Yesaya 43
43
Iserae nyeelɛɛre dokoloŋ kooŋ
1Mɔna nɛnɛɛ nnɛ yaa Degbeŋgyoo,
ŋon ɔ be yɛɛ nyaŋ Yakɔbe,
te ɔ be ma nyaŋ Iserae nɛ ne yako,
<<Naa yee ya, nawolo nyi ma te lɛɛ neŋ,
ma te lɔ n yele baake neŋ nyi, n yɛɛ me wui.
2Nyi n moo loŋse man na,
me kpuɛna neŋ,
te n moo booneŋ man na,
be gyae ka mo neŋ laŋ.
Nyi n dɔŋ boalaŋ man na,
n be gyae n ke nyakee ya,
boalaŋ laakemse ŋan be gyae ke koolii neŋ ya.
3Nawolo nyi maŋ yɛna Degbeŋgyoo n Wurubuarɛ,
Iserae Fereŋkyeŋte Ŋon, n nyeelɛɛre.
me ta mo Igyipite tɔ n nyeeman kom,
me ta mo Kuse#43:3 Keŋ yɛna naele ado yenaŋ na Seba see n nawɔɔ man.
4Lee keŋ n na lee koya te n dana obuo me siaman,
na keŋ mɛɛ gyae neŋ dɔɔ,
maa mo balaŋ kyɛɛkee neŋ,
maa mo tɛɛlese kyɛɛkee lɛɛ n nyeedoŋ.
5Naa yee ya, nawolo nyi me kpuɛna neŋ,
maa mo n bia lee weese dɛɛlee kɔŋ,
na maa yilaa ŋon lee weese dɛɛyalae.
6Maa yako adoyenaŋ nyi, <Tina wɔ yela.>
na maa yako atayenaŋ nyi, <Naa kyaŋ wɔ see ya.>
Mo me bia tewulɛɛ lee lemlem,
na me bia alebia lee tɛɛle ɔto kɔŋ.
7ɔkamasɛ ŋon bɔɔ mo ma yele baake e,
ŋon mɔɔ yɛɛ e fa me gyoorobiiri,
ŋon mɔɔ ma e te mɔɔ yɛɛ e nɛ.>>
8Yilaa baŋ be dana sia mɔna be sia te yɛlɛɛ,
baŋ be dana deŋela mɔna ba deŋela te tɔɔ nɛ.
9Tɛɛlese pou dɛɛ gyaŋee,
na balaŋ baŋ ke yilaa.
Be wurubuarɛse baŋ man woŋti yakona kei lee kewalaŋ,
te ɔ gyɔɔ abɔɔ ŋan be kɔŋ kaalaŋ nɛ dekpeŋkpeŋ fa daa?
Baa mo ba adansɛɛtena kɔŋ, na be kaa di adansɛɛ nyi be nombia doona kegbɛɛ,
na baale ke nyii na baa yako nyi, <<Ke yɛɛ ampaŋ.>>
10Degbeŋgyoo kpa, <<Ɛmɛɛ yɛna ma adansɛɛtena,
na ma somere ŋon mɔɔ lese,
na ɛ ke nyiŋ gyeŋ na ɛ ke lɛɛ maŋ di,
na ɛ ke nyii ke man nyi maŋ ŋonaŋ.
Ba te yɛɛ wurubuarɛ ŋolo pɛte maŋ,
yaa ŋolo ke kɔŋ me wɔle ya.
11Maŋ, maŋ yɛna Degbeŋgyoo,
te maŋ wɔle na nyeelɛɛre ŋolo be kyaa ya.
12Ma lesewɔ wola, te me lɛɛ walaŋ nyee, te me gyɔɔ ka dekpeŋkpeŋ,
Maŋ, na wurubuarɛ wɔle ŋolo ɛ man ya.
Degbeŋgyoo kpa, <<Ɛmɛɛ yɛna ma adansɛɛtena, nyi maŋ yɛna Wurubuarɛ.
13Maŋ yɛna Wurubuarɛ leenaŋ beneŋ keŋ, maŋ ŋonaŋ.
Ŋolo be tale lɛo kolo lee me nyiŋmaa man ya,
Me yɛɛ kolo na, amɔte ne gyaela waa tale kyɛɛkee ke?>>
Wurubuarɛ waraŋase kewii na Iserae
14Nnɛ yaa Degbeŋgyoo,
ɛ Lɛɛre, Iserae Fereŋkyeŋte Ŋon ne yako,
<<Lee ɛmɛɛ dɔɔ maa kpila gyu Babilɔn,
na baa yoo mo Babilɔntena ŋgba yoogbeŋa nɛ#43:14 Yaa Kalediyatena
na baa kuu wɔ do agbelese, ŋan dɔɔ bɛɛ gate ba wose nɛ man.
15Maŋ yɛna Degbeŋgyoo, ɛ Fereŋkyeŋte Ŋon,
Iserae yɛɛre, ɛ Gyoo.>>
16Nnɛ yaa Degbeŋgyoo,
ŋon ɔ ba do gbɛɛ ta ɛpo man,
te ɔ ba lese detɛe booneŋ dinaana man,
17ŋon ɔ ne yele anebiliŋiŋse na dɛɛkyɔŋse,
yoonɔɔtena na baalabia,
ne yale keŋ bɔɔ na koro ya,
na be ta yem ŋgba kenea ŋmeleŋ nɛ ne yako,
18<<Ɛ naa tɔɔse gyaŋgba nombia ya,
ɛ naa gyueŋ beneŋ nombia ŋan ya.
19Kɛɛ, mɛɛ yɛɛ kolo wɔle!
Nɛnɛɛ te ka lese ka nyee, n bɛɛ naa ke yee?
Maa lese gbɛɛ depampaa man,
na boŋobiise tɛɛle kpakparakpaa man.
20Ŋale man wonembia na mo obuo fa maŋ,
gbougbouse na kpilimse,
nawolo nyi ma te fa wɔ loŋ depampaa man,
te boŋobiise leewɔ tɛɛle dowolo man,
na maa fa me balaŋ baŋ mɔɔ lese nɛ loŋ baa nyɔɔ,
21balaŋ baŋ mɔɔ yɛɛ fa ma wose,
na baa gyɔ ma yele kalese dekpeŋkpeŋ.
22<<Mɔna Yakɔbe, n te baake maŋ ya,
Iserae#43:22 Yaa Yakɔbe, n ta mo n wose pou fa maŋ ya.
23N ta mo n namense yɛɛ katoo kedeesa fa maŋ,
yaa n ka mo n kedeesase do maŋ obuo ya.
Me ta ŋere neŋ nyi nyaa mo n weenɛɛ deesi fa maŋ,
yaa nyaa mo oliifi som maŋ ya.
24N te lɛɛ oliifi deesi fa maŋ,
yaa e n ka mo n kedeesa nuŋ fa maŋ beiŋ ya.
Mɔna n moo n dukum bese kasolɔ fa maŋ,
te n moo n nombiakumɛɛ naase maŋ diyem.
25<<Maŋ, maŋ yɛna ŋon maa feefo,
n nombiakumɛɛ, lee maŋ gbagba dɔɔ,
keŋ mɔɔ gyae maa tɔɔse n dukum bela ya.
26Tɔɔse maŋ gyaŋgba nombia,
yela daana neŋ ke di nombia,
yako n wui na ka wola nyi n nombia dei.
27N naana gyaŋgbate yɛɛ dukum,
baŋ mɔɔ bɔɔ kpili nyi be kaa wola ŋon seŋawɔ tia maŋ,
28Mena dɔɔ ma doo yɔ ɔsom deni dinaa man obuo balaŋ desɛŋ,
ma lese Yakɔbe fa nyi baa wɔlɛɛ e korakora#43:28 43:28,
te ma moo Iserae fa tubia.
Currently Selected:
Yesaya 43: NTR
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics Literacy and Bible Translation
