Ka Di Poglkwa 8
8
Sipsip nagigle ye kendel nuglo si dagimara bage namba 7 sada bogl edugwa
1Ana sipsip nagigle ye pepa ta kendel nuglo si dagigwa ikra bage namba 7 sada bogl edugo, na kaniga. Sada bogl edugwa igne, yoba ya angelo ki heven ibo meglkwa i hap aua mere yegl, ka dikre, krede kaima meglkwa. 2Yegl eriko, na kan moglko, angelo 7-pela ye God gumamugl adigl meglkwa i, God ye swara swarade biugel ta togo, igwa.
3Ana ta ama kaniga i, plet ta gol mina bekigwa angelo pere ta ake idre, u aduglko, na kaniga. Te, God siamo king yomara gumamugl i, bogl ta gol mina beke edigwa yogwa. Bogl i, ede nuglo demene wakai erukwa i garamnedi beke edigwa yogo, angelo ta ugwa i u bogl yomara magigl adigl moglko, angelo ta ere mogl, ye ede nuglo demene wakai erukwa i, tau mere garabedi togwa. Ye taragl i garabuka i, God yobama kamage erikwa i idre, i suna suna ede, garabuka mere yegl paugwa. Ana yegl paugo, angelo i ye ede nuglo demene wakai erukwa i, tau bogl mina gaglsre, 4tau plet ake moglkwa i mina gaglko, ede inge i, God yobama kamage erikwa i bogl, God gumuglo mina ede egli ogwa. 5Ede inge ede egli ogo, doga ta bogl mina dogwa i, angelo i tau idre, plet gol mina i atne ede, pia si makandigle edugwa. Pia si makandigle edugo, kamun tai sidre, kamun gur podo dugo, mu kane kane dugo, imem ama ta ugwa.
Angelo 4-pela ye biugelno pu digwa
6 Ana taragl yegl mere plau dugo, angelo 7-pela ye biugel ake meglkwa i ere mogl, biugel pu dinamnedi erikwa.
7Angelo swara ta ere mogl, biugel namba 1 pu dugo, be dugwa igne, aragl mogo, doga drabie ya bormai bogl akie yage makandigle sigwa. Sigo, dumo makan ya ede paigwa i bage swarade mere de kodugo, bage suo mere yoko yogwa. Te, kugl makandigle paugwa i, mudu kaima de tege ere kodugwa.
8Ana angelo namba 2 ye biugel pu dugwa igne, taragl ta muglo meglbi mere yegl padre, doga de pai moglko, yage mudi nigl suna sugwa. Sugo, mudi nigl tau u bormai ogo, tau yoko moglkwa. Mudi nigl u bormai ogwa i, bage swara mere u bormai ogo, bage suo mere yoko moglkwa. 9Yegl eruko, mudi nigl atne taragl ta kor meglkwa mudu i, ama mere kide geglkwa. Taragl kane kane mudi nigl meglkwa i, bage swara mere mudu geglko, bage suo mere yoko mogl pai meglkwa. Te, sip ta nigl yaudomugl wan meglkwa i ama, ikne mudu kide eriko, ikne yoko yogwa. Bage swara ta mere yegl kide eriko, bage suo mere yoko yogwa.
10-11Ana angelo namba 3 ye biugel pu dugwa igne, kugl kuri podo ta ken mere yegl de paugwa i, kamin mitna ibo pai, yage si, nigl umara ya ogo beimara tau mere ere kide erukwa. Bage swara mere ere kide eruko, bage suo mere yoko meglkwa. Kugl kuri i, kagie Giu Erukwa we digwa. Nigl bage bage ere kide erukwa i, giu eruko, yoba mere kide nedre, geglkwa.
12Ana angelo namba 4 ye biugel pu dugwa igne, God ye ade ba ya kugl kuri abuglage wakai si dinaiglmedi ere kide ere togwa. Ere togo, kugl kuri ikne, bage swara mere yegl abuglage sikriko, ikne, bage suo mere yegl, abuglage si pai meglkwa. Te, ade sugwa i, ege swara swarade ere i suota edugo, swara ta ade abuglage sikruko, bage suo keme abuglage sugwa mere yegl paugwa. Ba paugwa i, ama yegl erukwa. Eduer ege swara swarade ere i suota edugo, swara ta ba dekruko, suo keme ba dogo, na kaniga.
13Ana na taragl yegl mere kandre, taragl ta ama kaniga i, kua kigla ta kamun mitna ibo pur di wogo, kaniga. Kua i pur didre, ama ka podo yegl dugwa, Yoba makandigle meglkwa i, yubun podo kide suota ye meglmara plau dinabuka pai moglmiwe dugwa. Angelo suota ye biugelno pu dinamnedi ere meglkwa i, ye pu dibi, taragl kide i plau dinabiwe di, yegl dugo, na prika.
Currently Selected:
Ka Di Poglkwa 8: KB
Highlight
Copy
Compare
Share
Want to have your highlights saved across all your devices? Sign up or sign in
Copyright 2015 New Tribes Mission
