Matyu 14

Herot Jisas ye Jon moglmedi prukwa

(Mak 6.14-29, Luk 3.19-20, 9.7-9)

1Ana igne i Jisas kimagl ya kogon erukwa i, yoba di ede eigo, Gavana Herot prisre, 2ye niglmo kogonmo yoba yegl di togwa, Yagl Jisas i, ye Jon, nigl bugl togwa yagle goglkwa ikra, ye adigl u kor ogwa pre yobuglo paugo, kimagl yegl erumiwe di, Herot yegl dugwa.

3-4Ana Herot ye okna Jon si goglkwa i, kamo yegl paugwa, Herot okna ye agigle Filip ebie na ebina morabedi yugwa. Ye agigle ebie i, kagie Herodias. Ye abu Herodias yugo, Jon ye ege mere di te, yegl dugwa, Ene agitn ebie inga i, aglau etniwe dugwa. Jon yegl dugwa pre Herot ye si kane si i pi kane yugu edugwa. 5Edidre, ye si goragledi prukwa ba ye yoba kuduglno goglsre, tabre si goglkrukwa. I siragl pre yoba prikwa i, Jon ye God kamo kep yoba ta moglmedi prikwa.

6Ana aglke ta Herot mam ye kuglkwa egemo yogo, yoba kade wagle tau u makai si meglkwa. Makai si meglko, Herodias abuglo ede suna u, kagle egrukwa. Egruko, King Herot wakai kandre, 7abai i ka gigledi di padigl, yegl di togwa, Ene siragl ta kwian borabuka i, na di natn, ene tenaluwe dugwa. 8Yegl dugo, abai mam ye kina sidre, ka beke togo, ye Herot yegl di togwa, Ene yagl Jon, yoba ake nigl atne ede, nigl bugl togwa yagle ikra, nugu tabre gare ede, ye bre plet mina yu naratnedi priwe dugwa.

9Ana abai i yegl dugo, king kide prukwa ba ye ka giglede okna di paduglkwa ikra pre ya yoba di gaglkwa kan meglkwa gumuglno mina agai gogl dinagledi ye pra, abai i dumere yegl, erio di, ye soldiamo dedugwa. 10Ye soldiamo Jon kane yugu pamara pidre, ye nugu gare, 11plet mina ede yu abai i teigo, abai i ere mogl, Jon bre i pi mam togwa.

12Ana Herot ye Jon si goglko, Jon duglo beglkwa yoba u ye ogo nagie idre, pi maugl sigwa. Ye maugl si kodidre, u siragl taragl plau dugwa i, Jisas di teigwa.

Jisas bret ake buko didre, yagl 5,000 mere yegl meglkwa i, togwa

(Mak 6.31-44, Luk 9.10-17, Jon 6.1-13)

13Ana Herot ye Jon si goglkwa i, Jon duglo beglkwa yoba pi Jisas di teigo, prisre, ye duglo beglkwa yoba bogl yene moramnedi bakugl mina ede nigl Galili koglo ibo dumo wau yomara ta eigwa. Ba Jisas ede aglo mere ogwa i, digo, prisre, yoba mere kide yuguno toglno kide kodo, nigl nubun i winabo di, Jisas tegigl yenamnedi eigwa. 14Ana nigl koglo ibo plau digo, Jisas ede makandigle pidre, ye yoba mere kide wigwa i, kandre, mitno goglkwa. Ye mitno goglsre, ye tau kide sigwa i, ere wakai ere togwa.

15Ana Jisas yegl ere moglko, min panagledi erukwa. Eruko, Jisas duglo beglkwa yagl ede magigl pidre, yegl digwa, Dumo magigl i, yugu togl ta yeikruko, min pai kodugwa pre yoba i dedin, ede enaiglmedi prumniwa. Ye ede taun ya yugu togl yomara kaya mokna topo si nenaiglmiwe digwa. 16Yegl digo, Jisas di ikne ede, yegl dugwa, Yoba ede bage ta enaiglkwa i ta paikrukwa. Ene kaya mokna ta nenaiglmere teo dugwa. 17Jisas yegl dugo, ye duglo beglkwa yagl aglke kor yegl digwa, No bret 5-pela ya buglo bagle suo keme yomne digwa. 18Yegl digo, Jisas ye di te, bret 5-pela ya buglo bagle suo i, yu nario dugo, yu teigwa.

19Ana Jisas duglo beglkwa yagl ye bret ya buglo bagle yuigo, Jisas yoba mere meglkwa i di te, Ene kugl mina ame dio dugo, ye ame digwa. Ame di meglko, Jisas ye bret 5-pela ya buglo bagle suo ikra idre, kan heven ibo ede, God di wakai yei togwa. Di wakai yei tedre, ake buko didre, ye duglo beglkwa yagl yoba i pi tenaiglmedi te pai moglko, ye i pi teigwa. 20I pi teigo, yoba mudu neigwa, dano eruko, ye bret ya buglo bagle kawa te yogwa i, gade makai sidre, degigl gagl 12-pela gre kau sigwa. 21Ana yoba bret ya buglo bagle neigwa i, abu gak kerekrikwa ba yagl keme kerikwa i 5,000 mere yegl meglkwa.

Jisas nigl yaudomugl konbauna ede ogwa

(Mak 6.45-52, Jon 6.16-21)

22Ana Jisas ye duglo beglkwa yagl di tedre, Tabre ede bakugl mina pio dugwa. Enene ede okna pi nigl koglo ibo ebi, na yoba mere magigl meglkwa i, di pere pere edinaluwe dugwa. Yegl dugo, ye ede eigwa. 23Ana Jisas yoba di pere pere edidre, ye swara ede muglo pi kamage eragledi ede ogwa. Ana Jisas yene muglo ibo moglko, min paugwa. 24Min paugo, ye duglo beglkwa yagl ede u eglke pi nigl suna eigo, ir podo u, nigl si pepigl di bakugl guma mina sugo, bakugl enabuka mere manugwa. 25Igne i kamun tagenabuka magigl eruko, Jisas nigl yaudomugl egre, ede bakugl pamara magigl ogo, 26ye duglo beglkwa yagl kandre, kudugl podo gogl, grigle di, Yoba goglkwa ta kiamo umiwe digwa. 27Yegl digwa ba Jisas oglade yegl di togwa, Ene kiede mogl, kudugl goglkrio! Na wiwe dugwa.

28Ana Jisas yegl dugo, Pita ere mogl, yegl dugwa, Yagl Kade ene kaima unga panan, ene din, na nigl yaudomugl ene motnara unagliwe dugwa. 29Pita yegl dugo, Jisas, Ede wo! dugo, Pita baglkugl kide kodo, nigl yaudomugl ede Jisas moglmara enagledi ogwa. 30Ye kuno ere egre ogwa ba ye ir podo ugwa pre ye kudugl goglko, nigl i atne, atne edugo, ye kaglkane yei, Yagl Kade, na ere yo! dugwa.

31Pita ka yegl dugo, Jisas tabre ogo ede, ye akidre, yegl dugwa, Ene na pre mediglnga i, kebra paugwa. Ene siragl eruko, kinan suo yome? dugwa. 32Jisas yegl dugo, ye ede egli bakugl mina ebriko, ir ugwa i, oglade bu yogwa. 33Ir bu yogo, Jisas duglo beglkwa yagl meglkwa ikra kandre, Jisas kagie kade tedre, Ene ka kaima God Wam motniwe di, yegl digwa.

Jisas ede dumo Genesaret pidre, yoba kide sigwa i, mere kide ere wakai ere togwa

(Mak 6.53-56)

34Ana Jisas ye duglo beglkwa yagl bogl ede nigl koglo ibo dumo Genesaret we dimara i eigwa. 35Eigo, Genesaret yoba Jisas ikra umedi kandre, ka di wai digo, yoba dumo magigl yeimara i, mudu Jisas umedi prikwa. Prisre, yoba kide sigwa mere kidine auro yu ye moglmara edigwa. 36Edidre, ka gigle di, yegl digwa, Ene kanige etn we, yoba kide sigwa i, ene gaglnen puduo akibi, kideno bu yenabiwe di, yegl di prikwa. Ye yegl di prisre, yoba ira ta Jisas kuguglmo gaglmo akigwa i, ye kideno aragan erukwa.

Currently Selected:

Matyu 14: KB

Highlight

Compare

Copy