Ka Di Poglkwa 4
4
Yoba heven ibo mogl, God kagie kade teigwa
1Mokomugl i, na kan mitna ibo ede kaniga i, heven ibo dua ta yauro edigwa yogo, kaniga. Kanigo, Yagl Kade okna ka podo kide, biugel be podo dumere mere yegl dugwa ikra, ye aglke kor ka podo yegl mere didre, Ene ede egli wo! dugwa. Ene ede egli un, na taragl tau okuo plau dinabuka paugwa i, ene obuno di tebo, ene kanatniwe dugwa. 2Yegl dugo, God Murubuglomo tabre na moglmara si kau si naruko, na kaniga i, heven ibo sia king ta yogo, yoba ta sia king i mina ame di moglko, kaniga.#4.2 Jon ye Yoba ta sia king mina ame di moglme dugwa i, God Nem pre dugwa. God Nem murubuglo moglko, ogo nagie ta paikrukwa ba Jon gumuglomugl erumara i, ye yoba mere yegl moglmedi kanugwa. 3Yoba ta sia king mina ame di moglkwa i, ye ogo nagie pogl di yogwa. Kobuglo ta jaspa we digwa i ya kobuglo gogl ta kagie konilian we digwa i, pogl dibrere mere yegl, ye ogo nagie mina yegl pogl dugwa. Ye ogo nagie mina yegl mere pogl dugo, te, sia king yomara titokubun ta bogl winabo dugwa ba titokubun i, kala kane kane paikrukwa. Kobuglo grinpela ta kagie emeral we digwa i yomere mere, titokubun i grinpela keme boglkwa. 4Te, sia king yomara i, sia 24-pela ama yei winabo digo, bitno yoba 24-pela ye sia i mina ame di meglkwa. Bitno yoba i, kugugl gagl kruo edidre, king bitno gagl gol mina bekigwa i, bitno mina edigwa.
5Ana sia king yomara kamun tai si ede meda pidre, kamun gur podo di moglkwa. Te, sia king yomara gumamugl i, ken lam 7-pela de paigwa. Ken lam 7-pela i, God Murubuglomo 7-pela i, i nogugl edigwa. 6Te, sia king gumamugl i, taragl ta yogwa, na mudi nigl mere yegl moglmedi kaniga ba taragl i nigl moglkrukwa. Glas mere yegl yedre, ais mere yegl pogl dugwa.
Ana sia king yomara magigl i, taragl 4-pela ama meglkwa. Ta sia king gumamugl moglko, ta mokomugl moglko, suo koglo koglo miurka. Taragl 4-pela i, mokono gumano, ogono nagino mina i, mudu gumuglno pai poria erukwa. 7Taragl 4-pela meglkwa i, ta komono moglkwa i, laion mere yegl moglkwa. Ta namba 2 moglkwa i, kau nagigle mere yegl moglkwa. Ta namba 3 moglkwa i, yoba gumano drano kunere mere yegl koglko, namba 4 moglkwa i, kua kigla mere yegl moglsre, pur dumedi kaniga. 8Taragl 4-pela i, ye mudu koyeno 6-pela paugo, ogono nagino mudu ya koyeno atne i ama gumuglno pai poria erukwa meglkwa. Ye etne ya eduer ka ege ege di moglsre, yegl digwa,
Yagl Kade God, ye yobuglomo pai kawa togwa moglkwa i,
Ye wakai kaima moglsre, dem muduo pe kaima sugwa.
Ye okna ibo moglkwa, erme moglkwa, te okuo ime aimadi kamin morabiwe#4.8 Aisaia 6.3
di, yegl digwa.
9Ana taragl 4-pela i ye God, aimadi kamun moglsre, sia king mina ame di moglkwa i kagie kade tedre, debie si, di wakai yei teigwa igne, 10bitno yagl 24-pela ikra God ye sia king mina ame di moglmara gumamugl yage kobragai padre, God ye kor aimadi moglkwa i kagie kade te, bitno gagl ama gugl edidre, pia si, sia king yomara gumamugl edidre, yegl digwa, 11Yaglno Kade God motnga i, yoba mudu ene kagn kade tedre, debin si, ene swara yobugln pamiwe dinaiglkwa i, kuno erume digwa. I siragl pre enene wakai pitnara i mina ene taragl mudu ere yengo, taragl kane kane meglkwa ya paigwa. Ene swara taragl mudu ere yenga yagle motniwe di, yegl digwa.
Currently Selected:
Ka Di Poglkwa 4: KB
Highlight
Copy
Compare
Share
Want to have your highlights saved across all your devices? Sign up or sign in
Copyright 2015 New Tribes Mission
