2 Begyu-dɩrɛ 16
16
Yuda wogyu Ahasi
1Remaliya wobi Peka bugyu buu gedi tɛ Isareli bete wʋʋ gɩkyan fwo-kwarankɩfɛ gaanɩ fɔ, Yuda wogyu-dɩrɛ Yotam wobi Ahasi e sere bugyu buu gedi. 2Ɔkʋna gɛtɛ Ahasi e sere bugyu buu bugyu fɔ, ɛ̀ ba bɩkyan dikpilin, gɛ e di bugyu Isareli bɩkyan fwo-kooron. Ɛn tɛrɛma wotu Dafidi wade-mɛlɛ. Ɛn mɛ ade-kpara Yahwe, wo Wurubwarɛ fɔ bʋnʋn baanɩ. 3Ɛ tɛrɛma Isareli begyu boo-isele, gɛ e kuma wobi gba ɛ tɛ gekuma gii gedi ɛ ka ɛ tɛrɛma ade-kyʋnlɛ gɛtɛ bɛnɩ gɛtɛ Yahwe e berema e ye Isareli bete bɔɔ bʋnʋn fɔ bɛ mɛ fɔ. 4Ɛɛ tɛ gedi, gɛ ee kuma olifwi asʋmakʋn, ma adenbi yii koro, ma oyon-kusuu-kamasɛ wʋʋ gatɩn.
5Ɔkʋna wʋkɩ fɔ, Aram wogyu-dɩrɛ Resin ma Isareli wogyu-dɩrɛ Peka gɛtɛ wote n di Remaliya fɔ bɛ san bàà ma sʋ Yerusalem ditele bɛ sa, fɔ bàà tà dɩɩ bɛnɩ bɩtà. Mɔ bɛn talɩ di dii koro. 6Waanɩ fɔ, Aram wogyu-dɩrɛ Resin ɛ kpà e to Elati ditele fɔ e ye Yuda bete baakʋn ɛ tɛ Aram, gɛ Edom bete bɛ san bɛ ma sara dʋkɔ bè ye ma ǹdò.
7Ɛwʋ gɛ Ahasiya ɛ sa bɛnɩ Asiriya wogyu-dɩrɛ Tigilati-Pileseri wakʋn alan, <<Ǹ di gɛ aasaranyan ma aabi. Ba fɔ àà bè tiri mɩ ye Aram wogyu-dɩrɛ ma Isareli wogyu-dɩrɛ gɛtɛ bɛɛ tà mɩ bɩtà lɛ baalɔ yaanɩ.>> 8Gɛ Ahasi ɛ ka sɩka-fututu ma sɩka-sɩya gɛtɛ wʋ̀ sa Yahwe Dikwo-dɩrɛ daanɩ fɔ, ma ɛwʋ gɛtɛ wʋ̀ sa gigyu-bɩya gɩɩ gatɩn fɔ, bɛ ma tɛ Asiriya wogyu-dɩrɛ. 9Gɛ Asiriya wogyu-dɩrɛ fɔ ɛ nʋn wakʋn, gɛ ɛ ma tà Damasiko ditele bɩtà, gɛ e gye dɩ bɩtà. E tiri dɩɩ bɛnɩ e ye daanɩ ɛ san Kiri, gɛ e wolo Resin.
10Gɛtɛ egyu-dɩrɛ Ahasi ɛ san Damasiko ɛ ma tuma Asiriya wogyu-dɩrɛ Tigilati-Pileseri fɔ, e we gedi gɩɩ gɛtɛkʋn gɩkɩ Damasiko dʋkɔ, gɛ ɛ ka gɩɩ gɛta ma gɩɩ gɛmarabi-gbagbaagba ɛ tɩyɛma gedi gɩɩtɛlɛ Uriya. 11Ɛwʋ gɛ gedi gɩɩtɛlɛ Uriya ɛ mara gedi gɩɩ gɛtɛkʋn gɛtɛ giidu wʋ̀ bɔ wu we anlɛ gɛtɛ egyu-dɩrɛ Ahasi ɛ ka ɛ tɩyɛma e ye Damasiko fɔ. Gɛ gedi gɩɩtɛlɛ fɔ ɛ mara gedi gɩɩ gɛtɛkʋn fɔ e were pɛgɛ egyu-dɩrɛ Ahasi e biri ɛ ba. 12Gɛtɛ egyu-dɩrɛ e ye Damasiko e be gyu, gɛ e we gedi gɩɩ gɛtɛkʋn fɔ, e kpe ɛ gbɛma gɩ, gɛ ɛ tɛ gedi gii koro. 13Ɛ tɛ gekuma ma anyan yaabi yii gedi, gɛ ɛ daa bʋkan e lù gii koro ɛ tɛ gedi, gɛ ɛ ka nkalan fɔ ɛ tɛ olila wuu gedi gii koro. 14Gɛ ɛ kpema gɩwɔrɔnyan-sɩya gedi gɩɩ gɛtɛkʋn gɛtɛ gi yela Yahwe bʋnʋn, Dikwo-dɩrɛ fɔ dɩɩ bʋnʋn fɔ e ye gii geyelakʋn, gɛ ɛ ka gɩ ɛ ma yela gifufon fɔ gɩɩpɩ, gatala gɩɩ gɩlan. 15Ɛwʋ gɛ Ahasi ɛ dɔ̀ gedi gɩɩtɛlɛ Uriya alan, <<Tɛ gagyɩgyan gii gekuma gii gedi ma ɔgyɔlɔ waanyan yaabi yii gedi, ma egyu-dɩrɛ wo gekuma gii gedi ma wanyan yaabi yii gedi, ma gɛtʋnkwaa fɔ powu gɩɩ bɛnɩ boo gekuma gii gedi ma bɔɔ bʋkan buu gedi gɩɩ gɛtɛ̀ gedi gɩɩ gɛtɛkʋn-fon fɔ gii koro. Wʋʋ gama fɔ ka gekuma gii gedi gaanyan, ma gedi gɩɩ gɛtɛ̀ yɩɩ nkalan fɔ powu ŋwan gedi gɩɩ gɛtɛkʋn-fon fɔ gii koro. Mɔ gedi gɩɩ gɛtɛkʋn gɛtɛ bɛ ka gɩwɔrɔnyan-sɩya bɛ mɛ fɔ gàà yela tɛ mɩ nan tì ka n lila Yahwe gelenbi. 16Gɛ gedi gɩɩtɛlɛ Uriya ɛ mɛ anlɛ gɛtɛ egyu-dɩrɛ Ahasi ɛ bɔ ɛ dɔ̀ fɔ.
17Gɛ egyu Ahasi e tiri iyon-pansan-pansan fɔ, gɛ e tiri bɛtasa-dɩrɛ gɛtɛ bɛ̀ gyaga yii koro fɔ. Ɛ tɔ̀là butu buu geto-sakʋn gɛtɛ gɩ̀ gyaga bɛkwɔ gɛtɛ bɛ ka gɩwɔrɔnyan-sɩya bɛ mara fɔ boo koro fɔ, gɛ ɛ ka gɩ ɛ ma gyaga dɩtaa dii koro. 18Gɛtɛ ee len wade yàà di Asiriya wogyu-dɩrɛ gʋnʋn okoro, e tiri duwi-tunalɛ dii gedi gɩɩpanpan gɛtɛ nafɔ be sere Dikwo-dɩrɛ daanɩ fɔ e ye, gɛ ɛ sʋ otunu gɛtɛ Isareli wogyu ɛɛ ka e gyu Dikwo-dɩrɛ daanɩ fɔ.
19Bɛ ŋwara Ahasi wade-kurumakyɛɛ gɛtɛ ɛ mɛ wo bugyu buu gedi baanɩ fɔ bɛ sa Yuda begyu-dɩrɛ boo koro gaade yaakpa yaanɩ. 20Ahasi e ku, gɛ be lò wɔ wotu ɛbɛ bɔɔ bɩsan baanɩ, ɔkʋn gɛtɛ bee kpèlè Dafidi Ditele-dɩrɛ fɔ. Gɛ wobi Hesekiya e di bugyu e sere wɔ gɩsɩrɩ.
Currently Selected:
2 Begyu-dɩrɛ 16: ADE
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy and Bible Translation