Rom 11
11
Israel yoba tau pre medigl pai meglkwa
1Ana Israel yoba mere kide ye God mokono tedre, God ye konbauna ta si norumara i mina ukrikwa. Ye yegl erikwa ba God ye ka kaima Israel yoba moko te kodokrukwa. Israel yoba tau we, God kamo pre mediglsre, ye God yobama mogl pai meglkwa. Nana ama Israel yoba moglsre, God kamo pre mediglka pre God yobama meglmara i moglka. Na Abraham gawamo ta moglsre, Benjamin yugobunomo mina moglka.
2Israel yoba tau mere ye Jisas kamo ta pre mediglkrikwa i, God okna ibo ye yegl eraiglmedi pre kan ere kodugwa ba ye Israel yoba moko tekrukwa. Erme Israel yoba suom ta God kamo pre mediglmere kuno yegl, okna ibo ama yegl paugwa. God kamo kep yagl Elaija moglkwa igne, ye ama suom keme pre mediglkwa pre Elaija ye Israel yoba erikwa i kide prisre, God di togwa i, God kamo mina yegl paugwa, 3Yagl Kade yo, Israel yoba meglkwa i, ene kanen prikrikwa. Ye ene kanen kep yoba mudu si goglsre, tawa bogl ene tawa gagl tenamnedi yoba okna kiglkwa i ama si guru di atne edigwa. Na swara na ene mokona tekrika ba ye erme na ama na si goramnedi ere meglmiwe di, Elaija yegl dumiwe#11.3 Israel Yoba Kingno Buk 1 19.10, 19.14 di, yegl beglkwa. 4Ana Elaija ye God ka yegl di togwa ba God siragl mere di ikne edugwa i, ene pre meglmo? Ye yegl dugwa, Ene pitnga, Israel yoba mudu kaima God mokono teimedi pitnga ba i kuno erekrukwa. Kaima Israel yoba mere kide mokono narsre, god kibi ta kagie Bal we digwa i, kagie kade teigwa ba ye mudu mokono narekrikwa. Na yobanama, mokono ta narekrikwa i, yoba 7,000 mogl pai meglmiwe#11.4 Israel Yoba Kingno Buk 1 19.18 di, God yegl dugwa.
5Ana God okna ibo Israel yoba kowano awano yoko kaima ere wakai ere tedre, ye kere i pere ede kodugwa pre Israel yoba mudu God mokono tenaiglkwa i kuno erekrukwa. Ye mere God mokono tenaiglkwa ba suom ta pre medigl pai moraiglkwa. Elaija moglkwa igne, Israel yoba suom ta pre medigl pai meglmere yegl, erme ama Israel yoba swarade God mokono tekre, pre medigl meglkwa. 6Ana na diga, God ye okna ibo Israel yoba yoko kaima ere wakai tome diga ba God ye yoba yoko kaima ere wakai ere tome dumga i, nono pre pogl sinamga. Yoba mabuno wakai ta erukwa pre God ye ere wakai ere tenan, i mabuno pere paugwa. God yegl ta eran, nono God ye yoba i yoko kaima ere wakai ere tome dikramga. Ye mabuno wakai erumara i mina topo tome dinamga. Ba God mabunomo yegl ta paikrukwa. Ye yoba mabuno wakai ta erikwa pre ye ere wakai ere tekrukwa. Ye yoba yoko kaima ere wakai ere togwa.
7Ana Israel yoba mere kide ere mogl, no nono eun, yoba du moramnedi kogon podo erikwa ba God ye erimara i yoba du meglmedi kankrukwa. Israel yoba suom keme God konbauna si norumara i mina ta wigwa i, God ye kere i pere edidre, yoba du meglmedi kanugwa. Yegl erukwa ba Israel yoba tau mere pre mediglkrimara God ye kamo prikraiglmedi nomano si giglede togwa. 8God kamo okna beglkwa i ama mem swara i pre yegl dugwa,
God kamo prikraiglmedi ye nomano si giglede togwa.
Ye gumuglno kin yenabedi ersre,
kinano gi dinabedi eruko, ye erme pra, ka prikrimiwe#11.8 Lo 29.4, Aisaia 29.10
di, God kamo yegl dugwa. 9Te, King Devit ama okna ibo mem swara i pre yegl dugwa,
Yoba i ame di mogl, kaya mokna podo nedre, wakai munedi primara i,
God ye ere si, ere kide ere tenan,
ye mabunono kide i pre topo kide idre, yage sinaiglkwa.
10God ye gumuglno si kin yenan, ye ta kankraiglkwa.
Te, God ye yubun mere tenan, ye aimadi magi keme di wan moraiglmiwe#11.10 Giglage 69.22-23
di, King Devit yegl dugwa.
11Ana Israel yoba tau mere kide God konbaunamo mina ukrikwa i pre ye aimadi kamun meda meglbi, God ye kide kodinabo? Ta manugwa. Okuo Israel yoba nomane kor ibi, God ye ere wakai ere te pai morabuka ba erme ye God mokono teimara i mina Jisas kamo ede yugobuno pere pere meglmara i ogo, God ye yoba mere yugobuno pere pere meglkwa i, ere yugwa. God prukwa i, ye yugobuno pere pere ere ibo, Israel yoba kandre, kide pre, nomane kor inaiglmedi prukwa. 12Ana Israel yoba tadaglme ere, ka prikrimara i mina yoba uglo koglo koglo meglkwa i, Jisas kamo prisre, taragl wakai kaima igwa. Ba prio! Israel yoba nomane idre, ede ikne God moglkwa wibi, taragl wakai kaima plau dinabuka. Israel yoba ya yugobuno pere pere akie wakai kaima moraiglkwa pre diga.
13Na Israel yoba pre ka di moglka i, ene yoba yugobuno pere pere meglkwa i, pre pogl sinaiglkwa pre diga. God na kogon narsre, na dedugwa i, na Jisas kamo i pi yugobuno pere pere di tenatnedi na dedugwa. Ye kogon yegl naruko, na yugobuno pere pere meglmara ere wan moglka i, Israel yoba gumuglno mina kanaiglmedi ka ege mere di wan moglka. 14I siragl pre na prika i, God ye yoba meda meglkwa i, tau mere kide ere yugwa ka i na nina agrama Israel yoba di te moglbo, ye kide pre, God no ama ere inabedi pribi, na ka dinaglmara i ye tau agre ede ikne wiga mere yegl panabuka pre diga.
15Ene prio! Israel yoba ye God mokono tedre, Jisas kamo prakiurimara i, Jisas kamo ede uglo koglo koglo ogo, yoba mere kide uglo koglo koglo meglkwa i Jisas kamo prisre, ede suna u, God bogl deno muduno swara yeigwa. Israel yoba mabuno kide yegl erimara i, taragl wakai ene yoba meda meglmara i plau dugwa ba ye aglke kor nomane idre, Jisas kamo pre mediglbi, God ye i suna edenan, taragl wakai kaima plau dinabuka. Israel yoba gogl kodidre, adigl u kor eigwa mere yegl panabuka. 16Ede ta God edemo mere yegl ta panan, ede yogagle i ama God pre panabuka. Israel yoba kowano awano Abraham i, ede i mere yegl moglko, Israel yoba erme meglkwa i ede i yogagle mere yegl meglkwa. God ye okna ibo Abraham, ede mere yegl moglkwa i, ka kaima mere di te padiglsre, ama ye suglmo moglka. Yegl pre Israel yoba erme meglkwa, ede yogagle mere yegl meglkwa i, God ye ka okna di te paduglmara i pre ye suglno mogl pai moran, ye okuo nomane kor idre, ede suna unaiglkwa kuno erukwa.
17Na ede pre diga i, yegl pre diga. Abraham okna ibo moglkwa i, ye ede oliv mere yegl ta moglkwa. God ye okna dugwa i, Abraham gawama ere wakai ere tenagle dugwa pre ede yogagle ede mina nuglo wakai yumere yegl, Abraham gawama meglkwa i, ye ede yogagle mere yegl mogl, taragl wakai igwa ba God erme ede yogagle tau si buko di edidre, ene yugobuno pere pere, meda meglkwa i suna edugwa i, ede oliv are yogagle yu, ede mina si dagugwa mere yegl paugwa. Yegl pre erme Israel yoba ta munga i ya te, ene yugobuno pere, meda ta meglkwa i pra, God ye Abraham gawama ere wakai ere tenagle dumara i mina nono pra pra taragl wakai yumga. 18Yegl paugwa ba ene prio! Ene ere mogl, No Israel yoba againo yumga pre ye egre tomniwe di, ene yegl ta praiglkwa i kuno erekrukwa. Ene ede mere yegl moglkrikwa ba ede yogagle pere ta u ede mina si dagigwa mere yegl meglkwa. Ede i ta yogagle mina nuglo inan, kuno erekrabuka ba ede yogagle i, ede mina nuglo inan, kuno erabuka.
19Ana yoba ta prabuka i, God ye no yugobuno pere, meda munga i, i suna edenagledi Israel yoba ede yogagle mere yegl si buko didre, kide kodumiwe di, yegl prabuka. 20God ye kaima ede yogagle tau si buko didre, kide kodugwa ba mem swara ta paugwa pre erukwa. Israel yoba i ye Jisas pre mediglkrikwa pre yegl erukwa. Te, God yoba yugobuno pere, meda meglkwa i tau i suna edugwa i, ye Jisas pre mediglmara swara i pre i suna edugwa. Yegl pre yugobuno pere, meda meglkwa i, ye mogl mitna edumnedi prikre, God kuduglmo goraiglkwa kuno erukwa. 21Ene prio! Israel yoba ye Abraham gawama meglkwa ba ye pre mediglkrimara i, God ye kide kodugwa. Yegl pre yoba yugobuno pere, meda meglkwa i ta pre mediglkribi, God yoba i ama kide kodinabuka keme paugwa.
22God siragl mere moglkwa i, ene prio! Ye yoba tau ere wakai ere tedre, yoba tau dem kubro tedre, erukwa. Israel yoba ye mokono God teigwa i, ye dem kubro togwa ba ene yugobuno pere meda meglkwa i ye ama ene ere wakai ere togwa. God ye yugobuno pere pere meda meglkwa i ere wakai ere togwa ba yoba meda i, God yoko kaima yoba ere wakai ere togwa ka i pre mediglkre, mokono tebi, God ye ama ere wakai ere tekrabuka. Ye ede yogagle si buko di edumere yegl, ye kide kodinabuka. 23Te, Israel yoba we, ye tau mere pre mediglkrikwa ba ye ta nomane kor idre, pre mediglbi, God ye ede yogagle i suna ede, si dagumere yegl, ye i suna edenabuka. God yegl erabuka i, waragine paikrukwa. 24I siragl pre yugobuno pere, meda meglkwa i, ye oliv are yogagle mere yegl meglkwa ba God ye i suna edidre, ede mina si dage paduglkwa. Ye yegl erukwa i waragine pamedi pramga ba ye ere kodugwa. Yegl pre nono pre pogl sinamga. Israel yoba ta nomane kor idre, pre mediglbi, ye yene edeno mina aglke kor i suna edidre, si daginabuka kuno erukwa.
Israel okuo ede ikne unaiglkwa
25Agrama wagle, Israel yoba erikwa i, yoba mere pre pogl sikrikwa ba God di norukwa pre ene pre pogl sinaiglmedi prika. Ene pre pogl sinaiglme diga i, yegl pre diga, Israel yoba tau mere nomano gigle dugo, Jisas kamo prikrikwa ba ye nomano aimadi yegl ta gigle di pai moglkrabuka. Yoba yugobuno pere, meda meglmara yoba ta Jisas pre mediglsre, ede suna unaiglkwa i, mudu u kodibi, okuo Israel yoba ta moraiglkwa i, nomane kor idre, Jisas kamo praiglkwa. Yegl pre ene yugobuno meda meglkwa i Israel yoba againo yumnedi prisre, mogl mitna edumnedi prikraiglkwa. 26Okuo Israel yoba Jisas kamo pre mediglbi, God ye mudu ere inabuka. Okna ibo mem swara i pre God yegl dugwa,
Yoba Ere Inabuka Yagl i, ye dumo Jerusalem mina plau didre,
Israel yoba mabunono kide ere edenabuka.
27Ege i, na ka okna di te padiglmere ere,
Israel yoba tadaglmeno gugl edinaluwe#11.27 Aisaia 27.9, 59.20-21
di, God yegl dumiwe di, yegl beglkwa.
28Ana Israel yoba meglkwa i, ye Jisas kamo prakiurimara i, ye God kudamo ikna mere yegl meglkwa. Ye yegl erikwa pre Jisas kamo ede u yugobuno pere pere meglmara i ugwa. Yegl pre ene yugobuno meda meglmara taragl wakai plau di togwa. Ba God okna kaima ibo Israel yoba kowano awano kere yugwa pre ye kere yumara i, dem muduo te pai moglkwa. 29I siragl pre God yoba ta agle didre, yoko kaima ere wakai ere togwa i, aimadi ere wakai ere te morabuka. God nomane kor idre, ye ta kide kodokrabuka.
30Ene yugobuno pere, meda meglkwa i, okna God kamo duglo boglkre, meda meglkwa ba Israel yoba ye God kamo prakiurikwa i pre God aglke kor ene meglmara kogon podo ersre, ene yoko kaima ere wakai ere togwa. 31Te, ene okna erimere kuno yegl, erme Israel yoba ye God mokono tedre, meda meglko, God ene yugobuno meda meglkwa i yoko kaima ere wakai ere togwa. Ye ene ere wakai ere tomara i, Israel yoba kandre, nomane kor ibi, ye ama yoko kaima ere wakai ere tenagledi prukwa pre yegl erukwa. 32God ye yoba mudu, no Israel yoba munga i ya yugobuno pere, meda meglkwa i pra, nono ye kamo duglo boglkunga i pre kane panaiglmedi erukwa. Ye no kane panaiglmedi erukwa i, mem wakai ta paugwa pre erukwa. Nono mudu kane padre, yoba kide munedi prumun, ye nono mudu yoko kaima ere wakai ere inabuka i pre erukwa.
33God moglkwa i, ye nomanemo podo kide paugo, taragl mudu pre kan ere kodugwa. God ye kogon siragl mere eragledi prisre, erukwa i, nono yoba munga i ta pre pogl sinamga kuno erekrukwa. Ye yagl podo kaima moglkwa. 34God kamo okna ibo beglkwa i mina yegl beglkwa,
Yagl Kade nomanemo siragl mere paugwa i, yoba swara ta pre pogl sikrikwa.
Yoba swara ta ere mogl, God ka beke tedre, nomane tekrumiwe#11.34 Aisaia 40.13
di, yegl beglkwa. 35Te, God kamo bage ta mina ama yegl beglkwa,
Yoba ye taraglmo ta God togo,
God moglmara dina ta pamo?
Ta manga! Yoba taragl swara ta God tekrimiwe#11.35 Jop 41.11
di, yegl beglkwa. 36God swara taragl mudu ere yedre, te taragl mudu ama erme sugl mogl pai moglkwa. Yegl pre ye taragl mudu ere yomara i mina kagie kade inabuka paugwa. Nono munga i ama aimadi kamun God kagie kade te pai moramga. Kaima.
Currently Selected:
Rom 11: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
