Rom 5
5
God bogl deno muduno swara yomga
1Ana nono Jisas pre medunara swara i mina God nono yoba du meglmedi kan kodugwa. Yegl pre nono okna God kudamo ikne munga i, erme moglkrumga. Nono Yaglno Kade Jisas Krais kogon erumara i mina nono erme God bogl deno muduno swara yomga. 2Te, nono erme munga i, God nono ere kide erekre, yoko kaima ere wakai ere norumara i mina atne kra mogl kodumga. Mogl kodumga i, nono Jisas pre medungo, ye konbauna yauro norumara i mina nono ede suna pidre, munga. Moglsre te, nono okuo God abuglagemo podo sumara ye bogl akie wakai kaima moramga i, kaima yegl moramnedi prisre, gun podo yomga pre diga.
3Ana nono okuo God bogl akie moramga i pre gun yedre, te nono erme makandigle mogl, yubun yumga i ama gun podo yenamga. I siragl pre nono pre kan erumga i, nono yubun yumnara i, nono si gigledi norukwa. 4Yubun kane kane umara i, nono si gigledi noruko,yobuglo idre, kaglno mina adigl munga. Te, nono kaglno mina adigl munga igne, nono okuo God bogl wakai kaima moramnedi prumga ikra ama u gigle dugwa. 5Te, nono okuo God bogl wakai kaima moramnedi pre gi dumga i, u yoko ta enan, kide pramga mere yegl ta manugwa. Nono ka kaima ye bogl akie aimadi kamun wakai moramga i, nogugl paugwa. Nogugl paugwa i siragl pre God ye dem muduo siragl mere norukwa i, i nogugl ede kodugwa. Ye Mudu Murubuglo noruko, Mudu Murubuglo nono deno muduno mina kogon ersre, God dem muduo podo kide norukwa i, i nogugl ede norukwa.
6Ana prio. Nono okna meda kaima mogl, ede God moglmara enamga i, konbaunano ta yeikrukwa igne, Krais u nono God mokono tomga yoba munga i, ere inagledi goglkwa. 7Nono yoba mabunono siragl mere paugwa i, kamga. Yoba ta yoba du morabuka ba yoba pere ta ye ake ple di tenagledi gorabo mo goglkrabe? Ta goglkrabuka. Ana yoba swara ta wakai kaima moran, yoba pere ta ye ake ple di tenagledi gorabo mo goglkrabo mo i na ta prikrika. Yoba suom ta yegl eraiglkwa ba mere yegl ta erekraiglmedi prika. 8Nono yoba mabunono yegl ta paikrukwa ba God mabunomo pai pere edugwa. God ye Krais dedugo, u nono pre goglkwa i, nono yoba wakai mungo, u goglkrukwa. Tadaglme yoba mogl pai mungo, ye u nono pre goglkwa. God ye Krais nono ere inabedi dedumara i mina ye nono tadaglme yoba dem muduo podo norukwa i, i nogugl edugo, kamga.
9Ana nono erme pre pogl sinamga. Jisas ye bormaimo suru edidre, goglmara i, God ye nono yoba du meglmedi kan kodugwa. Yegl pre okuo God kor dem kubro noro, ka tage norabo? Ta manabuka. Jisas kogon erumara i mina nono ere i kodugwa pre nono okuo ka tage norabuka i ta kuno erekrabuka. 10Ene prio! Nono okna God kudamo ikne munga ba ye Wam goglmara i mina aglke kor nono yu yene moglmara magigl edugo, nono ye bogl deno muduno swara yei, akie munga. Jisas goglmara i mina God nono yu yene moglmara magigl edugwa pre Jisas erme adigl u kor pidre, kor moglmara i mina nono aimadi kamun wakai kaima moramga keme paugwa. God okuo nono ka tage norabuka i ta kuno erekrabuka. 11Yegl paugo, te nono Yaglno Kade Jisas Krais kogon erumara i mina nono erme God bogl deno mudu swara yei, akie munga i pre nono erme God gun yei tenamga.
Adam erumara i mina geglkwa mabuno yumga ba Jisas erumara i mina kor meglkwa i, yumga
12Ana okna ibo yagl Adam swara ye tadaglme erumara i mina tadaglme ede suna udre, yoba mudu uglo kogl koglo meglkwa i, bi di kodugwa. Te, tadaglme ede suna umara i, geglkwa mabuno akie ugwa. Adam erumara i, tadaglme ede suna ugo, yoba mudu uglo kogl koglo meglkwa i ama tadaglme erikwa pre ye mudu geglkwa. 13Oknayene ibo, God ye lomo yoba tekrukwa igne i yoba lo prikre, si biglke digwa ba tadaglme erikwa. God ye lomo yoba tekrukwa pre yoba i ye lomo si biglke dimedi bogl atne edekrukwa ba yoba i tadaglme erikwa pre 14ye mudu ama geglkwa. Adam komono kana tadaglme erukwa i, ye God lo ta togo, si biglke dugwa. Ana Adam moglkwa igne ede u Moses moglsre, God lomo idre, yoba togwa igne suna i, God lomo tekrukwa pre yoba si biglke dikrikwa ba ye ama tadaglme erimara mudu kaima geglkwa.
Ana, na yagl Adam pre diga i, ene prio. Yagl i mabuno swara ta erumara i, yoba mudu bi di kodugwa. Erumere mere kuno yegl, Jisas swara okuo udre, mabuno swara ta erukwa i, ama yoba mudu bi dugwa. Yegl pre Adam ye Jisas okuo udre, kogon erabere piksa mere yegl moglkwa. 15Adam erukwa i ya Jisas erukwa i, nono mudu bi dugwa ba ye eribrika i, mabunomo pai pere pere edugwa. Adam ye God lomo si biglke dugwa i ya Jisas yoko kaima nono ere wakai ere norukwa i, mabunomo pai pere pere edugwa pre diga. Adam ye God lomo si biglke dumara i, yoba mere kide geglkwa ba Jisas Krais dem muduo yoko kaima norsre, yoba ere yumara i, God yoba yoko kaima ere wakai ere norukwa mabunomo i, Adam erukwa i egre atne edidre, yoba mere kide ama no bi di kodugwa. 16Na di kodiga. Adam mabunomo i ya God nono yoko kaima ere wakai ere norukwa mabuno i, pai pere pere edugwa. I siragl pre yagl swara ta God lomo si biglke dumara i mina God yoba mudu dem kubro tedre, ka tage tenagle dugwa. Yegl dugwa ba ye aglke kor yoba ye lomo mere kide si biglke digwa i, ye yoko kaima ere wakai ere tedre, yoba du meglmedi kanugwa. 17Yagl swara ta God lomo si biglke dumara i, geglkwa mabuno ede suna u yoba mudu bi didre, nono bitno mere yegl moglkwa. Ba Jisas Krais kogon podo kide ere, Adam erukwa i egre atne ede togwa. Yegl pre Jisas kogon erumara i, God yoba yoko kaima ere wakai ere tedre, yoba ta ye du meglmedi kanugwa yoba i, ye aimadi kamun kor mogl, Jisas king mogl, taragl mudu sugl morabara i, ye akie sugl moraiglkwa.
18Ana na Adam ya Jisas pre diga i, erme di kodinaglka. Yagl Adam swara ere mogl, God lomo si biglke dumara God yoba mudu ka tage tenagledi di padigl kodugwa. Ba yagl swara ta okuo udre, mabuno du mina duglo bogl, kogon swara ta erumara i mina God yoba mudu du meglmedi kandre, ye kor aimadi meglkwa i tenabuka, kuno erukwa. 19I siragl pre yagl swara ta God kamo sedumara yoba mere kide ede u tadaglme yoba pi meglkwa ba yagl swara ta God kamo duglo boglsre, kogon erumara i mina yoba mere kide God gumuglo mina yoba du moraiglkwa.
20Ana God ere mogl, ye lomo yoba togwa i, yoko ta tekrukwa. Yoba tadaglme erikwa i, podo kide eunedi pre pogl sinaiglkwa pre togwa. Ye lo togwa i yoba prisre, tadaglme siragl mere paugwa i pre kan erikwa ba tadaglme ere ede podo eigwa. Yegl erikwa ba God ye yoba yoko kaima ere yugwa mabunomo i, ama ede u podo kide ogwa. Yoba swara ta tadaglme podo kide eran, God ye ere inabuka ta kuno erekrabedi pramga i ta manugwa. 21Yegl pre nono okna tadaglme mina atne mogl, gunere mere kuno yegl, erme God nono yoba du meglmedi kanugwa pre nono ye yoko kaima ere yugwa mabunomo i mina atne munga. Te, nono Yaglno Kade Jisas Krais kogon erumara i mina nono aimadi kamin kor moramga i, God noro kodugwa.
Currently Selected:
Rom 5: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
