Maargoo 11
11
Yasuuꞌa Algudus shuumiya
1Algudus idwilneeb oodoor, Isaytuuni Riba daraag eefeent timadiina Beetfaageewwa Beetaanyaawwa iktimna. Yasuuꞌa ikwiriyaatayeesooh maloob diigwatiya. 2Bareeyooh dehaay, “Tugariya suurookna teefeet beena. Batooh shuumteenihoob, halkwiib hakwaart, oonaay suurii tak amaab biikaayeeb timeerna. Barooh fidignaat tooy haay mꞌaana! 3Gaal han sakanaayookna ikatiyeek, ‘Naanhooy bak sakteena?’ indiyuukna, ‘Wꞌankwana yhariw, willa dehook yꞌigir indi.’ diina!” idi.
4Baraah ibeena, whalkwi barraab usalaliib udheefaay daraag hakwaar akay imriin. Baraah whalkwi fidgee, 5beentooy iifiin ingid oodehayii gali raatiyaana, “Whalkwi naanhooy tifadigna?” idiin. 6Baraah Yasuuꞌa iideeb ibhali bareeh sooyaan. Oontꞌa uudehay han bareeh yꞌishna. 7Malya whalkwi Yasuuꞌii dehaay haay eeyaaniit yhalakaayeehna kehii daasiyaan. Yasuuꞌa bariiyooh kehii yꞌam. 8Gwida dehay yhalakaayeehna usalaliib dehaay ibrirna. Wari tidirꞌa ibeeniit hindi lꞌid katꞌiyaaniit ibrirna. 9Baliin suurii sakiinwa yharꞌii iifiinwa waliikiyaaniit, “Hoosaana!” idiin. Iyahuudi bhaliyeeb “Hoosaana!” Wꞌankwanaay simii eeyaab baarakamiya miyaadi. 10Baraah “Hooboon Daawidiit tehadꞌaayi tꞌeetniit baarakamaati.
Whamaad tibreeteeb eefeeb Ukwaasanaayu!” idiin.
11Yasuuꞌa Algudus shuumiya, aree Wꞌankwanaay oogaw shuumiya. Baruuh kasteeh teena ukwayaay iifiint ishbib. Laakiin hawaad dawil iifi akay ikwiriyaatayi geeb Beetaanyaab beeti giigiya.
Yasuuꞌa Tiini hindi yꞌat
12Tulhaytooh baraah Beetaanyaay giigiinihoob, Yasuuꞌa yharagw. 13Yasuuꞌa sagi mhiinii tiini hindiit raat rhiya. Mꞌariit hooy amarri miyaadiib dehaay eeya. Laakiin iktimihoob, teerat nuun naat han miraab kiiki. Whindi mibsheekwtiyooh door kiiki akay naat han miraab kiiki. 14Yasuuꞌa whindii dehaay, “Door han gaal masi samaraat hook tami kiidi!” idiit whindi yꞌat. Ikwiriyaatay barooh een bareeh diyee imaasiwna.
Yasuuꞌa ibꞌiishraayana Wꞌankwanaay gawii isfarꞌa
15Yasuuꞌa Ukwaasanaay oogaw shuumiyaayt, oodehay beentooy bꞌiishraayiin kasseeh iskwi. Aree baliin mhallaga iibdil eendeet titarabeesaawwa, tikwibheeriya iidlib eendeet tikanabaawwa bꞌoosiya idꞌi, 16naat yaksaa Wꞌankwanaay oogawii hasamiib gaal han ishaab kiiki. 17Malya Yasuuꞌa bareeh allamiya, “Tuun iktabeeb kataabtu: ‘Ugawu kasseeh idehayaayee dehaay siileelti gawu baakaay, ibꞌiishraati mhiin kiiki.’ attiyoodiyaati. Laakiin baraakna igwiharaayi amar tikwaasna.” idi.
18Ifagiiriya isuurkinaawwa whaggi koojaawwa beet toona imaasiwniit, barooh haay iidirni sabab yhiriwna. Laakiin bariiyuuh wꞌagriisti kassooh oodehay ajbaa iifi akay barooh irkwiin.
19Tehimni tikayihoob, Yasuuꞌaawwa ikiwiriyaatayaahwa tumadiinaatii barraab ifirꞌana.
Utiini hindi balamiya
20Fajir tooyin tooraaw baraah hasamee, been ootiini hindi kassuuh igadamaayee balamaa rhiyaan. 21Bitrus Yasuuꞌiib ibhali shꞌaa iifi, malya “Seednaay, shibiba! Utiini hindi baruuk tꞌateeb balamiya.” idi.
22Yasuuꞌa “Ukwaasana aamanaana! 23Oosdik andi hookna, Ukwaasana aamanteeneek aree uginꞌii bitꞌeetehakayneek, oon oorba ‘Fitakaat ubhariib dhibaa!’ tiyadneek, beet toona sakiini. 24Oon usabbii, ani andi hookna, kastooh baraakna siileeliit tehariwneet toona aamanaana timeerna. Aree bareetookna iikti tindi. 25Baraakna siileelteenihoob, naat gaat taki kehii tibariineek afooyaana. Aflaay been baabuukna tibreeteeb eefi han tumaagtookna afooyiini. 26Baraakna warib batꞌafooyayneek, baabuukna tibreeteeb eefi han kaꞌafooyi hookna.” idi.
Yasuuꞌi tehadꞌaayi raatamamiya
27Baraah masi Algudus iktimna. Yasuuꞌa Wꞌankwanaay oogawi hooshiib hiireeree, ifagiiriya isuurkinaawwa, whaggi koojaawwa, oodehayi suurkinaawwa bariiyooh dehaay eeyaan. 28Baraah “Naat hadꞌaayeetii teen teena saktiniya? Aaw aree tehadꞌaayi yhii hook?” idiin.
29Yasuuꞌa bareeyooh dehaay igwibi, “Ani han bareekna gaana raati hookna andi, beet sooyaanaheeb! Malya ani baliit teena naa hadꞌaayeetii akwasiyeeb sooyi hookna andi. 30Yuuhannaab umoosana umaasiit hadꞌaayi aaw yhii? Ukwaasana tibreeteeb eefeeb kiiki han, hana uudehay hiiyyaabu? Sooyaanaheeb!” idi.
31Baraah taktak bhaliisamiyaaniit, “Beet toona Yuuhannaab Ukwaasana yhii niyadee dehaay kaꞌadgirna. Een niyadeek, aflaay ‘Naanhooy aamanaab kitteena?’ iyaad hoon indi. 32Laakiin hinin ‘Beet tehadꞌaayi oodehayii imri.’ niyadee dehaay han kaꞌadgirna.” idiin.
Kassaah uudehay Yuuhannaab unabiit aamaniin akay baraah oodehay irkwiin.
33Aflaay baraah Yasuuꞌii dehaay, “Yuuhannaab oomaasiit hadꞌaayi aaw hiiyyaab ikatiyeeb kinkan.” idiin.
Yasuuꞌa “Ani han teena tisakaniyeet naat hadꞌaayeetii akwasiyeeb sooyi hookna kaadi.” idi.
Currently Selected:
Maargoo 11: BEJA
Highlight
Share
Compare
Copy
Want to have your highlights saved across all your devices? Sign up or sign in
2026 Seed Company and the MTT
