Luk 21

Abu werai ta mige gogl suo God togwa

(Mak 12.41-44)

1 Ana Jisas tawa teigwa yugu mige boks yomara i moglsre, yoba mige podo kan neigwa i, mige ofa tenamnedi mige i pi boks mina atne edigo, kan moglkwa. 2Kan mogl, abu werai ta goduglme moglkwa i ama mige mogo gogl suo ta i pi atne edugo, kanugwa. 3Kandre, yegl dugwa, Na ene kaima di teiga, abu werai ta goduglme moglkwa i, mige podo togo, ye mudu mige kebra teigwa. 4I siragl pre ye mudu migeno podo kawa tomara i mina ofa teigwa ba abu werai i, mige ta kan nomere mudu togwa. Ye migemo tau yoko yenan, ye ere nenabuka i ta yeikrume, dugwa.

Yoba tawa teigwa yugu ere kide eraiglkwa i pre Jisas dugwa

(Matyu 24.1-2, Mak 13.1-2)

5Ana Jisas duglo beglkwa yoba tau tawa teigwa yugu i kan moglsre, yegl digwa, Yugu i kobuglo wakai wakai idre, keigo, taragl wakai kane kane yoba yu ofa teigwa i idre, yugu i, ekin wakai gagl teimiwe digwa. Yegl digo, Jisas yegl dugwa, 6Ene yugu magigl kan digwa i, ege okuo ta plau dinan, yoba udre, yugu i si gurdi atne edibi, kobuglo swara ta kobuglo ta yenabara tebe ta yeikrabiwe dugwa.

Yubun podo podo okuo plau dinaiglkwa

(Matyu 24.3-14, Mak 13.3-13)

7Ana Jisas duglo beglkwa yoba tau Jisas yegl di prikwa, Tisa yo, taragl yegl mere plau dinabuka i, aunake plau dinabe? Te, no siragl taragl kandre, taragl i plau dinabuka i, magigl erumedi pramne? digwa. 8Yegl digo, Jisas yegl dugwa, Yoba ta ene bakagl te dinaiglmedi kan kun erio. I siragl pre yoba tau mere na kagna mina udre, Na Krais moliwe didre, Taragl mudu dudunabuka igne i ede magigl u kodumiwe dinaiglkwa. Ye yegl dinaiglkwa ba ene ye duglo boglkrio. 9Te, kuda kane kane, kebra ya kade plau dume dibi, ene prisre, kudugl goglkrio. I siragl pre taragl i mudu plau dinaiglkwa paugwa ba taragl pra pra dudunabuka ege i, okuo kaima unabiwe dugwa.

10Kantri ikne ikne kuda beglbi, te, king ikne ikne ama kuda boraiglkwa. 11Imem podo podo unan, bage tau kidan podo kaima panaiglkwa. Paibi, bage tau yoba kide sinan, mere geglbi, diu ama tau kamun mitna ibo plau dibi, yoba kandre, kudugl podo goraiglmiwe dugwa.

12Ana taragl mudu i, plau dinaiglkwa ba komono kana yoba ene si ake gi di mogl, ere kide ere tedre, ka mabuno yuguno yenabara i kot ere tedre, si i pi kane yugu edenaiglkwa. Te, ene na duglo beglkwa pre ye ene gudu i pi king ya gavana moraiglmara edenaiglkwa. 13Edibi, na kana yoba kade wagle i di tenaiglkwa egemo yenabuka. 14Yenan, ene ka siragl mere di ikne edenaiglkwa i, ere wakai eramga i ta paikrumedi praiglkwa. 15I siragl pre ege i, nana ene ka siragl mere dinaiglkwa i di tebo, ene kano mem wakai panan, ene kudano ikne ta moraiglkwa i, ene kano si atne edenaiglkwa i, kuno ta erekrabiwe dugwa.

16Enene neno mano ya agroma ene i pi kudano ikne ogono mina yebi, kabagleno ya yoba bormai swara meglkwa ama yegl eraiglkwa. Te, ene meglmara suna tau si goraiglkwa. 17Te, ene na duglo beglkwa pre yoba mudu ene kide kanaiglkwa. 18Ba yoba i, ene kiano mina ere kide ere tebi, kuno ta erekrabuka. 19Ene yubun idre, adigl gigledi meglbi, ene kiano mina wakai kaima moraiglmiwe di, Jisas yegl dugwa.

Yoba dumo Jerusalem ere kide ere tenaiglkwa

(Matyu 24.15-21, Mak 13.14-19)

20Jisas yegl didre, ama yegl dugwa, Ana ami u Jerusalem mogl winabo dinaiglkwa igne, ene Jerusalem ere kide ere tenaiglkwa ege ede magigl u kodumedi praiglkwa. 21Ana igne i yoba ta distrik Judia suna moraiglkwa i, ye teke ede muglo meglbi paimara ebi, yoba ta taun Jerusalem suna moraiglkwa i, teke ede meda ebi, yoba taun meda moraiglkwa i, ama ede suna ukraiglkwa. 22I siragl pre ege i, God dem kubrukwa ege yenan, God kamo mina siragl kane kane ta plau dinabedi beglkwa ikra, ege i plau dinabuka. 23Igne i, abu ta dano panabuka mo gak kebra am te moraiglkwa i, mitno erabuka. I siragl pre ege i, yubun podo kide makandigle plau dinan, ege i God Israel yoba dem kubro togwa i, i nogugl ede tenabuka. 24Israel yoba kudano ikne udre, ye tau mere bainet mina si gogl, tau mere ama si kane si i pi kantri bage bage edenaiglkwa. Yoba yugobuno pere Israel yoba moglkrikwa i, dumo Jerusalem egre i atne edidre, sugl mogl ebi, God ye yugobuno pere dumo Israel sugl moraiglmedi ege paduglkwa i dudinan, pra, okuo ta sugl moglkraiglmiwe di, Jisas yegl dugwa.

Yoba Wam ede ikne unabuka

(Matyu 24.29-31, Mak 13.24-27)

25Jisas yegl didre, ama yegl dugwa, Ade ba ya kugl kuri mina diu podo plau dinan, mudi nigl ama podo kaima si pepigl didre, mu podo dinan, yoba yugobuno pere pere moraiglkwa i nomane sidre, kudugl podo goraiglkwa. 26Te, ege i, taragl podo podo kamun mitna ibo paigwa i, gua gua wanibi, yoba dumo makan dudinabedi kandre, kudugl goglsre, gumuglno magran, yage sinaiglkwa. 27Ana igne i na Yoba Wam moglka i, kamun kua mitna ibo udre, na yobuglna ya abuglagena podo paugwa i nogugl edibo, kanaiglkwa. 28Taragl yegl mere plau dinagledi erabuka igne, ene adigl gigledi mogl, kan mitna ede, sugl kan molo. I siragl pre God ene ikne edenabuka ege ede magigl u kodumedi praiglme di, Jisas yegl dugwa.

Yoba ede fik kandre, nomane inaiglkwa ka padum

(Matyu 24.32-35, Mak 13.28-31)

29Ana Jisas ka yegl di kodidre, ye ka ebrie swara ta yegl di togwa, Ede fik ya ede kane kane ta paigwa i, poglo di prio. 30Ye yaudo kor sigwa igne, ene kandre, niga dinabuka ege i, ede magigl umedi kanigwa. 31Kuno yegl mere, na taragl tau plau dinaiglme diga i plau dibi, ene kandre, God yoba kingno mogl, suglno morabuka igne i ede magigl u kodumedi praiglmiwe dugwa.

32Yegl didre, ama yegl dugwa, Na ene ka kaima di teiga, Yoba erme meglkwa i goglkribi, taragl yegl mere mudu plau di kodinan, okuo goraiglkwa. 33Kamun mitna ibo ya dumo makan dudunabuka kuno erabuka ba na kana ta dudukre, aimadi kamun pai morabiwe dugwa.

Jisas duglo beglkwa yoba i, ye Jisas unabedi sugl kan moraiglkwa paugwa

34Jisas yegl didre, ka ta ama yegl dugwa, Ene kan kun erio. I siragl pre ene gua gua ere, spak ersre, erme makandigle siragl mere mogl pai eraiglkwa i pre yubun debi, taragl i ene nomano mina kau sinabuka. Kau sinan, ege i tabre plau dinan, 35dua kabu kigln keglko, simere mere yegl, ene wai kuraiglkwa. I siragl pre ege i, makandigle yoba mudu moraiglmara plau dinabuka. 36Yegl pre ene ege ege sugl kan moglsre, God yobuglo bogl norabedi kamage erio. God ene yobuglo bogl tenan, yubun i ene si atne edekran, ene na Yoba Wam gumuglna mina adigl mogl, wakai moraiglme di, Jisas yegl dugwa.

37Ana Jisas ege swara swarade tawa teigwa yugu yomara togl suna pidre, yoba ka beke te moglkwa ba eduer keme ye Jerusalem kide kodo, muglo Oliv we dimara i ugl paugwa. 38Te, yoba mudu tagna kide kana adiglsre, Jisas ka dinan, pramnedi muku di ede tawa teigwa yugu yomara eigwa.

Currently Selected:

Luk 21: KB

Highlight

Compare

Copy