Ka Di Poglkwa 6
6
Sipsip nagigle ye kendel nuglo si dagimara sada bogl edugwa
1Ana na taragl yegl mere kan kodidre, taragl swara ta ama kaniga i, pepa ta kendel nuglo bage 7-pela si dagigwa ikra sipsip nagigle akidre, bage swara ta sada bogl edugo, kaniga. Sada bogl edugo, taragl 4-pela meglkwa ikra, swarano ta ka podo kaima Ene ede wo! dugwa. Ye ka yegl dugwa i, kamin gur dumere yegl, ka podo yegl dugwa. 2Ana ye yegl dugo, na pi kaniga i, hos kruo ta moglko, te yagl ta hos i au si moglko, kaniga. Yagl i, God ye king morabedi king bitno gagl ta togo, edidre, kibr akidre, yoba kuda bogl tedre, yobuglo eragledi hos au sidre, ede ogo, na kaniga.
3Ana na taragl yegl mere kandre, ta ama kaniga i, sipsip nagigle ere mogl, kendel nuglo si dage padiglkwa ikra bage 2 sada bogl edugo, na kaniga. Sada bogl edugo, taragl 4-pela meglmara suna i, ta namba 2 moglkwa i, Ene ede wo! dugwa. 4Yegl dugo, na pi kaniga i, yagl ta hos gogl ta au si ede ogo, kaniga. Yagl i, God bainet podo ta tedre, yoba makandigle meglkwa i ame wakai di mogl dinaiglmedi, ye kuda bogl, yene ikne ikne si goraiglmedi ero di yobuglo togo, ede ogwa.
5Ana na taragl yegl mere kandre, ta ama kaniga i, sipsip nagigle i ere mogl, kendel nuglo si dage padiglkwa ikra bage 3 sada bogl edugo, na kaniga. Sada bogl edugo, taragl 4-pela meglmara suna i, ta namba 3 moglkwa i, Ene ede wo! dugwa. Dugo, na kaniga i, hos kama ta moglko, yagl ta hos kama i au sidre, kaya mokna skel ta ake moglko, na kaniga. 6Na taragl i kan moglsre, taragl 4-pela meglmara suna i, yoba ta ka ta dugwa mere prika. Ye dugwa i, yagl ta hos au sugwa i, yegl di togwa, Kidan podo yenabedi etn, kugl wit ya bali mige podo borabuka. Yoba kogon ere ede ebi, min panan ye pidre, wit plet swara keme topo sinaiglkwa. Mo, bali inamnedi pribi, ye plet 3-pela keme topo sinaiglkwa. Ene kidan podo yegl yenabedi eratnga ba ene ede oliv ya ede wain ere kide erekitn, yoba oliv nuglo ya nigl wain ne pai moraiglkwa.
7Na taragl yegl mere kandre, ta ama kaniga i, sipsip nagigle ikra kendel nuglo bage namba 4 sada bogl edugo, na kaniga. Sada bogl edugo, taragl 4-pela meglmara suna i, ta namba 4 moglkwa i, Ene ede wo! dugwa. 8Dugo, na pi kaniga i, yagl ta hos didugwa ta au sidre, ede ogo, na kaniga. Yagl i, kagie Geglkwa we digwa. Te, yagl i ede ogo, yagl ta ama ye moko mina ogwa. Yagl i kagie Geglkwa Dumo we digwa. God yagl suo i, wan u ikne ikne pidre, makandigle yoba uglo koglo koglo meglkwa i tau mere kide kaima si gorabredi yobro togwa. Ye yoba mudu si bage 4-pela edidre, bage swara ta mudu si gorabrika mere yegl paugwa. Ye yoba si gorabrika i, tau bainet mina si goglsre, tau kidan mina ama si goglsre, kide mina ya agl bugla are drano mina pra, ye yoba mere kide si gorabredi yobro togo, ye ede ebrika.
9Ana sipsip nagigle ikra kendel nuglo bage namba 5 sada bogl edugo, na kaniga igne, tawa bogl ta heven ibo yogo, tawa bogl i mabunomugl yoba kiano tau meglko, kaniga. Yoba i, okna God kamo pre mediglsre, yoba God kamo di te meglkwa pre yoba ye si geglko, ye kiano erme tawa bogl mabunomugl meglkwa. 10Ye moglsre, ka podo di, yegl digwa, Yagl Kade yo, ene den mudn pe kaima sugo, ka kaima keme dinga motnga. Makandigle yoba no si geglkwa i, ene aunake ye ka tage tedre, ye erimara ere te ikne edinatne? digwa. 11Yegl digo, God ye swara swarade gagl suna kruo olto ta tedre, ye di te, yegl dugwa, Ene kuri ta mogl ir si prio! Pribi, ene agroma na kogona ere meglkwa ime, ene si geglmere mere yegl tau ama si goraiglkwa. Ye si goraiglkwa pai moglkwa i, si geglbidre, okuo na ye ere sinaluwe di, yegl dugwa.
12Ana na kan moglko, sipsip nagigle ikra kendel nuglo bage namba 6 ama sada bogl edugwa. Sada bogl edugo, imem podo kide ta makandigle ugo, ade abuglage sikre, ake mim eruko, ba ake gogl ere, ede u bormai mere yegl ogwa. 13Yegl eruko, te, ir magugo, ede fik mogomo bogl yeikre, yage simere yegl, kugl kuri kamin mitna ibo paigwa i, yage makandigle sigwa. 14Kugl kuri yage sigo, te yoba pepa ake pere i suna edimere mere yegl, kamun mitna ibo yegl pere ede pi yene imin daglko, ailan ya muglo meglbi makandigle paigwa i, mudu pra pra piga kar di, suglki wuglki erikwa.
15Ana taragl yegl mere makandigle plau dugo, yoba mudu ede pi muglo meglbi kobuglo paimara ya kobuglo mur atne pidre, teke paigwa. Yoba king meglkwa ya yoba kade meglkwa ya ami sugl meglkwa yoba ya yoba mige moni podo kan neigwa ya yobuglno podo paugwa i mudu teke paigo, te, yoba yoko meglkwa ya yoba tau ye yoba pere boino pai teigwa i pra, mudu teke paigwa. 16Teke pai, muglo meglbi ya kobuglo yegl di teigwa, Yagl ta sia king mina ame di moglkwa i ya sipsip nagigle dem kubrukwa i, no kan dinabriwa. Ene yage, si kegl di, no teke padilo! digwa. 17I siragl pre ye suo i, deno kubrisre, ka tage norabrika ege kade i, u kodugwa pre yoba swara ta adigl morabuka i kuno ta erekrumiwe di, yegl digwa.
Currently Selected:
Ka Di Poglkwa 6: KB
Highlight
Copy
Compare
Share
Want to have your highlights saved across all your devices? Sign up or sign in
Copyright 2015 New Tribes Mission
