Matyu 11
11
Jon Baptais duglo beglkwa yagl Jisas moglmara dedugwa
(Luk 7.18-35)
1Ana Jisas ye duglo beglkwa yagl 12-pela nomane yegl te kodidre, dedugo, ye ede eigwa. Ede eigo, Jisas ere mogl, God kamo beke tenagledi dumo i kide kodo, Juda yoba dumono pere pere yomara wan ede ogwa.
2Ana Jon kane yugu pai moglsre, Jisas kogon kane kane erukwa i, digo, Jon prisre, ye duglo beglkwa yagl Jisas moglmara pi di praiglmedi dede, 3Jisas yegl di prio dugwa, Yagl ta unabuka ikra, ene uno mo no yoba ta pre sugl moramne? di prio dugwa. Yegl dugo, ye pi Jisas yegl di priko, 4Jisas di ikne ede, yegl dugwa, Ene ede ikne pi, ene siragl taragl kandre, prisre, erikwa i, Jon di teo dugwa. 5Yoba gumuglno kin yogwa i, aglke kor kanigo, kaglno kide erukwa i konbauna ede eigo, yoba leprosi erikwa i, ogono nagino u wakai omiwe di teo. Te, yoba gogl kodigwa i, u kor eigo, te, goduglme yoba ye God kamo wakai i, priko, no kamne di, Jon yegl di teo. 6Te, ka ta ama yegl di tenaiglkwa. Yoba na erabedi primere ta erekrika ba na pre medigl mogl yage sikrikwa i, gun yenaiglmiwe di, Jisas yegl dugwa.
7 Ana yagl wagle i ede eigo, Jisas ere mogl, yoba mere makai si meglkwa i Jon pre ka tau yegl di togwa, Ene okna yagl Jon kanamnedi dumo wau yomara eigwa i, ye siragl mere moglkwa kanamnedi ede eime? Jon yobuglo paikruko, ir u sugo, egre ya kugl kan piga dumere yegl mere moglko, kanamnedi eimo? 8Ta manugwa. Mo, Jon kugugl gagl wakai kaima ta edugwa i kanamnedi eimo? Ta manugwa. Yoba ta kugugl gagl wakai kan neigwa i, ye king yuguno toglno suna i keme meglkwa. 9Mo, ene God kamo kep yoba ta kanamnedi ede eime? Kaima, Jon kaima God kamo kep yagl ta moglkwa ba ye ka kep yagl yoko ta moglkrukwa. 10God kamo okna yagl ta unabe dugwa i, Jon moglme dugwa. God kamo yegl dugwa,
Ene pro! Na yagl ta kana kep ero dibo, ye ene enatnara ede okna enabiwa. Ye ene enatnara ede okna pi, yoba konbauna ake kun erimere yegl erabiwe#11.10 Malakai 3.1
dugwa i, Jon yoba i moglmiwe dugwa. 11Na ene kaima di teiga, Jon yoba nigl bugl togwa moglkwa i, yagl kade mogl, yoba mudu erme makandigle meglkwa i egre togwa. Ba okuo kaima God yoba kingno morabuka igne i yoba yoko kaima ta morabuka i, Jon erme makadigle moglmere mere yegl moglkrabuka ba mogl mitna kaima edenabiwe dugwa.
12Ana Jon nigl bugl togwa yagle kogon mabuno bogl erukwa igne ede u ege erme ugwa i, God yoba kingno mogl, suglno morabuka ka i, yobuglo ere, ede eglke eglke pi pai moglko, yoba yobuglo ere, God kingno morabara ede suna u pai meglkwa. 13Yoba God lomo digwa ya ye kamo kep ere digwa i, di ede wimara i, Jon okuo kaima ugwa. 14Te, na ka diga i, ene kaima pramnedi pribi, na ene yegl di tenaglka, God kamo kep yoba ye Elaija okuo unabe digwa i, ye Jon unabuka pre digwa. 15Ene na kana pramnedi pribi, wakai ere kinano gudu prio dugwa.
16Ana Jisas ka yegl di kodidre, ama yegl dugwa, Ene yoba erme paigwa i, na Jon bogl akie no kenaglno sigwa i, na ka ebrie siragl we di boragle? Yoba maket ere meglmara gak tau daragl erimere mere yegl gak kade tau ere mogl, gak tau di te, 17Ene daragl yegl erio! dimere yegl ene yegl meglkwa. Moglsre, ene ama ka yegl digwa, No pu migi sidre, ene kaglno egrio dumga i, kaglno egrekrikwa. Te, no kai giglage sidre, kai erio dumga i, ene kai erekrimiwe digwa. 18Ka ebrie i mina kuno yegl mere, ene Jon nigl bugl togwa yagle kaya mokna nekre, wain nekre, erukwa i kide kandre, ye Murubuglo kide suna ta moglme digwa. 19Te, na Yoba Wam moglka i, ede nogugl wiga igne, na bret ya nigl wain akie neiga. Yegl neigo, na ama kenaglna sidre, Yagl i kaya mokna podo nedre, spak erukwa yagle moglsre, tadaglme ya taks igwa yoba bogl begane yei wan moglmiwe digwa. Ba yoba ta God nomanemo wakai pre igwa meglkwa i, ye kogono i mina i nogugl edinaiglmiwe di, Jisas yegl dugwa.
Yoba nomano yake tekrikwa i, ka tage inaiglkwa
(Luk 10.13-15)
20Ana yoba dumo yegl meglkwa i, nomano yake tekrikwa pre ka togwa. Dumo yegl i, Jisas kimagl mere kide suna erukwa ba yoba mere nomano yake tekrikwa. 21Yegl pre Jisas yegl dugwa, Ene Korasin ya Betsaida yoba meglkwa i, yubun podo inaiglkwa. Na ene gumuglnomugl kimagl mere erika ba nomane yake tekrikwa pre diga. Na taun suo Tair ya Saidon kimagl yegl ta pi eria, taun suo i, kamun kuade nomano yake tedre, lap gagle yaglkwa pre, yugum pere edimara bolamugl ame digo. 22Ba na ene di teiga, God yoba ka tage tenabuka igne, Tair yoba ya Saidon yoba yubun tau kebra dagl inaiglkwa ba ene yubun podo kaima inaiglkwa.
23Te, ene Kapernaum yoba ene mogl mitna edidre, heven ibo enaiglmo? Ta pikraiglkwa. Ene ede atne kaima pidre, yoba geglkwa pai meglmara enaiglkwa. I siragl pre na okna dumo Sodom pidre, kimagl tau ene meglmara erimere yegl eria, dumo Sodom erme pai moglko we dugwa. 24Ba na ene di teiga, God yoba ka tage tenabuka igne, Sodom yoba yubun tau kebra dagl inaiglkwa ba ene yubun podo kaima inaiglmiwe di, Jisas yegl dugwa.
Jisas dugwa i, Yoba na moglmara wibi, deno muduno wida di inaiglmiwe dugwa
(Luk 10.21-22)
25Ana igne i Jisas kamage ere, yegl dugwa, Nina, ene kamun mitna ya makan gaba Nem Yagl motnga i, na ene kagn kade teiwa. Ene yoba tau mogl mitna edidre, bitno podo pamedi prikwa i kinano si gi di tedre, pre pogl si dinaiglmedi ersre, yoba gak kebra nomano pamere mere igwa i, pre pogl sinaiglmedi etniwa. 26Nina, ka kaima ene yegl etnga i, siragl pre enene wakai pitnere etnga.
27Na Nina taragl mudu na ogona mina edugwa. Te, na God Wam kaima siragl mere moglka i, yoba ta pre kan erekrikwa ba na Nina yene pre kan erukwa. Te, na Nina siragl mere kaima moglkwa i, yoba ta pre kan erekrikwa ba na ye Wam moglka i, nana pre kan erika. Te, na yoba ta i nogugl ede tenagledi prika i keme Nina pre kan eraiglkwa.
28Ene yoba ta kogon podo ere moglsre, yubun kake meglkwa i, na moglmara wio. Ene na moglmara wibi, na ene ir si praiglmedi ere tenaglka. 29Na mogl mitna edekre, yoba ere wakai ere teiga yoba moglka pre ene na mabunona bekio. I siragl pre ene na mabunona beke moglsre, duglo beglbi, ene kaima ir si prisre, deno muduno wida di inaiglkwa. 30I siragl pre na ene na duglo boraiglmara i, na ene yubun podo kake tenaiglmedi tekraglka. Taragl tau u dinabuka i keme ene kakenaiglmedi tenaluwe dugwa.
Currently Selected:
Matyu 11: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
