Rom 1
1
Pol Jisas kogonmo ere wan moglkwa pre dugwa
1Na Pol, Krais Jisas niglmo kogonmo yagl moglka. God na ye dedugwa yobamo ta moratnedi na agle didre, ye kamo wakai yoba di tenatnedi na kere i pere edugo, moglka.
2Ka wakai i, ka kaima unabiwe di ye kamo kep yobamo di togo, ye okna ibo ye kamo du paugwa i mina bogl atne edigwa. 3Ka wakai i, ye Wam nono Yaglno Kade Jisas Krais pre paugwa. Jisas Krais yoba moglmere i we, King Devit gawamo moglkwa. 4Te, ye murubuglomo du paugwa i we, ye gogl adigl u kor ogwa igine, ye God Wam kaima mogl, yobuglomo podo paugwa ere i nogugl edugwa.
5No ye aposelma yoko kaima moraiglmedi noruko, no yoba mudu uglo koglo koglo Jisas pre medraiglkwa swara sika sio di tomgo, Jisas kagie wanugwa. 6Te, yoba mudu uglo koglo koglo meglmara i, Jisas Krais ene Rom yoba ama agle dugwa.
7Ene dumo Rom kipaigwa i, na pepa i bogl teiga. God ene dem muduo tedre, ye yobama du moraiglmedi agle dugo, meglkwa. Na prika i, Neno Kade God ya Yaglno Kade Jisas Krais, yoko kaima ene ere wakai ere tedre, deno muduno wida di tenabredi prika.
Pol dumo Rom kanagledi prukwa
8Na ka komono kana dinaglka i, yegl paugwa, Jisas Krais konbo yauro norumara na Godna di wakai yei teiga. I siragl pre yoba uglo koglo koglo ene Jisas pre mediglmedi ka podo di meglkwa.
9Na ege ege ene pre kamage erika God yene pre kan erukwa. God i na dena muduna bogl kogonmo ersre, ye Wam kamo wakai yoba di teiga. 10Na ege ege kamage erika i, konbo ta yenan, God wakai ta pran, na ene meglmara unagledi konbo ta yauro narabedi kamage erika. 11I siragl pre ene ka kaima kanagledi prika. U ene kandre, kiano mina ake ple di tebo, yobuglo inaiglmedi prika. 12Na prika i, na pre mediglka i, kandre, yobuglo ibi, te ene pre mediglkwa i na ama kandre, yobuglo ibo, ikne ikne deno muduno si gigle dinamnedi prika.
13Agrama abarama wagle, ene pre kan eraiglmedi prika i, na ege tau mere ene meglmara unagledi erika ba taragl ta ege ege si kegl dugwa. Na unagledi prika i, Jentail tau meglmara kogon erimere yegl, ene meglmara ama kogon eribo, mogo wakai korabedi prika. 14I siragl pre yoba Grik ka digwa mo di kankrikwa i mo, nomano podo paugwa mo du paigwa i, Jisas kamo di tenaglka dinau mere yegl pai moglmedi prika. 15Pai moglkwa pre ene dumo Rom meglkwa i, Jisas kamo wakai ene ama di tenagledi nomana aduglkwa.
Jisas kamo wakai i mina God yoba ere yugwa
16Na Krais kamo wakai yoba di tenaglka i, agai ta goglkraglka. I siragl pre ka i God yobuglomo podo atne paugo, yoba iramna pre medraiglkwa i, mudu ere inabuka. Ka i komono kana Juda yoba pidre, okuo Jentail yoba enabuka. 17Ka wakai i mina God du moglmere mere moramga i, ama i nogugl edugwa. Pre medramga keme. Kuno yegl mere God kamo mina okna ibo bogl, Yoba ta pre mediglbi, God ye yoba du meglmedi kanan, yoba i kor aimadi moraiglmiwe#1.17 Habakuk 2.4 di, yegl beglkwa.
Yoba mudu God mokono teigwa
18Ba yoba ta God mokono tedre, mabuno kide beglkwa i, God heven ibo mogl, mudu dem kubro tomere i nogugl edugwa. Yoba i, God kamo kaima yogwa i pre dinamnedi mabuno kide beglkwa. 19Te, God pre kan eraiglkwa God yene i nogugl ede togwa pre nogugl pai kodugwa. 20God dumo makan ere yogwa igne ede u erme pra, God taragl kane kane ere yogwa i yoba kandre, ye God kaima moglkwa ya yobuglo podo aimadi kamin paugwa i, kan pogl si kodigwa. God siragl mere moglkwa i, yoba gumuglno mina ta kankrikwa ba ye taragl ere yogwa i kandre, kan pogl sigwa pre ye ere mogl, No God ta pre kan erekune dinaiglkwa i, ka kaima kuno ta erekrukwa.
21Yoba i God pre kan erikwa ba ye God moglmedi kagie kade tekre, ye ama di wakai yei tekrikwa. Ta tekriko, ye nomano u kide ogo, ye nomano mina pre pogl sikre, du mere yegl erikwa. 22Ye nomano podo pame digwa ba ye du erikwa. 23Ersre, God aimadi kamun kor morabuka abuglagemo podo sugwa i, mokono tedre, yoba ege sugunagle meglkwa i kwiano bekidre, kua ya agl bugla ya gur toki kane kane kwiano bekidre, God agaimo taragl i tedre, kagie kade te wan meglkwa.
24Yoba yegl erikwa pre God ye tadaglme siragl mere deno muduno mina ta eramnedi prikwa i, eraiglmedi kanige erukwa. Kanige eruko, ye mabuno deglbi yogwa i ersre, yene ikne ikne ogono nagino mina agai mabuno erikwa. 25Ersre, God siragl mere kaima moglkwa i prakiure, ka kibi keme pre mediglkwa. God taragl kane kane ere yogwa i, ye kagie kade teigwa ba God taragl mudu Nem yagl moglkwa i kagie kade tekrikwa. Ba God aimadi kamun kagie kade i pai morabuka. Kaima.
26Yoba mabuno yegl beglkwa pre God ye kide kodidre, agai mabuno eraiglmedi kanige erukwa. Abu ama yagl bogl bogl swara panaiglkwa i kide kodo, mabuno paikrumere mere abu yene abu ake ikne ede igwa. 27Erimere kuno yegl, yagl ama abu bogl panaiglkwa mabuno pamere kide kodidre, yagl bogl panamnedi nomano adiglsre, agai mabuno erikwa. Eriko, ye topo kide ta inaiglmere ogono nagino mina igwa.
28Yoba i God siragl mere moglkwa i toruo sinabedi prikwa pre God ye moko tedre, nomano kide pamere sika sidre, mabuno paikrumere eraiglmedi kanige erukwa. 29Kanige eruko, yoba i mabuno kide kane kane ya, mabuno tom ya, bubuno geglkwa mabuno ya, kuda ikne mabuno ye nomano mina kau sidre, kigl nonga mabuno ya, yoba si geglkwa mabuno ya, ka kibi mabuno ya, yoba ere kide ere tenamga mabuno ama nomano kau sidre, kenaglno mabuno ya, 30mokono ka mabuno, God kide kanigwa mabuno ama nomano mina kau sugwa. Te, yoba kagno ere kide erikwa mabuno ya, yene kagno ake mitna edigwa mabuno kau sidre, mogl mitna edigwa mabuno ya, mabuno kide kor tau ama eramnedi nomano mina pre epigl ere, neno mano kano ama sedigwa. 31Te, ye nomano u kide ogo, ka dimara adigl moglkre, yoba deno muduno tekre, mitno goglkrikwa. 32God lomo du paugwa i, yoba mabuno yegl eribi, goraiglme dugwa ye prikwa ba ye prisre, ere pai meglkwa. Ere pai moglsre, yoba pere mabuno kide yegl beglkwa i, ye gun yei tedre, ama wakai erimedi kanigwa.
Currently Selected:
Rom 1: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
