Matiyo 10
10
Yesu kpirida gifi bala baa
Maakɩ 3:13-19; Luka 6:12-16
1Yesu yagɛ wʋ kpalɛnara gifi bala baa kɔŋ wʋ jaŋ, sɛ wʋ fa ba yikuo sɛ ba n gɩŋ feliŋ sʋbʋ lɩɩ bakpa tɩba na baa chɔ lʋm na lʋmɩɛ ngoriŋ-ngoriŋ.
2Kpirida gifi bala baa yɩrɩɛ mɩnaŋ: wʋŋ wʋ dɔŋ asanaŋ na n nyina Simoŋ [wʋŋ baa yagɛ ɩ Petero] na wʋ nabu Andurusi, na Jamesi na Yohane Sebedi bie, 3Filipo, Batolomiyo, Tomasi, Matiyo lampo lɩɛrɛ wʋŋ, Yakubu Alifiyosi bu, Tadiyosi, 4Simoŋ wʋŋ baa yagɛ ɩ sɛ Sɩlɔtɩ#10:4 Sɩlɔtɩtina ba yɩɛ Yudatina baa ba kʋlʋ yuo Romatina, na Yudasi Isikariyoti wʋŋ wʋ lɩsɛ Yesu fa na.
Yesu kpiri wʋ kpalɛnara gifi bala baa
Maakɩ 6:7-13; Luka 9:1-6
5Yesu kpiri wʋ kpalɛnara gifi bala baa sɛ wʋ tawɩ ba sɛ, <<N baa ju baa ba ba yɩɛ Yudatina na salɛ yaa Samariyatina dɩɛ garɛ naŋ. 6Ama n ju Isiralitina baa ba kɩɛna takɩɛ feŋ batʋsʋsa na jaŋ. 7Ɩ ju na, n tawɩ ba sɛ, <Ɩsʋɔ Juori gaa tirina.> 8N chɔ lʋmɩɛtina, n feŋsi sira, n chɔ achalaŋa na ɩ geŋ feliŋ sʋbʋ lɩɩ bakpa tɩba. Ba mʋ yikuo gana fa amɩɛ kpakpuo bɛ, dɩmʋŋ sɛ amɩɛ gba n mʋ fa kpakpuo. 9N baa mʋ diterembi sɩɛm bi, diterembi fʋlʋm bi yaa nyɩŋgɩrɛ sɩɛm diterembi bi dʋ amɩɛ aterembie takpe naŋ. 10Ɩ ju gbɩɛ na, n baa mʋ adiku, yaa adugbe gagba kpi, asibita kpi yaa daŋ gatugasa kpi. Akala takɩɛ dɩtʋm yɩɛrɛ daga wʋ kɩmtʋɔ.>>
11Dɩɛ yaa dɩɛ bie kʋma gaa ɩ ju ga tɩba na, n tasɛ ja wʋkʋma wʋŋ wʋ daga na wʋ a lɩɛ amɩɛ na, n cha wʋ waa dʋɔ ga tala saŋa gaa ɩ lɩɩ dɩmaŋ. 12Waa kʋma gaa ɩ jʋʋ ga dʋɔ na, n tawɩ sɛ wʋsɛfɩɛ n kɔŋ amɩɛ dʋɔ. 13Waa gana dʋɔ bakpa lɩɛ amɩɛ na, amɩɛ wʋsɛfɩɛ n kɔŋ ba dʋɔ. Ama sɛ ba n lɩɛ amɩɛ bɩrɛ, n yela na amɩɛ wʋsɛfɩɛ a bɔrɛ kɔŋ amɩɛ jaŋ. 14Ama sɛ dɩɛ yaa waa garɛ dʋɔ bakpa pɩɛ amɩɛ yaa ba n nyii amɩɛ wɩɛ na. Ɩ lɩɩ dɩmaŋ na, n kpisi amɩɛ nafara tie dibuu wʋrʋgɩ dɩmaŋ. 15Maa tawɩ sɛ n nyii na dieli sɛ Ɩsʋɔ wɩɛ di wɩɩ gaa na, wʋ a fɔŋɩ dɩɛ gana bakpa dɩla kii Sodomtina na Gomoratina.
Ganyala ŋii ŋii kɔŋ na
Maakɩ 13:9-13; Luka 21:12-17
16N kɩɛ, maa kpiri amɩɛ takɩɛ feŋ sɛ n ju gbogboo aba naŋ. Dɩmʋŋ dʋɔ n yu kpiŋjim takɩɛ dʋmɩɛ na ɩ yɩɛ chɩrɩchɩrɩ takɩɛ Juori gakuosɛ.
17Dɩmʋŋ dʋɔ, <<N duo amɩɛ wʋsɛ dʋɔ lɩɩna bakpa dʋɔ. Baa chaŋ amɩɛ mʋ ju wɩɛ adiitiŋ bɩnɩɛ asanaŋ na baa taɩ amɩɛ Yudatina tʋm danɩŋ naŋ. 18Ma dʋɔ, baa mʋ amɩɛ mʋ ju Roma bɩnɩɛ baa baa kɩɛ Isirali tibi dʋɔ na, na juoneŋ asanaŋ na baa di amɩɛ wɩɛ. Dɩmaŋ sɛ ɩ yu gbɩɛ tawɩ Ɩsʋɔ Wɩɛ Abama ŋii fa ba na baa ba ba yɩɛ Yudatina na. 19Sɛ ba chaŋ amɩɛ na, n baa nyala amɩɛ wʋsɛ wɩɛ ŋii ɩ tawɩ na dʋɔ yaa ganaŋkʋ ɩ tawɩ na. Dɩ tala dɩmaŋ na, Ɩsʋɔ aja kalaa amɩɛ ŋii ɩ tawɩ na. 20Akala takɩɛ naa amɩɛ tɩŋtɩŋ aaŋ ja ɩ tawɩ ɩ, ama amɩɛ Juo Ɩsʋɔ Feliŋ aaŋ ja mʋna amɩɛ dʋɔ tawɩ.>>
21Sɛ Yesu tawɩ sɛ, <<Nalʋrʋ bie aja lɩsɛ dɔŋa fa na baa kʋ ba, na juo a lɩsɛ wʋbu fa. Bachaasɛ aja kʋlʋ sɩŋ ba lʋrʋda dʋɔ na baa kʋ ba. 22Ma dʋɔ, bakpa kpiniŋ aja kɔla amɩɛ. Ama wʋŋ wʋ a sɩŋ na doŋ ga tala dɩtamtɩŋ na, wʋ a mɔlɔgɩ ɩ. 23Sɛ ba nyala amɩɛ dɩɛ garɛ naŋ na, n se ju dɩɛ gafɔlɛ naŋ. Maa tawɩ sɛ n nyii na dieli sɛ ɩɩ taŋ Isirali dɩɛsɛ ajanɩɛ ŋii naŋ kɩlɩŋsɩ ɩ pɔɩ na Wʋkpa Bu wʋŋ a kɔŋ.>>
24<<Kpalɛnarɛ baa kii wʋ wʋkalaasa a, sɛ tʋmɩrɛ baa kii wʋ kpaŋjuo o. 25Wɩɛ dieli fa kpalɛnarɛ na wʋ a yɩɛ takɩɛ wʋ wʋkalaasa, na tʋmɩrɛ gba a yɩɛ takɩɛ wʋ kpaŋjuo. Sɛ ba yagɛ maŋ wʋŋ ma yɩɛ waa nyi sɛ Belesebu na, sɩnɛ sɛ baa yagɛ amɩɛ baa ɩ yɩɛ ma waa dʋɔtina!>>
Wʋŋ ba n se ɩ na
Luka 12:2-7
26Sɛ Yesu ju dʋɔ tawɩ sɛ, <<N baa se ba nyɩŋtɩɛ. Bʋrʋkʋma gaa ba fu ga dʋɔ na, gaa fulu dʋɔ na baa na. Dɩmʋŋ sɛ wɩɛ ŋii ŋɩ wɩsaɩ na, aja lɩɩ na baa na. 27Wɩɛ kʋma ŋii maa tawɩ gɩbɩrɩ naŋ na, n tawɩ ŋɛ bakpa naŋ. Wɩɛ ŋii ba muni dʋ n dɩlɛ naŋ na, n jɔ ŋɩ dʋɔ dawuta.>> 28N baa se baa baa dɩlɛ kʋ wʋsɛ nanɛ, ama baa dɩlɛ kʋ sʋbʋ ʋ. Ama n se Ɩsʋɔ wʋŋ wʋ a dɩlɛ warɩɛ sʋbʋ na wʋsɛ nanɛ kpiniŋ awʋrʋfʋɔ bʋala naŋ. 29Naa kpaŋnyɔ sɛ baa mʋ lɩɛ tʋra jimbisi banʋŋ? Ama Ɩsʋɔ amɩɛ Juo n fa gbɩɛ na, ba wʋrʋ taŋ wʋ a sala a. 30Ama amɩɛ bɩrɛ, wʋ jiŋ amɩɛ nyi nyʋɔsɛ kpiniŋ nʋɔ. 31Dɩmʋŋ dʋɔ n baa se nyɩŋtɩɛ, akala takɩɛ ɩ yɩɛ ba kpari kii tʋra jimbisi fɔɩ.
32Sɛ Yesu tawɩ sɛ, <<Maa tawɩ amɩɛ sɛ, wʋkʋma wʋŋ wʋ a tawɩ bakpa asanaŋ sɛ wʋ yɩɛ ma wʋrʋgbɩɛtɛ na, Wʋkpa Bu wʋŋ gba wʋ a lɩsɛ tawɩ sɛ wʋ yɩɛ ma wʋrʋgbɩɛtɛ Ɩsʋɔ Majuo wʋŋ wʋ wɩɛ Ɩsʋɔ adugbe na asanaŋ. 33Ama wʋkʋma wʋŋ wʋ pɩɛ maŋ bakpa asanaŋ na, maŋ gba, maa pɩɛ ɩ Ɩsʋɔ Majuo wʋŋ wʋ wɩɛ Ɩsʋɔ adugbe na asanaŋ.>>
Yesu n mʋ wʋsɛfɩɛ kɔŋ ŋ ama galu
Luka 12:51-53; 14:26-27
34Sɛ Yesu tawɩ sɛ n ba fa nfɩɛrɛ sɛ wʋsɛfɩɛ sɛ ma mʋ kɔŋ tibi dʋɔ. Ma n kɔna wʋsɛfɩɛ ɛ, ama galu. 35Akala takɩɛ ma kɔŋ sɛ,
<<Bu baalɛ jaŋ a kʋlʋ wʋjuo dʋɔ,
bu alʋ jaŋ a kʋlʋ wʋnaa dʋɔ,
bu baalɛ jaŋ alʋ a kʋlʋ wʋ awu dʋɔ.
36Na wʋkpa badʋŋna a yɩɛ wʋ tɩŋtɩŋ wʋ waa dʋɔtina.>>#Mik 7:6.
37<<Wʋkʋma wʋŋ wʋ a ja wʋjuo yaa wʋnaa kii maŋ na, wʋ n daga na wʋ a yɩɛ ma wʋrʋgbɩɛtɛ ɛ. Dɩmʋŋ sɛ wʋkʋma wʋŋ wʋ a ja wʋ bu baalɛ jaŋ yaa alʋ jaŋ kii maŋ na, wʋ n daga na wʋ a yɩɛ ma wʋrʋgbɩɛtɛ ɛ. 38Sɛ wʋkʋma wʋŋ wʋ n mʋ wʋ tɩŋtɩŋ wʋ daŋ gasagasa silɛ na wʋ a kpaŋ maŋ na, wʋ n daga na wʋ a yɩɛ ma wʋrʋgbɩɛtɛ ɛ. 39Akala takɩɛ wʋkʋma wʋŋ wʋ a ja wʋ a yu nkpa fa wʋ wʋsɛ na, ŋii jɔ ɩ. Ama wʋkʋma wʋŋ wʋ nkpa jɔ ɩ lɩɩ ma dʋɔ na, wʋ a yu nkpa.>>
Ɩsʋɔ kɩmtʋɔ
Maakɩ 9:41
40Sɛ Yesu ju dʋɔ tawɩ sɛ, <<Wʋkʋma wʋŋ wʋ lɩɛ nyaŋ na lɩɛ maŋ, sɛ wʋkʋma wʋŋ wʋ lɩɛ maŋ na lɩɛ wʋŋ wʋ kpiri maŋ na gba. 41Wʋkʋma wʋŋ wʋ lɩɛ Ɩsʋɔ ɔja akala takɩɛ wʋ yɩɛ Ɩsʋɔ ɔja na, wʋ a yu ɔja kɩmtʋɔ. Sɛ wʋkʋma wʋŋ wʋ lɩɛ wʋkpa wʋchirigisa akala takɩɛ wʋ yɩɛ wʋkpa wʋchirigisa na, wʋ a yu wʋchirigisa kɩmtʋɔ. 42Sɛ wʋkʋma wʋŋ wʋ a fa bachaasɛ bisi bana lɩŋ afɩɛsa na gafie akala takɩɛ wʋ yɩɛ ma kpalɛnarɛ na, maa tawɩ sɛ n nyii na dieli sɛ Ɩsʋɔ aja fa ɩ ŋɩ dʋɔ kɩmtʋɔ.>>
Currently Selected:
Matiyo 10: CLL
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy amp Bible Translation
