1 Begyu-dɩrɛ 10
10
Seba wogyu-nanɩ e be silin Solomon
1Gɛtɛ Seba wogyu-nanɩ ɛ nʋn anlɛ gɛtɛ Solomon diyere di ye ma ɛwʋ gɛtɛ ɛ mɛ ɛ sa Yahwe gingyebi fɔ, ɛ ba èè be ten wɔ onyun ma ade-lilalɛ ma ɔkɛma ɩkɩ. 2Ɛ ba Yerusalem ma wɔ bɛnɩ dɩtɩnpan, ma akpɔŋɔ, gɛtɛ ì tola anyan ma ofen, ma sɩka-sɩya gepepe, ma ataa ma ɔyɛkɛma, gɛ e be gyu Solomon wakʋn. Gɛ ɛ dɔ̀ Solomon ade powu gɛtɛ ɩ̀ sa wamɩnlɛ yaanɩ. 3Ɛwʋ gɛ Solomon e tiri wade fɔ powu yiinyun ɛ tɛ wɔ. Ade ɩkɩ ɩn mɛ egyu-dɩrɛ ɔkɛma gɛtɛ èè tiri yiinyun ɛ tɛ wɔ. 4Gɛtɛ Seba wogyu-nanɩ e we gɛsɛyɩ powu gɛtɛ Solomon ɛ̀ ba, ma Digyu-kpara gɛtɛ e sere, 5ma anyandilɛ gɛtɛ ɩ̀ gyaga wɔkpʋlɔ wuu koro, ma wɔ bɛndɩrɛbi anlɛ gɛtɛ bè si, ma wɔ bɛsaranyan ma bɛsʋgʋgyan gɛtɛ bɛ̀ sa bɔɔ ngba, ma wɔ bʋkan bʋʋ bɛyaranlɛ, ma gekuma gii gedi gɛtɛ ɛ tɛ Yahwe Dikwo-dɩrɛ fɔ daanɩ fɔ, ɔmɩrɩ wu ku wɔ wʋ kààrà.
6Ɛwʋ gɛ ɛ dɔ̀ egyu-dɩrɛ alan, <<Ade gɛtɛ na nʋn mɩɩn gɩfɩɩ gaanɩ ka dama aa gʋtʋn gɛtɛ a mɛ, ma aa gɛsɛyɩ fɔ, wʋ̀ sa waanɩ. 7Mɔ min to ade fɔ di bè ye ma ɔkʋna gɛtɛ nmɩ gbagba na ka mɩɩn gʋnʋn na be we. Nkyɛ bɛn dɔ̀ mɩ ade fɔ yɩɩfan gba. Aa gɛsɛyɩ, ma koro gaanyan powu gɛtɛ à ba fɔ, wʋ kààrà ade gɛtɛ bɛ dɔ̀ mɩ fɔ. 8Aa bɛnɩ bɛ ma duyu-kpara! Gɛlɛ ke gɛ aa bɛndɩrɛbi, gɛtɛ bɛɛ nʋn aa gɛsɛyɩ gaade ɔya-kamasɛ fɔ, bɛ ma duyu-kpara! 9Gesila gì di gɛ Yahwe aa Wurubwarɛ gɛtɛ ee len aade, gɛ ɛ ka wɔ̀ ɛ mɛ Isareli wogyu fɔ woyo. Yema gelen gakpaakpa gɛtɛ Yahwe ɛ̀ ba tɛ Isareli fɔ wuu koro gɛ ɛ sɩ̀ wɔ̀ bugyu, fɔ àà dɔ̀ gɔdɔ kyɛkyɛ ma giisele waanɩ.>>
10Ɛwʋ gɛ ɛ tɛ egyu-dɩrɛ sɩka-sɩya gɛtɛ wʋʋdʋrʋ waà mɛ anlɛ bekilo ɩgbaa ɩnyɔɔ ma nkpɩn bʋnyɔɔ ma akpilin-ton (4,500), ma anyan ma ofèn kpekpesi, ma ataa gɛtɛ ɩ̀ ba ɔyɛkɛma. Solomon en wura anyan ma ofèn yàà nɩma anlɛ gɛtɛ Seba wogyu-dɩrɛ-nanɩ ɛ tɛ wɔ fɔ nya.
11Hiram wɔ-ɩkʋlɩ-dɩrɛ gɛtɛ ɩ tɩ ka sɩka-sɩya i ye Ofiri ɩ mɔma wɔ fɔ, ɩ ka alimugi wo-iyon ma ataa ma ɔyɛ-kɛma yaatola-dɩrɛ-dɩrɛ mɔ ɩ ba. 12Gɛ egyu-dɩrɛ ɛ ka alimugi wo-iyon fɔ e sere bepila e gye Yahwe Dikwo-dɩrɛ fɔ, ma digyu-kpaara fɔ, gɛ ɛ ka ɩkɩ ɛ mɛ adʋlɛ ɛbɛ ma adʋlɛ ɛbɛ dɩrɛ-dɩrɛ ɛ tɛ ɩnʋn yɩɩ bɛnʋmalɛ. Ye duwi dɩtɔkɔ fɔ bɛn mɩnɩ mɔma alimugi wo-iyon asɔ yaanɩ gɛlɛ, abɛɛ bàà we ɩkɩ asɔ yaanɩ gɛlɛ nya be sere ma ǹdò.
13Egyu-dɩrɛ Solomon ɛ tɛ Seba wogyu-nanɩ gɩnyan-kamasɛ gɛtɛ ee len abɛɛ e lila fɔ, ka fɩya ma anyan gɛtɛ ɛ tɛ wɔ e ye agyu-nyan gɛtɛ ɛ tɛ wɔ fɔ. Ɛwʋ gɛ ɛwɔ ma wɔ bɛnɩ-nyɩmalɛ fɔ be biri bɛ da bɔɔ gɩfɩɩ gaanɩ.
Solomon gɩkyɩnyɩn
14Sɩka-sɩya gɛtɛ Solomon ee wura gɩkyan-kamasɛ fɔ wʋʋdʋrʋ wʋ̀ ba siminti bɛbagɩ nkpɩn bʋnyɔɔ ma akpilin ton (500) wʋʋdʋrʋ, 15gɛtɛ bɛn kalan kɔba gɛtɛ ee to e ye gɩyɛ gii bedilɛ, ma Arabiya begyu-dɩrɛ powu, ma Isareli bete bɔɔ bɛnyalɛ fɔ baakʋn.
16Egyu-dɩrɛ Solomon ɛ yɛ bɛ ka sɩka-sɩya be tiba bɛ mɛ awɔrɔnyan-dɩyɛlɛ-koro gɛkpɩn (200). Bɛ ka sɩka-sɩya kilo besiyee ma ɔfan (3.5) bɛ mɛ gɩwɔrɔnyan-dɩyɛlɛ-koro-kamasɛ. 17E biri e tiba sɩka-sɩya ɛ mɛ awɔrɔnyan-dɩyɛlɛ-koro-tɩtɩɩ gɛkpɩn ma akpilin ton (300). Ɛ ka sɩka-sɩya kilo ma ɔfan ɛ mɛ gɩwɔrɔnyan-dɩyɛlɛ-koro-kamasɛ. Gɛ egyu-dɩrɛ ɛ ka yɩ ɛ ma sɩ̀ Digyu-kpara gɛtɛ bee kpèlè Lebanon gɩkan fɔ daanɩ.
18Egyu-dɩrɛ ɛ salɩ gigyu-bɩya gɛ ɛ ka etola anya ɛ sa gɩ adawʋ. Ɛ ka sɩka-sɩya-kpara ɛ bɔlɩ gɩ. 19Gigyu-bɩya fɔ gɩ̀ ba akyikya-bʋnkʋn kooron, gɛ gɩɩ gama wʋʋ gɩlan fɔ, gɩ̀ ba gɛkpasakʋn kulu-kulu. Gɛ gɛbɩya fɔ gɩ̀ ba alɔ yɩɩ gɛgyagakʋn, giifen ɩnyɔɔ fɔ powu. Bɛ mɛ bɛdɩ̀rɛ̀ bɛnyɔɔ be yela gɛbɩya fɔ gɩɩ dɩbɩyan ma giilogyi. 20Bɛdɩ̀rɛ̀ fwo-bɛnyɔɔ bè yela akyikya-bʋnkʋn kooron yii koro. Ɛdɩ̀rɛ̀ ɛkɩ-ɛkɩ è yela gekyikya-bʋnkʋn-kamasɛ giifèn ma ofèn. Bɛn tɛ mɛ gigyu-bɩya nyagɩ gaakɩ anlɛ nyagɩ giidu tɛ bugyu bʋkɩ bɛ nya. 21Bɛ ka gɛ sɩka-sɩya bɛ mɛ egyu-dɩrɛ Solomon bɛkɔpʋ powu. Gɛ digyukpaara gɛtɛ bee kpèle Lebanon gɩkan fɔ daanɩ daanyan powu ì di gɛ sɩka-sɩya-kpara gɛ bɛ ka bɛ mɛ yɩ. Gɩnyankɩ gɩn ma gɛtɛ bɛ ka gɛ sɩka-fututu mɛ gɩ, yema Solomon wɔya waanɩ fɔ, sɩka-fututu ɛn ma gɩyɛ. 22Fɔ egyu-dɩrɛ ɛ̀ ba gɩyɛ gɩɩ-ɩkʋlɩ-kpekpesi ɛpʋ wo koro, fɩya ma Hiram woyo ɩkʋlɩ fɔ. Bɩkyan bisiyee-kamasɛ fɔ, ɩkʋlɩ fɔ ii ye Tarisisi ɩ ba ma sɩka-sɩya, ma sɩka-fututu, ma ditola-nyaa, ma bɛsɩsɩra, ma betema.
23Egyu-dɩrɛ Solomon gɛsɛyɩ ma wo koro gaanyan gɛtɛ e wura fɔ, ɩ da gɛtʋnkwaa giigyu-kamasɛ woyo. 24Gɛlɛ wuu koro ande powu yɩɩ bɛnɩ bee len gɛtɛ bàà bɛ nʋn Solomon gɛsɛyɩ gaade gɛtɛ Wurubwarɛ ɛ tɛ wɔ fɔ. 25Gɩkyan n di gɩkyan, ɛnɩ-kamasɛ gɛtɛ ɛ̀ ba wakʋn fɔ, ɛɛ bɛ kyɛ wɔ sɩka-fututu, ma sɩka-sɩya anyan, ma ngba-serelɛ, ma akpanyan, ma anyan ma ofèn, ma abengyi, ma akpɔŋɔ-tɩtɩɩ.
26Solomon e kʋla tiiramisan ɛbɛ ma abengyi, ma yii bɛgyagalɛ, gɛ e wura tiiramisan ɛbɛ nkpɩn kwarankɩ (1,400), ma abengyi ɩgbaa kooron (12,000), gɛtɛ ɛ ka ɛ ma sɩ tiiramisan yaatele yaanɩ ma ɛwɔ egyu-dɩrɛ gbagba wakʋn Yerusalem. 27Egyu-dɩrɛ ɛ yɛ sɩka-fututu e gbintin Yerusalem anlɛ ataa tun-tun, gɛ seda wo-iyon i gbigi anlɛ gɛtɛ Sikamo wo-iyon ɩ yɔn odon wʋʋ gatɩn fɔ. 28Bɛ ka gɛ Solomon wabengyi fɔ be ye gɛ Egyipiti, ma Kuwe ntʋnkwaa baanɩ. Wɔ gɩyɛ gii bedilɛ fɔ be se yɩ be ye gɛ Kuwe. 29Be se tiiramisan-kɩlɩn sɩka-fututu abi nkpɩn bisiyee (600), gɛ be se dibengyi kɩlɩn mɔ sɩka-fututu abi akpilin kwarankɩ ma fwo (150) be ye Egyipiti. Gɛ ɛbɛ mɔ be fu yɩ bɛ tɛ Hiti bete ma Aram bete boo begyu powu.
Currently Selected:
1 Begyu-dɩrɛ 10: ADE
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy and Bible Translation