2 Begyu-dɩrɛ 5
5
Naaman e wura geyeba gɩɩ gɛkya
1Ete ɛkɩ ɛ sara gɛtɛ bee kpèlè wɔ Naaman. È di Aram bɩtà bʋʋ bɛtàlɛ bɔɔndɩrɛ. Aram wogyu-dɩrɛ ee bù wɔ gepepe, gɛ ee sila wɔ, yema ɛwɔ Naaman wo koro gɛ Yahwe ɛ da, gɛ Aram bɩtà bʋʋ bɛtàlɛ be di akpa yii koro. È di gɛ bɩtà bʋʋtàlɛ-dɩrɛ, mɔ ee yeba geyeba-sɩya.
2Aram bɩtà bʋʋ bɛtàlɛ bɛɛ tɩ̀ ma kpila Isareli bete baanyan, gɛ waanɩ fɔ, be gye ɛsʋgʋgyan-bi, gɛtɛ ɛ bɛ mɛ Naaman wɔsɔ wɔsʋgʋgyan. 3Duwi dɩkɩ ɛsʋgʋgyan-bi fɔ ɛ dɔ̀ wofona alan, <<Gengyi miinfonte ɛ̀ ka koro ɛ ma wùlà Wurubwarɛ wɔtabʋrʋlɛ gɛtɛ ɛ̀ sa Samariya fɔ, ɛɛ̀ kya wɔ geyeba sɩya nyagɩ.>>
4Gɛtɛ Naaman wɔsɔ ɛ dɔ̀ wɔ ade nyayɩ fɔ, ɛ san ɛ ma dɔ̀ egyu, ade gɛtɛ Isareli-sʋgʋgyan-bi fɔ ɛ dɔ̀ fɔ. 5Gɛ Aram wogyu-dɩrɛ ɛ dɔ̀ wɔ alan, <<Na nʋn, san! Nan tɛ wɔ̀ gɩkpa gɛtɛ aà ka a san ma Isareli wogyu. Okoro Naaman ɛ da. Gɛtɛ ɛɛ fɔrɔ fɔ, ɛ ka sɩka-fututu bekilo gɛkpɩn ma akpilin kwarankɩ (340), ma sɩka-sɩya bekilo akpilin asiyee ma fwo (70), ma gèsù gɩɩ ngba akpen fwo (10) e ton. 6Gɩkpa gɛtɛ ɛ ka ɛ san ma Isareli wogyu fɔ gɩɩ dɔ̀ alan, <<Ntɛ sa mɩɩn saranyan Naaman gɛtɛ è de gɩkpa nyagɩ ɛɛ mɔma wɔ̀ lɛ, fɔ àà kya wo geyeba sɩya fɔ.>>
7Gɛtɛ Isareli wogyu ɛ bɔ ɛ kalan gɩkpa fɔ, e gye wɔ ngba ɛ fɛɛran, gɛ ɛ dɔ̀ alan, <<Ǹ di gɛ Wurubwarɛ? Ǹ talɩ n wolo ɛnɩ, abɛɛ ǹ talɩ n birima ɛnɩ n ba nkpa anɩ? Anʋn yii koro gɛ Egyu-dɩrɛ nyawɔ ɛɛ ka ɛnɩ ɛ tɩyɛma mɩ alɛ n kya wɔ geyeba sɩya? Nya anlɛ gɛtɛ ee len èè len mɩ ololo!>>
8Gɛtɛ Wurubwarɛ wɔtabʋrʋlɛ Elisa ɛ nʋn gɛtɛ Isareli wogyu-dɩrɛ ɛ fɛɛran wɔ ngba fɔ, ɛ sa wɔ ɔtʋn alan, <<Anʋn yii koro gɛ a fɛɛran aa ngba. Yɛ ete fɔ ɛ̀ɛ̀ ba maakʋn, fɔ èè we alɛ Wurubwarɛ wɔtabʋrʋlɛ ɛkɩ ɛ̀ sa Isareli.>> 9Okoro Naaman ɛ ka wabengyi ma wo tiiramisan ɛbɛ, gɛ ɛ ma yela Elisa dɩkpaara diitunu. 10Ɛwʋ gɛ Elisa ɛ sa ɛnɩ ɛ ma dɔ̀ wɔ alan, <<San Yodan getu gaanɩ, fɔ àà kù butu fɔ disere kwarankɩ. Fɔ aa koro-kpaba gaà biri gɩ sara giinundu, gɛ waà kpa wɔ̀ koro dɩdɩɩ.>>
11Mɔ Naaman ɛ ka owurufa e kpe e ye wakʋn gɛ ɛ dɔ̀ alan, <<I fi ɩ nya! Ǹ nyɩ̀ alɛ Wurubwarɛ wɔtabʋrʋlɛ fɔ eè ye e be yela mɩɩn bʋnʋn, fɔ èè tiri onyun tɛ Yahwe, wo Wurubwarɛ fɔ, fɔ ɛ̀ɛ̀ ka gʋlɔ wùlà geyeba sɩya fɔ, fɔ ɛ̀ɛ̀ kya mɩ geyeba fɔ. 12Damasiko watu Abana ma Faripa ɩn kɔlɔ da Isareli watu powu? Mɩɩn daa kù yaanɩ fɔ nàn wura geyeba gɩɩ gɛkya?>> Okoro Naaman e biri gɛ ɛ da owurufa waanɩ.
13Ɛwʋ gɛ wɔ bɛsaranyan be kpe bɛ gbɛma wɔ, gɛ bɛ dɔ̀ wɔ alan, <<Miinfonte, Gengyi ade ma ɔkɛma ɩkɩ gɛ Wurubwarɛ wɔtabʋrʋlɛ fɔ ɛ̀ daà dɔ̀ wɔ̀ alɛ mɛ fɔ, an daà mɛ yɩ? Anʋn yii koro gɛ aan talɩ a bɔ a kù anlɛ gɛtɛ ɛ dɔ̀ fɔ, fɔ àà wura geyeba gɩɩ gɛkya?>> 14Ɛwʋ gɛ Naaman ɛ waran ɛ san Yodan getu fɔ gaanɩ, gɛ e gyu butu fɔ baanɩ e mulun e ye disere kwarankɩ, anlɛ gɛtɛ Elisa e wùlà wɔ fɔ, gɛ e wura geyeba gɩɩ gɛkya. Wo koro gi biri gi sara giinundu gɛ gi fere anlɛ ebi-sorobi wo koro-kpaba. 15Ɛwʋ gɛ Naaman ma wɔ bɛnɩ fɔ powu be biri bɛ san Elisa wakʋn, gɛ ɛ dɔ̀ wɔ alan, <<Nkele na we gɛtɛ gɛtʋnkwaa powu gaanɩ fɔ Wurubwarɛ ɛn ma ɔkankɩ sɩyɛɛ Isareli. Okoro ɛndɩrɛ, ǹ fɔ wɔ̀ gɛ to aasaranyan anyan-kyɛlɛ nyayɩ.>>
16Gɛ Elisa ɛ dɔ̀ wɔ alan, <<Na nya Yahwe gɛtɛ ɛ̀ sa, gɛ ntɛ sʋma lɛ alɛ, mɩn nan to anyan-kyɛlɛ ɩkɩ.>>
Naaman ɛ nyɩ Elisa gɛtɛ èè to anyan fɔ, mɔ Elisa e terema. 17Ɛwʋ gɛ Naaman alan, <<Gengyi an nan to maanyan-kyɛlɛ fɔ bɩrɛ fɔ, yɛ nmɩ aasaranyan nan kpila atɩn akpɔŋɔ-tɩtɩɩ yaatola anyɔɔ n san mɩɩnlɛ n ma mara gedi gɩɩ gɛtɛ̀kʋn, yema ye nkenkele san fɔ, mɩn nan nɩ tɛ ekpen ɛkɩ gedi, abɛɛ nan kuma anyan n tɛ ekpen ɛkɩ gedi, sɩyɛɛ Yahwe woko.>> 18Ɔya-kamasɛ gɛtɛ miinfonte ee gyu ekpen Rimon dikwo daanɩ èè kura wɔ fɔ, ɛɛ tɩ̀ ka ɔdʋrʋ ɛ nyɩ mɩ gɛtɛ wʋʋ yɛ nmɩ mɔ nte kura wɔ. Mɔ ntɛ fɔ Yahwe ɛ̀ɛ̀ ka nmɩ aasaranyan maade-kpen gɛtɛ na mɛ fɔ ɛ kyɛ mɩ. Ntɛ fɔ Yahwe ɛ̀ɛ̀ ka ɛ kyɛ mɩ yema nmɩ mɔ na kura na sʋma.>>
19Ɛwʋ gɛ Elisa ɛ dɔ̀ wɔ alan, <<San olila waanɩ!>>
Gɛtɛ Naaman e kpe e ye Elisa wakʋn ɛ da gɛ ɛn ta ye ɔfɔ gʋsɔ fɔ, 20Wurubwarɛ wɔtabʋrʋlɛ Elisa wɔsaranyan Gehasi ɛ dɔ̀ woko-woko alan, <<Miinfonte e kere Aram-te Naaman nyawɔ ɛ ya ɛ da gɛtɛ en to wanyan gɛtɛ ɛ ka ɛ ba fɔ. Na nya Yahwe alɛ nan serenti n tɛrɛma wɔ n ma to gɩnyankɩ.>>
21Gɛ Gehasi ɛ kpa ɛ gyaga Naaman wo koro. Gɛtɛ Naaman e we Gehasi è serenti ɛ̀ tɛrɛma wɔ fɔ, ɛ waran wo tiiramisan fɔ wo koro ɛ ma tuma wɔ. Ɛwʋ gɛ e lila wɔ alan, <<Ade ɩkɩ ɩ ba abɛɛ?>>
22Gɛ Gehasi alan, <<Ade kpen ɩkɩ ɩn ma. Miinfonte na sa mɩ aakʋn alɛ ǹ bɛ dɔ̀ wɔ̀ alan, <Wurubwarɛ bɛtabʋrʋlɛ bɛnyɔɔ be ye Efrayim wo-idon yɩɩ gɛtʋnkwaa gaanɩ bɛ ba maakʋn nkenkele nyawʋ. Ǹ fɔ wɔ̀ gɛ tɛ bɛ sɩka-fututu bekilo dikpilin ma fwo bɛnaa, ma ngba akpen bʋnyɔɔ.> >>
23Gɛ Naaman ɛ dɔ̀ Gehasi alan, <<To sɩka-fututu fɔ bekilo akpilin asiyee ma nɩyɛ.>> Gɛ ɛ nyɩ̀ wɔ gɛtɛ e to wʋ gɛlɛ, gɛ ɛ ban sɩka-fututu fɔ ɛ sa bɛbagɩ bɛnyɔɔ baanɩ, fɩya ma ngba fɔ. Gɛ Naaman ɛ ka anyɩmɩnyan fɔ e tola wɔ bɛsaranyan bɛnyɔɔ bɛ ka bɛ ma yela Gehasi. 24Gɛtɛ be gyu odon wuu koro fɔ, Gehasi e to anyɩmɩnyan fɔ ɛ ma sɩ̀ wo dikwo daanɩ, gɛ ɛ yɛ bɛnɩ fɔ be biri bɛ da. 25Ɛwʋ gɛ e gyu ɛ san ɛ ma yela wofonte bʋnʋn.
Gɛ Elisa e lila wɔ alan, <<Gaanɩ gɛ a san?>> Gɛ Gehasi e tiri wuunyun alan, <<Mɩn san ɔkankɩ.>>
26Mɔ Elisa ɛ dɔ̀ wɔ alan, <<À nyɩ̀ alɛ ete fɔ ɛ waran e ye wo tiiramisan fɔ wanɩ e be tuma wɔ̀ fɔ miin sunsun ɛn fɩya ma awɔ? Ɔya nyawʋ gɛ aa ka a to kɔba, abɛɛ aa ka a to ngba, ma olife wo-iyon, ma olife wo-ili, ma bɛnan, ma bɛyɛran, abɛɛ bɛdɩ̀-teni ma bɛdɩ̀-nanɩ? 27Ade nyayɩ gɛtɛ a mɛ lɛ yii koro, Naaman geyeba-sɩya fɔ gaà gye awɔ ma aadu waanɩ wʋʋ bɛnɩ gakpaakpa.>> Gɛ Gehasi e kpe e ye Elisa bʋnʋn. Geyeba-sɩya gi gye wɔ, gɛ e fo anlɛ ɔyangʋ.
Currently Selected:
2 Begyu-dɩrɛ 5: ADE
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy and Bible Translation