1 Koorinteeb 14
14
Gwida miyaaw Ishuukeeb
1Ooreeri salal sakaana, Ishuuki miyaaw aree daayiib hariwna! Oosruud sooyiiniib oomiyaaw aree daayiib hariwna. 2Baliin girba bhaliiyee hadiideen warib kahadiidsamiyaana, laakiin Ukwaasana hadiidsameen. Bareeh aree gaal han kaꞌafhamiya akay Ukwaasana hadiidsameen. Baraah Ishuuki akriree kwabaasna hadiideen. 3Baliin oosiruud sooyeen oodehay bhaliisameetiit aree bareeh eeshtiimna, isꞌakiirna, igwirhaayeeb geeb ingadiin. 4Baliin girba bhaliiyee hadiideen igarooyeehna eeshtiimna, laakiin baliin Ukwaasanaayt tudiigwat sooyeen kastooh tukaniisi eeshtiimna.
5Baraakna kassaakna girba bhaliiyee hadiidteeneet toona ani asehariiw hookna. Laakiin Ukwaasanaayt tudiigwati sooti miyaaw timeerneet toona aharriiw. 6Isanaayaan, oontꞌa ani yꞌeetiit hookna girba bhaliiyee hadiidsamaniyookna, ani naat daayiinaayt dehookna iikti? Abadan, Ukwaasanaay lawaana haay baayꞌayuukna tari shalikt kanaant tari akraat diigwat tari shalik allamti tari siruud baꞌallamayeek, ani naat daayiinaayt dehookna iikti? 7Teena shuuk baabariit kadhaweent ikatiineek han, ambiilhooyt tari basankwoob tꞌiiteena, iwatara taktakee waasamiin biidiineek, keeya watar atoothꞌaab ikatiyeeb kak gaal han ikteen? 8Masi aree tuniggaara daayiib tageegsi bitkadhawayeek, aaw oofinaay dehaay iitmar indi? 9Aflaay batuuh geebookna teefi. Baraak umiidalaabiisookna daayi bhali hadiidtiina bitdiineek, baraakna tiyadneet toona uudehay kassuuh kak iktiin iyadna? Baraakna mishiit bhaliiteena. 10Eetehak anu gwida bhali tuduniyaatiib eefeena, laakiin gal han mꞌanaab anu kiikeena - kassaah mꞌanaab ibariin. 11Aflaay gaal hadiidiiniyeeb ibhali umꞌanaayooh baakaaneek, been ibhaliyi kinaay geeb ani girbaab akati, baruuh han anii geeb girbaab ikati. 12Aflaay tuun batuuh geebookna teefi. Baraakna Ishuuki miyaaw winneet tehariwni sabbii, tukaniisi indꞌiir miyaawiib tishboobiineet toona ibakii jarrabaana.
13Oon usabbii, girba bhaliyee hadiidiiniib uutak baruuh indiyeet toona fassariiniyee dehaay ibakii siileeliini. 14Ani oontꞌaaneet siileelaniyeek, Ishuuki siileeleena laakiin uginꞌu geeb kadaaya. 15Aflaay ani naan sakani? Ani ishuukeeyu geeb siileelani, laakiin uginꞌiyu geeb han masi siileelani. Ishuukeeyu geeb kafani, laakiin uginꞌiyu geeb han kafani. 16Baraakna Ukwaasana ishuukeesookna tehamidneek, gaal aree baliib afhamaab baakaayni geeb daayiiniyeek, baruuh baraakna tiyadneet toona biikaaneek, whamaadiit siileeltookna kak afhamiini? Baruuh kak aamiin indi? 17Whamaadiit siileeltuukna daayiit tikatiyeek han, uudehay aaraw shiboobaab kiikeen.
18Ani gwida girba bhali kasseeyookna mhakwal hadiidaniyeet toona Ukwaasana ahammiid. 19Laakiin tamin alfa kalmaat girba bhaliiyee whadiidtiika, tukaniisaatiib ani ayt daayiit kalma uudehay afhameeneet hadiidani, oodehay eeraw aree haay sooyani.
20Isanaayaan, inisrikaayeet baakwinna. Tumaagtiib nisrik tꞌiiteeb akeena, laakiin teekwinnihoob yꞌeegrimaayeet kwinna. 21Tuun tuuna Whaggiib kataabtu, Wꞌankwana “Girba bhaliyi dehayiiwwa, girba dehayiit ambalooyaateewwa, ani oon oodehay bhaliisamani. Laakiin malya han baraah kiisinaakirnaheeb.” indi.
22Aflaay girba bhaliyee whadiidti miyaaw oodehay yꞌaamanaab kiikeena laakiin oodehay yꞌaamanaab baakayneet alaama tikati. Laakiin uusiruud oodehay yꞌaamanaayeet alaama ikati, oodehay yꞌaamanaab baakayneet kitti. 23Aflaay tukaniisi kastuuh hiddaab ammarraaytiit, uudehay kassaah girba bhaliyee hadiideeneek, gwadi aree baaꞌafhamaya tari aamanaab baakay shuumi yꞌeeneek, baraah “Baraakna kassaakna haalayaabaana!” kiidiin han? 24Laakiin gaalka Ukwaasanaayt tudiigwat sooyiiniyihoob, aamanaab baakaay tari gaal afhamaab baakaay shuumi yꞌiiniyeek, baruuh toona tumaasiwaab ikatiyeet idanuubeeh itfidhidh indi. Baruuh kasseesooh haakamami indi. 25Bariiyooh uginꞌiib eefeent tikwabasnay lawi iyadna. Aflaay baruuh whaashiib dhibeetiit Ukwaasana anbiid, “Sidik aree Ukwaasana geebookna eefi!” diitiit sooyiini.
Tukaniisaatiib ootkwuukw
26Isanaayaan, aflaay naan niyad? Baraak hiddaab timmarriinihoob, gaalka hamaadiit shiila tibariina, tari sooteeneet kalma tibariina, lawsiteeneena tibariina, girba bhaliyeet diigwat tari mꞌanaab tibariina. Taan bataah kastaah tukaniisaatiit sꞌakrooytiib ibakii daameen. 27Gaal han girba bhaliyee hadiidiiniyeek, maloob tari guudeeneek mhay ibakii hadiideena, taktaki harꞌii hadiideena, weer gaal aree ibakii baraah iyadneet toona tarjamiini. 28Laakiin ibhali tarjamiini biihaayeek, whadiidana ibakii tukaniisaatiib tim ikatiyeet toonaatu, aree ugarooyooh geebwa Ukwaasanaay geebwa hadiidiini.
29Maloob tari mhay nabi Ukwaasanaayt tudiigwat sooyeen ibakii hadiideena, aree aaraw baraah iyadneet toona haakameen. 30Laakiin umajlisiib sꞌee Ukwaasanaayt tudiigwat iniineek, whadiidana whankaani ibakii ingadi. 31Baraakna kassaakna gaal gaalnaay Ukwaasanaayt tudiigwat sooteena, aflaay uudehay kassaah ikteeniinka yꞌarikna. 32Inabiyaayi shuuk inabiya isnaakiirna. 33Ukwaasana aree ribshaayti Kwaasana kiiki, laakiin mꞌasgi Kwaasana ikati.
Kasseeh Ukwaasanaay oodehayiit kaniisaati haal tꞌiiteena, 34taamꞌat tikaniisaateeb tim ikatiin. Bataah whadiidti soomamaat kiikeena, laakiin whag indiyeet toonaatiit bataah atꞌaat ibakii ikatiin. 35Bataah naat gaat raattiib yhariwneek, igawaayeeb eendeehna eekna raateen. Tutakati hadiidti tukaniisaatiib eeb ikati. 36Ukwaasanaay ibhali bareesookna yꞌaaba han? Tari aan ibhali katim ikatiineeb oodehay bareekna eebhat tikatiina han? 37Gaal han ugarooyooh nabiib hiisiiniyeek, tari ishuuki miyaaw ibariib hiisiiniyeek, ani marookna akantiibeet toona Wꞌankwanaayt wasi ikatiineet toona sooya. 38Baruuh een bareeh eebdhiineek, baruuh han itbidhdhin indi.
39Aflaay isanaayaan, Ukwaasanaayt tudiigwati sooti hariwna, laakiin girba bhaliyee whadiidti aree baahabiina. 40Naatka aree ibakii daayiib takwaakw tikatiyeet toonaati.
Currently Selected:
1 Koorinteeb 14: BEJA
Highlight
Copy
Compare
Share
Want to have your highlights saved across all your devices? Sign up or sign in
2026 Seed Company and the MTT