Matyu 9
9
Jisas yagl ta ogo kagle mawa sugwa ere wakai erukwa
(Mak 2.1-12, Luk 5.17-26)
1Ana Jisas baglkugl mina ede kuglo pidre, ye ede nigl koglo ibo yene yugomugl ogwa. 2Ogo, yoba tau yagl ta ogo kagle goglkwa ye gagle ersre, boglo ere yu Jisas moglmara wigwa. Yagl wagle pre mediglkwa i, Jisas kandre, yagl kagle goglkwa i di te, Wana yo, gun yeo. Ene tadaglmenen gugl ede teiwe dugwa.
3Ana Jisas ka yegl dugo, God lomo beke teigwa yoba meglkwa i, ye nomano mina yegl di prikwa, Yagl i God agaimo inagledi ka kide dumedi prikwa. 4Yegl priko, ye deno muduno mina prikwa i, Jisas kwande kandre, yegl dugwa, Ene siragl pre nomano mina kide yegl prime? dugwa. 5Na siragl ka dibo yuwaglke panabedi prime? Yagl i di tedre, tadaglmenen gugl ede teie dibo, yuwaglke panabo mo yagl i di tedre, adigl, konbauna ede po dibo, yuwaglke panabedi prime? 6Na ene tadaglmeno gugl ede tekrabedi prikwa ba na Yoba Wam moglka i, yoba tadaglmeno gugl ede tenaglka kagna paugwa pre erme taragl ta eribo, kan pogl sinaiglmiwe dugwa. Jisas yegl didre, yagl kagle goglkwa ikra yegl di togwa, Ene adigl, kuguglnen akidre, ede kipanara po! dugwa. 7Yegl dugo, yagl i adiglsre, konbauna ede kipamara ogwa. 8Ede meda ogo, yoba kan meglkwa i, gagno kogl, God kagie kade tedre, God yoba kimagl eraiglmedi yobuglo togwa pamiwe digwa.
Jisas Matyu agle didre, Na duglo boglo dugwa
(Mak 2.13-17, Luk 5.27-32)
9 Ana okuo Jisas konbauna wan pidre, taks yugwa yagl ta taks imara ame di moglko, kanugwa. Yagl i, kagie Matyu we digwa. Ana Jisas yagl i kandre, ye di te, Na duglo boglo dugo, Matyu adiglsre, Jisas omara duglo bogl ede ogwa.
10Ana okuo Jisas ede Matyu kipamara pidre, kaya mokna nenagledi ame di moglko, taks igwa yoba yeigo, tadaglme erikwa yoba ama yeigo, Jisas duglo beglkwa yagl bogl akie kaya mokna neigwa. 11Ne meglko, Farisi yoba u kandre, Jisas duglo beglkwa yagl yegl di prikwa, Siragl pre ene tisano ye taks igwa yoba ya tadaglme yoba bogl kaya mokna akie neime? digwa. 12Yegl digo, Jisas prisre, di ikne ede, yegl dugwa, Yoba kide sikrukwa i, ye dokta moglmara enaiglkwa kuno erekrumiwa. Ba yoba kide sigwa i keme dokta moglmara enaiglkwa kuno erukwa. 13Ene pi God kamo bage ta bekenaiglkwa paugwa i, yegl dugwa, Na ene tawa naraiglmedi prikrika. Ene yoba pere mitno goraiglmedi priwe#9.13 Hosea 6.6 dumara i, pi bekenaiglkwa paugwa. Te, ene ama praiglkwa i, yoba du meglkwa i, na agle dinagledi ukrika ba na tadaglme yoba agle dinagledi wie dugwa.
Jisas yoba kaya mokna mawagl erikwa pre dugwa
(Mak 2.18-22, Luk 5.33-39)
14Ana okuo, Jon duglo beglkwa yagl tau Jisas moglmara udre, yegl digwa, No Farisi yoba bogl ege tau mere kaya mokna mawagl erumga ba siragl eruko, ene duglo beglkwa yoba kaya mokna mawagl erekrime? digwa. 15Yegl digo, Jisas di ikne ede te, yegl dugwa, Yagl abu ta bogl ibr, yagl i kunama bogl akie meglkwa i, kide praiglmo mo gun yenaiglme? Ye gun keme yenaiglkwa. Ba yagl i auro i ede enaiglkwa igne i, ye kabaglemo kaya mokna mawagl eraiglmiwe dugwa.
16Ana Jisas yegl didre, ka ebrie ama yegl dugwa, Yoba kuguglmo gaglmo goglo ta argla dinan, ye lap kor ta bogl i pi si boglkrabuka. I siragl pre lap kor i gugl sidre, argla di ede podo kaima enabuka. 17Te, yoba nigl wain kor ta morabuka i, ta i pi toide nigl mige goglo mina atne edekrabuka. Toide atne edenan, nigl wain kor i, poia didre, nigl mige goglo i si bla dinabuka. Yegl eran, nigl wain toide ede meda enan, nigl mige i ama ere kide erabuka. Yegl pre nigl wain kor ta morabuka i, yoba i pi toide nigl mige kor mina atne edibi, nigl wain ya nigl migi i, akie wakai yoko yomiwe dugwa.
Abai gak ta goglko, Jisas ye ere i kor edidre, te, abu ta Jisas gaglmo akugo, kidemo aragan erukwa
(Mak 5.22-43, Luk 8.41-56)
18Ana Jisas ye Jon duglo beglkwa yagl i bogl ka di meglko, Juda yoba ka mabuno yuguno ta sugl moglkwa yagl ta Jisas moglmara udre, yage kobragai pai, yegl dugwa, Na abra tagamadi goglkwa ba ene udre, ye akin, ye u kor enabiwe dugwa. 19Yegl dugo, Jisas adigl, yagl i bogl ede ebriko, ye duglo beglkwa yoba ama sika si ede eigwa.
20Ana konbauna eimara suna i, abu ta ye mokomugl ogwa. Abu i, kide sugwa i, abu ba kanimere yegl bugla yugu 12-pela bu yeikruko, aimadi kan pai moglkwa. Ana abu i, Jisas mokomugl u, ye kuguglmo gaglmo puduo yomara akugwa. 21Akidre, ye prukwa i, Na ye kuguglmo gaglmo keme akibo, kidena bu yenabiwe di prukwa. 22Ana abu i Jisas kuguglmo gaglmo akugo, Jisas kan ake te, ye kandre, yegl dugwa, Abra yo, ene gun yeo. Ene na pre mediglnga pre kidenen bu yomiwe dugwa. Jisas yegl dugo, ege i, abu i kidemo bu yogwa.
23Ana Jisas abu i ere wakai ere tedre, ede yagl kade ikra kipamara pi kanugwa i, yoba yugugl i, pu mige si, kai podo ere meglko, kanugwa. 24Kandre, yegl dugwa, Ene ede eglke eglke pio. Abai i goglkrukwa. Ugl keme pamiwe dugwa. Dugo, ye gauglmo podo erikwa. 25Yegl erikwa ba ye yoba di meda edigo, ye ede yugugl pi, abai i ogo akugo, abai i aduglkwa. 26Ana taragl yegl mere plau dugwa i, yoba di wai digo, yoba dumo magigl ta meglkwa i, mudu prikwa.
Yoba gumuglno kin yogwa ya ka dikrikwa i, Jisas ere wakai ere togwa
27Ana Jisas dumo i kide kodo, konbauna ede ogo, yagl suo ye gumuglno kin yogwa ye omara duglo bogl pidre, ka podo di, Devit Gawamo yo, no mitno goglo! dibrika. 28Yegl dibriko, Jisas ede yugugl ta yomara ogo, yagl suo okuo ebrika. Ebriko, Jisas ye di pre, yegl dugwa, Na ene ere wakai ere tenaglka kuno erumedi pre mediuro? dugwa. Yegl dugo, ye yegl dibrika, Yagl Kade yo, kaima no yegl pre meduluwe dibrika. 29Yegl dibriko, Jisas ye gumuglno mina akidre, yegl dugwa, Ene pre mediurka pre ene dibrere plau dinabiwe dugwa. 30Yegl dugo, ye gumuglno pine dugo, kor kanibrika. Jisas ere wakai ere tedre, ka gigledi di te, yegl dugwa, Taragl ta ene miurara plau dugwa i, ene yoba swara ta di tekriro! dugwa. 31Yegl dugwa ba yagl suo i ede meda pi, Jisas siragl mere erukwa i, di te ede ebriko, yoba dumo magigl ta meglkwa i, mudu prikwa.
32Ana yagl suo i ede meda ebriko, yagl ta murubuglo kide ye moglmara suna moglkwa ta auro yuigwa. Murubuglo kide i, yagl i ka dikrabedi eruko, ka dikrukwa. 33Ana Jisas murubuglo kide di meda edugo, yagl i, kor ka dugo, yoba mere magigl meglkwa i prisre, nagino keglkwa. Ye nagino koglsre, yegl digwa, Dumo Israel suna i, taragl yegl mere okna ta plau dugo, kankuniwe digwa. 34Yegl digwa ba Farisi yoba digwa i, Murubuglo kide bitno ta moglkwa ikra, yagl i yobuglo togo, ye murubuglo kide di meda edumiwe di, kenaglmo sigwa.
Jisas ye duglo beglkwa yoba di tedre, God kogonmo yoba dedenabedi kamage erio dugwa
35Jisas ye wan ede pi Juda yoba tauno ya dumono mudu pidre, ye ka mabuno yugu kei yeimara yugugl pi, yoba God kamo beke tedre, God yoba kingno mogl, suglno morabuka ka wakai i, yoba di togwa. Di tedre, yoba kide kane kane ya giugl kane kane prikwa i ama ere wakai ere tedre, erukwa. 36Ana yoba mere kide meglko, Jisas kandre, mitno kaima goglkwa. Ye kanugwa i, ye nomane sidre, yobuglno paikruko, wau beglmedi kanugwa. Kandre, sipsip suglno yoba ta moglkrimedi kan, 37ka ebrie ta duglo beglkwa yagl yegl di togwa, Kaya mokna mere kide de kodugwa ba yoba ta si suna edenaiglkwa i, kunabe meglmiwa. 38Kogon yoba kunabe meglkwa pre ene kaya mokna ere yaglkwa Yobamo kogon yoba mere dedenan, kaya mokna si yunaiglmedi kamage ere teo dugwa.
Currently Selected:
Matyu 9: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
