Ka Di Poglkwa 1
1
Ka Bre
1Ka magigl paugwa i, Jisas Krais ka di nogugl ede norukwa paugwa. Ana siragl tau tabre plau dinaiglkwa paugwa i, God ere mogl, Jisas di togwa. Ye Jisas di togwa i, Jisas prisre, ye niglmo kogonmo yoba di tenabedi ye di togwa. Ana God ye ka i Jisas di togo, Jisas ere mogl, angelo ta dedugo, angelo i na Jon, Jisas niglmo kogonmo yoba moglka i, di pogl narukwa. 2Di pogl naruko, na bogl atne ediga. God kamo siragl mere paugwa i, ya te Jisas Krais ka siragl mere di nogugl ede narukwa i ya te, na siragl taragl kandre, prisre, erika i, erme na kuno ere ene di tenagledi bogl atne ediga.
3Na God kamo kep ere boglka magigl i, yoba ta ka i, i pi yoba pere kere tenabuka yobamo i God ye ere wakai ere tedre, yoba ta ka i prisre, duglo boraiglkwa i, God ye ama ere wakai ere tenabuka. Na taragl mudu boglka i, tabre plau dinabuka pre ka i kere prio.
4-5Ene God yobama, provins Esia suna, taun kade 7-pela yomara suna meglkwa i, Na Jon, pepa magigl i, ene bogl teiga. Na prika i, God ya Jisas Krais yebr, te, God Murubuglo ye yobuglomo 7-pela paugwa moglkwa i, ye pra pra ene yoko kaima ere wakai ere tedre, deno muduno wida di padigl tenaiglmedi prika. God moglkwa i, ye okna ibo aimadi kamun moglsre, erme ama mogl pai moglsre, okuo yene ama unabuka. God Murubuglomo ye yobuglo 7-pela paugwa molkwa i, ye God siamo king yomara gumamugl moglkwa. Te, Jisas Krais moglkwa i, ye God kamo pamere di norukwa yagle moglkwa. Ye komnaye kana goglsre, adigl u kor ogwa te, erme king makandigle meglkwa i mudu i swara ede, Yaglno Kade moglkwa.
Ana nono aimadi kamin Jisas kagie kade tenamga paugwa. Nono tadaglme erumga pre kane pamgo, ye dem muduo norsre, ye bormaimo suru edumara i mina nono i meda edugwa. 6Te, ye nono kingno mogl, suglno moglmara nono i suna edidre, tawa teigwa yoba kogon erimere mere yegl, Jisas Nem God moglkwa i, nono ye kogonmo ere tenaiglmedi norukwa. Yegl pre ye kagie kade aimadi kamun tedre, ye nono Yaglno Kade moglmedi debie si pai moramga.
7Ene kanio! Jisas kamun kua mina ibo ede ikne unan, yoba mudu ye kanaiglkwa.#1.7 Daniel 7.13 Ye kuglage sigwa yobamo i ye umiwedi kanibi, te yoba yugobuno pere pere uglo koglo koglo meglkwa i, ye umiwedi kan, kudugl goglsre, kai podo eraiglkwa. Ye yegl mere unabuka. Kaima.#1.7 Sekaraia 12.10
8Yagl Kade God yegl dugwa, Na moglka i, na taragl mudu plau dinabedi ersre, te, na taragl mudu ama si dudinaglka moglka. Na okna ibo aimadi kamun moglsre, erme ama mogl pai moglsre, te okuo na nana unaglka moglka. Na yobuglna pai kawa togwa moluwe di, yegl dugwa.
Jon ye Jisas Krais kanugwa
9Na Jon moglka i, ene agro moglko, nono Jisas yobama munga i pre nono akie yubun idre, giugl akie prumga. Te, God nono kingno moglsre, suglno moglmara i, nono suna akie munga. Te, yubun imga igne akie adigl gigledi munga. Na God kamo yoba beke tedre, Jisas kamo yoba di pogl teiga i pre yoba na si kane si i pi ailan ta kagie Patmos we dimara i, edigo, na ailan Patmos suna i moglsre, ene pepa i bogl teiga.
10Ana ege swara ta Sunde ege Yaglno Kade egemo yogo, God Murubuglomo na moglmara si kau si naruko, na moknamugl i, yoba ta ka dugwa ba ye ka dugwa i, biugel be podo dumere mere yegl ka podo kide dugwa. 11Ye dugwa i, yegl dugwa, Ene siragl taragl ta kanatnga i, mudu buk mina bogl atne edidre, yoba ten, ye i pi pre mediglkwa yoba taun 7-pela makai sinaglmara i tebi, kerinaiglmiwe dugwa. Taun 7-pela i, Efesus ya Smerna ya Pergamum ya Taiataira ya Sardis ya Filadelfia ya Laodisia pre diwe di, yegl dugwa.
12 Ana na ira dumada di, na kan ake te, kaniga i, ken lam gol mina bekigwa 7-pela yogo, kaniga. 13Te, lam 7-pela yomara suna i, yoba ta adigl moglko, kaniga. Na ye kaniga i, ye Yoba Wam we dumga i moglkwa mere yegl kaniga. Ye gagl suna olto edidre, kumagl ta gol mina bekigwa i pirie mina de prak sugwa. 14Te, ye bre ya bre yugo i, kamin kua kruo pe sumere mere mo sipsip kruo yugono pe sumere yegl mere pe kaima sugwa. Sugo, ye gumuglo i, doga bauglo abuglage sumere mere yegl abuglage sugwa. 15Ye yegl mere moglko, na kandre, ye kagle ama pogl dumedi kaniga. Yoba ain bras doga mina gaglsre, ake wige digo, pogl dumere mere yegl pogl dugwa. Te, ye ka dugwa i, nigl podo kide ta mu dumere mere yegl ka podo kaima dugwa. 16Ye ogo wo kra, kugl kuri 7-pela ake moglsre, dra mina bainet ta ikne ikne nogwa ede meda ugwa. Te, ye guma dra ade ermine sumere mere abuglage podo sugo, na kaniga.
17Ana na yagl i kandre, yage kagle mina si, yoba geglkwa pai meglmere mere yegl pai moglka. Na yegl erika ba ye ogo wo mina na akidre, na yegl di narukwa, Ene kudugl goglkro! dugwa. Na moglka i, taragl mudu plau dinabedi ersre, te, na taragl mudu ama si dudinaglka moliwa. 18Na kor moglka. Na okna goglka ba ene kano! Na erme moglsre, te aimadi kamin ama kor mogl pai moraliwa. Te, yoba goraiglkwa mo kor moraiglkwa i, na nem yagl moglsre, yoba goglsre, ede aglo mere enaiglkwa i ama nem yagl moluwe dugwa. 19Yegl pre ene taragl tau kan kodinere yegl bogl atne edidre, te taragl tau erme plau dugwa i ya te, taragl tau okuo plau dinabuka i mudu bogl atne edo dugwa.
20Yagl i yegl didre, ama yegl dugwa, Na ogona wo mina kugl kuri 7-pela ake moglko, ene kanga i, ka padum mere paugo, mabunomo yegl mere paugwa. Pre mediglkwa yoba taun 7-pela makai si meglmara suna i, yagl 7-pela ene motnara unaiglmedi dedigo, u meglkwa i, kugl kuri i, ka padum mere yegl yagl 7-pela i, i nogugl edugwa. Te, ken lam 7-pela kanga i, pre mediglkwa yoba taun 7-pela makai si meglkwa ikra, i nogugl edumiwe di, yegl di narukwa.
Currently Selected:
Ka Di Poglkwa 1: KB
Highlight
Copy
Compare
Share
Want to have your highlights saved across all your devices? Sign up or sign in
Copyright 2015 New Tribes Mission
