Mattaay 4
4
Uubliis Yasuuꞌaab jarrabiya
1Aflaay Yasuuꞌa oobliisii jarrabamiyi jillaay, Aashuuk barooh umingaay beeti imilhana. 2Fadhig tamuun hawadwa fadhig tamuun bꞌeewwa baaskiitiyanihoob, Yasuuꞌa yharagw. 3Uubliis bariiyooh dehaay eeyaayt, “Baruuk Ukwaasanaay Oor tikatiyeek, een yꞌawi hadhiib akeena diyaat sooyaa.” idi.
4Yasuuꞌa igwibi, “Tuun kataabtu: ‘Wꞌaadami mꞌariit toobhaanaatii kiikwiri, laakiin Ukwaasanaay yafii yꞌeen ibhali yharriiw.’ diyaabu.” idi.
5Malya uubliis barooh tumadiina tumugaddas beeti istoob aree Ukwaasanaay ugawi mooyi kehii isingad. 6Uubliis “Aflaay baruuk Ukwaasanaay Oor tikatiyeek, nꞌati faraa. Tuun batuuh kataabtu:
‘Baruuh imalakeeh bariisook waseeyi indi,
baraah yꞌayeeyoohna asti yꞌibik hook iyadna. Aflaay iragadaayaak aweeb imuuthꞌa kiidiin.’ diyaabu.” idi uubliis.
7Yasuuꞌa bariiyooh dehaay igwibi, “Tuun han kataabtu: ‘Wꞌankwana Ukwaasanaayook baajarrabaa!’ diyaabu.” idi.
8Masi uubliis barooh winneet tageega riba beeti haay ibaayt, kasteeh tuduniyaatiit tehadꞌaayeewwa imatuuneehwa barooh rhisiya. 9Uubliis “Nꞌati kuuramiit aneeb anbiideek, teen bateeh kasteeh iyaaw hook andi.” idi.
10Yasuuꞌa “Hoosu giigaa, baruuk uubliis! Tuun batuuh kataabtu: ‘Wꞌankwana Ukwaasanaayook abida, barooh oobhaat shagaama.’ diyaabi.” idi.
11Malya uubliis barooh yꞌish giigiya, aree malak bariiyooh dehaay eeyaaniit barooh ishamna.
Yasuuꞌa Jaliileeb ishanhooh badooya
12Yuuhanna oosjin daamiya diyee imaasiwihoob, Yasuuꞌa Jaliil beeti yꞌagar. 13Baruuh Naasiraab yꞌisht Kafarnaahuum ibaayt hooy ikwiri. Been oomhiin Sabaluunwa Naftaaliiwwa haashiib iikti bhar oodar iifi. 14Tuun batuuh aree unabi Isyaas diyaab iiktiyeet toona sidik tiikwsi. 15Unabi Isyaas, “Sabaluuni haashiiwwa Naftaali haashiiwwa,
oobhar eebiib usalal, Urduni daraag,
Jaliil Ijintiili haash!
16Uudehay thibniib ikweer
win nuur rhiyaan.
Tuyati lꞌandalaay haashiib ikweer baliib,
nuur dehaay talawiya.” diyaabi.
17Been oodoori harꞌii Yasuuꞌa bhaliitiib badooya, “Tuubaana, tibreeteet hadꞌaayi dawiltu.” idi.
Yasuuꞌa ikwiriyaatay yhankaaneeb waliikiya
18Yasuuꞌa Jaliili bhari dar hiireeree, malu sana Siimoon Bitrus atoosmaabwa oosan Andaraawooswa rhiya. Baraah aashoob aabkiiba, shabakaatoohna ubhariib iigidna. 19Yasuuꞌa “Mꞌaana ramnaheeb, dehayi aabki iikwasi hookna andi.” idi. 20Baraah igidiyeesooh tishabakaateehna yꞌishna idꞌiiniit barooh iramna.
21Baruuh beentooysii sakee, wari sana maloob rhiya. Baraah Yaaguub Sabadi oorwa oosan Yuuhannaawwa iiktiin. Baraah falluukaatiib ubaabuuhna Sabdi geeb haayee, tishabakaateehna isuumirna. Yasuuꞌa bareeh waliikiya. 22Baraah willa tufalluukaawwa ubaabaawwa yꞌishniit barooh iramna.
Yasuuꞌa oodehay eelhaab mheeliya
23Yasuuꞌa kastooh Jaliileeb hiirareeriya, Iyahuudi diini gawaayeeb allamiya. Tehadꞌaayeeti sakana udaayiib bhaliiya, oodehay igwalyaamaabwa eelhaabwa kasseeh mheeliya. 24Yasuuꞌiib usakana kassuuh Suuriyaay ibrar. Uudehay aree abaakiibwa lhanaytwa iibriin kasseeh bariiyooh dehaay haay eeyaan. Baliib lhanayt iibriinwa, jin hooy iifiineebwa, oodhib iibriinwa, yꞌamꞌadhdhaabwa Yasuuꞌa kasseeh mheeliya. 25Jaliilee gwida dehay barooh iramna. Timadiina titaminwa, Alguduseewwa, Yahuudaaywa, Urduni dar ooraaw iifiib whaashiiwwa barooh iramna.
Currently Selected:
Mattaay 4: BEJA
Highlight
Share
Compare
Copy
Want to have your highlights saved across all your devices? Sign up or sign in
2026 Seed Company and the MTT
