Yesaya 52
52
Wurubuarɛ waa lɛɛ Yerusalɛm
1Foŋ, foŋ, Siyɔn,
mo doŋ kaa!
Yerusalɛm, donɔɔ dinaa fereŋkyeŋ,
mo nyɔ obuo kegba do.
Baŋ ba te kara be baalawose ya, na baŋ bɔɔ waalaa ba wose nɛ,
be gyae baa gyoo n man bela ya.
2Kpiisi aŋasa lee n wose man,
Yerusalɛm, koro kyaa gyoorogbeli dɔɔ.
Siyɔn alebu ŋon n doo gbeŋiri man,
lese agbaragbarase ŋan lee n wɔŋe man.
3Nawolo nyi nnɛ yaa Degbeŋgyoo ne yako,
<<Me yɔɔ ŋon keŋ ma te lɛɛ kolo ya,
Te na kɔba te maa mo lɛɛ ŋon ya.>>
4Nnɛ yaa Degbeŋgyoo Doŋ Pou Nyee ne yako,
<<Gyaŋgba keŋ na me balaŋ gyuuwɔ ke kyaa Igyipite,
Kenaŋ wɔle te Asiriyatena ŋere wɔ do.
5Te nɛnɛɛ woŋ te me dana kɛbo?>> Degbeŋgyoo torola yako.
<<Nawolo nyi be ta mo me balaŋ laŋ keŋ ba te yɛɛ kolo ya,
te baŋ bɛɛ di be dɔɔ nɛ ne kulu wɔ.>> Degbeŋgyoo torola yako.
<<Te wee kamasɛ na,
bee kolosi mmusuo nombia tia ma yele.
6Mena dɔɔ me balaŋ baa gyeŋ ma yele,
Mena wee kenaŋ baa gyeŋ nyi,
maŋ yɛna ŋon mɔɔ kolosi ke see.
Ayi, ke yɛɛ maŋ.
7Kɛɛ mena keŋ baŋ
bɛɛ mo nombia kpaakpaa kɔŋ nɛ naawɔ kyeo bula dɔɔ,
Baŋ bee kolosi wosefɛɛreŋ nombia,
baŋ bɛɛ yako nombia ŋan dei,
baŋ bɛɛ gyɔ nyeekelɛɛ dekpeŋkpeŋ,
baŋ bɛɛ yako Siyɔn nyiaa
<<N Wurubuarɛ ne diina gyoori!>>
8Tei! N gyeera te gyina ba woya,
bɛɛ fae kenyaŋee yeesa.
Debaŋ keŋ Degbeŋgyoo waa bese kɔŋ Siyɔn nɛ,
baŋ gbagba baa naa ke na be sia.
9Ɛ kpee kenyaŋee nɔɔneŋ,
ɛmɛɛ Yerusalɛm akyaŋse ŋan ɛ be yɛlɛɛ,
nawolo nyi Degbeŋgyoo te fɛɛ ɔ balaŋ wɔe,
ɔ te lɛɛ Yerusalɛm.
10Degbeŋgyoo waa gyuusu ɔ nyiŋmaa fereŋkyeŋ keŋ see
tɛɛlese ŋan pou siaman
te tɛɛle ɔto pou gyae ke naa,
de Wurubuarɛ nyeekelɛɛ keŋ.
11Ɛ lee, ɛ lee, ɛ lee botɔɔ,
ɛ naa tina abɔɔ ŋan dana ayimɛɛ ya.
Ɛmɛɛ baŋ ɛ na seele Degbeŋgyoo ɔsom deni man kuruwaase nɛ,
ɛ lee ke man na n wose kefaafo.
1 12Mɔna ɛ be gyae ɛ ke barase lee,
yaa ɛ ke yeu ya,
nawolo nyi Degbeŋgyoo waa ta ɛ siaman,
Iseraetena Wurubuarɛ ŋon waa gyee nideli ŋon.
Somere ŋon kaale na ɔ gyoorobiiri
13Kɛɛ ma somere waa yɛɛ abɔɔ siakekara man#52:13 Waa nyiŋ ɔ wose,
Waa lɛɛ yele na obuo na maa gyina e adido nideli.
14Mena keŋ lee ŋon dɔɔ balaŋ burum wose be gbirisi wɔ,
ɔ wose naane be wɔlɛɛ kela deniwalaŋ kamasɛ wui,
te ɔ ta lee deniwalaŋ kamasɛ ya nɛ,
15mena dɔɔ, tɛɛlese burum nɔɔ gyae ke doo wɔ,#52:15
te lee ŋon dɔɔ gyooneŋ baa wuu be nɔɔse.
Nawolo nyi baa naa keŋ ba te yako wɔ ya nɛ,
te keŋ be te nyii ya nɛ, baa nyii ke man.
Currently Selected:
Yesaya 52: NTR
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics Literacy and Bible Translation
