl dugwa.
Currently Selected:
Luk 16: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
