Luka 21
21
Alʋ okulapu wʋrʋ faa
Maakɩ 12:41-44
1Gʋ Yesu wɩɛ Ɩsʋɔ tʋm danɛ naŋ na sɛ wʋ jiŋna wʋ asa adugbe kɩɛ, sɛ wʋ na gʋ akpaŋtatina chamɩna ba faa baa dʋ faa dɩdaka gaa naŋ. 2Sɛ wʋ na alʋ okulapu ayɔŋtɛ wʋrʋ mʋ kpaŋnyɔ ala ju ga dʋ faa dɩdaka gaa naŋ. 3Sɛ Yesu tawɩ sɛ, <<Maa tawɩ sɛ n nyii na dieli sɛ dɩmʋŋ alʋ okulapu ayɔŋtɛ wina mʋ aterembie dʋ faa dɩdaka gaa naŋ kii wʋkʋma. 4Akala takɩɛ bakpa baa kpiniŋ lɩsɛ chonii bɛ lɩɩ ba akpaŋta naŋ dʋ faa dɩdaka naŋ. Ama okulapu ayɔŋtɛ wʋŋ bɩrɛ, wʋ lɩɩ wʋ gɩyɔŋ naŋ bɛ sɛ wʋ mʋ pii ŋii wʋ a di na kpiniŋ ju ga dʋ faa dɩdaka gaa naŋ.>>
Yesu tawɩ Ɩsʋɔ tʋm danɛ warɩɛwʋ dʋɔ wɩɛ
Matiyo 24:1-2; Maakɩ 13:1-2
5Yesu kpalɛnara baa tɩba barɛ cha tawɩ Ɩsʋɔ tʋm danɛ na ganaŋkʋ ba mʋ bʋɛ a janɩɛ ŋii ŋɩ wɩɛ dieli ma ga, na faa ŋii ba yɩɛ ŋɩ chɩrɩchɩrɩ fa Ɩsʋɔ na dʋɔ wɩɛ. Ama Yesu tawɩ ba sɛ, 6<<Ŋii ɩ na jɩna n na, saŋa garɛ aja kɔŋ, bʋɩ garɛ baa ti jaga ga dʋɔ dʋɔ ɔ. Baa salɩɛ ŋɩ kpiniŋ.>>
Awʋrʋfʋɔ na ganyala dʋɔ wɩɛ
Matiyo 24:3-14; Maakɩ 13:3-13
7Sɛ Yesu kpalɛnara baa tasɛ ɩ sɛ, <<Wʋkalaasa, saŋa gamʋɔ sɛ ŋina aja tibi sɛ be daasɛ aaŋ ja kalaa gʋ ŋina aja tibi?>>
8Sɛ Yesu lɩsɛ ba nʋɔ sɛ, <<N kɩɛ amɩɛ wʋsɛ dʋɔ na dieli, na wʋrʋ n baa pɩna amɩɛ. Akala takɩɛ bakpa fɔɩ aja kɔŋ ma yɩrɛ naŋ na baa gaa tawɩ sɛ, <Baa n nyina Kirisito wʋŋ> na <Saŋa gaa tirina.> Ama n baa kpaŋ ba. 9Ɩ nyii yuo gaa ga tirina amɩɛ na yuo gaa ga wɩɛ taŋasɛ wɩɛ na, n baa yela na amɩɛ agela a kʋlʋ. Ŋɩ tiri gʋ ŋina a chɩŋkpɩɛ tibi, ama ŋii kalaa sɛ dulunya dɩtamtɩŋ talɛ ɛ.>>
10Sɛ wʋ ju dʋɔ tawɩ ba sɛ, <<Atawɩ yɩrɩ aja yuo dɔŋa na juori a yuo juori. 11Tibi jigisi, wɔŋfɩrɛ na lʋmɩɛ ŋii ŋɩ nʋɔ wɩɛ doŋ aja kɔŋ akpie dʋɔ-akpie dʋɔ, na abʋrɩ ŋii ŋɩ wɩɛ nyɩŋtɩɛ na daasɛ ajanɩɛ a lɩɩ Ɩsʋɔ adugbe kɔŋ.>>
12Sɛ wʋ ju dʋɔ tawɩ sɛ, <<Ama ma yɩrɛ dʋɔ, baa chaŋ amɩɛ na baa yɩɛ amɩɛ awʋrʋfʋɔ, baa mʋ amɩɛ ju Yudatina tʋm danɛ naŋ na baa ga di amɩɛ wɩɛ, na baa mʋ amɩɛ ga dʋ danɛ dɩtʋɔtɩŋ, baa mʋ amɩɛ kɔŋ juoneŋ na Romatina bɩnɩɛ baa baa kɩɛ Isirali tibi dʋɔ na asanaŋ, pɔɩ na ŋina kpiniŋ a kɔŋ. 13Dɩmaŋ sɛ ɩ yu gbɩɛ tawɩ Ɩsʋɔ Wɩɛ Abama ŋii fa ba. 14Ama n baa fa nfɩɛrɛ nyala amɩɛ wʋsɛ ja wɩɛ ŋii ɩ tawɩ lɩɛ amɩɛ wʋsɛ na dʋɔ. 15Akala takɩɛ maa fa amɩɛ wɩɛ na kpiŋjim ŋii ɩ mʋ tawɩ na amɩɛ badʋŋna n baa dɩlɛ tawɩ sɛ ŋii ɩ tawɩ na taŋ tɩba yaa ŋii ɩ tawɩ na ba yɩɛ gasiŋteŋ ŋ. 16Amɩɛ lʋrʋda, nabie, lʋŋtina, na dɩɛtina aja lɩsɛ amɩɛ fa na baa kʋ amɩɛ tɩba barɛ. 17Ma dʋɔ, bakpa kpiniŋ aja kɔla amɩɛ. 18Ama amɩɛ nyi nyʋɔ garɛ gba baa tʋsʋ ʋ. 19Ɩ sɩŋ na doŋ na, ɩ yu nkpa ŋii ŋɩ taŋ gɩtɛ.>>
Yesu tawɩ Yerusalem warɩɛwʋ wɩɛ
Matiyo 24:15-21; Maakɩ 13:14-19
20Sɛ Yesu ju dʋɔ tawɩ sɛ, <<Ɩ na gʋ yuora logo Yerusalem na, n jiŋ gʋ ga warɩɛwʋ tirina. 21Ɩ na ŋɛ dɩmʋŋ na, n yela na baa ba wɩɛ Yudiya tibi dʋɔ na, a se ju bʋrɔŋsɛ dʋɔ, na baa ba wɩɛ Yerusalem na n lɩɩ, sɛ baa ba taŋ dɩɛ janɛ gaa naŋ na n baa jʋʋ dɩɛ gaa naŋ. 22Akala takɩɛ ŋina n nyina saŋa gaa Ɩsʋɔ aja wʋ a fɔŋɩ Yerusalem dɩlɛ na ŋii yela Ɩsʋɔ wɩɛ ŋii ba sabɩɛ si na a kɔŋ tɩba. 23Dɩmʋŋ gɩyɩɛnɩŋ ŋina naŋ na, fililietina na alʋsɔna baa lakʋ! Akala takɩɛ bakpa wʋsɛ aja chaŋ ba awʋrʋfʋɔ tibi gana dʋɔ, sɛ Ɩsʋɔ biŋbira aja kɔŋ Yudatina dʋɔ. 24Baa mʋ yuo dabɩlasɛ kʋ barɛ, na baa chaŋ ba barɛ dʋɔ takɩɛ danɛtʋɔra mʋ ju dɩɛsɛ ngoriŋ-ngoriŋ dʋɔ. Sɛ baa ba ba yɩɛ Yudatina na aja baa di Yerusalem dʋɔ ga tala gʋ saŋa gaa Ɩsʋɔ mʋ fa ba na aja ju gɩtɛ.>>
Wʋkpa Bu wʋŋ aja bɔrɛ kɔŋ
Matiyo 24:29-31; Maakɩ 13:24-27
25Sɛ Yesu ju dʋɔ tawɩ sɛ, <<Daasɛ wɩɛ aja yɩɛ wiita na gafita na achikpebi naŋ. Sɛ ɔpʋ galaŋba na apaa jʋɔ aja yela na atawɩ yɩrɩ wʋsɛ achaŋ ba tibi dʋɔ. 26Nyɩŋtɩɛ aja chaŋ bakpa na baa kiriŋ ŋii ŋii kɔŋ tibi dʋɔ na dʋɔ, akala takɩɛ abʋrɩ ŋii ŋɩ wɩɛ Ɩsʋɔ adugbe na kpiniŋ aja jigisi. 27Dɩmʋŋ saŋa gana naŋ na, baa na Wʋkpa Bu wʋŋ a kɔnɛ na yikuo na jilima janɛ lɩɩ Ɩsʋɔ tanɩɛ naŋ. 28Gʋ ŋina kpiniŋ fara ŋii tibi na, n kʋlʋ sɩŋ na ɩ jiŋna amɩɛ asa kɩɛ adugbe, akala takɩɛ Ɩsʋɔ a kɔŋ na wʋ a gaa lɩɛ amɩɛ.>>
N kɩɛ figi daŋ na ɩ kpalɩɛna bʋrʋ garɛ
Matiyo 24:32-35; Maakɩ 13:28-31
29Sɛ Yesu jɔ ba diduu garɛ sɛ, <<N kɩɛ figi daŋ na dasɛ ŋii ŋɩ kakaa na kpiniŋ. 30Ŋii pɔrɔgɩ na, n jiŋ gʋ awuluŋ tirina. 31Dɩmʋŋ gba sɛ ɩ na gʋ ŋina kpiniŋ a tibi na, n jiŋ gʋ Ɩsʋɔ Juori gaa tirina.>>
32Maa tawɩ sɛ n nyii na dieli sɛ gɩnanaŋ gana baa laŋ ŋ ga tala saŋa gaa ŋina kpiniŋ aja tibi. 33Ɩsʋɔ adugbe na tie aja laŋ, ama ma wɩɛ ŋii bɩrɛ, ŋii laŋ ŋ.
N kɩɛ amɩɛ wʋsɛ dʋɔ na dieli
34Sɛ Yesu ju dʋɔ tawɩ wʋ kpalɛnara baa sɛ, <<N kɩɛ amɩɛ wʋsɛ dʋɔ na dieli, n baa mʋ amɩɛ wʋsɛ fa asadi fɔɩ, sʋlʋŋ dɩɛsɛ na chawʋ naŋ nfɩɛrɛ su amɩɛ agela naŋ, na dɩmʋŋ wɩɩ gana n baa gaa purugi amɩɛ takɩɛ gʋdʋ achaŋ nam na. 35Akala takɩɛ wɩɩ gaa maa kɔŋ na aja purugi bakpa baa ba chaɩ tibi dʋɔ na kpiniŋ. 36Dɩmʋŋ dʋɔ n kɩɛ amɩɛ wʋsɛ dʋɔ na dieli, na ɩ jɔ dɩga saŋa kʋma na e yu doŋ mʋ sɩŋ ŋii ŋii kɔŋ tibi dʋɔ na kpiniŋ naŋ. Na ɩ dɩlɛ sɩŋ Wʋkpa Bu wʋŋ asanaŋ.>> 37Wɩɩ kʋma Yesu cha wʋ a kalaa bakpa Ɩsʋɔ tʋm danɛ naŋ. Sɛ bʋyanɔ kʋma, wʋ a ju wʋ a duo olifi dasɛ bʋrɔŋ gaa dʋɔ. 38Sɛ nafo kʋma, bakpa baa kpiniŋ a kɔŋ wʋ jaŋ Ɩsʋɔ tʋm danɛ gaa naŋ baa nyii wʋ wɩɛ.
Currently Selected:
Luka 21: CLL
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy amp Bible Translation
