Matyu 7
7
Jisas ene yoba pere kan yubu sikrio dugwa
(Luk 6.37-38, 6.41-42)
1Ana Jisas yegl didre, ka ta ama yegl dugwa, Ene jas mere yegl moglsre, yoba kan yubu sikrio. Ene yoba pere kan yubu sibi, kowai God ene ama kan yubu si dinabiwa. 2I siragl pre ene siragl mere yoba ta kan yubu sinaiglkwa i, God ene ama kan yubu sinabuka. Te, ene siragl mere yoba wakai ere tenaiglmere mere yegl God kuno ere, ere ikne edenabuka.
3Ana siragl eruko, ene agitn gumuglo mina ede dekne kebra ta paugwa ibo kandre, ede mudu ta enene gumugln mina paugwa i kankre, dine? 4Ede podo ta ene gumugln mina pai moglko, ene kanige ere, agitn moglmara pi di te, Agra, na ede dekne kebra ta gumugln mina paugwa i, i meda edinaluwe dinga i, kuno ta erekrume dugwa. 5Ene mabuno kibi etnga. Ede podo ta gumugln mina paugwa i komono kana i meda edin, ene kan pogl sidre, ede dekne kebra ta agitn gumuglo mina paugwa i, i meda edinatnga kuno erabiwe di, Jisas yegl dugwa.
6Jisas yegl didre, ama yegl dugwa, Taragl tau God pre yenabuka i, ene agl tekrio. Te, bis nuguno wakai kaima ta yenabuka i, ene puk si bugla moraiglmara edekrio. Ene yegl eribi, ye bis nuguno i, egre atne edidre, kan ake te, ene sinaiglmiwe dugwa.
Yoba kamage eribi, God ye kamageno prabuka pre dugwa
(Luk 11.9-13)
7Yegl pre na ene di teiga, Ene taragl tau pre God agle di pribi, ene tenabuka. Ene taragl ta dokibi, ene kanaiglkwa. Te, ene dua mina sibi, God dua yauro tenabuka. 8I siragl pre yoba mudu God agle di prikwa i, ye dimere igwa. Te, yoba taragl ta doko meglkwa i, ye taragl i kanigwa. Te, yoba dua mina sigwa i, God ye dua yauro tomiwe dugwa.
9Ene gak nenoma meglkwa i, ene wano ta ere mogl, bret ta nenagledi prie dinan, ene ye kobuglo ta tenatno? 10Mo, ye buglo bagle pre dinan, ene ye toki ta tenatno? Ta tekratnga. 11Ene yoba kide meglkwa ba ene gagroma taragl wakai te kanimiwa. Yegl pre ene Neno Kade heven ibo moglkwa i, yoba ta ye di prabuka i, ye dumere ersre, tau ama i tebe ede tenabe dugwa.
12Yegl pre yoba ene mabuno siragl mere ta ere naraiglmedi pratnere i, ene mabuno mudu i, yoba ta ere to. I siragl pre God lomo ya ka kep yoba ka beglkwa i, mudu mem swara i pre dumiwe dugwa.
Togl dra kebra ya kade
(Luk 13.24)
13Ene togl dra kebra yenabara ede suna enaiglkwa. I siragl pre konbauna ta ede pi yoba u kide enaiglmara ogwa i, konbauna kade yogo, togl dra ama kade yogo, yoba mere konbo i mina ede eigwa. 14Ba konbauna ta ede pi kor moraiglmara ogwa i, togl dra kebra yogo, konbauna ama kebra yogo, eruko, yoba suom keme togl dra i kandre, eimiwe dugwa.
Jisas ye ka kep yoba kibi ene bakagl te dinaiglmiwe dugwa
(Luk 6.43-44, 13.25-27)
15Ene ka kep yoba kibi moraiglkwa i pre kan kun erio. Ka kep yoba kibi ene meglmara unaiglkwa i, yoba ye meda kanaiglkwa i, sipsip mere yegl meglmedi kanaiglkwa ba ye deno muduno suna i, agl are, ene si nenamnedi prikwa mere yegl moraiglkwa. 16Ka kep yoba kibi i, ene ye mogo siragl mere koraiglkwa i kandre, kan pogl sinaiglkwa. Yoba fik mogomo mo wain mogomo ta uramnedi praiglkwa i, ye pi ede kide ede kewan pamara ta pidre, mogomo ta urokraiglkwa. 17Mabuno swara i mina ede wakai paigwa i, mogo wakai keme koraiglkwa. Te, ede kide paigwa i, mudu mogo kide koraiglkwa. 18Ede wakai ta mogo kide korabuka i, kuno erekrabuka. Te, ede kide ta mogo wakai korabuka i, ama kuno erekrabuka. 19Te, ene prikwa, ede mudu ta mogo koraiglkwa paugwa ba mogo wakai ta koglkrikwa i, yoba wei atne edidre, pia si doga mina edigwa. 20Yegl pre ka kep yoba kibi moraiglkwa i, ye mogo siragl mere koraiglkwa i, ene kandre, ye kan pogl sinaiglmiwe dugwa.
21Yoba mere na di narsre, Yaglno Kade motniwe dinaiglkwa ba ye mudu ta God yoba kingno morabara suna pikraiglkwa. Yoba ta na Nina, kamin mitna moglkwa i, ye eraiglmedi prumere ta eraiglkwa i keme ede suna enaiglkwa. 22Okuo, ege kade ta plau dinabuka igne, yoba mere na di nare, yegl dinaiglkwa, Yagl Kade yo, no ene kagn mina ka kep ere didre, murubuglo kide di meda edidre, kimagl tau mere erumniwe dinaiglkwa. 23Yegl dibi, na di ikne edidre, Na ene kaima ta pre kan erekrika. Ene mabuno kide erikwa yoba meglkwa i, na moglmara kide kodo, ede pio! dinaluwe di, Jisas yegl dugwa.
Jisas ye yoba yugu keigwa pre ka ebrie dugwa
(Luk 6.47-49)
24Yoba ta na ka diga i prisre, duglo boglkwa i, na ye siragl mere moglkwa i di boglsre, ka ebrie ta dinariwa. Yoba ta nomane wakai paugo, yugu wakai ta keigwa mere yegl moglkwa. Yoba i, makan wake ede atne pidre, kobuglo pamara yugu guglo boglkwa. 25Okuo, kamun podo sugo, nigl podo ugwa. Te, ir podo udre, yugu i sugwa ba yugu i yage sikrukwa. I siragl pre yugu kegwa yaglmo i, kobuglo bolamugl kegwa. 26Ba yoba ta na kana prisre, sedinan, ye yoba ta nomane kide paugo, yugu kide ta keigwa mere yegl morabuka. Yoba i, yugu guglo wesan bolamugl yoko edidre, yugu keigwa. 27Yegl pre okuo, nigl kamun podo ta sidre, ir podo mage udre, yugu i ta sugo, yugu i tabre kaima yage sidre, u kide pi kodumiwe di, Jisas yegl dugwa.
28Ana Jisas ka yegl di kodugwa igne, yoba mere kide ye ka beke togwa pre meglkwa i, nagino keglkwa. 29I siragl ye ka beke togwa i, God lomo beke teigwa yoba dimere yegl ta dikrukwa. Ta manugwa. Ye yene kagie kade paugwa mere yegl dugwa.
Currently Selected:
Matyu 7: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
