Matyu 28

Jisas adigl u kor ogwa

(Mak 16.1-10, Luk 24.1-10, Jon 20.1-18)

1Ana Sabat ege dudugo, Sande kamun tagenagledi eruko, Maria, dumo Makdala mam ikra Maria ta bogl Jisas kobuglo mur yeimara i, kanabugledi ubrika. 2Ubriko, imem podo ugo, angelo ta heven ibo kide kodo, ede atne u kobuglo podo ta kobuglo dra si kegl digwa ikra, ake nu si eglke edidre, kobuglo bolamugl ame di moglkwa. 3Angelo i, guma dra pogl dugwa i, kamun tai sugwa igne, pogl dumere yegl pogl dugo, ye kuguglmo gaglmo ama ais kruo yomere yegl, kruo kaima yogwa. 4Ana angelo i ugo, soldia tau kobuglo mur sugl kan meglkwa i, kudugl podo goglsre, nagino nuglo di, yage sidre, yoba geglkwa pai meglmere mere yegl pai meglkwa.

5Ana abu suo ede magigl ubriko, angelo yegl di togwa, Ene kudugl goglkriro. Ene Jisas ede prak mina si geglkwa i, dokibrika i, prika 6ba ye magigl i ta moglkrukwa. Ene u ye ogo nagie yeimara i, kaniro! Ye okna dumere yegl ere, adigl u kor omiwe dugwa. 7Te, ene tabre pi ye duglo beglkwa yagl yegl di teiro, Jisas goglkwa i, adigl u kor pidre, ede okna pi distrik Galili omiwa. Ene pi distrik Galili ye kanaiglmiwe di, yegl di teiro! Ana ka yegl mere ene di te kodiwe di, angelo i, yegl dugwa.

8Ana abu suo i, kudugl geglbrika ba gun podo yei, kobuglo mur yomara tabre kide kodo, muku di pi, Jisas duglo beglkwa yagl di tenabugledi ede ebrika. 9Ye ede pidre, Jisas tegigl yebriko, ye di te, Abu suo wakai we di togwa. Yegl dugo, abu suo u ye kagle akidre, Jisas kagie kade tebrika. 10Yegl eribriko, Jisas yegl di togwa, Ene kudugl goglkriro. Ene pi na agrama wagle yegl di teiro, Na ede distik Galili ena eiga. Ene u dumo i na kanaiglmiwe di, Jisas yegl dumiwe diro dugwa.

Soldia kobuglo mur sugl meglkwa i, ka kibi digwa

11 Ana abu suo i ede pi miurko, soldia tau ye kobuglo mur sugl kan meglkwa i, ede Jerusalem suna udre, taragl mudu plau dumere yegl tawa teigwa yoba bitno meglkwa i, di teigwa. 12Di teigo, tawa teigwa bitno yoba meglkwa i, ye Juda yoba kade bogl makai sidre, ka di kogl, mige silva tau mere yu soldia wagle tedre, 13yegl digwa, Ene yoba yegl di teo, No ugl pai mungo, ye duglo beglkwa yagle eduer u ogo nagie kunogl imiwe dio! digwa. 14Te, ene ugl paime dibi, gavana ta pran, no ye dem muduo aragan erabedi eramga pre ene yubun ta ikraiglmiwe digwa. 15Yegl digo, soldia wagle mige silva idre, yoba kade wagle di teimere yegl, yoba di teigwa. Yoba yegl di teigo, ka i wai dugo, Juda yoba mudu prikwa. Te, erme Juda yoba mudu ka i pre meglkwa.

Jisas duglo beglkwa yagl kogonmo eraiglmedi dedugwa

(Mak 16.14-18, Luk 24.36-49, Jon 20.19-23)

16Ana Jisas duglo beglkwa yagl 11-pela meglkwa i, ye ede distrik Galili pidre, Jisas ye muglo meglbi ta enaiglmedi dedimara i eigwa. 17Ye pi Jisas kandre, ye kagie kade teigwa. Ba tau ye Jisas kaima moglmo mo di, kinano suo yogwa. 18Ana Jisas ede magigl udre, ye di te, yegl dugwa, Na Nina taragl mudu heven ibo ya dumo makan mina meglkwa ya paigwa i, na bitno moratnedi narukwa. 19Yegl pre ene ede uglo koglo koglo pidre, yugobuno pere pere meglmara i pi ye na kana duglo boraiglmedi beke teo dugwa. Beke tedre, ye na Nina God ya na ye Wam moglka i ya Mudu Murubuglo kagno mina ye nigl bugl teo dugwa. 20Nigl bugl tedre, ka mudu ene duglo boraiglmedi beke teiga i, ye ama duglo boraiglmedi beke teo. Te, ene prio. Na ene bogl aimadi akie moramga. Ege erme munga i dudinan, okuo na ene bogl aimadi mogl pai moramniwe di, Jisas yegl dugwa.

Currently Selected:

Matyu 28: KB

Highlight

Compare

Copy