Luka 19
19
Yesu na Sakiyosi
1Yesu jʋʋ Yeriko dɩɛ naŋ mʋna wʋ a lam. 2Baalɛ wʋrʋ baa yagɛ ɩ sɛ Sakiyosi wʋŋ wʋ yɩɛ lampo lɩɛra bɩnɛ, sɛ wʋ wɩɛna akpaŋta na cha wʋ wɩɛ dɩmaŋ. 3Wʋ cha wʋ a ja sɛ wʋ a na wʋkpa wʋŋ Yesu yɩɛ na, ama jama baa dʋɔ wʋ n dɩlɛ na ɩ ɩ. Akala takɩɛ wʋ yɩɛ wʋkpa guŋ bɛ. 4Dɩmʋŋ dʋɔ wʋ se ju asanaŋ ga jiŋ sikamo daŋ na wʋ a yu gbɩɛ na Yesu, akala takɩɛ dɩmaŋ sɛ Yesu aja mʋna.
5Gʋ Yesu tala daŋ gaa tie na, wʋ kɩɛ adugbe sɛ wʋ na ɩ, sɛ wʋ tawɩ ɩ sɛ, <<Sakiyosi, tibi kɔŋ bileŋ n waa dʋɔ sɛ maa sui jaŋ.>> 6Sɛ wʋ tibi bileŋ mʋ asadi yɩɛ ɩ nsa-nsa mʋ ɩ ju wʋ waa dʋɔ.
7Gʋ bakpa baa kpiniŋ na ŋina na, ba fara baa fʋlʋ sɛ, <<Wʋ ju ga sui dɩsʋbʋ yɩɛrɛ.>>
8Ama Sakiyosi kʋlʋ sɩŋ sɛ wʋ tawɩ kpaŋjuo sɛ, <<Kɩɛ Kpaŋjuo, maa kpara ma akpaŋta naŋ bʋla na maa mʋ bʋdʋŋdʋlʋŋ fa ayɔŋtina. Ma ŋɩrɛ wʋrʋ doŋ dʋɔ lɩɛ wʋ bʋrʋ na, maa tɔ ɩ kɩm dɩmʋŋ gbɩɛta bʋnara.>>
9Sɛ Yesu tawɩ ɩ sɛ, <<Jaŋ, mɔlɔgɩ kɔŋ waa gana dʋɔ, akala takɩɛ baalɛ wina gba yɩɛ Abiraham ganana bie bɛ. 10Akala takɩɛ Wʋkpa Bu wʋŋ kɔŋ na wʋ a gaa mɔlɔgɩ baa ba tʋsʋ na bɛ.>>
Tʋmɩra gifi barɛ dʋɔ diduu
Matiyo 25:14-30
11Gʋ bakpa baa a nyii Yesu wɩɛ na, wʋ ju dʋɔ jɔ diduu fa ba, akala takɩɛ wʋ tirina Yerusalem dɩɛ sɛ bakpa baa jiŋ sɛ Ɩsʋɔ Juori gaa aja kɔŋ gabʋanaŋ. 12Sɛ Yesu tawɩ sɛ, <<Baalɛ wʋkpa kpari wʋrʋ n ju dɩɛ taŋasɛ garɛ naŋ na baa ga si ɩ juo na wʋ a bɔrɛ kɔŋ. 13Pɔɩ na wʋ a laŋ na, wʋ yagɛ wʋ tʋmɩra gifi fa ba aterembie mina gifi#19:13 Mina garɛ yɩɛ dɩtʋm yɩɛrɛ gafɩtasɛ sɩ toro kɩmtʋɔ sɛ wʋ tawɩ ba sɛ n mʋ aterembie ŋina ga di yawʋ ga tala gʋ maa bɔrɛ kɔŋ.>>
14Ama lɩɩna gʋ wʋ dɩɛnaŋtina a kɔla ɩ na dʋɔ, ba kpiri gabʋɔsɛ ju tibi kɩɛrɛ wʋjanɛ wʋŋ wʋ a si ɩ juo na jaŋ ga tawɩ ɩ sɛ, <<Dɩ ja baalɛ wina a gaa yɩɛ daa Juo o.>>
15Sɛ Yesu ju dʋɔ tawɩ sɛ, <<Ama ba si ɩ Juo na wʋ bɔrɛ kɔŋ dɩɛ. Sɛ wʋ kpiri yagɛ wʋ tʋmɩra baa wʋ fa ba aterembie na, na wʋ a kɩɛ tɔnʋɔ ŋii ba yu kpi na.>>
16Sɛ wʋ ju dʋɔ tawɩ sɛ, <<Asanaŋtɛ wʋŋ kɔŋ gaa tawɩ sɛ, Kpaŋjuo, ma yu aterembie mina gifi kpi nya aterembie mina gifi ŋii nya fa maŋ na dʋɔ.>>
17Sɛ wʋ Kpaŋjuo wʋŋ tawɩ ɩ sɛ, <<Ma tʋmɩrɛ wʋbam, n sa na dɩtʋm. Ganaŋkʋ nya dɩlɛ di gasiŋteŋ pii ŋina dʋɔ na, maa fa nyaŋ yikuo na nyaa di dɩɛsɛ gifi dʋɔ.>>
18<<Balatɛ wʋŋ kɔŋ gaa tawɩ sɛ Kpaŋjuo, ma yu aterembie mina anʋŋ kpi nya aterembie mina ŋii nya fa maŋ na dʋɔ.>>
19Sɛ wʋ Kpaŋjuo wʋŋ tawɩ sɛ, <<Nyaŋ gba, maa yela nyaa di dɩɛsɛ anʋŋ dʋɔ.>>
20Sɛ ba torotɛ wʋŋ kɔŋ gaa tawɩ ɩ sɛ, <<Kpaŋjuo, nya aterembie mina mɩnaŋ. Ma mʋ ŋɩ pɔgʋ dɩpaŋtaŋ naŋ wɩsɛ gatʋŋgʋrʋ. 21Akala takɩɛ maa se nyaŋ sɛ n wɩɛ wɩɛ doŋ. Nyaa lɩɛ bʋrʋ gaa ga ba yɩɛ n teri na sɛ nyaa kara bʋrʋ gaa nya n duu u.>>
22Sɛ wʋ Kpaŋjuo wʋŋ tawɩ ɩ sɛ, <<Nyaŋ tʋmɩrɛ sʋbʋ, n wɩɛ dʋɔ sɛ maa sɩŋ fu nyaŋ dɩpʋɛ. N cha n jiŋ gʋ ma wɩɛ wɩɛ doŋ, maa lɩɛ bʋrʋ gaa ga ba yɩɛ ma teri na sɛ maa kara bʋrʋ gaa ma n duu u. 23Be n yɩɛ sɛ nya n mʋ ma aterembie ga si aterembie dɩsɩɩtɩŋ ganaŋkʋ ma kɔnɛ na, maa gaa lɩɛ ŋɩ na ŋɩ tɔnʋɔ?>>
24Sɛ wʋ tawɩ baa ba sɩmɩɛɩ dɩmaŋ na sɛ, <<N lɩɛ aterembie mina ŋii lɩɩ wʋ jaŋ na ɩ mʋ kpi wʋŋ wʋ wɩɛna aterembie mina gifi na dʋɔ.>>
25Sɛ ba tawɩ ɩ sɛ, <<Kpaŋjuo, wʋ fɩla wʋ wɩɛna aterembie gifi.>>
26Sɛ kpaŋjuo wʋŋ lɩsɛ nʋɔ sɛ, <<Maa tawɩ amɩɛ sɛ, <wʋkʋma wʋŋ wʋ wɩɛna bʋrʋ garɛ na, Ɩsʋɔ aja mʋ ŋarɛ kpi wʋ dʋɔ. Ama wʋkʋma wʋŋ wʋ tana bʋrʋ garɛ na, ŋii wʋ wɩɛna na gba, Ɩsʋɔ aja lɩɛ lɩɩ wʋ jaŋ. 27Dɩtɩɛna n mʋ ma badʋŋna baa baa ja sɛ ma n yɩɛ ba juo na, kɔna maŋ jɩna na ɩ kʋ ba ma asanaŋ.> >>
Yesu jʋʋ Yerusalem dɩɛ naŋ takɩɛ Juo
Matiyo 21:1-11; Maakɩ 11:1-11
28Gʋ Yesu jɔ dɩmʋŋ diduu gana taŋ na, wʋ pala wʋ kpalɛnara baa asanaŋ wʋ na ba a ju Yerusalem. 29Gʋ Yesu tirina Betifage na Betaniya dɩɛsɛ bisi ŋii ŋɩ wɩɛ Olifi dasɛ bʋrɔŋ bie gaa dʋɔ na, wʋ kpiri wʋ kpalɛnara baa tɩba bala, sɛ wʋ tawɩ ba sɛ, 30<<N ju dɩɛ bie gaa ga wɩɛ amɩɛ asanaŋ na naŋ. Gʋ ɩ jʋʋ na, ɩ na kpaŋa bie wʋŋ wʋrʋ n cha ta wʋ dʋɔ na pɔgaɩ. N buoli ɩ kɔna maŋ. 31Wʋrʋ tasɛ amɩɛ sɛ be n yɩɛ sɛ ɩ buoli ɩ na? N tawɩ ɩ sɛ, Kpaŋjuo wʋŋ n tiri ɩ.>>
32Sɛ baa wʋ kpiri ba na, ju ga na ɩ takɩɛ ganaŋkʋ wʋ tawɩ ba na. 33Gʋ baa buoli kpaŋa bie wʋŋ na, sɛ wʋ Kpaŋjuo aba tasɛ ba sɛ, <<Be n yɩɛ sɛ ɩ buoli ɩ?>>
34Sɛ ba lɩsɛ nʋɔ sɛ, <<Kpaŋjuo wʋŋ n tiri ɩ.>>
35Gʋ ba mʋ kpaŋa bie wʋŋ kɔna Yesu na, ba mʋ ba adugbe gagbasɛ jaga wʋ dʋɔ sɛ ba chɔna ɩ sɛ wʋ cha wʋ dʋɔ. 36Gʋ wʋ a ju na, sɛ bakpa mʋ ba adugbe gagbasɛ tɔ gbɩɛ naŋ sɛ wʋ n pala dʋɔ.
37Gʋ Yesu tirina Yerusalem diele gaa gbɩɛ tibi gaa ju olifi dasɛ bʋrɔŋ gaa tie na, sɛ wʋ kpalɛnara jama baa kpiniŋ kuusi na doŋ asadi naŋ baa kalɩɛ Ɩsʋɔ lɩɩna adaŋgana ŋii ba naa na kpiniŋ dʋɔ.
38Sɛ ba tawɩ sɛ,
<<Kusee n nyina Juo wʋŋ wʋ kɔŋ
Ɩsʋɔ yɩrɛ naŋ!#Num 118:26.
Wʋsɛfɩɛ wɩɛ Ɩsʋɔ adugbe sɛ jilima n ju fa Ɩsʋɔ.>>
39Sɛ Farasitina baa barɛ baa ba wɩɛ jama baa tɩba na tawɩ Yesu sɛ, <<Wʋkalaasa, tawɩ n kpalɛnara sɛ ba n fu ba nʋɔsɛ dʋɔ.>>
40Sɛ Yesu lɩsɛ nʋɔ sɛ, <<Maa tawɩ amɩɛ sɛ ba fu ba nʋɔsɛ dʋɔ na, bʋɛ aja kuusi.>>
Yesu wii fa Yerusalem
41Gʋ Yesu tirina Yerusalem sɛ wʋ na dɩɛ gaa na, wʋ wii fa ga, 42sɛ wʋ tawɩ sɛ, <<Nafʋɔ n jiŋ ŋii ŋii fa nyaŋ wʋsɛfɩɛ jaŋ wɩɩ gana na, ama ŋɩ wɩsɛ nyaŋ. 43Saŋa garɛ aja kɔŋ, n badʋŋna aja ma dɩpɔrɛ logo nyaŋ, na baa logo nyaŋ na baa gaa nyaŋ lɩɩ laraŋ-laraŋ. 44Baa warɩɛ nyaŋ na n bie kpiniŋ. Baa yela bʋɩ garɛ a jaga ga dʋɔ-dʋɔ ɔ. Akala takɩɛ nya n na saŋa gaa Ɩsʋɔ kɔŋ gaa mɔlɔgɩ nyaŋ na a.>>
Yesu gɩŋ yawʋ dira lɩɩ Ɩsʋɔ tʋm danɛ naŋ
Matiyo 21:12-17; Maakɩ 11:15-19
45Sɛ Yesu jʋʋ Ɩsʋɔ tʋm danɛ naŋ. Sɛ wʋ fara wʋ a geŋ baa baa di yawʋ na wʋ a lɩɩ dɩmaŋ. 46Sɛ wʋ tawɩ ba sɛ, <<Ba sabɩɛ Sabɩɛwɩɛ ŋii naŋ sɛ, <Ma tʋm danɛ aja yɩɛ dɩga danɛ.>#Yis 56:7. Ama ɩ mʋ dɩmaŋ yɩɛ ŋmɩɛla baa ba chamɩna doŋ baa lɩɛ bakpa abʋrɩ na dɩchatɩŋ.#Yere 7:11.>>
47Wɩɩ kʋma wʋ a kalaa Ɩsʋɔ tʋm danɛ naŋ, ama Ɩsʋɔ sei bɩnɩɛ, Mosesi mbara bakalaasa na dɩɛ bɩnɩɛ baa fara baa ja gbɩɛ gaa baa mʋna dʋɔ na baa kʋ ɩ. 48Ama ba n yu gbɩɛ na baa kʋ ɩ ɩ, akala takɩɛ bakpa baa ba wɩɛ dɩmaŋ na kpiniŋ kaŋ ba dɩla baa nyii wʋ kalaa ŋii.
Currently Selected:
Luka 19: CLL
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy amp Bible Translation
