Rom 3
3
God ye ka dumara adigl moglkwa
1Yegl mere panan, Juda yoba nagino beglkwa i, ye taragl wakai ta imo? 2Taragl wakai mere igwa. Ta igwa podo paugwa i, God Juda yoba ye kamo sugl moraiglmedi togwa.
3Ba Israel yoba tau pre mediglkre, adigl gigle dikrikwa i we? Ye pre medigl adigl gigle dikrikwa i pre God ye kamo plau dinabedi eran, kuno erekrabo? 4Ka kaima ta manabuka. Yoba mudu ka kibi di, kano mina adigl morglkraiglkwa ba God ege ege ka kaima keme dinabuka. Yegl paugwa pre okna ibo yegl beglkwa,
God yo, ene ka siragl mere dinga i, yoba ene ka kaima keme dinedi praiglkwa.
Te, yoba ta ene kot ere tenagledi eran, ene ege ege win sinatnga keme pamiwe#3.4 Giglage 51.4
di, yegl beglkwa.
5Ba yoba tau ka yegl dinaiglkwa, No mabuno kide erumga i, God swara yagl du moglmedi i nogugl edumniwe dinaiglkwa. Ka yegl dibi, God no sugwa i, aglau erume dinamno? 6Kaima ta dikramga. God no sugwa aglau erume dumun, yoba mudu kot ere tenabuka kuno erekrabuka paugwa. 7Paugwa ba yoba i aglke kor didre, No ka kibi dumga i, God ka kaima keme dugwa pamedi kandre, kagie kade tenaiglkwa pame dinaiglkwa. Didre, No tadaglmeno kot ere norukwa kuno erekrume dinaiglkwa. 8Ba ka yegl dinamnedi pribi, Pra God kagie kade inabedi tadaglme mere kide erio do. Ba yoba nomane kide yegl paugwa i, God ye ka tage tenabuka kuno kaima erukwa. Te yoba tau na ama ka kide yegl dume di, kenaglna sigwa ba dikrika.
Yoba mudu tadaglme yoba meglkwa
9Ana nono siragl we dinamne? No Juda yoba wakai mungo, Jentail kide meglme dinamno? Ta manugwa! Na ene obuno di te kodiga. Juda ya Grik yoba akie tadaglme mina atne kane pamga. 10Mabuno yegl paugwa pre God kamo yegl dugwa,
Yoba du ta moglkrikwa. Swara kaima ta manugwa.
11Te, yoba ta nomane mina pre pogl sidre,
God doko kanagledi erukwa swara kaima ta moglkrukwa.
12Yoba mudu God mokono tedre,
Yoba mudu u kide pi kodigwa.
Yoba ta mabuno wakai boglkwa,
swara kaima ta moglkrukwa.#3.12 Giglage 14.1-3, Giglage 53.1-3
13Yoba drano i,
yoba geglko, kubuno erumere yegl, kubuno kide erukwa.
Ye drabino ka kibi dinaiglmedi beke teigwa.#3.13 Giglage 5.9
Toki kide yoba sumere mere yegl, ye yoba kenaglno kede sigwa.#3.13 Giglage 140.3
14Yoba drano mina yoba ta ere kide ere tedre, di kide keme yei teigwa.#3.14 Giglage 10.7
15Yoba ere mogl, yoba ta si goramnedi tabre wan u ikne ikne pidre, te,
16ye aglo mere eigwa i, yoba ere kide ere tedre,
yubun tedre, yegl keme erikwa.
17Te, ye yoba pere bogl deno muduno swara yei kankrikwa.#3.17 Aisaia 59.7-8
18Yoba God kuduglmo gogl kankrimiwe#3.18 Giglage 36.1
di, God kamo yegl dugwa.
19Yegl pre nono pre pogl sumga i, yoba God lomo atne meglkwa i, lo ye pre paugo, ye pre ama dugwa.
Yegl pre yoba mudu uglo koglo koglo meglkwa i God lomo prisre, God gumuglo mina tadaglme yoba munedi pre, drano si kegl di, ka ta di ikne edekraiglkwa pre paugwa. 20I siragl pre yoba ta God lomo mudu duglo boglsre, God gumuglo mina du morabuka, yoba swara ta moglkrukwa. God lomo i, yoba prisre, tadaglme eunedi pre kan eraiglkwa pre paugwa.
Yoba ta Jisas pre medran keme God gumuglo mina yoba du morabuka
21Du moglkramga ba God gumuglo mina nono erme yoba du moraiglmedi konbauna kor ta i nogugl ede norukwa. Konbauna kor i, God lomo duglo boramga i ta manugwa ba Moses ya ka kep yoba ka bogl atne edigwa i, konbauna i pre digwa i we, 22yoba Jisas Krais pre mediglbi, God ye du moglmere moraiglmedi erabuka. Yoba mudu pre medraiglkwa i, ye yegl ere tenabuka. Konbono pere pere ta yeikrukwa.
23I siragl pre yoba mudu pra pra tadaglme ersre, God yagl du kaima mogl, abuglagemo podo kide sugo, moglmara enamga i, yage sumga. 24Ba God yene wakai prumere ere wakai ere norsre, Krais Jisas nono topo si ikne edumara i mina God yoko kaima no yoba du meglme dugwa. 25Didre, yoba ira pre medraiglkwa i, ye kumapno Jisas moglmara edugo, ye bormaimo suru ede, tawano moglkwa.
I mina God yagl du moledi i nogugl edugwa. I siragl pre ye okna ibo yoba tadaglmeno kanige erukwa i, aglau erekrukwa. Ye Jisas okuo dedinagledi prisre, tadaglmeno si bi di togwa. 26Te erme God ye yoba du meglmedi kanugwa i, ama kuno erukwa. I siragl pre ye yoba kumapno yoko kide kodokrukwa. Ye mabuno du eragledi yoba Jisas pre mediglkwa i, ye kumapno Jisas tedre, ye yoba du meglme dugwa.
27Yegl paugwa pre taragl swara ta erumnara i mina kagino kade imno? Kaima ta ikrumga. Nono mabuno wakai bun, konbo ta yomo? Ta yeikrukwa. Nono Jisas pre medramga keme konbo yogwa. 28Yegl paugwa pre nono di kodinamga, God lomo duglo boglkramga ba pre medun keme God gumuglo mina du moramga.
29God Juda yoba Godno keme moglmo mo ye Jentail yoba ama Godno moglme? Ye ama Jentail yoba Godno moglkwa. 30I siragl pre God swara moglko, nagino beglkwa mo boglkrikwa i, pre mediglmara swara i mina ye yoba du meglmedi kanugwa. 31Ana nono Jisas pre medunga pre God lomo kogonmo ta paikrume dumno? Ta manugwa. God lomo kogonmo wakai pai moglmedi i nogugl edumga.
Currently Selected:
Rom 3: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
