Matiyo 15
15
Duluŋ akalaasa
Maakɩ 7:1-13
1Farasitina na mbara bakalaasa baa barɛ lɩɩ Yerusalem kɔŋ gaa tasɛ Yesu sɛ, 2Be n yɩɛ sɛ n kpalɛnara baa baa kpaŋ daa duluŋ ayɩɛsa dʋɔ? Akala takɩɛ baa saŋ ba pamɩɛ pɔɩ na baa di i.
3Sɛ Yesu tasɛ ba sɛ, <<Be n yɩɛ sɛ amɩɛ duluŋ ayɩɛsa dʋɔ ɩɩ kpaŋ Ɩsʋɔ mbara dʋɔ? 4Akala takɩɛ Ɩsʋɔ tawɩ Mosesi mbara wɩɛ ŋii naŋ sɛ bu njuo na nnaa#Ɛsa 20:12; Ditiro 5:6. na wʋkʋma wʋŋ wʋ a tawɩ wɩɛ baŋ wʋjuo yaa wʋnaa na, ŋɩ tiri gʋ ba n kʋ ɩ.>>#Lɛf 20:9. 5Ama amɩɛ bɩrɛ ɩ kalaa sɛ wʋkʋma wʋŋ wʋ tawɩ wʋjuo yaa wʋnaa sɛ, <<Chɔna kʋma ŋii nyaa yu lɩɩ ma jaŋ na yɩɛ gafaasa fa Ɩsʋɔ. 6Ɩ tawɩ sɛ ŋɩ n ti daga wʋ a bu wʋjuo#15:6 Sabɩɛwɩɛ ŋii ŋarɛ wɩɛna wʋjuo yaa wʋnaa na wʋ a kɩɛ wʋ dʋɔ ɔ. Dɩ kɔŋ dɩmʋŋ na amɩɛ duluŋ ayɩɛsa dʋɔ, ɩɩ kpaŋ Ɩsʋɔ mbara ŋii dʋɔ ɔ. 7Amɩɛ aluguusitina! Amɩɛ wʋsɛ dʋɔ wɩɛ ŋii Ɩsʋɔ ɔja Yisaya cha gbalɛ na yɩɛ gasiŋteŋ>> bɛ sɛ,
8<<<Bakpa bana, ba nʋɔ naŋ sɛ baa bu maŋ,
ama ŋɩ n lɩɩ ba agela naŋ ŋ.
9Baa tʋm maŋ kpakpuo bɛ,
wʋkpa mbara sɛ baa kalaa.>#Yis 29:13.>>
Bʋrʋ gaa gaa yela sɛ wʋkpa wʋsɛ a yɩɛ iniesi
Maakɩ 7:14-23
10Yesu yagɛ jama baa kɔŋ wʋ jaŋ sɛ wʋ tawɩ ba sɛ, <<N nyii ma jaŋ na ɩ nyii tie 11naa bʋrʋ gaa gaa jʋʋ wʋkpa nʋɔ naŋ na aaŋ yela sɛ wʋ wʋsɛ a yɩɛ iniesi i. Ama bʋrʋ gaa gaa lɩɩ wʋ nʋɔ naŋ na aaŋ dɩlɛ yela na wʋ wʋsɛ a yɩɛ iniesi.>>
12Sɛ wʋ kpalɛnara baa kɔŋ wʋ jaŋ gaa tasɛ ɩ sɛ, <<N jiŋ gʋ Farasitina baa nyii dɩmʋŋ wɩɛ ŋina na ba kara biŋbira?>>
13Sɛ Yesu lɩsɛ ba nʋɔ sɛ, <<Daŋ kʋma gaa naa Majuo wʋŋ wʋ wɩɛ Ɩsʋɔ adugbe n duu ga na, wʋ a kuli ga tʋsʋ. 14N baa nyala amɩɛ wʋsɛ ba dʋɔ, ba kɩɛna bɛ takɩɛ bataŋpʋna baa baa pala bataŋpʋna asanaŋ na. Ɔtaŋpʋ pala ɔtaŋpʋ asanaŋ na, baa bala baa sala dɩchabʋɔ naŋ.>>
15Sɛ Petero tawɩ ɩ sɛ, <<Lɩsɛ diduu gaa tie kalaa daa.>>
16Sɛ Yesu tasɛ ba sɛ <<Amɩɛ gba ɩŋ nyii tie? 17Ɩ ba jiŋ gʋ bʋrʋ gaa ga jʋʋ wʋkpa nʋɔ naŋ na, gaa jʋʋ wʋ lori naŋ bɛ na gaa lɩɩ wʋ wʋsɛ naŋ? 18Ama wɩɛ ŋii ŋii lɩɩ wʋkpa nʋɔ naŋ na lɩɩ wʋ digela naŋ bɛ, ŋina aaŋ yela sɛ wʋkpa wʋsɛ a yɩɛ iniesi. 19Akala takɩɛ wʋkpa digela naŋ sɛ nfɩɛrɛ asʋbʋɛ, gatagapʋ, alʋ wʋrʋgbɩɛ lɩɩ yaa baalɛ wʋrʋgbɩɛ lɩɩ, danaŋburidi, ŋmɩɛlɩŋ, akarɩɛ sariya na yɩrɛ warɩɛwʋ kpiniŋ a lɩɩ. 20Ŋina aaŋ yela sɛ wʋkpa wʋsɛ a yɩɛ iniesi, ama wʋkpa n saŋ wʋ pamɩɛ sɛ wʋ mʋ di adiya baa dɩlɛ yela na wʋ wʋsɛ a yɩɛ iniesi i.>>
Kanani alʋ wʋrʋ lɩɛdi
Maakɩ 7:24-30
21Sɛ Yesu lɩɩ dɩmaŋ ju Tirosi na Sidoŋ tibi dʋɔ. 22Sɛ Kanani alʋ wʋrʋ wʋŋ wʋ lɩɩ tibi gaa dʋɔ na kɔŋ wʋ jaŋ wʋ a kuusi sɛ, <<Kpaŋjuo, Juo Dawidi ganana bie, wɩɩ ma gɩyɔŋ! Feliŋ sʋbʋ chaɩ mabu galibie tɩba wʋ a nyala ɩ.>>
23Ama Yesu n lɩsɛ ɩ nʋɔ ɔ. Dɩmʋŋ dʋɔ wʋ kpalɛnara baa kɔŋ wʋ jaŋ gaa sʋlʋ ɩ sɛ, <<Lɩsɛ ɩ gbɩɛ akala takɩɛ wʋ kpamɩna daa wʋ a kuusi.>>
24Sɛ Yesu lɩsɛ nʋɔ sɛ, <<Isiralitina baa ba kɩɛna takɩɛ feŋ baa ba tʋsʋ na jaŋ sɛ Ɩsʋɔ kpiri maŋ.>>
25Sɛ alʋ wʋŋ kɔŋ gaa luuŋ wʋ asanaŋ sʋlʋ ɩ sɛ, <<Kpaŋjuo, chɔna maŋ!>>
26Sɛ Yesu tawɩ ɩ sɛ, <<Dɩ n daga na baa mʋ bachaasɛ adiya fa paasɛ ɛ.>>
27Sɛ alʋ wʋŋ tawɩ ɩ sɛ, <<Kpaŋjuo, yɩɛ gasiŋteŋ bɩrɛ, ama paasɛ gba a di ajarɩɛ bisi ŋii ŋɩ lɩɩ sala ba kpaŋjuo aba tebulu tie na.>>
28Sɛ Yesu lɩsɛ ɩ nʋɔ sɛ, <<Alʋ, n lɩɛdi bɔlɩɛɩ! N tasɛ n kɔŋ tɩba fa nyaŋ.>> Gabʋanaŋ sɛ wʋ bu galibie wʋŋ yu lʋm chʋɔ.
Yesu chɔ bakpa fɔɩ
29Sɛ Yesu lɩɩ dɩmaŋ ju wʋ dɔŋ Galaliya lɩɩ nʋɔ. Sɛ wʋ jiŋ bʋrɔŋ garɛ ga cha. 30Sɛ jama baa mʋ baa ba jaɩ-jaɩ, bataŋpʋna, buobi aba, anamu na lʋmɩɛtina fɔɩ baa ba kakaa na kɔŋ wʋ jaŋ gaa sii wʋ asanaŋ sɛ wʋ n chɔ ba. 31Gʋ bakpa baa na gʋ anamu a tawɩ, buobi aba yu alaŋfiya, baa ba jaɩ-jaɩ na palɛ sɛ bataŋpʋna asa fulu na, dɩ yɩɛ ba doba. Sɛ ba kalɩɛ Isiralitina Ɩsʋɔ.
Yesu fa bakpa kɔrʋɔsɛ sɩ nara (4,000) adiya
Maakɩ 8:1-10
32Sɛ Yesu yagɛ wʋ kpalɛnara baa kɔŋ wʋ jaŋ sɛ wʋ tawɩ ba sɛ, <<Bakpa bana wɩɛ wɩɛ maŋ gɩyɔŋ, akala takɩɛ wɩɛ atoro mɩnaŋ gʋ ba wɩɛ ma jaŋ, sɛ ba n yu bʋrʋ di i. Maa ja sɛ maa tii ba gbɩɛ na dusoŋ ŋ, naa dɩmʋŋ na baa lɩɩ sala gbɩɛ naŋ.>>
33Sɛ wʋ kpalɛnara baa tasɛ ɩ sɛ, <<Le sɛ dɩɩ yu adiya ifuli ŋina dʋɔ fa jama bana?>>
34Sɛ Yesu tasɛ ba sɛ, <<Bodobodo aŋmaŋ sɛ ɩ wɩɛna?>> Sɛ ba lɩsɛ ɩ nʋɔ sɛ, <<Lɩkaarɛ na gajibisi pii barɛ.>>
35Sɛ Yesu tawɩ jama baa sɛ n cha tibi naŋ. 36Sɛ wʋ mʋ bodobodo lɩkaarɛ ŋii na aji baa, gʋ wʋ yɩlɩ Ɩsʋɔ taŋ na, wʋ jaɩ tɩba mʋ fa wʋ kpalɛnara baa sɛ ba mʋ fa bakpa baa. 37Bakpa baa kpiniŋ di sɛ ba pawʋ sɛ wʋ kpalɛnara baa kui ŋii ba di kakaa na gachaŋasɛ lɩkaarɛ. 38Bakpa baa ba di adiya ŋii na tɩba baala nʋɔ yɩɛ kɔrʋɔsɛ sɩ nara (4,000). Ala na bachaasɛ n kpi i. 39Gʋ Yesu tii jama baa gbɩɛ taŋ na, wʋ jʋʋ buori naŋ tɩɛsɛ ju Magadaŋ tibi dʋɔ.
Currently Selected:
Matiyo 15: CLL
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy amp Bible Translation
