Luk 4

Satan Jisas kina sugwa

(Matyu 4.1-11, Mak 1.12-13)

1Ana Mudu Murubuglo ye Jisas moglmara si kau si togo, Jisas ye nigl Jordan omara kide kodidre, ede ikne ogwa. Ogo, Mudu Murubuglo ere mogl, ye auro i pi dumo wau yomara suna edugo, 2ye dumo wau yomara suna i, ege 40-pela de moglko, Satan ye eran, kanagledi kina sugwa. Jisas ye ege 40-pela de i, kaya mokna mawagl erukwa pre ege i dudugo, ye kidan podo goglkwa. 3Ye kidan podo goglko, Satan ye yegl di togwa, Ene God Wam kaima motn, ene kobuglo magigl paigwa i di tedre, u bret koglo eo do! dugwa. 4Yegl dugo, Jisas di ikne edidre, yegl dugwa, God kamo mina yoba ta yegl boglkwa, Yoba bret keme idre, kor moglkrabiwe#4.4 Lo 8.3 di, yegl boglme dugwa.

5Ana Jisas ka yegl di kodugo, Satan ye agre i pi dumo mitna kaima ibo ta edidre, king dumo uglo koglo koglo sugl meglkwa i, Jisas kanabedi tabre kaima yu magigl edugwa. 6-7Yu magigl ede tedre, yegl dugwa, Dumo uglo koglo koglo wakai kaima yogwa kanga i, na ogona mina yogo, yoba ira ta sugl moraiglmedi prika i, nana teiga. Yegl pre ene goglkon bodugl narsre, kagna kade natn, taragl kanga i, mudu ene tebo, ene kagn wanabiwe di, yegl dugwa. 8Yegl dugo, Jisas di ikne ede, yegl dugwa, God kamo mina yoba ta yegl boglkwa, God, ene Yaglnen Kade moglkwa i, ye swara goglkon bodugl tedre, kagie kade tenatniwe di, yegl boglme#4.8 Lo 6.13-14, 10.20 dugwa.

9Ana Jisas yegl di kodugo, Satan ye auro i pi Jerusalem suna pidre, tawa teigwa yugu yomara tebe kaima ibo edidre, ye yegl di togwa, Ene God Wam kaima motn, ene puglo di, yage atne suo. 10I siragl pre God kamo yegl dugwa, God angeloma dedenan, ene sugln moraiglmiwa. 11Te, ene kagln kobuglo bogl dinatga pre ye angeloma ene ake i mitna edinaiglmiwe#4.11 Giglage 91.11-12 di, yegl beglkwa pame dugwa. 12Satan yegl dugo, Jisas di ikne ede, yegl dugwa, God kamo bage ta ama yegl dugwa, God, ene Yaglnen Kade moglkwa i, ene ye eran kanagledi erekro!#4.12 Lo 6.16 dumiwe dugwa.

13Ana Satan ye yegl mere Jisas kina si kodidre, ye ege ta ikne unagledi Jisas kide kodo, ede ogwa.

Jisas ede dumo Nasaret ogwa

(Matyu 4.12-17, Mak 1.14-15)

14Ana God Murubuglo Jisas yobuglo te moglko, Jisas ede ikne distrik Galili ogwa. Ogo, distrik Galili suna i, ye kamo wai dugo, yoba mudu prikwa. 15Priko, ka mabuno yugu bage bage ta kei yeimara Jisas wan pi yoba ka beke togo, yoba mudu wakai prisre, ye debie sigwa.

Nasaret yoba Jisas mokono teigwa

(Matyu 13.53-58, Mak 6.1-6)

16Ana Jisas wan ede pi dumo Nasaret, ye gak kebra mogl, yakumara i ogwa. Pidre, wakan kade ege ye ege ege erumere mere yegl, ye ede ka mabuno yugu yugugl pidre, God kamo kere tenagledi yoba gumanomugl adigl moglkwa. 17Adigl moglko, ka kep yagl ta kagie Aisaia ka okna bogl atne edugo, pepa mina paugwa i, Jisas kerenabedi yoba ta yu togwa. Togo, Jisas ake pigla didre, bage ta doko idre, yoba kere togwa. 18Kere te yegl dugwa, Yagl Kade Murubuglomo we, na moglmara mogl narumiwa. I siragl pre yoba ka wakai di tenatnedi God na kere i pere edidre, goduglme yoba meglkwa i ka wakai di to dumiwa. Te, yoba kane paigwa i, ene i meda ede, yoba gumuglno kin yeigwa i, kanaiglmiwe di to. Te, yoba tau yubun kane kane teigo, atne meglkwa i, na ye i eglke edibo, wakai moraiglme didre, 19te God yoba ere inabuka egemo i, ama u kodumiwe#4.19 Aisaia 61.1-2, 58.6 di, na ka yegl di to! dumiwe di, Jisas yegl kere togwa. 20Jisas kere te kodo, pepa ake suna ede, i pi, yagl ta pepa sugl moglkwa i tedre, ame dugwa. Ye ame dugo, yoba mudu ka mabuno yugu yugugl meglkwa i ye toro kan meglkwa. 21Ye toro kan meglko, Jisas ere mogl, yoba yegl di togwa, Na God kamo ene kere teigo, prikwa i, erme magigl i plau dumiwe di, Jisas yegl dugwa.

22Ana Jisas ka yegl dugo, yoba ye kamo pre meglkwa i, ye ka wakai kaima dumedi prisre, nagino kogl, debie sigwa. Komno kana debie sigwa ba okuo ye ere mogl, yegl digwa, Yagl i, ye nono bogl kuno mungo, ye Josep wam kra moglmiwe di, yegl digwa.

23Ana yoba i yegl digo, Jisas ye di te, yegl dugwa, Yoba niga nigadi ka yegl digwa, Ene dokta kaima ta motn, enene kidenen ere wakai etn, kanamniwe di, ege ege yegl digwa i, na di bogl, di naramnedi erikwa. Ene yegl di naramnedi erikwa i, Ene kimagl dumo Kapernaum etnga i, enene yugunomugl magigl i ama ta etn, pre medramniwe di, ene yegl di primiwe di, Jisas yegl dugwa. 24Ene ka yegl di naraiglkwa ba ene kaima di teiga. God kamo kep yoba ta morabuka i, yoba dumo pere pere moraiglkwa i, ye kamo praiglkwa ba yene yugomugl yoba meglkwa i, ye eran, kaima ta prikraiglmiwe dugwa.

25Ana Jisas ye di tedre, Na ene ka kaima di teie dugwa. Okna kaima ibo Elaija moglkwa igne i bugla yugu suota ba 6-pela mere kamun sikruko, Israel kamin kidan podo kide yogwa. Yogwa igne i abu werai mere kide suna Israel kamin meglkwa. 26Meglkwa ba God ye Elaija dedidre, abu werai wagle i ere wakai ere to ta dikrukwa. Ye abu werai ta Israel abu moglkrukwa ta taun kebra Sarefat we digwa, taun kade Saidon bina ta yomara kipai moglmara i dedugo, ede ome dugwa. 27Te, ka kep yagl Elisa moglkwa igne, Israel yoba tau mere kide leprosi paugwa ba God ye ta ere wakai ere tekrukwa. Ba yagl Naman Israel yoba moglkrukwa, ye kantri Siria nem moglkwa ikra keme ere wakai ere tomiwe di, Jisas yegl dugwa.

28 Ana God yoba pere ere wakai ere togwa i pre dugo, yoba mere kide ka mabuno yugu yugugl pre meglkwa i, deno boglko, 29adiglsre, Jisas taun yomara si meda edinamnedi auro ede meda wigwa. Ye tauno i muglo ta kei yeigwa. Guglo kogl koglo yogo, suna kei yeigwa pre Jisas si ake nu si atne edinamnedi auro ede guglo yomara magigl wigwa. 30Wigwa ba Jisas ye eimara suna i konbauno pidre, ede pi ede ogwa.

Jisas murubuglo kide ta di meda edugwa

(Mak 1.21-28)

31Ana Jisas ede taun Kaperneam ogwa. Kaperneam i distrik Galili suna i yogwa. Ana ye pi igle moglsre, wakan kade ege, ege ege ede ka mabuno yugu yugugl pidre, God kamo beke togo, 32yoba prisre, nagino keglkwa. I siragl pre ye God kamo beke togwa i, ye yene kagie kade paugwa mere yegl dugwa.

33God kamo beke togo, yagl ta murubuglo kide moglkwa ta ama moglkwa. Moglkwa i, ye Jisas kandre, ka podo didre, 34Aya, Jisas ene Nasaret nem motnga i, no siragl ere nora une? No ere kide ere nora uno mo? Te, ene ira motnga i, na pre kan erie dugwa. Ene God Kere Yugwa Yagl ikra motniwe dugwa.

35Murubuglo kide i, yegl dugo, Jisas ka gigledi yegl di togwa, Ene dran si kegl didre, yagl i moglmara kide kodo ede meda wo dugwa. Dugo, murubuglo kide i, yoba meglmara suna yagl i ere edugo, yage sugo, ede meda ogwa ba murubuglo kide yagl i ta ere kide ere tekre, yoko ede ogwa. 36Ede ogo, yoba mudu yugugl meglkwa i nagino kogl, di ikne ikne ede yegl digwa, Aya, yagl i ka kor ta yu di norumiwe digwa. Didre, Ye ama yagl kade mere yegl ta moglsre, ka yobuglo bogl dugo, murubuglo kide ama ye kamo duglo boglsre, yoba meglmara kide kodo ede meda wime digwa. 37Ye yegl didre, ede meda wigwa igne, Jisas kamo di wai digo, yoba distrik Galili suna i, mudu prikwa.

Pita abu imakie kide sugo, Jisas ere wakai ere togwa

(Matyu 8.14-15, Mak 1.29-31)

38Ana Jisas ka mabuno yugu kide kodo, ede pi Saimon Pita kipamara ogwa. Ogo, Saimon ebie mam nagie niga podo dugo, yugugl i pai moglkwa. Pai moglko, yoba tau Jisas ye ere wakai ere tenabedi di prikwa. 39Di priko, Jisas pi pai moglmara adigl moglsre, kidemo i ka gigledi di togwa. Di togo, ye kidemo bu yogo, abumo i tabre adigl, ye kaya mokna nenaiglmedi ere wakai ere gaglkwa.

Jisas yoba mere kaima kideno ere wakai ere togwa

(Matyu 8.16-17, Mak 1.32-39)

40Ana ade ede prak ogwa igne, yoba tau kide kane kane sigwa i, Jisas ye ere wakai ere tenabedi auro yuigwa. Yuigo, Jisas ye pi swara swarade akugo, kideno aragan eruko, 41te, murubuglo kide yoba mere meglmara atne meglkwa i, ama ede meda udre, ka podo di, Ene God Wam motniwe digwa. Yegl digwa ba Jisas ene ka yegl dikrio di mane di togwa. Jisas God Kere Yugwa Yagl moglmedi ye pre kan ersre, digwa pre Jisas mane di togwa.

42Ana tagna ta i, Jisas adigl ede pi dumo wau yomara ta ogo, yoba ye pre dokigwa. Doko pi kanigo, moglko, ye dumono kide kodo ede pi dinabedi si kegl dinamnedi erikwa 43ba Jisas ere mogl, yegl di togwa, Na ede dumo tau ama pidre, God yoba kingno mogl, suglno morabuka i pre dinaglka pamiwa. I siragl pre God na yegl ero dedugo, wiwe dugwa. 44Jisas yegl didre, ye adigl ede pi distrik Judia suna ka mabuno yugu ta kei yeimara i swara swarade God kamo yoba beke te ede ogwa.

Currently Selected:

Luk 4: KB

Highlight

Compare

Copy