Ka Di Poglkwa 15
15
Angelo 7 ye plet 7-pela gol mina bekigwa i, akigwa
1Ana na taragl ta ama kaniga, heven ibo diu podo ta eruko, na wai kugl, kan moglko, angelo 7-pela ibun 7-pela ake meglko, kaniga. Ye yubun 7-pela makadigle yoba tebi, dudinan, mokomugl i ibun ta ukrabuka. I siragl pre God dem podo kubrukwa i, ibun 7-pela i mina i nogugl edenan, dudunabuka.
2Te, na taragl ta ama kaniga i, mudi nigl mere yegl ta moglko, kaniga. Mudi nigl mere yegl ta moglmedi kaniga ba i mudi nigl moglkrukwa. Taragl glas mere yegl ta yogo, yomara suna ibo ama doga bauglo erukwa mere yegl kaniga. Te, taragl i tebe bolamugl i, yoba tau adigl moglsre, taragl gita mere yegl ta God ye togwa i, ake meglko, na kaniga. Yoba adigl meglko, kaniga i, ye agl bugla are ikra kagie kade tekre, ye kiamo beke padiglkwa paugwa i ama kagie kade tekre, te ye nambamo ama muno gane mere yegl ta ikre, yegl erikwa pre ye kuda yobuglo erikwa mere yegl paugwa.
3Ana yoba i adigl moglsre, giglage ta digwa. Giglage i, God niglmo kogonmo yoba Moses ikra, okna giglage dumere mere yegl didre, sipsip nagigle kagie kade tenamnedi giglage digwa. Ye giglage digwa i, yegl digwa,
Yagl Kade God yo, ene yobugln pai kawa togwa motnga i,
Ene kogon podo kide etngo, no kandre, nagino podo kunga.
Yugobuno pere pere uglo koglo koglo meglkwa i, ene ye kingno moglsre,
mabuno du ya mabuno kaima keme etnga.
4Ene swara den mudun pe kaima sugwa motnga pre
Yoba mudu ene kuduglnen goglsre, kagn kade tenaiglkwa.
Ene mabuno du keme ersre, yoba kot ere tenga i, i nogugl edinga pre
yugobuno pere pere uglo koglo koglo meglkwa i, ene motnara udre, kagn kade tenaiglmiwe#15.4 Giglage 86.9, 98.2, 111.2-3, Lo 32.4, Jeremaia 10.7
di, giglage yegl digwa.
5Ana okuo na kaniga i, God sel yugumo heven ibo yogwa i, dua yauro edigo, kaniga. God sel yugumo i, God lomo yugugl yogwa. 6Sel yugu i dua yauriko, angelo 7-pela ye yubun 7-pela makandigle yoba tenamnedi ake meglkwa i, ede meda wigwa. Ye kugugl gagl kruo, pe kaima sugwa edidre, kumagl gol mina bekigwa i, dano bage de prak sigwa. 7Ana taragl 4-pela sia king yomara meglkwa ikra, swarano ta plet 7-pela gol mina bekigwa i ake moglsre, angelo 7-pela i togo, ye igwa. God kor aimadi moglkwa i, ye dem kubrukwa i, plet 7-pela i mina atne kau sugwa mere yegl paugwa. 8Ana angelo 7-pela i ye plet igo, God ye abuglagemo podo sugo, yobuglomo podo kaima paugwa moglkwa i, ede inge ye moglmara ede egli pi, ye yugumo yugugl ake wai di, kau kaima sugwa. Te, yoba mo angelo ta ede God yugumo yugugl iro enaiglkwa i, kuno erekrukwa. Ye sugl meglbi, angelo 7-pela i ye yubun 7-pela ikra makandigle yoba te kodibi, ye okuo ede yugugl enaiglkwa paugwa.
Currently Selected:
Ka Di Poglkwa 15: KB
Highlight
Copy
Compare
Share
Want to have your highlights saved across all your devices? Sign up or sign in
Copyright 2015 New Tribes Mission
