Dɩtʋm 26
26
Pɔɔlʋ tawɩ gara wʋ wʋsɛ Agiripa asanaŋ
1Sɛ Juo Agiripa tawɩ Pɔɔlʋ sɛ, <<Nya wɩɛ gbɩɛ na nyaa tawɩ n wɩɛ.>>
Sɛ Pɔɔlʋ ŋɩrɛ ba pam sɛ wʋ fara wʋ a tawɩ wʋ a gara wʋ wʋsɛ sɛ, 2<<Juo Agiripa, ma yu asadi takɩɛ gʋ ma sɩmɩɛɩ nya asanaŋ jaŋ maa tawɩ ma wɩɛ maa gara ma wʋsɛ lɩɩna pʋɩ ŋii Yudatina mʋ baŋ maŋ na kpiniŋ. 3Fɔŋfɔŋ nya jiŋ Yudatina ayɩɛsa na ba noro wɩɛ kpiniŋ na dieli. Dɩmʋŋ dʋɔ maa sʋlʋ nyaŋ takɩɛ nya n yu digela, na nyaa nyii ma jaŋ.>>
4Sɛ Pɔɔlʋ ju dʋɔ tawɩ sɛ, <<Yudatina kpiniŋ jiŋ ganaŋkʋ ma cha ma chawʋ naŋ lɩɩ ma gɩchasɩtɩɛ, na ganaŋkʋ ma cha ma tɩŋtɩŋ ma dɩɛ naŋ na Yerusalem. 5Ba jiŋ maŋ taŋgɩlɛ, sɛ baa jawʋ na, baa dɩlɛ di seriya takɩɛ ma kpi dikpeŋ gaa gaa kpaŋ daa dɩtʋm dʋɔ na dieli sɛ ma chaɩ takɩɛ Farasi wʋkpa. 6Dɩtɩɛna lɩɩna ma tamaa gaa ma wɩɛna bʋrʋ gaa Ɩsʋɔ tawɩ si fa daa duluŋ na dʋɔ, sɛ ma sɩmɩɛɩ ɩɩ di ma wɩɛ jaŋ n na. 7Dɩmʋŋ Ɩsʋɔ tawɩ si ŋina sɛ Isirali buonɔsɛ gifi ala wɩɛna tamaa na baa na gʋ ŋii kɔŋ tɩba, dɩmʋŋ dʋɔ sɛ ba chɩdɩsɛ baa tʋŋ Ɩsʋɔ wiita na yuluma. O Juo, lɩɩna dɩmʋŋ tamaa gana dʋɔ sɛ Yudatina baa a pʋɩ maŋ. 8Be n yɩɛ sɛ ɩɩ lɩɛ ɩ di takɩɛ Ɩsʋɔ a feŋsi atatina?>>
9Sɛ Pɔɔlʋ ti tawɩ sɛ, <<Maŋ gba ma lɩɛ di takɩɛ dɩ daga maa yɩɛ bʋrʋkʋma gaa maa dɩlɛ yɩɛ mʋ chicha Yesu Nasarati wʋkpa wʋŋ yɩrɛ gaa. 10Sɛ dɩmʋŋ gba sɛ ma yɩɛ Yerusalem. Ma yu yikuo lɩɩ Ɩsʋɔ sei bɩnɩɛ baa jaŋ takɩɛ ma n chaŋ Ɩsʋɔ bakpa dɩchɩrɩchɩrɩ kpiniŋ ga tɔ danɛ, sɛ ma kpa takɩɛ ba n kʋ ba. 11Maa dɩlɛ maa ju Yudatina tʋm danɛ garɛ naŋ mʋ ju garɛ naŋ maa chaŋ ba maa fɔŋɩ ba dɩla, sɛ maa ŋɩrɛ ba sɛ baa tawɩ mbusu wɩɛ. Gʋ maa kara biŋbira ba dʋɔ na dieli na dʋɔ, maa kpaŋ ba maa ju mʋɔra dɩɛsɛ dʋɔ maa nyala ba.>>
Pɔɔlʋ tawɩ ganaŋkʋ wʋ lɩɛ Yesu di
Dɩtʋm 9:1-19; 22:6-16
12Sɛ Pɔɔlʋ ju dʋɔ tawɩ sɛ, <<Dɩmʋŋ gbɩɛsɛ ju ŋina garɛ tɩba gaa ma lɩɛ tanɛ lɩɩ Ɩsʋɔ sei bɩnɩɛ baa jaŋ gaa ga fa maŋ yikuo na gbɩɛ sɛ ma n ju Damasiko. 13O Juo, aja yɩɛ wiita keŋkeŋ gʋ ma dɔŋ na gbɩɛ na, ma na ŋmaŋi garɛ lɩɩ Ɩsʋɔ adugbe, gaa ŋalagi kii wiita sɛ ga kɔŋ gaa ŋalagi logo maŋ na ma dɔŋa. 14Daa kpiniŋ dɩ lɩɩ sala sɛ ma nyii gʋ lofu garɛ a tasɛ maŋ Aramiki#26:14 Ɩsʋɔ Sabɩɛwɩɛ ŋarɛ wɩɛna Hibiri dɩtawɩ. dɩtawɩ naŋ sɛ Sɔɔlʋ, Sɔɔlʋ, be n yɩɛ sɛ nyaa nyala maŋ? N jiŋ sɛ nyaa nyala maŋ bɛ, nyaa nyala n tɩŋtɩŋ n wʋsɛ bɛ.>>
15<<Dɩmaŋ sɛ ma tasɛ sɛ Kpaŋjuo, nyaŋ n nyina Mmʋɔ? Sɛ Kpaŋjuo lɩsɛ nʋɔ sɛ Maŋ n nyina Yesu wʋŋ nyaa nyala na.>>
16<<Dɩtɩɛna kʋlʋ sɩŋ n nafara dʋɔ, ma lɩsɛ ma wʋsɛ kalaa nyaŋ na maa lɩɛ nyaŋ takɩɛ tʋmɩrɛ, na nyaa di ŋii nya na lɩɩ ma dʋɔ na ŋii maa kalaa nyaŋ na dʋɔ seriya. 17Maa lɩɛ nyaŋ lɩɩ n tɩŋtɩŋ nya bakpa na baa ba ba yɩɛ Yudatina pamɩɛ naŋ. Maa kpiri nyaŋ ba jaŋ 18na nyaa ga fulu ba asa, na nyaa lɩsɛ ba lɩɩ giteŋteŋbiri naŋ kɔŋ ŋmaŋi naŋ. Na nyaa lɩsɛ ba lɩɩ Sɩtanɩ doŋ naŋ kɔŋ Ɩsʋɔ jaŋ, ganaŋkʋ lɩɩna lɩɛdi gaa ba wɩɛna ma tɩba na dʋɔ baa yu dɩsʋbʋ mʋ chɩɛ na dɩchatɩŋ baa ba yɩɛ dɩchɩrɩchɩrɩ na tɩba.>>
19Sɛ Pɔɔlʋ ti tawɩ sɛ, <<Dɩmʋŋ dʋɔ, Juo Agiripa, ma n yɩɛ dɩlɛ naŋ doŋ fa Ɩsʋɔ lɩsɛ kalaa gaa ga lɩɩ Ɩsʋɔ adugbe na a. 20Ma chɩŋkpɩɛ tawɩ wɩɛ ŋii fa baa ba wɩɛ Damasiko, Yerusalem na baa ba wɩɛ Yudiya na kpiniŋ, na baa ba ba yɩɛ Yudatina na gba. Ma tawɩ ba sɛ ba n biliŋi lɩɩ ba dɩsʋbʋ naŋ kɔŋ Ɩsʋɔ jaŋ, na ba ayɩɛsa a kalaa takɩɛ ba biliŋi lɩɩ ba dɩsʋbʋ naŋ. 21Ŋina dʋɔ sɛ Yudatina baa chaŋ maŋ Ɩsʋɔ tʋm danɛ naŋ baa ja baa kʋ maŋ. 22Ama Ɩsʋɔ n chɔna maŋ gaa tala jaŋ gɩyɩɛ gana, ŋina dʋɔ sɛ ma sɩmɩɛɩ jɩna maa di seriya maa fa ba kpari na baa ba ba yɩɛ ba kpari. Ŋii maa tawɩ na ŋii Ɩsʋɔ bajana na Mosesi tawɩ sɛ ŋii kɔŋ na yɩɛ bʋdʋŋdʋlʋŋ bɛ. 23Ŋii n nyina sɛ Kirisito wʋŋ aja na awʋrʋfʋɔ, na wʋ a yɩɛ feŋ lɩɩ sɩŋ naŋ asanaŋtɛ. Na wʋ a jɔ ŋmaŋi gaa dawuta fa wʋ tɩŋtɩŋ wʋ bakpa na baa ba ba yɩɛ Yudatina na kpiniŋ.>>
24Gʋ Pɔɔlʋ ju dʋɔ wʋ a tawɩ wʋ a gara wʋ wʋsɛ na, sɛ Fesito kara wʋ nʋɔ dʋɔ kuusi tawɩ sɛ, <<Pɔɔlʋ, n nyi warɩɛwʋ. N tanɛ jim fɔɩ yela sɛ nya kili jɩtɩrɛ.>>
25Sɛ Pɔɔlʋ lɩsɛ nʋɔ sɛ, <<Fesito wʋkpari, ma aa kili jɩtɩrɛ ɛ. Maa tawɩ gasiŋteŋ na kpiŋjim wɩɛ bɛ. 26Juo n jiŋ wɩɛ ŋina dʋɔ, maa dɩlɛ yu digela tawɩ fa ɩ. Sɛ ma lɩɛ wɩɛ ŋii wʋ tawɩ na di ŋii ma tawɩ na ŋarɛ n wɩsɛ nyaŋ ŋ, akala takɩɛ ba n yɩɛ ŋɩ ŋarɛ asɩrɩ naŋ ŋ. 27Juo Agiripa, n lɩɛ Ɩsʋɔ bajana baa di? Ma jiŋ gʋ n lɩɛ di.>>
28Dɩmaŋ sɛ Juo Agiripa tasɛ Pɔɔlʋ sɛ, <<Nyaa fa nfɩɛrɛ sɛ nyaa dɩlɛ mʋ saŋa ga guŋ gana tawɩ na maa lɩɛ wɩɛ ŋii nyaa tawɩ maŋ di na maa yɩɛ Kirisito wʋkpa bɛ yaa?>>
29Sɛ Pɔɔlʋ lɩsɛ nʋɔ sɛ, <<Saŋa ga guŋ naŋ bɛ o, aja taŋgɩlɛ bɛ o, maa jɔ dɩga maa fa Ɩsʋɔ sɛ naa n nyiŋeŋ ŋ, ama baa baa nyii ma wɩɛ jaŋ na kpiniŋ a kɩɛna takɩɛ maŋ, amʋɔ baa n baa mʋ agbaraŋgbaraŋ ŋina pɔgʋ ba.>>
30Sɛ Juo wʋŋ na Roma bɩnɛ wʋŋ wʋ a kɩɛ Isirali tibi dʋɔ na Benisi, na baa ba chaɩ dɩmaŋ na kpiniŋ kʋlʋ. 31Ba lɩɩ danɛ gaa naŋ yela baa tawɩ dɔŋa jaŋ sɛ, <<Baalɛ wina ba aa yɩɛ bʋrʋ gaa ga daga gʋ ba n kʋ ɩ, yaa ba n tɔ ɩ danɛ ɛ.>>
32Sɛ Agiripa tawɩ Fesito sɛ, <<Sɛ baalɛ wina n sʋlʋ sɛ Juo Kayisa n di wʋ wɩɛ na, nafʋɔ dɩɩ yela ɩ.>>
Currently Selected:
Dɩtʋm 26: CLL
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy amp Bible Translation
