Yesaya 48
48
Iserae konɔɔyuŋ
1<<Ɛmɛɛ Yakɔbe duuluŋmantena, ɛ tei kei,
ɛmɛɛ baŋ bɔɔ mo Iserae yele baake ŋon,
te ɛ ba lee Yuda woŋ man,
ɛmɛɛ baŋ ɛ na mo Degbeŋgyoo yele kaŋ ntam,
te ɛ ne baake Iserae Wurubuarɛ yele,
mɔna na anokoare yaa katenee gbɛɛ man ya,
2ɛmɛɛ baŋ ɛ ne baake ɛ wose nyi donɔɔ dinaa fereŋkyeŋ keŋ balaŋ,
te ɛ ne yɛɛ ŋgba ɛ na mo ɛ wose lɔ Iserae Wurubuarɛ dɔɔ,
Degbeŋgyoo Dekpataakpere yɛna ɔ yele.
3Me wulaa yako gyaŋgba nombia ŋan benebene,
me gyɔ ŋa dekpeŋkpeŋ te me yelaa ɛ gyeŋawɔ,
me yɛɛ ke karatetee dokoloŋ te ŋe kɔŋawɔ mena.
4Nawolo ma gyeŋ nyi ɛ dana konɔɔyuŋ
ɛ wɔŋe wolase yɛɛ nyeele bibiini ke,
ɛ tirinɔɔse yɛɛ kɔbere ke.
5Mena dɔɔ me yako ŋon nombia kɛŋa lee beneŋ beneŋ,
me wulaa gyɔ ŋa dekpeŋkpeŋ fa ŋon pɛte ŋe lɔŋawɔ,
na ɛ be nyiŋ yako nyi,
<Me bɛɛneŋ yelela ŋe kɔŋawɔ,
me bɛɛneŋ baŋ mɔɔ yae na me wurubuarɛ ŋon mɔɔ luu yelela ŋe kɔŋawɔ ya.
6N te nyii nombia kɛŋa, kɛɛ ŋe popou.
N be lɛɛ ŋa do yee?
<<Lee nɛnɛɛ ne gyu maa yako neŋ nombia wɔlɛɛ,
nombia aweeseŋ ŋan n ba gyeŋ ya.
7Nɛnɛɛ te be yɛɛ ŋa, ŋe ta lee gyaŋgba ya,
n te nyii ŋa see ŋgba gyɛŋ kei ya,
mena dɔɔ n be nyiŋ yako nyi,
<Ayi, ma gyeŋ ŋa> ya.
8N te nyiita see yaa n ke nyii ke man ya,
lee gyaŋgba na n deŋela ta torota ya.
Ma gyeŋ nyi anokoare be doo n man ya,
be baake neŋ deŋele doŋte lee wee keŋ bɔɔ lola neŋ.
9Lee ma yele dɔɔ te me wɔŋa me baŋ lee wɔle,
lee ma yele kalese dɔɔ te me wɔŋa ke lee wɔle lee n gyaŋ,
na mɔɔ nyiŋ wɔlɛɛ neŋ kerekere ya.
10Kɛɛ, ma te kyalase neŋ, mɔna na ŋgba kɔba wolom ya.
Me te kɛɛse neŋ kɛɛ kaale boalaŋ degyapaa keŋ man.
11Lee maŋ gbagba dɔɔ, lee maŋ gbagba dɔɔ, te me yɛɛ kei.
Woŋ dɔɔ te maa yela baa wɔlɛɛ ma yele?
Mɔɔ gyae maa mo me gyoorobiiri fa walaŋ ŋolo ya.
Iserae kenyiŋ ka wose
12Yakɔbe, tei maŋ,
Iserae ŋon mɔɔ baake,
Maŋ ŋonaŋ,
Maŋ yɛna gyaŋgbate, te maŋ yɛna ɔtomante.
13Maŋ gbagba moona me nyiŋmaase see tɛɛle kei mokɔɔ,
te me dunoluŋ nyiŋmaa fɛlɛɛ adido,
nyi me baake wɔ na,
be popou na koro seŋ.
14Ɛ popou ɛ kɔŋ kaa gyaŋee, na ɛ ke tei,
Bane woŋti wulaa yakona nombia kɛŋa?
Ŋon Degbeŋgyoo ba lese e nɛ,
waa yɛɛ keŋ ɔ kpa waa yɛɛ Babilɔn,
waa gyina ɔ baam tia Babilɔntena#48:14 Kalediyatena
15Maŋ, maŋ gbagba kolosila,
ayi, maŋ baakena e.
maa mo e kɔŋ,
na ɔ kpene kamasɛ keŋ waa yɛɛ ke de.
16<<Ɛ tuu bena maŋ na ɛ ke tei nombii kei,
<<Lee kewalaŋ dekpeŋkpeŋ keŋ man nɛ, ma te kolosi nombii weese ya,
mena debaŋ kenaŋ na, me kyaa botɔɔ.>>
Nɛnɛɛ Degbeŋgyoo Doŋ Pou Nyee te kpila maŋ,
ɔ ta mo ɔ feliŋ do me man.
17Nnɛ yaa Degbeŋgyoo, n lɛɛre,
Iserae fereŋkyeŋte ŋon ne yako,
<<Maŋ yɛna Degbeŋgyoo n Wurubuarɛ,
ŋon ɔ na wola neŋ kpene keŋ dei nideli fa neŋ,
ŋon ɔ na wola neŋ gbɛɛ keŋ kaboena nyi nyaa mo.
18Nyeŋ see n deŋele di maŋ mmaraase dɔɔ nɛ,
nafɔ n wosefɛɛreŋ gyae ke yɛɛ ŋgba boo nɛ,
na n kede ke yɛɛ ŋgba ɛpo feliŋ kegyɔ nɛ.
19Nafɔ n duuluŋman balaŋ baa yɛɛ ŋgba aŋasa nɛ,
na n bia ke yɛɛ ŋgba ka boyabia nɛ,
bɔɔ gyae baa lese ba yela,
yaa baa wɔlɛɛ wɔ lee me siaman ya.>>
20Ɛ lee Babilɔn,
ɛ yeu lee Babilɔntena baŋ gyaŋ.
Ɛ mo kenyaŋee yeesa gyɔ kei dekpeŋkpeŋ,
na ka toro ke yako.
Ɛ yela ke kelii tɛɛle ɔto,
nyiaa, <<Degbeŋgyoo te lɛɛ ɔ somere Yakɔbe.>>
21Ɔ moo wɔ ta depampaa man keŋ loŋboaneŋ ta ko wɔ ya,
ɔ yelaa loŋ leewɔ kpanaŋ man fa wɔ,
ɔ bɛɛse kpanaŋ man,
te loŋ leewɔ waale,
22Degbeŋgyoo kpa, wosefɛɛreŋ be doo fa akpanyanyaŋte ya.>>
Currently Selected:
Yesaya 48: NTR
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics Literacy and Bible Translation
