Ɩya-ɩya 13
13
Be birima Dikola dɩɩ dɩdaka fɔ bɛ san Yerusalem
1Wʋʋ gama fɔ Dafidi e tuma ma bɩtà bʋʋ bɛndɩrɛ fɔ powu gɛtɛ bɩtà bʋʋ bɛtàlɛ nkpɩn ton-ton, ma ɛbɛ gɛtɛ akpilin ton-ton bɛ̀ sa bɔɔ gatɩn fɔ. 2Ɛwʋ gɛ ɛ dɔ̀ Isareli dɩtɩnpan gɛtɛ di tuma dʋkɔ fɔ powu alan, <<Gengyi wʋ̀ kɔlɔ tɛ yɩ, gɛ gengyi wù di gɛ Yahwe, tii Wurubwarɛ gelenbi fɔ, ɩ yɛ taà sa bɛnɩ tɩɩ bɛfʋrɩ-kurumakyɛɛ Isareli bete fɔ baakʋn, Isareli gɛtʋnkwaa powu gaanɩ. Taà sa bɛnɩ gedi gɩɩ bɛtɛlɛ ma Lefi bete gɛtɛ bè si ma ɛbɛ, baatele yaanɩ, ma bɔɔ bɛnan baadikʋn yaanɩ fɔ bàà bɛ̀ fɩya ma ɛtɩ. 3Fɔ taà birima Dikola dɩɩ dɩdaka fɔ tɩ ba taakʋn, yema ɔkʋna gɛtɛ Sawulo ee di bugyu fɔ, tin lila dii koro.>> 4Ɛwʋ gɛ dɩtɩnpan fɔ powu di yera ade fɔ, yema ɩ sara ma ɛbɛ powu.
5Okoro Dafidi ɛ yɛ Isareli bete powu, ye Sihori getu gɛtɛ gɩ̀ sa Egyipiti wɔbalan waanɩ fɔ, ma sere Lebo-Hamati be tuma gɛtɛ bàà ma ka Dikola dɩɩ dɩdaka fɔ ye Kiriyati-Yarim san Yerusalem. 6Ɛwʋ gɛ Dafidi ma Isareli bete powu bɛ san Bala, gɛtɛ wù di Kiriyati-Yarim, gɛtɛ wù sa Yuda wofoli wʋʋ gɛtʋnkwaa fɔ, gɛtɛ bàà ma ka Wurubwarɛ Dɩdaka gɛtɛ dii wùlà alɛ Yahwe è si kerubi ɛbɛ bɛnyɔɔ boo getite, gɛ wo diyere dɩ̀ gyaga dii koro fɔ ba.
7Be tiri Dɩdaka fɔ be ye Abinadabi dɩkpaara daanɩ bɛ ma gyaga tiiramisan-fon wo koro, gɛ Usa ma Ahiyo bee wùlà tiiramisan fɔ osele. 8Dafidi ma Isareli bete powu bɛ ka bɔɔkɛma powu bɛ tà abin, ma adʋlɛ, ma akyaka, ma agongon, ma ɩnʋn yɩɩ gɛnʋma gɛ bɛ fʋ̀n akantan be di ɔsɛ Yahwe bʋnʋn.
9Gɛtɛ be gyu Kidon wamɔrɔ yii getibakʋn fɔ, ɛkwɔ fɔ ɛ sarɩ, gɛ Usa ɛ sama gʋlɔ ɛ kɔlɩ dɩdaka fɔ. 10Disere-kɩlɩn fɔ, Yahwe wowurufa wʋ ba Usa wo koro, yema ɛ kya dɩdaka fɔ okoro. Usa e ku dʋkɔ Wurubwarɛ bʋnʋn.
11Wʋ taga Dafidi yema Yahwe wowurufa-dɩrɛ wʋ ba Usa wo koro, gɛ bè ye ma ǹdò bee kpèlè dʋkɔbɛ alɛ Peresi-Usa.#13:11 Peresi-Wusa gɛtɛ wuu wùlà alɛ Wurubwarɛ wowurufa wʋ tɔ Wusa wo koro
12Gɛ Dafidi e serenti Yahwe duwi dɩtɔkɔ, gɛ e lila alan, <<Lan gɛ nan mɛ gɛ nan ka Yahwe Dikola dɩɩ dɩdaka nyadɩ n san maakʋn?>> 13Okoro ɛn mɩnɩ ka Dɩdaka fɔ sɩ̀ wakʋn, ɔkʋn gɛtɛ bee kpèlè Dafidi Ditele-dɩrɛ fɔ daanɩ. Mɔ fɔ ɛ yɛ bɛ ka dɩ bɛ ma sɩ̀ Gati-te gɛtɛ bee kpèlè Obedi-Edom fɔ dɩkpaara daanɩ. 14Wurubwarɛ Dɩdaka fɔ dɩ wɔ dɩ dʋrɔ Obedi-Edom dɩkpaara daanɩ bebon besiyee, gɛ Yahwe e hira wɔ dɩkpaara dɩɩ bɛnɩ, ma gɩnyan-kamasɛ gɛtɛ e wura fɔ.
Currently Selected:
Ɩya-ɩya 13: ADE
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy and Bible Translation