Mattaay 17
17
Yasuuꞌiib umatuun usidkiib
1Asagwit yinaati harꞌii Yasuuꞌa Bitruswa, Yaaguubwa oosan Yuuhannaawwa geebooh giigisiya. Malya bareeh eekna tageega riba beeti haay reewiya. 2Baruuh beentooy ikwiriyaatayi suurii ibdal. Aafiir tuyintiit talawiyaana, aree yhalakaayaah utalawiit eeraab iiktiin. 3Malya beentooy bareeyooh suurii Muusaawwa Eelyaawwa Yasuuꞌaab bhaliisamee dehaay lawiyaan.
4Bitrus Yasuuꞌii dehaay, “Wꞌankwanaay, hinin tooy daanayeet tuuna daayiiti. Baruuk harriiweek, ani mhay gawa iidꞌir andi. Gaal bariiyook dehaay, gaal Muusaay dehaay, aree weer Eelyaay dehaay iidꞌir andi.” idi.
5Baruuh masi hadiidee, eera bꞌaluuk bareeyooh kehii daaya. Aree ibꞌaluukii hiss itmassaaw, “Uun baruuh Wꞌooru ani areeyaniyeebu, ani bariiyooh geeb winneet afirhaabi. Barooh sinaakirna!” iid.
6Ikwiriyaatay een imaasiwnihoob, ifiiree nꞌati whaashiib dhibiyaaniit irkwiin. 7Laakiin Yasuuꞌa eeyaayt bareeh tehiya, “Asti gadna, baarakwiina.” idi. 8Baraah asti ishbibnihoob, Yasuuꞌaab nuun weer gaal han rhaab kiikeen.
9Baraah oorbaay gidehee, Yasuuꞌa bareeh sooya, “Toona turhitaaneet Wꞌaadami Oor tuyatii yakiiniyeeb ookiik gaal han baasooyaana.” idi.
10Ikwiriyaatay barooh raatiyaana, “Aflaay whaggi kooja Eelya ibakii hankaab yꞌiini naanhooy iyadna?” idiin.
11Yasuuꞌa “Eelya sidik whankaay yꞌiini, aree baruuh naatka isuumir indi. 12Laakiin ani andi hookna: Eelya suur akay eeya laakiin baraah kanaab kiikeen. Baraah yhiriwneena kastooh hooy sakiyaan. Wꞌaadami Oor han bak tꞌiiteena hooy saki iyadna, aree bareeyeehna yꞌayeeb lhami indi.” idi. 13Malya ikwiriyaatay baruuh Yuuhannaab umoosanaay hadiidiyeet toona afhamiyaan.
Yasuuꞌa oor jin hooy iifiineeb mheeliya
14Baraah oodehay igwidaab beeti eeyaanihoob, tak gaal Yasuuꞌaab idwilaayt bariiyooh suurii ignaf. 15Uutak “Wꞌankwanaay, wꞌooru dehaay nꞌakwmanaaya, barooh jin abkaaba aree winneet gwirhaayeeb eefi. Baruuh diimaab tunꞌeetiib dhibiini tari iyameeb dhibiini. 16Barooh ikwiriyaatayeek dehaay haay yꞌan, laakiin barooh imheelti adgiraab kiikeen.” idi.
17Yasuuꞌa “Baraak wꞌiimaan baabariinwa, wꞌamaag dehaywa, ani naadoor ookiik geebookna iistꞌa andi? Ani naadoor ookiik geebookna daayi andi? Wꞌoor tooy haay mꞌaana.” idi. 18Yasuuꞌa eejin idnin, aree baraah wꞌoorii ifirꞌana. Aree beet tumiddaatii wꞌoor mheelamiya.
19Malya ikwiriyaatay Yasuuꞌii dehaay eeyaaniit, barooh oodꞌooh bhaliisamiyaana, “Eejin hooy imhalti naanhooy adgiraab kinki?” idiin.
20Yasuuꞌa “Baraak winneet shalik iimaan tibariinayt adgiraab kitteen. Oosdik andi hookna: Shalik iimaan isinfaayt habbaati haddiib tiibriineek, oon oorba ‘Tooysii hantaayaat beentooy bayaa!’ tiidneek, uurba hantaayi. Bareekna dehookna akraana kitehaay. 21Laakiin tuun tuuna siileeltiiwwa baaskiitiiwwa nuun tikatiina kitti.” idi.
22Baraah Jaliil beeti hiddaab eeyaanihoob, Yasuuꞌa bareeyooh dehaay, “Wꞌaadami Oor dehayi ayeeb nuunami indi. 23Baraah barooh iidir iyadna, aree tooyin tumhaya tooyat hooy yakami indi.” idi. Aree ikwiriyaatay winneet gadabiyaan.
Udiini gawiib titilba
24Yasuuꞌaawwa ikwiriyaatayaahwa Kafarnaahuum iktimnihoob, udiini gawi tilbaat lakkatana Bitrusii dehaay eeyaaniit, “Ukoojaayuukna, Ukwaasanaay ugawiit tilba kwansi han?” idiin.
25Bitrus “Awooh titilba kwansi.” idi.
Bitrus oogaw shuumiyanihoob, Yasuuꞌa hankaab hadiidiya, “Siimoon, naan tinkwiina? Tubuuti hadꞌa tuwaajibwa titilbaawwa aay iyayna? Yꞌareesoohna iyayna han weer dehayii iyayna?” idi.
26Bitrus “Weer dehayii iyayna.” idi.
Yasuuꞌa bariiyooh dehaay, “Aflaay yꞌaraahna titilba kiifirꞌana. 27Laakiin aflaay bareeh nisehasiyeet toona kinhariw. Baruuk oobhar bayaat sinnaarook gidaa! Wꞌaashu hankaab tꞌanbiikeeb ooyaf haaksaa aree fadhig girsha imaar tindiya. Eegrish yaksaat bareeh hiiyya, aniit titilbaawwa tubariitookwa haay kwisiya.” idi Yasuuꞌa.
Currently Selected:
Mattaay 17: BEJA
Highlight
Share
Compare
Copy
Want to have your highlights saved across all your devices? Sign up or sign in
2026 Seed Company and the MTT
