Yesaya 36
36
Sanehɛribe keŋmaase Yerusalɛm
1Gyoo Hesekiya kedi gyoori kulutooneŋ kufu anaarate man nɛ, Asiriya gyoo Saneheribe ke yoo Yuda donɔɔse dinaana ŋan bɔɔ baŋ akyaŋse kilisi ŋa pou, te ɔ dii be dɔɔ. 2Keŋte Asiriya gyoo kpila ɔ yoonɔɔtena kegyia na yoonɔɔtena burum lee Lakisi gyu gyoo Hesekiya gyaŋ Yerusalɛm. Be kelii Yerusalɛm nɛ be ka seŋawɔ adogbɛɛ depaa keŋ doo gyu botɔɔ keŋ bɛɛ faafo abɔɔ nɛ. 3Keŋte Hilikiya bu Eliyakim ŋon ɔ ne kɛɛ gyooro dekpaŋalaŋ keŋ dɔɔ na be tɔne ŋmarasere Sɛbena na Asafe bu Yoa ŋon ɔ ne kyaŋ be nɔɔwoya see nɛ leewɔ gyu ɔ gyaŋ.
4Keŋte yoonɔɔtena kegyia ŋon yako wɔ nyiaa, <<Ɛ yako Hesekiya nyiaa,
<<<Nnɛ yaa Asiriya gyoo dinaa ŋon ne yako, woŋ kitii dɔɔ yaa n na mo n wose lɔ? 5N gyeŋ nyi nɔɔwoya yakaa yɛna yoo abɔɔ ŋan bɛɛ mo gyu yoo? Amɔte dɔɔ yaa n na mo n loo gyakaa te n na koro seŋ tia maŋ? 6Kɛɛ, ma gyeŋ nyi n na mo n wose lɔ Igyipite, moro keŋ be tekeri nɛ, keŋ ŋon ɔ teelina ke na gyae ke sɔɔ e ɔ nyiŋmaa nɛ dɔɔ! Mena te Igyipite gyoo Faaro doo fa baŋ bɛɛ mo be loo gyakaa ɔ dɔɔ nɛ. 7Mɔna akpaa ɛ yako maŋ nyi, <<Dɛɛ mo da wose lɔ Degbeŋgyoo de Wurubuarɛ dɔɔ>> nɛ, na bulasebia na ɔ kedeesaboya te gyoo Hesekiya wɔlɛɛwɔ te ɔ yako Yuda na Yerusalɛm nyiaa, <<Kedeesaboe kei siaman te kaboena nyi yaa som yee>>?
8<<<Nɛnɛɛ kɔŋ na ɛmɛɛna me gbeŋgyoo Asiriya gyoo ke kolosi sɛɛ dɔŋa, nyi akpaa n ke nyiŋ baŋ baa tale kyaa dɛɛkyɔŋse na, maa fa neŋ dɛɛkyɔŋse kakpoŋse ala. 9Doo nyi n ta mo n wose lɔ Igyipite yookɔtase na dɛɛkyɔŋ kyaara dɔɔ, mɔna sena yaa n ke tale di me gbeŋgyoo yoonɔɔte ŋon ɔ be dana doŋ koraŋ ya nɛ dɔɔ? 10Agyakaŋ na, me kɔŋae me kaa yoo wɔlɛɛ donɔɔ kei keŋ Degbeŋgyoo be kpuɛ yee? Degbeŋgyoo gbagba yakona maŋ nyi, <Gyu keyoo tɛɛle kei na n ke wɔlɛɛ ke.>>>
11Keŋte Eliyakim na Sɛbena na Yoa yako yoonɔɔtena kegyia ŋon nyiaa, <<Waaseda kolosi fa n tewulɛɛ Aram dei man nawolo nyi dee nyii ke. Naa kolosi fa daa Hiburu dei man, na baŋ be kyaa dekyaŋ keŋ dɔɔ nɛ kenyii ya.>>
12Mɔna yoonɔɔtena kegyia ŋon tiranɔɔ fa wɔ nyiaa, <<Ɛmɛɛ na ɛ gbeŋgyoo yaageŋ gyaŋ yaa me gbeŋgyoo kpila maŋ nyi me kaa yako nombia kɛŋa fa? Balaŋ baŋ be kyaa dekyaŋ keŋ dɔɔ, keŋ baa kaa di baŋ gbagba pena na baa nyɔɔ ba foŋfoŋ ŋgba ɛmɛɛ nɛ be kpuɛ yee?>>
13Keŋte yoonɔɔtena kegyia ŋon korowɔ seŋ te ɔ gyinaa ɔ woya kolosi Hiburu dei man nyiaa, <<Ɛ nyii gyoo dinaa ŋon nombia, Asiriya gyoo ŋon! 14Gyoo ŋon kpa nyiaa, ɛ naa yele Hesekiya ka beo ŋon ya. Ɔ be gyae waa tale lɛɛ ŋon ya! 15Ɛ naa yele Hesekiya ka beo ŋon nyi yaa mo ɛ wose lɔ Degbeŋgyoo dɔɔ, debaŋ keŋ ɔ be yako nyi, <Kelɛɛ te Degbeŋgyoo waa lɛɛ daa, ɔ be gyae waa mo donɔɔ dinaa kei do Asiriya gyoo nyiŋmaa man ya.>
16<<Ɛ naa tei Hesekiya ya. Asiriya gyoo kpa nyiaa, ɛ yela dee kolosi wosefɛɛreŋ nombia na ɛ ka lee kɔŋ me gyaŋ. Kenaŋ na ɛ man ɔkamasɛ waa di ŋon gbagba waa abɔɔbia lee ke woŋ man, na fiigi daŋ man na waa nyɔɔ ŋon gbagba detiribuŋ man loŋ. 17Kelii debaŋ keŋ maa kɔŋ kaa mo ŋon gyu tɛɛle keŋ ke yɛɛ ŋgba ɛmɛɛ gbagba wui nɛ man. Tɛɛle keŋ wamela na waen wɔle kyaa, tɛɛle keŋ weenɛɛ na gerepo wɔɔse kyaa nɛ.
18Ɛ naa yele Hesekiya ka beo ŋon nyiaa, <Degbeŋgyoo waa lese daa> ya. Tɛɛlese ŋaale kyaa keŋ be wurubuarɛse be tale lɛɛ be tɛɛlese lee Asiriya gyoo nyiŋmaa man? 19Hamate na Arepade wurubuarɛse kyaa aleŋ? Sefarewayim wurubuarɛse kyaa aleŋ? Be talewɔ lɛɛ Samariya lee me nyiŋmaa man? 20Donɔɔse kɛŋa pou man woŋti wurubuarɛse talela lɛɛ be tɛɛlese lee me nyiŋmaa man? Nɛnɛɛ sena te Degbeŋgyoo waa tale lɛɛ Yerusalɛm lee me nyiŋmaa man?>>
21Mɔna balaŋ baŋ pou wuu be nɔɔse keŋ ba te yako kolo ya, nawolo nyi gyoo faree wɔ nyiaa, <<Ɛ naa tiranɔɔ fa e ya.>>
22Keŋte Hilikiya bu Eliyakim ŋon ɔ ne kɛɛ gyooro dekpaŋalaŋ dɔɔ na be tɔne ŋmarasere Sɛbena na Asafe bu Yoa ŋon ɔ ne kyaŋ be nɔɔwoya see nɛ kyaŋa ba kegbase tirii te be gyuuwɔ Hesekiya gyaŋ ke yako e ŋan yoonɔɔtena kegyia ŋon be yako.
Currently Selected:
Yesaya 36: NTR
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics Literacy and Bible Translation
