Luka 23
23
Ba mʋ Yesu ga sɩŋ Pilato asanaŋ
Matiyo 27:1-2; 11:14; Maakɩ 15:1-5
1Sɛ bakpa baa kpiniŋ kʋlʋ mʋ Yesu ga fa Pilato#23:1 Pilato yɩɛ Romatina bɩnɛ wʋŋ wʋ a kɩɛ Yudatina tibi dʋɔ. 2Sɛ ba fara baa pɔɩ ɩ sɛ, <<Dɩ na gʋ baalɛ wina a warɩɛ Yudatina barɛ nfɩɛrɛ sɛ ba n kʋlʋ sɩŋ Romatina dʋɔ na ba n baa tɔ lampo fa Juo Kayisa, sɛ wʋ ti bɔrɛ tawɩ sɛ wʋ yɩɛ Kirisito, Juo wʋŋ.>>
3Sɛ Pilato tasɛ Yesu sɛ, <<Nyaŋ n nyina Yudatina Juo naa?>> Sɛ Yesu lɩsɛ nʋɔ sɛ, <<Ŋii sɛ n tɩŋtɩŋ nya tawɩ na.>>
4Sɛ Juo Pilato tawɩ Ɩsʋɔ sei bɩnɩɛ na jama baa sɛ, <<Ma n na wɩɛ ŋii maa sɩŋ ŋɩ dʋɔ fu baalɛ wina dɩpʋɛ ɛ.>>
5Ama ba saŋ ba sɩmɩɛɩ dʋɔ sɛ, <<Wʋ mʋ wʋ kalaa fuosi dʋ bakpa kpiniŋ Yudiya tibi dʋɔ. Wʋ fara lɩɩ Galaliya bɛ mʋ gaa lɩɩ jɩna.>>
6Gʋ Pilato nyii wɩɛ ŋina na wʋ tasɛ sɛ, <<Baalɛ wina yɩɛ Galaliya wʋkpa bɛ?>> 7Gʋ wʋ jiŋ gʋ Yesu lɩɩ tibi gaa Juo Hɛrɔdɩ yɩɛ juo ga dʋɔ na, wʋ mʋ ɩ juna Juo Hɛrɔdɩ. Saŋa gana na wʋ wɩɛ Yerusalem.
8Gʋ Juo Hɛrɔdɩ na Yesu na, wʋ asadi fɔɩ, akala takɩɛ gʋ wʋ a ja wʋ a na ɩ na, dɩ taŋgɩlɛ. Ŋii wʋ cha nyii lɩɩ wʋ dʋɔ na, wʋ wɩɛna tamaa gʋ wʋ a wʋ a yɩɛ adaŋgana. 9Wʋ tasɛ Yesu wɩɛ fɔɩ ama Yesu n lɩsɛ ɩ nʋɔ ɔ. 10Sɛ Ɩsʋɔ sei bɩnɩɛ na Mosesi mbara bakalaasa baa sɩmɩɛɩ dɩmaŋ baa pɔɩ Yesu na doŋ. 11Sɛ Juo Hɛrɔdɩ na wʋ yuora baa yɩɛ ɩ takɩɛ wʋkpa kpakpuo sɛ ba jabi ɩ. Sɛ ba fu ɩ adugbe gagba bam sɛ ba mʋ ɩ ga fa Pilato. 12Dɩmʋŋ wɩɩ gana sɛ Juo Hɛrɔdɩ na Pilato ba yɩɛ dɩɛtɩrɛ, nafʋɔ ba cha ba yɩɛ badʋŋna bɛ.
Ba fu Yesu sɩŋ dɩpʋɛ
Matiyo 27:15-26; Maakɩ 15:6-15
13Sɛ Pilato yagɛ Ɩsʋɔ sei bɩnɩɛ, dɩɛ kɩɛra na bakpa baa kpiniŋ gaa jaŋi, 14sɛ wʋ tawɩ ba sɛ, <<Ɩ mʋ wʋkpa wina kɔna maŋ sɛ wʋ a warɩɛ bakapa nfɩɛrɛ sɛ ba n kʋlʋ sɩŋ Romatina dʋɔ. Ama gʋ ma kɩɛ wʋ wɩɛ naŋ na dieli amɩɛ asanaŋ na, ma n na gʋ wʋ di dɩpʋɛ wɩɛ ŋii ɩ tawɩ jaga wʋ dʋɔ na tɩba a. 15Dɩmʋŋ sɛ Juo Hɛrɔdɩ gba n yu wɩɛ ŋarɛ ɛ. Dɩmʋŋ dʋɔ wʋ bɔsɩna ɩ kɔna daa. Ŋɩ yɩɛ gasiŋteŋ gʋ Yesu n yɩɛ bʋrʋ gaa ga daga wʋ a sɩŋ ŋ. 16Dɩmʋŋ dʋɔ maa fɔŋɩ wʋ dɩlɛ na maa yela ɩ.>> 17Bɩriŋnʋɔ kʋma dɩ tala Yudatina nyiŋi asadi adiya di na, ŋɩ yɩɛ Pilato ayɩɛsa sɛ wʋ n yela bakpa baa ba tɔ baa danɛ na tɩba wʋŋ bakpa baa a jawʋ na wʋrʋ fa ba.#23:17 Naa Sabɩɛwɩɛ ŋii kpiniŋ n wɩɛ dɩmʋŋ wɩɛ ŋina a
18Sɛ bakpa baa kpiniŋ yɩɛ nʋɔ garɛ kuusi sɛ, <<Kʋ baalɛ wina, na nyaa yela Barabasi fa daa.>> 19Ba tɔ Barabasi danɛ dɩtʋɔtɩŋ akala takɩɛ wʋ cha kpi baa ba kʋlʋ yuo chicha Roma bɩnɩɛ baa ba wɩɛ Yudatina tibi dʋɔ sɛ wʋ kʋ ba tɩba barɛ.
20Gʋ Pilato aja wʋ a yela Yesu dʋɔ na, wʋ ti bɔrɛ tawɩ dʋ bakpa baa. 21Ama ba ju dʋɔ baa kuusi sɛ, <<Jɔ ɩ daŋ gasagasa dʋɔ, jɔ ɩ daŋ gasagasa dʋɔ!>>
22Sɛ Pilato ti bɔrɛ tawɩ ba butoro-tɛ sɛ, <<Be dɩsʋbʋ sɛ baalɛ wina yɩɛ? Ma n na dɩsʋbʋ gaa wʋ yɩɛ sɛ dɩmʋŋ dʋɔ wʋ daga sɩŋ ŋ. Dɩmʋŋ dʋɔ maa fɔŋɩ wʋ dɩlɛ bɛ na maa yela ɩ.>>
23Ama ba desina kuusi na doŋ sɛ n jɔ ɩ daŋ gasagasa dʋɔ. Sɛ ba kuusi ŋii di dʋɔ. 24Dɩmʋŋ dʋɔ Pilato yɩɛ wʋ nfɩɛrɛ sɛ wʋ a yɩɛ ba jawʋ fa ba. 25Sɛ wʋ lɩsɛ Barabasi wʋŋ baa jawʋ na fa ba, wʋŋ ba tɔ ɩ danɛ dɩtʋɔtɩŋ sɛ wʋ cha kpi baa ba kʋlʋ yuo chicha Roma bɩnɩɛ baa ba wɩɛ Yudatina tibi dʋɔ sɛ wʋ kʋ ba tɩba barɛ. Sɛ wʋ mʋ Yesu fa ba ganaŋkʋ baa jawʋ na.
Ba jɔ Yesu daŋ gasagasa dʋɔ
Matiyo 27:32-44; Maakɩ 15:21-32
26Gʋ yuora baa mʋ Yesu baa ju na baa ga jɔ ɩ daŋ gasagasa dʋɔ na, ba jaŋina baalɛ wʋrʋ baa yagɛ ɩ sɛ Simoŋ wʋŋ wʋ lɩɩ Kireni. Wʋ lɩɩ dɩɛ bie garɛ naŋ wʋ a ju Yerusalem. Sɛ ba chaŋ ɩ dʋ ɩ sɛ ba mʋ daŋ gasagasa gaa sɩlɛ ɩ sɛ wʋ kpaŋ Yesu. 27Sɛ bakpa baa fɔɩ kpaŋ Yesu, mʋ kpi ala barɛ dʋɔ baa yɩyɩɛ yela baa wii na. 28Sɛ Yesu biliŋi tawɩ ba sɛ, <<Yerusalem ala, n baa wii maŋ! Ama n wii fa amɩɛ wʋsɛ na amɩɛ bie. 29Akala takɩɛ saŋa garɛ aja kɔŋ ɩ tawɩ sɛ, <Kusee n nyina ala pamɩɛ a kpaŋtina, na lorie ŋii ŋɩ n lʋrʋ na ade ŋii ba n ŋmasɛ ŋɛ ɛ.> 30Sɛ
<<Baa tawɩ bʋrɔŋsɛ sɛ n sala daa dʋɔ!
Na baa tawɩ bʋrɔŋbisi sɛ n fu daa dʋɔ!>>#Hos 10:8.
31Sɛ bakpa mʋ ŋina yɩɛ maŋ wʋŋ ma kɩɛna takɩɛ daŋ ga lai na, be sɛ baa mʋ yɩɛ amɩɛ baa ɩ yɩɛ dasɛ awʋlɩɛ?
32Sɛ ba mʋ dɩsʋbʋ yɩɛra bala barɛ kpi Yesu dʋɔ na baa ga kʋ ba. 33Gʋ ba ga tala diele gaa baa yagɛ sɛ Goligato[tie akala sɛ Nyi Gafie] na, ba jɔ Yesu daŋ gasagasa dʋɔ. Sɛ ba jɔ dɩsʋbʋ yɩɛra bala baa gba daŋ gasagasa dʋɔ. Wʋrʋ wɩɛ wʋ jɩsaŋ dʋɔ yela wʋrʋ wɩɛ wʋ naŋbii dʋɔ. 34Sɛ Yesu tawɩ sɛ, <<Majuo, mʋ ba dɩsʋbʋ chɩɛ ba, akala takɩɛ ba ba jiŋ ŋii baa yɩɛ ɛ.>>#23:34 Ɩsʋɔ Sabɩɛwɩɛ ŋii ŋarɛ tana dɩmʋŋ wɩɛ ŋina a Gʋ ba jɔ Yesu daŋ gasagasa dʋɔ taŋ na, sɛ ba lɔ wʋ gagbasɛ dʋɔ mbi mʋ kpara fa dɔŋa.
35Dɩmʋŋ saŋa gana na, bakpa baa cha ba sɩmɩɛɩ dɩmaŋ baa kɩɛ ɩ. Sɛ Yuda bɩnɩɛ baa jabi ɩ tawɩ sɛ, <<Wʋ a mɔlɔgɩ barɛ, sɛ wʋ yɩɛ Kirisito wʋŋ Ɩsʋɔ lɩsɛ na, wʋ n mɔlɔgɩ wʋ wʋsɛ.>>
36Sɛ yuora baa gba kuwe ɩ sɛ ba fa ɩ wayɩŋ sʋlʋŋ aŋaŋsa. 37Sɛ ba tawɩ sɛ, <<Sɛ nyaŋ n nyina Yudatina Juo na, mɔlɔgɩ n wʋsɛ.>>
38Sɛ ba sabɩɛ bʋrʋ garɛ jaga wʋ nyie dʋɔ daŋ gasagasa gaa dʋɔ sɛ, <<WINA N NYINA YUDATINA JUO WƲŊ.>>
39Sɛ dɩsʋbʋ yɩɛra baa tɩba wʋrʋ wʋŋ wʋ sagaɩ daŋ gasagasa gaa dʋɔ na tii ɩ sɛ, <<Naa nyaŋ n nyina Kirisito naa? Mɔlɔgɩ n wʋsɛ na nyaa mɔlɔgɩ daa!>>
40Ama wʋ dɩsʋbʋ yɩɛra baŋbaŋ wʋŋ jɔ wʋ nʋɔ dʋɔ sɛ, <<Nyaa se Ɩsʋɔ, sɛ n ba jiŋ gʋ nyaŋ na ɩ, ɩ wɩɛ dɩpʋɛ fuu gadʋŋdʋlʋŋ naŋ? 41Daa bɩrɛ, ba fɔŋɩ daa dɩlɛ na, dɩ daga daa dɩsʋbʋ ayɩɛsa. Ama baalɛ wina bɩrɛ, wʋ n yɩɛ ŋii ŋɩ taŋ dieli i.>>
42Sɛ wʋ tawɩ sɛ, <<Yesu, n kɔŋ n Juori naŋ na, nyiŋi maŋ.#23:42 Ɩsʋɔ Sabɩɛwɩɛ ŋarɛ wɩɛna sɛ nya kɔŋ n juori yikuo naŋ na >>
43Sɛ Yesu tawɩ ɩ sɛ, <<Maa tawɩ sɛ nyii na dieli sɛ jaŋ nyaa kpi ma dʋɔ paradiso.>>
Yesu sɩŋ wɩɛ
Matiyo 27:45-56; Maakɩ 15:33-41
44Gʋ dɩ tala wiita keŋkeŋ na, giteŋteŋbiri kɔŋ tibi dʋɔ kpiniŋ ga tala bʋyanɔ karafɩɛ atoro, 45sɛ wiita yela jʋɔ sɛ dukuru gaa ba mʋ gara Ɩsʋɔ tʋm danɛ naŋ na, chati tɩba bʋla. 46Sɛ Yesu kuusi sɛ, <<Majuo, ma mʋ ma sʋbʋ dʋ n pam naŋ.>> Gʋ wʋ tawɩ ŋina taŋ na sɛ wʋ sɩŋ.
47Gʋ yuora gafie bɩnɛ wʋŋ na ŋii ŋɩ tibi na, wʋ kalɩɛ Ɩsʋɔ sɛ wʋ tawɩ sɛ, <<Gasiŋteŋ, baalɛ wina yɩɛ wʋchirigisa bɛ.>> 48Gʋ bakpa baa ba jaŋi dɩmaŋ kpiniŋ na ŋii ŋɩ tibi na, ba mʋ ba pamɩɛ jaga ba nyie dʋɔ wii ju dɩɛ. 49Ama baa ba jiŋ Yesu na ala baa ba kpaŋ ɩ lɩɩ Galaliya na cha ba sɩmɩɛɩ taŋasɛ baa kɩɛ.
Yesu wuu
Matiyo 27:57-61; Maakɩ 15:42-47
50Baalɛ wʋrʋ cha wʋ wɩɛ baa yagɛ ɩ sɛ Yosefu wʋŋ wʋ yɩɛ dɩɛnaŋ bɩnɩɛ naŋ bɩnɩɛ dikpeŋ naŋ tɩba wʋrʋ. Wʋ yɩɛ wʋkpa bam sɛ wʋ gbɩɛsɛ chirigi. 51Wʋŋ bɩrɛ, wʋ n kpa ba gbɩɛsɛ na ŋii baa ja sɛ baa mʋ yɩɛ Yesu na a. Wʋ lɩɩ Arimatiya gaa ga wɩɛ Yudiya tibi dʋɔ bɛ. Wʋ cha wʋ dana Ɩsʋɔ Juori gaa kɔnɛ. 52Sɛ wʋ ju Pilato jaŋ ga sʋlʋ sɛ wʋ n mʋ Yesu gɩtatɛ gaa fa ɩ na wʋ a mʋ ga wuu. 53Sɛ wʋ sagi ɩ mʋ dɩkalala pɔgʋ ɩ. Sɛ wʋ mʋ ɩ ga wuu akpanaŋ bʋɔ garɛ naŋ gaa ba n wuu ta wʋrʋ dɩmaŋ ŋ. 54Ŋɩ cha ŋɩ yɩɛ wɩɩ ga kʋlasa gaa baa kʋla ba wʋsɛ ba dana Fɩɛsɛ wɩɩ na bɛ.
55Sɛ ala baa ba kpaŋ Yesu lɩɩ Galaliya kɔŋ na kpaŋ Yosefu ju ga na gachaŋ gaa na ganaŋkʋ wʋ wuu Yesu na. 56Sɛ ba bɔrɛ ju dɩɛ ga kʋla wuu fʋagɩɛ tii alifeŋsa na nuŋ alifeŋsa na baa mʋ gaa susaa wʋ gɩtatɩrɛ. Ama ba fɩɛsɛ Fɩɛsɛ wɩɩ ganaŋkʋ Mosesi mbara a kalaa na.
Currently Selected:
Luka 23: CLL
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy amp Bible Translation
