Luugaay W'injiil 17
17
Idanuubwa, Wꞌiimaanwa, Tuwaajibwa
1Yasuuꞌa ikwiriyaatayeeh dehaay, “Oodehay tumaagnaay isidꞌiint taana kassoohoob ibakii daayeen. Laakiin bariiyooh geebii timaagnay ikatiineeb unafar been idhikw! 2Een bareeh idabalooya maagnaayti sakistiika, baruuh tꞌalaatiyooh riyaati awi hakwiriit, oobhariib dhibiiniyeek dehaay hanyiis. 3Aflaay igarooyeekna gwꞌadna.
Usanuuk maagnaayt sakiiniyeek, barooh dinina, aree tuubiiniyeek barooh afooya! 4Baruuh asarama doora oombꞌii kehook aglitiiniyeek, aree asarama doora dehook agartiit, ‘Tuuban!’ indiyuuk, barooh afooya.” idi.
5Ilinguumiya Wꞌankwanaay dehaay, “Wꞌiimaanoon shaawa!” idiin.
6Wꞌankwana igwibi, “Aan baraakna dabalu iimaan isinfaayt habbaati haddiib tibariineek, oon whindi ubidhdhigilii dehaay, ‘Fitaka! Oobhariib yakaa!’ tiyadneek, isnaakiir hookna.
7Gaal bareesookna tudirꞌaatiib shagaamiini kishiya tari tꞌanu dirmiiniib ibariyeek, baruuh tudirꞌaatii itꞌagiirihoob, bariiyooh dehaay, ‘Eetaneena! Mꞌaa shuumaa! Mꞌariit tamaa’ indi han? 8Abadan een kiidi. Baruuh ukishiyaay dehaay, ‘Aniib oodraar soomira, uknaayuuk maraa, ani tamaniyeebwa gwꞌaniyeebwa ookiik hagitaheeb. Beenaay harꞌii, baruuk tamtiniya aree gwꞌitniya!’ indi. 9Ukishiya toona tusoomamaab iiktiyeeb dꞌiyaabuuyt, baruuh barooh hammiid han? 10Aflaay baraakna han bak tikatiina. Baraakna toona tusoomamaab tikatiineet kastooh daateenihoob, malya ‘Hinin takweet baabari kishiyaaba, tuwaajibtoon toobhaat nidꞌi.’ diina.” idi.
Tamin Da Bhadhiyay
11Yasuuꞌa Algudus beeti sakee, Saamiraabwa Jaliilwa eebtik yhiduudee hasamiya. 12Gariyaat gaat shuumiyaneeb oodoor, bhadh iibriin tamin da barooh yꞌashishniit isgiini ingadna. 13Baraah tageega hissii, “Yaa Yasuuꞌa, Wꞌankwana! Arhamaa hoon!” idiin.
14Yasuuꞌa bareeh rhiyihoob, “Giigaana! Igarooyeekna ifagiiriya rhisaana!” idi. Aree giigiinihoob, baraah inhasna.
15Gaal bareesooh inꞌireet toona rhiyanihoob, tageegi hissii Ukwaasana hamdee yꞌagar. 16Baruuh Yasuuꞌiib iragadaayi suurii dhibiyaayt, barooh yhamid. Been uutak aree Saamiriibi.
17Yasuuꞌa raatiya, “Aanda itamin kassaah inꞌirna? Aaraw yꞌashshadhig keeyaana? 18Oon barooh ugirbaab baakaay, weer yꞌeetiit, Ukwaasana yhammiid kiihaay han?” idi. 19Malya baruuh bariiyooh dehaay, “Yakaat giiga! Wꞌiimaanuuk mheeliya hook.” idi.
Ukwaasanaayt Hadꞌaayeeti Wꞌaay
20Fariisi gwadi, Ukwaasanaayt tehadꞌaayi naadoor eetniyeeb Yasuuꞌaab sakanaayaan. Baruuh igwibi, “Ukwaasanaayt tehadꞌaayi baraakna rhiteeneet hayꞌaatii kaꞌeeta. 21Batuuh ‘Beetee, tuuntee’ iyadneena kitti. Ukwaasanaayt tehadꞌaayi tooy geebookna teefi.” idi.
22Malya ikwiriyaatayeeh dehaay, baruuh “Door yꞌi indi, baraakna Wꞌaadami Ooriit tiyinaateeb yint gaanaati rhiti minniimi tiyadna, laakiin batooh rhi kitdiina. 23Gal bareeyookna dehaay, ‘Beentooy shibibna! Tooy shibibna!’ iyadna. Baagiigaana aree bareeh baaraamna. 24Teebri dar gaalnaay ooraaw ookiik talawiiniib utalawiit, Wꞌaadami Oori bꞌi han bak iikti indi. 25Laakiin baruuh awwal ibakii gwidaana lhamiiniyeet toonaatu aree uun uutaas barooh eeribneet toonaati.
26Noohiib udamaaniib tikeet toonaatiit, Wꞌaadami Oori damaaniib han bak iikti tindi. 27Been udamaan Nooh falluukaat yꞌameeb hadiit, uudehay tamiina, gwꞌiina, aree iidꞌirna. Malya uukwaan eeyaayt bareeh kasseeh kwidhisiya.
28Tari Luutiib udamaaniib han, bak tꞌiiteena tiki. Uudehay tamiina, gwꞌiina, bꞌiishraayiina, yꞌiidna, aree gawaab iidꞌirna. 29Laakiin tooyin Luut Sadoomee ifirꞌeeb, Ukwaasana tibreetee nꞌeetwa kwibriitwa dehaay isiisiyaam, aree oodehay kassooh idaar.
30Wꞌaadami Oor lawiiniyeet tooyin, toon tꞌiiteena iikti tindi. 31Beet tooyin oogawi kehii eefi gaal, igadhꞌaah ugawiit hooyteeb eefeeneeb, nꞌati tikwiit ibakii bareeh kiiyhi. Tudirꞌaatiib daayiiniib naatii dehaay han ibakii harꞌa kiiꞌagar! 32Luutiit tutakatii dehaay tikeet toona shꞌaana! 33Umidhhanooh ooknaay dibuuy jarrabiiniibka, umidhhan iitnaw indi, umidhhanooh eetniiw aree umidhhanooh idaab indi. 34Ani andi hookna, been whawaad maloobka gaal nꞌaaliib diwi iyadna. Uungaal yakami indi, aree uuraaw ituuꞌish indi. 35Maloot mꞌatka hiddaab gaat riyaatiib huugi iyadna, tuungaat yakami tindi, aree tuuraaw ituuꞌish tindi. 36Malu da gaat dirꞌaatiib daayeena, uungaal yakami indi, aree uuraaw ituuꞌish indi.” idi.
37Ikwiriyaatay barooh raatiyaana, “Wꞌankwanaay, naamhiin iikti tindi?” idiin.
Yasuuꞌa igwibi, “Tumisuusinnaay daatniyeeb oomhiin, bꞌanoob itdibil iyadna.” idi.
Currently Selected:
Luugaay W'injiil 17: BEJA
Highlight
Copy
Compare
Share
Want to have your highlights saved across all your devices? Sign up or sign in
2026 Seed Company and the MTT
