Mak 15

Jisas agre i pi, Pailat moglmara eigwa

(Matyu 27.1-2, 27.11-14, Luk 23.1-5, Jon 18.28-38)

1 Ana taganamogl, tawa teigwa yoba bitno meglkwa i yeigo, Juda yoba yobano kade ikra yeigo, te God lomo beke teigwa yoba ya yoba tau ama Kaunsil mina meglkwa i mudu tabre makai si, ka di keglkwa. Ka di koglsre, Jisas si kane si i pi gavana Pailat moglmara edigwa. 2Edigo, Pailat ere mogl, Jisas kira pogl pre, yegl dugwa, Ene Juda yoba kingno motno? dugwa. Yegl dugo, Jisas di ikne ede, Ene dinga i, kuno diniwe dugwa. 3Yegl dugo, tawa teigwa yoba bitno wagle ikra ere mogl, Jisas aglau kane kane erume digwa. 4Yegl digo, Jisas di ikne edekrukwa pre Pailat aglke kor yegl dugwa, Ene ta di ikne edekratno? Ene aglau kane kane etne digwa i, pitno mo prikitne? dugwa. 5Pailat yegl dugwa ba Jisas ka swara kaima ta di ikne edekrukwa pre ye nagie kogl, kina gudu moglkwa.

Pailat Jisas i pi ede prak mina si golo dugwa

(Matyu 27.15-26, Luk 23.13-25, Jon 18.39–19.16)

6 Ana bugla yugu swara swarade Juda yoba egeno kade i ugwa igne, Pailat ye Juda yoba taragl ta ere togwa. Ye kane yoba swara ta kagie daiglko, Pailat ye yoba i kane paikrabedi i meda edugwa. 7Ana igne i yagl ta kane yugu pai moglkwa, kagie Barabas we digwa. Yagl i ye yoba tau bogl ere mogl, Juda yoba mogl pere edinamnedi Rom yoba kuda bogl tedre, yoba tau si geglkwa pre ye yagl i, si kane sigo, kane yugu pai moglkwa. 8Ana yoba mere kide ege i yomedi prisre, Pailat moglmara pi, erumere ikra ere norabedi di prikwa. 9Ye di priko, Pailat ye yegl di togwa, Na ene Juda yoba kingno i meda edibo, wakai praiglmo? dugwa. 10Siragl pre Pailat yegl dugwa i, Juda yoba kade wagle ye Jisas yoko kiam sidre, ye na moglmara edigwa pamedi prukwa. 11Ana Pailat yegl di prukwa ba tawa teigwa yoba bitno meglkwa i, ye yoba mere makai simara mudu kinano sidre, Ene gavana di te, yagl Jisas i meda edekre, yagl Barabas ikra i meda ede noro, dinaiglmedi ka beke teigwa. 12Ka yegl digo, Pailat ye di pre yegl dugwa, Ana yagl Jisas, ye Juda yoba Kingno moglme digwa i, na siragl ere tenagle? dugwa. 13Yegl dugo, yoba mudu i, Ye ede prak mina si goglo! di, ka podo kaima digwa. 14Yoba yegl digwa ba Pailat aglke kor yegl dugwa, Ye mabuno kide siragl mere erukwa pre na ye si goragle? dugwa. Dugwa ba yoba ka podo aimadi di pai moglsre, Ye ede prak mina si goglo! digwa. 15Yegl digwa pre Pailat ere mogl, yoba mudu wakai praiglmedi yagl Barabas kane pamara i meda edidre, ye soldiamo Jisas duglnai sinaiglmedi di togo, ye duglnai sigwa. Duglnai sigo, Pailat ye i pi ede prak mina si golo dugwa.

Soldia Jisas kenaglmo sidre, ere kide ere teigwa

(Matyu 27.27-31, Jon 19.2-3)

16 Ana Pailat soldiamo i, ye Jisas agre i ede pi Pailat yugumo toglmo suna edigwa. Togl suna edidre, ye soldia tau mere ye akie kogon erikwa i, mudu agle digo, wigwa. 17Wigo, ye Jisas gaglmo gugl edidre, gagl olto ta gogl yogwa i ede teigwa. Ede tedre, kewan kagigle ake kegmane ere, king bitno gagl erimere yegl ye bre mina padigl teigwa. 18Yegl ersre, ye bakagl te, yegl digwa, Juda yoba kingno, no ene di wakai yei tomniwe digwa. 19Yegl didre, ye megagle kuba bre mina ege mere sidre, eur si ogo nagie mina ede, goglkono bodugl, bitno magide teigwa. 20Ana Jisas agai gorabedi ere kide ere te kodidre, lap gogl ikra gugl ede, Jisas yene gaglmo aglke kor ede ikne ede tedre, ye ede prak mina si goramnedi agre i ede meda eigwa.

Jisas ede prak mina sigwa

(Matyu 27.32-44, Luk 23.26-43, Jon 19.17-27)

21 Ana soldia wagle Jisas auro i ede taun meda eigo, yagl ta taun meda mogl, ede suna unagledi ugo, tegigl yeigwa. Tegigl yeigo, soldia ye Jisas edemo prak kake tenatniwe digo, kake i ede ogwa. Yagl i, kagie Saimon we digo, ye dumo Sairini nem ta moglsre, wam suo Aleksander ya Rufus we digwa.

22Ana soldia ye Jisas agre i ede pi dumo ta Golgota we dimara i, plau digwa. Kagie Golgota i, mem paugwa, Bre Yobuglo Dumo. 23Ye dumo i udre, nigl wain tau giugl marasin ta myr we digwa i bogl toide i swara edigwa i, Jisas nenabedi erikwa ba ye marasin i ta nekrukwa. 24Ta nekruko, soldia wagle ye Jisas ede prak mina si padiglsre, ye kuguglmo gaglmo swara swarade inamnedi kas mere yegl sigwa.

25Ana ye Jisas ede prak mina sigwa i, tagna mogl, 9 klok mere yegl yogwa. 26Te, yoba aglauno bogl padigl, padigl erimere yegl, Jisas pre ama yegl bogl padiglkwa, Juda Yoba Kingno moglmiwe di, yegl bogl padiglkwa. 27-28Ana ye Jisas ede prak mina simara i, kunogl gogl yoba suo ta ogo wo kra sidre, ta kodo kra akie si padiglkwa.

29Ana Jisas ede prak mina pai moglko, yoba konbauna iro ya erikwa i, ye kagie ere kide ersre, bitno pia si, yegl digwa, Aya, ene God yugumo si gur di atne edidre, ege suota mina kor kenagle dinga i, 30ene enene ere idre, ede prak kide kodo, ede atne wo! digwa. 31Kuno yegl tawa teigwa yoba bitno meglkwa i ya te, God lomo beke teigwa yoba ama Jisas kenaglmo sidre, yene di ikne ikne ede, yegl digwa, Yagl i, ye yoba pere ere yugwa ba ye yene ere inabuka i kuno ta erekrukwa paugwa. 32Ye God Kere Yugwa Yagle, Israel kingno kaima moran, erme ede prak kide kodo, ede atne wo do! Ede atne unan, no kandre, ye pre medramniwe digwa. Te, kunogl gogl yoba akie ede prak mina sigwa i, dimere kuno yegl Jisas kenaglmo si miurka.

Jisas goglkwa

(Matyu 27.45-56, Luk 23.44-49, Jon 19.28-30)

33Ana ermine belo mere yegl, dumo magigl i mim mudu ake wai di, pai mogl ogo, ade kwia 3 klok mere yogwa. 34Ana ade kwia 3 klok yogo, Jisas ka podo di, yegl dugwa, Eloi, Eloi, lama sabaktani dugwa. Ye ka dugwa i mabuno yegl paugwa, Na Godna, na Godna, ene siragl pre na mokon natne?#15.34 Giglage 22.1 dugwa. 35Ana Jisas ka yegl dugo, yoba tau magigl adigl meglkwa i prisre, Prio. Ye ka kep yagl Elaija agle dumiwe digwa. 36Yegl digo, yoba ta ye muku di ede pi giagin ta idre, wain nuglo ku erukwa tau giagin mina si bai, buko mina padiglsre, i pi Jisas moglmara bi di nenabedi togo, nogwa. Nogo, yagl i aglke kor yegl dugwa, Ana Elaija u, ye i atne edenabo mo edekrabo mo i, nono kanamniwe di, yegl dugwa. 37Ana Jisas yegl pai moglsre, ka podo ta didre, goglkwa.

38Ana Jisas goglko, lap podo ta tawa teigwa yugu yugugl kra keglkwa i, mitna ibo yei, suna wom si argla di ede ime u i koglo koglo edugwa. 39Yegl eruko, te, yagl ta soldia bitno moglkwa i, ye Jisas goglmara gumamugl adigl moglsre, Jisas siragl mere goglkwa i kanugwa. Kandre, yegl dugwa, Yagl i ka kaima God Wam moglmiwe dugwa.

40Ana Jisas goglkwa igne i abu tau ama kuri ta eglke iro mogl, kan meglkwa. Abu i, ta kagie Maria we digwa, dumo Makdala mam i moglko, te Maria ta, Jems Kebra ya Josep mano i moglko, te abu Salome ama moglko, erukwa. 41Jisas okna distrik Galili suna wanugwa igne, abu i ye duglo boglsre, ye ake ple di teigwa. Te, abu tau mere ama Jisas bogl akie ede dumo Jerusalem akie wigwa i ama ye goglkwa kan meglkwa.

Jisas ogo nagie i pi kobuglo mur yeigwa

(Matyu 27.57-61, Luk 23.50-55, Jon 19.38-42)

42Ana Jisas goglkwa igne i wakan kade tagna yenabuka pre yoba kaya mokna ya nigl, ede ki, ede yugugl ede yeigwa ege yogwa. Ege i yogo, min panagledi eruko, 43yagl ta kagie Josep we digwa i, ye dumo Arimatea nem ta moglkwa, ye ere mogl, kudugl goglkwa ake bi didre, ede Rom Gavna Pailat moglmara ogwa. Yagl i Kaunsil mina moglsre, yagl kade ta moglkwa. Te, ye ama God yoba bitno mogl, ye suglno morabuka ege i unabedi pre ye sugl moglkwa yagl ta moglkwa. Ana ye ede pi Pailat moglmara pidre, Jisas nagie i pi kobuglo mur yenagledi di prukwa. 44Yegl di pruko, Pailat ere mogl, Jisas ye tabre goglmo mo goglkrumo mo di, kina gudu prisre, yagl ta soldia tau bitno moglkwa ikra agle dugo, ugwa. Ugo, Pailat ye di pre, Jisas goglmo mo goglkrume? dugwa. 45Yegl dugo, soldia bitno moglkwa i Goglmiwe dugo, Pailat prisre, yagl Josep i di te, Jisas nagie pi i atne edo dugwa. 46Yegl dugwa pre Josep pi lap kruo olto ta topo sidre, Jisas nagie ede prak mina i atne ede, lap were tedre, ye i pi kobuglo mur ta yoba padramnedi pere yeimara i pi atne yogwa. Yedre, ye kobuglo podo paglkane ta ake nu si yu, kobuglo dra si kegl dugwa. 47Te, ye kobuglo mur yomara i, Maria, dumo Makdala mam moglkwa i yogo, Maria ta Josep mam ikra bogl akie kanibrika.

Currently Selected:

Mak 15: KB

Highlight

Compare

Copy