Rom 14
14
Taragl kebra pre kigl nonga dikramga
1Ana yoba ta Jisas pre medrabuka ba ye ere mogl, Na siragl mere mogl pai eribo wakai panabumada di, kina suo yenabuka i ta moran, ene no agro ta moglmedi kan, ye di i suna edio. Ye di i suna edidre, kina suo yenabara i pre kigl nonga dikrio. 2Yoba ta nomane swara keme yenabuka i, ye mie nenamga i, aglau ta paikrumiwe di, pre pogl sinabuka ba yoba ta kina suo yenabuka i, ye pre pogl sikre, mie nenamga i, aglau pamiwedi prabuka. 3Yoba ta mie nogwa i, ye ere mogl, yoba ta nekrukwa i du erumiwe di, yegl ta prikrabuka. Te, kaya mokna keme nogwa yoba i ere mogl, mie nogwa yoba i God gumuglo mina aglau erumiwedi prikrabuka. God yoba i wakai kan kodugwa. 4Yoba ta ere mogl, yoba pere ta niglmo kogonmo yoba Kide etniwe dinabuka i, ye kogonmo ta paikrukwa. Yoba ta ye niglmo kogonmo ere togwa yoba i, yene Wakai etniwe dinabuka mo Kide etniwe dinabuka i, kuno erukwa. Kuno yegl mere, ene meglmara suna i, taragl tau yoba kinano suo yenabara i mina ene ikne ikne Kide etniwe dinaiglkwa i ta kuno erekrukwa. Yagl Kade swara ene mudu bitno moglkwa pre yene ene mogl pai eraiglmara ake kun ere tedre, Wakai erimiwe dinabuka keme paugwa.
5Na kaya mokna ya mie pre di kodiga ba na ka ta ama yegl dinaglka, yoba tau praiglkwa i, Wakan swara swarade, ege swara ta God egemo yomedi pre, ege i ye kagie kade tenamga pamiwe di, yegl praiglkwa. Te, yoba tau praiglkwa i, God kagie kade tenamga i, ege swara keme yeikrukwa, ege ege kuno keme yomedi, yegl praiglkwa. Pra, ye suo akie kinano suo yeikre, ye yene wakai ta praiglmere i, eraiglkwa paugwa. 6Yoba ta ege swara ta God egemo yomedi prukwa i, ye ege i, i pere ede, Yaglno Kade kagie kade tenagledi prukwa pre wakai erukwa. Te, yoba ta mie nogwa i, ye God di wakai yei tedre, nogwa pre ye Yaglno Kade kagie kade togwa. Te, yoba ta mie nekrukwa i, ye God na eratnedi prumere i eriedi prisre, ama God di wakai yei tedre, kaya mokna nogwa pre ye ama Yaglno Kade kagie kade togwa. Ye mabuno siragl mere ta erikwa i, u swara ogwa.
7-8Nono munga i, Yagl Yade yobama munga. Yegl pre nono kor mogl, wan moramga igne i no nono wakai moramnedi ere wan moglkramga. Yagl Kade kagie kade inabedi ere wan moramga paugwa. Te, Yagl Kade kagie kade inabedi goramga panan, ye pre ama goramga. 9Krais goglsre, adigl u kor ogwa i, ye nono mudu Yaglno Kade morabuka pre erukwa. Nono erme kor munga i mo agroma abaroma tau geglkwa i, Jisas swara nono mudu i swara ede, Yaglno Kade moglkwa.
10Nono swara swarade okuo God gumuglo mina adigl mun, ye swara nono mogl pai eunere i pre yubu sidre, Wakai etniwe didre, Kide etniwe didre, erabuka. Yegl pre siragl eruko, ene tau jas mere yegl munedi pre, agroma abaroma mogl pai erimara pre yubu sime? Te, siragl eruko, ene tau kan atne edidre, agroma abaroma du erimedi kanime? 11God kamo mina bage ta yegl beglkwa,
Na Yagl Kade moglka i, ene ka kaima di teiga,
Yoba mudu na gumuglnamugl goglkono bodiglsre,
na swara God motniwe di, yegl dinaiglmiwe#14.11 Aisaia 45.23
dugwa.
12Yegl pre nono pre pogl sinamga. Nono swara swarade siragl mere mogl pai eunere i, God gumuglo mina adigl mogl, di poramga.
13Ana nono swara swarade mogl pai eunere i, God moglmara di poramga pre ene ogono buglo si iro edidre, agroma abaroma ta yoba kide meglme digwa i, kide kodio. Mabuno i kide kodidre, enene mabunono siragl mere beglkwa i kan kun ersre, wan moraiglkwa. I siragl pre ene mabuno ta beglbi, agroma abaroma kandre, kide praiglkwa i mo ene eraiglmere yegl ta sika sidre, mabuno kide ta eribi, kuno ta erekrukwa.
14Na ka swara ta yegl dinaglka, na pre kan erika i, mie kane kane mo kaya mokna kane kane ta i nenamga i, aglau ta paikrukwa. Ka i, na drana mina dikrika ba nono Yaglno Kade Jisas i, yene dugwa pre na ka yegl diga. Yegl paugwa ba yoba ta ere mogl, taragl swara ta i nenabuka i aglau pamedi prisre, i nenan, ye pre ka kaima aglau paugwa. 15Yegl pre ene taragl swara ta i nen, agitn ta kandre, i kide yomedi kide pran, yegl mere i wakai ta paikrabuka. Ene agitn i den mudun tekitnga mere yegl panabuka. Krais ene agitn i pre goglkwa pre ene taragl ta i nenatnara i mina agitn ere kide ere tekro. 16Ene mie mo taragl ta i nenatnga i, ene aglau ta paikrumedi pre pogl sinatnga ba agitn ta kina suo yogo, ye pre pogl sikrukwa i kandre, ene tadaglme etnedi pran, ene ye kide pre dinabedi nekratnga ama wakai paugwa.
17God nono kingno mogl, suglno moglkwa i, ye nono kaya mokna siragl mere nomga mo nekunga i, ya nigl siragl mere nomga mo nekunga i ta pre yubun dekrukwa. Ye ta prukwa i, Mudu Murubuglo nono deno muduno mina kogon eran, nono mabuno du ersre, agroma abaroma bogl deno muduno swara yei, gun yei moraiglmedi prukwa. 18Yoba ta mabuno yegl ersre, Krais kogonmo eran, God kandre, wakai prabuka. Te, yoba ama kandre, wakai praiglkwa.
19Ana God nono mabuno yegl eraiglmedi prukwa pre nono ege ege deno muduno swara yenamnedi ersre, agroma abaroma yakenaiglmedi ake ple di tenamga. 20Ene mie mo kaya mokna ta i nenaiglmara i mina, God kogonmo ere kide erekrio. Mie kane kane mo kaya mokna kane kane nenaiglkwa i, aglau ta paikrukwa ba ene taragl ta i nebi, agro kandre, kide yomedi kide prabo mo yage sinabuka i, ene aglau erikwa. 21Ene agro kide prisre, yage si dinabedi mie mo wain nuglo mo taragl swara ta ene i nekribi, i wakai panabuka.
22Ene taragl kane kane ta i nenatnga i, ene pre pogl sidre, aglau ta paikrumedi pitn, i nenatnga. Ba ene agitn ta ene pitnere i sika sinabedi ake nu sikro. Ene swara i, God bogl miurara paugwa. Ene ere mogl, Na taragl kane kane i nenaglka i aglau ta paikrumiwe di, yegl prisre, kinan suo yekran, ene gun yedre, i nenatnga. 23Ba yoba ta kina suo yenan, ye mie mo ki ta i nenan, ye aglau erukwa. Ye i kide yomedi prisre, nogwa pre tadaglme erukwa. Te, mabuno kane kane eramga i, ama yegl paugwa. Nono ere mogl, mabuno ta eramga i wakai pamo mo kide pamo mo i pre pogl sikre, eun, tadaglme erumga.
Currently Selected:
Rom 14: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission