Luk 23

Jisas agre i pi, Pailat moglmara eigwa

(Matyu 27.1-2, 27.11-14, Mak 15.1-5, Jon 18.28-38)

1Ana yoba kade wagle makai sigwa i, mudu adiglsre, Jisas auro i pi Pailat moglmara edigwa. 2Edidre, ye aglau erumiwedi, yegl digwa, Yagl i, no yugobunono, Israel yoba meglmara i, yoba nomano ere kide ere tomiwe digwa. No mige taks Rom king tenamga i, ye mane didre, yene Krais mole didre, king ta mole dumiwe di, yegl digwa. 3Yegl digo, Pailat ye Jisas di pre, yegl dugwa, Ene Juda yoba kingno motno? dugwa. Yegl dugo, Jisas di ikne ede, yegl dugwa, Ene dinga i, kuno ere diniwe dugwa. 4Jisas yegl dugo, Pailat ye tawa teigwa yoba bitno meglkwa i ya yoba mere kide magigl kan meglkwa i di tedre, Yagl i aglau erukwa mere yegl ta kankriwe dugwa. 5Pailat yegl dugwa ba yoba kade wagle i, ka gigledi di moglsre, yegl digwa, Yagl i Juda yoba mudu nomano ere kide ere togwa. Ye distrik Galili mabuno bogl yoba ka beke tedre, ede u distrik Judia suna i, dumo mudu pidre, yoba ka kibi beke te moglmiwe digwa.

Yoba kade wagle Jisas auro i pi Herot moglmara edigwa

6Ana yoba kade wagle ye Jisas distrik Galili mabuno bogl kogon erume digwa i, Pailat prisre, Ye Galili yoba ta moglmo? dugwa. 7Yegl dugo, ye di ikne ede, Galili yoba moglme digo, Pailat prisre, Herot ye distrik Galili sugl moglkwa pre Herot ye kamo pran, kuno erabedi prukwa. Ana igne i Herot dumo Jerusalem moglkwa pre Pailat ye yoba tau Jisas i pi Herot moglmara edinaiglmedi dedugo, i ede eigwa.

8Ana yoba tau Jisas yuigo, Herot kanugwa igne, ye gun podo yogwa. I siragl pre okna Jisas kamo digo, ye prisre, Jisas kimagl ta eran, kanagledi prukwa. Prisre, tau kanana sugl mogl ogwa ba Jisas ta kankrukwa, erme kanugwa. 9Ana Pailat ye Jisas kandre, kira tau mere kide ye pogl prukwa ba Jisas ka swara ta di ikne edekrukwa. 10Jisas di ikne edekruko, tawa teigwa yoba bitno meglkwa i ya te, God lomo beke teigwa yoba i, magigl adigl moglsre, ka gigledi di, Jisas aglau kane kane erume digwa. 11Yegl digo, Herot ye soldiama bogl Jisas yagl yoko ta moglmedi kandre, ye kenaglmo sidre, ir gagl wakai ta pogl dugwa i ye moglmara ede te, ede ikne Pailat moglmara enabedi dedigwa. 12Ana Herot ya Pailat ye okna ikne ikne kide kanibrika ba igne i ye u kabagle mere yegl miurka.

Pailat Jisas i pi ede prak mina si goraiglmiwe dugwa

(Matyu 27.15-26, Mak 15.6-15, Jon 18.39–19.16)

13Ana Pailat ye tawa teigwa yoba bitno meglkwa i ya, Juda yoba yobano kade ya te, yoba yoko meglkwa i pra, agle dugo, 14ede magigl wigo, Pailat ye yegl di togwa, Ene yagl i yu na moglmara edidre, ye yoba kuda boraiglmedi erume digwa ba ene kanio. Na ene gumuglno mina ye kira pogl prika ba ene ye aglau erume dimere yegl, ye ta erukwa mere yegl poglkrumiwa. 15Te, Herot ye kira pogl prisre, ede ikne nono munara unabedi dedugwa pre ye ama aglau ta erekrumedi kanugwa paugwa. Ene kanio, ye aglau podo ta erekrukwa pre na ye si goraglka i, kuno ta erekrukwa. 16-17Yegl pre na ye duglnai keme sidre, di meda edinaluwe di, Pailat yegl dugwa.

18Ana Pailat Jisas di meda edenagle dugwa ba Israel yoba magigl makai sigwa i, mudu u swara pidre, ka podo di, Ene yagl i, i pi si goglsre, yagl ta Barabas we digwa i, i meda ede noro digwa. 19Yagl Barabas i, ye Jerusalem mogl, yoba Rom gavman kuda bogl tenaiglmedi ake nu sidre, yoba tau si goglkwa pre ye si kane si i pi kane yugu edigo, pai moglkwa. 20Ana Israel yoba yegl digo, Pailat ye Jisas di meda edenagledi prukwa pre ye aglke kor yoba magigl meglkwa i, ka tau di togwa 21ba ye ka podo di moglsre, Ye si goglo! didre, Ye ede prak mina si goglo! di meglkwa. 22Yegl di meglko, Pailat ege namba 3 di ikne ede tedre, yegl dugwa, Ye mabuno kide siragl mere erume? Ye mabuno kide podo ta eran, na ye si goraglka i ta paikrukwa pre na ye duglnai keme sidre, di meda edinaluwe dugwa. 23Yegl dugwa ba Israel yoba ye ka dimara adigl gigledi moglsre, Pailat ye ede prak mina si gorabedi ka podo di meglkwa pre ye kano ede podo pidre, Pailat kamo si atne edugwa mere yegl paugwa. 24Ka yegl digwa pre Pailat ere mogl, ye dimere Jisas si goraiglmedi prawe didre, 25yagl ta kuda kogl, yoba kuda boraiglmedi ersre, yoba tau si goglkwa pre di prikwa ikra di meda edugwa. Yagl kide i di meda edidre, Israel yoba primere yegl, Jisas i pi Rom soldia ogono mina yogwa.

Jisas ede prak mina sigwa

(Matyu 27.32-44, Mak 15.21-32, Jon 19.17-27)

26 Ana soldia wagle Jisas auro i ede taun meda eigo, yagl ta taun meda mogl, ede suna unagledi ugo, tegigl yeigwa. Tegigl yeigo, soldia ye Jisas edemo prak kake tenatniwe digo, ye Jisas omara mokomugl ede prakmo kake i ede ogwa. Yagl i, kagie Saimon we digo, ye dumo Sairini nem ta moglkwa.

27Ana Jisas omara i, yoba tau mere mokomugl sika si eigo, abu wagle tau ye eimara suna i, Jisas kai ere tedre, kai giglage sigwa. 28Yegl eriko, Jisas kan ake tedre, ye yegl di togwa, Ene Jerusalem abu meglkwa i, na pre kai erekrio. Ba ene enene pre kai ersre, gagroma pre ama kai erio. 29I siragl pre ege kide ene meglmara plau dinabuka magigl erukwa. Plau dinan, yoba ere mogl, yegl dinaiglkwa, Abu ta temne padre, gak kebra am tekrikwa i, tau wakai meglkwa ba abu ta gak kiglkwa i, mirie erumiwe dinaiglkwa. 30Ege i, yoba ere mogl, muglo meglbi kade ya kebra yage sidre, no si goraiglmba#23.30 Hosea 10.8 dinaiglkwa. 31Ene prio, na aglau ta erekrisre, yubun yegl mere iga. Yegl pre yoba aglau podo erikwa i, yubun siragl mere inaiglmedi prime? di, Jisas yegl dugwa.

32Soldia ye Jisas auro i ede eigwa igne, ye kunogl gogl yoba suo ama akie si goramnedi auro i ede eigwa. 33Ye auro i pi dumo ta Bitno Yobuglo Dumo we dimara i pidre, Jisas ya kunogl gogl yoba suo i, ede prak mina si padiglkwa. Ye Jisas suna si padiglko, kunogl gogl yoba swara ta ye ogo wo kra paugo, swara ta ye ogo koda kra paugwa. 34Ede prak mina si padiglko, Jisas kamage ere, yegl dugwa, Nina yo, ye tadaglme erikwa i, gugl ede to. I siragl pre ye aglau erikwa i, ta pre kan erekrimiwe dugwa. Te, soldia wagle i, ye Jisas kuguglmo gaglmo yubu si inamnedi kas mere yegl sigwa.

35 Ana Jisas ede prak mina si padiglmara i, yoba magigl adiglsre, kan meglko, Juda yoba yobano kade meglkwa i, ye Jisas kenaglmo si mogl, yegl digwa, Yagl i, yoba tau ere yume digwa. Yegl pre ye kaima Krais, God Kere Yugwa Yagl ikra moran, ye yene ere yo do! digwa. 36Yegl digo, te, soldia tau meglkwa i, ama Jisas kenaglmo sinamnedi wain nuglo tau ku erukwa i yu tenamendi ersre, 37yegl digwa, Ene kaima Juda yoba kingno motn, ene enene ere yo! digwa. 38Te, ye Jisas ede prak mina sigwa igne, ye pamara bre tebe i, ka yegl bogl padiglkwa, Yagl i, ye Juda yoba kingno moglmiwe di, yegl beglkwa.

39Ana kunogl gogl yagl suo ta Jisas bogl akie ede prak mina sigwa ikra, swarano ta Jisas kenaglmo sidre, yegl dugwa, Ene God Kere Yugwa Yagl motno? Ene kaima yegl motn, ene enene ere idre, no ama ere yo! dugwa. 40Yegl dugwa ba kunogl gogl yagl ta moglkwa i, ye ka tedre, yegl dugwa, Ene goratnga magigl erukwa ba ene God kuduglmo goglkitno? dugwa. 41Nono aglauno pamara gorabuglka kuno erukwa ba yagl i aglau swara ta erekrumiwe dugwa. 42Yegl didre, ama Jisas yegl di togwa, Jisas yo, ene king moratnga igne, ene na pre moratnedi priwe dugwa. 43Yegl dugo, Jisas di ikne ede, yegl dugwa, Na ene kaima di teiga. Ene erme na bogl akie dumo wakaile morabugle di, yegl dugwa.

Jisas goglkwa

(Matyu 27.45-56, Mak 15.33-41, Jon 19.28-30)

44Ana igne i 12 klok mere yogo, ege i ede pi 3 klok mere yegl, dumo magigl i mudu ake mim erukwa. 45I siragl pre ade abuglage sikrukwa. Te, tawa teigwa yugu yugugl i, lap podo ta kogl kegl digwa i, suna wom argla dugwa.

46Ana taragl yegl plau dugo, Jisas ka podo yegl dugwa, Nina yo, na kiana ene ogon mina yeiwe#23.46 Giglage 31.5 dugwa. Ye yegl didre, goglkwa.

47Jisas goglko, yagl ta soldia 100 mere bitno moglsre, magigl kan moglkwa i, ye taragl kane kane plau dugwa i kandre, God kagie kade te, yegl dugwa, Yagl goglkwa i, ye kaima yagl du ta moglkwa pamiwe dugwa. 48Te, yoba mere u makai sidre, taragl kane kane plau dugwa kan meglkwa i, ye kide pre, ye yene pitno tama sidre, dumo i kide kodo, ede eigwa.

49Ana Jisas kabaglema mudu meglkwa i ya te, abu tau okna distrik Galili moglsre, Jisas duglo bogl wigwa i, ye eglke adigl moglsre, taragl kane kane plau dugwa i, kan meglkwa.

Jisas ogo nagie i pi kobuglo mur yeigwa

(Matyu 27.57-61, Mak 15.42-47, Jon 19.38-42)

50-51 Ana yagl ta moglkwa, ye kagie Josep we digwa. Ye taun Arimatea, distrik Judia suna yogwa i, nem ta moglkwa. Te, ye ama Juda yoba kaunsilno mina moglsre, yagl du mogl, yagl wakai ta moglkwa. Kaunsil wagle makai sidre, Jisas siragl mere ere teigwa i, ye pra we dikre, God yoba kingno mogl, suglno morabedi sugl moglkwa yagl ta moglkwa. 52Ana yagl i ye Pailat moglmara pidre, Jisas ogo nagie inagledi di pruko, Pailat pra we dugo, 53ye Jisas ogo nagie ede prak mina paugwa i, i atne edidre, lap kruo mina were, ye ogo nagie i pi kobuglo mur kor ta perimara yogwa. Kobuglo mur i yoba ogono nagino okna yeikrikwa. 54Ana igne i Sabat de tagna yenabuka pre yoba kaya mokna ya ki ede yugugl ede yeigwa ege yogo, min panagledi erukwa.

55Josep Jisas ogo nagie i ede ogwa igne, abu tau ye okna Jisas bogl distrik Galili kide kodo, ede wigwa ikra ye duglo boglsre, Josep ogo nagie kobuglo mur mina atne yogwa i, kanigwa. 56Kandre, ede ikne pi Jisas ogo nagie kugo ere tenamnedi taragl tau demene wakai erukwa i, ere wakai ere yeigwa. Ere wakai ere yedre, lo dumere mere Sabat de wakan meglkwa.

Currently Selected:

Luk 23: KB

Highlight

Compare

Copy