प्रेरित.कामी 10
10
कुरनेलियुस पतरस के राअः लियाय
1कैसरिया रे इटालियन पलटनकु आली सुबेदार कुरनेलियुस नुमू रिनी मियांड होड़ तहिनोः केनाय। 2हुनी धरमी ताही नेनाय, तेकर अपन गोटा ओड़ाअ रिनकु समेत परमेसर तरअः बोर केनाय। तेकर हुनी जामा बेरा बिनती एकाय केनाय, आउर जाहुदी होड़कु रागेंःग-तेंताङकु के ढेर दान एमा कु केनाय। 3हुनी मुसिङ दिन ढाड़काः बेरा तीन बजे लकान दर्सन रे सफा-सफा नेल लःअय, ची परमेसर आली मियांड सिरमादूत हुनी दुबाःड़े भीतरी बोलो केते कंहड़ीः दाय, “ए कुरनेलियुस!”
4कुरनेलियुस सिरमादूत पखा नेल थिताव केते, तेकर बोरो केते कंहड़ी लःअय, “ए परभु एतान हेके?”
तब सिरमादूत हुनी के बेता लियाय, “आम आला बिनती तेकर आम आला दान तेङ रकाःब केते परमेसर एड़े सोदोर ना, तेकर हुनी आम के उईहार तःड मेआय। 5नहाअः दो याफा रे होड़ कुलगोःड केते, सिमोन के जे पतरस बेताईयाकु, राअः आगुः चिकुमे। 6हुनी सिमोन हरता रेनअः धधांधाई मुची दुबाःड़े गुतिया एदानिया, जेकर ओड़ाअ ताय समुदर रआ दौंड़ी रे एदनाआ।” 7जब हुनी सिरमादूत जे हुनी लोः बात ताही लःअय सेनोः नाय, दो हुनी बरिया धाँगड़ तेकर जे हुनी दुबाःड़े तहिनोः केनाकु, हुंकू मेसे मियांड धरमी सिपाही के राअः लियाय। 8जे हुयाव थिना जामा बात के उदूः केते याफा कुलगोःड लिकुआय।
पतरस आला दर्सन
9दोसरा हिला, डिंडोअ-डिंडोअ सहर दुबाःड़े सोदोर नाकु, दो दुपहरा लकान पतरस बि-बिनती लःअय ओड़ाअ रअः तेङ रे रकाःब नेनाय। 10हुनी के रांगेःग अदा लिया, तेकर जहानअ जोजोम नाम केनाय, बकिर हुंकू घोटो बनाय केनाकु गी, ची पतरस आतमा रे दर्सन नेल लःअय। 11आउर हुनी नेल लःअय ची सिरमा उघड़ाव ना तेकर जिलींग हेः चावड़ा पेछोड़ी लकान मियांड जहान जिनीस अड़गुन ताना तेकर होना रेनअः चाईरो कोना रेनअः छोर के धरती रे दोहोः दाकु। 12होना रे जामा लकान रिनकु चाईर गोड़वा, धरती रे रेंगाअ खाता जीव-जन्तु, तेकर सिरमा रिनकु ओड़े एदान कुआ। 13“पतरस के बिरिःड मे, गोएःग केते जोम कुमे!” मेन केते मियांड गुल आयुम नेना।
14बकिर पतरस कंहड़ी लःअय, “कोवान, परभु ओकिन रे होः कोवान एता लःअय ची ईङ ओका हिला होः जहान अपबितर चाहे छुँत जिनीस काईङ जोम तदा।”
15फिन दोबारा सबद आयुम नेना, “जे कुछ के परमेसर सुध ठहराव तदाय होना के छुँत आलुम कंहड़ी।” 16पे खेप नेकान नेना, तेकर नोःआँ तयोम होना जिनीस के फिन सिरमा रे तुरते तेङ रकाःब लअकु।
17पतरस ईङ जे दर्सन नेल तदिङ होना रेनअः माने एतान हुयाव सकाअ के, हुनी काय समझाव दाड़ी केना, ची हिमीन रे कुरनेलियुस पखी तरअः कुलगोःड लिनकु होड़ सिमोन आला ओड़ाअ रेनअः पता लगाव केते, दुवार रे हीःग सोदोर नाकु। 18“सिमोन जेके पतरस बेताईयाकु, निआँ ओड़ाअ रे गुतिया एदानिया एतान?” मेन केते हकाव केते कुलीअ दिकुआकु।
19पतरस नहाअः होः होना दर्सन रअः बारे बिचारे केनाय, ची “नेलकुमे! पे-होड़ होड़ आम के नाम देमेआकु मेन केते, पबितर आतमा हुनी के बेता लियाय। 20आम जल्दी लतार अड़गुन मे, तेकर बे संका ते, हुंकू लोः सेनोः जुनोः मे, एता लःअय ची हुंकू के ईङ कुलगोःड तडकुईङ।” 21तब पतरस लतार अड़गु केते, “आपे जेके नाम दियापे हुनी ईङ गी हेके, आपे एता लःअय नोआँड़े हीःग तनापे?” मेन केते पतरस हुंकू होड़ के कंहड़ी रूवाड़ोः लिकुआय।
22“कुरनेलियुस नुमू रिनी मियांड सुबेदार एदानिया, हुनी धरमी तेकर परमेसर के बोर वाला तेकर जामा जाहुदी जाईत रे बढ़ियाँ नामी होड़ हेके। हुनी के मियांड पबितर सिरमादूत तरअः नोःआँ हुकूम भेटाव ताना ची, हुनी आम के अपन ओड़ाअ रे राअः केते, आम तरअः बचन आयुमेआय,” मेन केते हुंकू बेता लियाकु। 23तब पतरस हुंकू के ओड़ाअ भीतरी राअः केते गुतिया लिकुआय।
कोरनेलियुस ओड़ाअ रे पतरस
दोसरा हिला हुनी हुंकू लोः सेन नेनाय, तेकर याफा रिनकु बोकोकु मेसे, थोड़ेक हुनी लोः गाती नेनाकु। 24दोसरा हिला हुनी कैसरिया सोदोर नेनाय, तेकर कुरनेलियुस अपन दुलार गाती ताय तिकु, आउर अपन गुतियाकु लोः, हुनी के नेल असराई केनाय। 25पतरस जब भीतरी बोल केनाय, दो कुरनेलियुस हुनी लोः भेंट नाय, तेकर इकड़ुम केते, जोहार लियाय। 26बकिर पतरस हुनी के बिरिःड केते “तिंगुन में, ईङ होः दो होड़ हेके” मेन केते हुनी के बेता लियाय। 27आउर पतरस हुनी लोः बतियाव यआते भीतरी सेन नेनाय, तेकर ढेर होड़कु के जवार नेल केते, 28हुंकू के बेता लिकुआय, “आपे पड़ीआपे ची एटाअ जाईतकु लोः गतियोः चाहे हुंकू दुबाःड़े सेनोः जाहुदीकु लःअय एकदम मना एदनाआ। बकिर परमेसर ईङ के देखाव तदाय ची ओके होड़ के होः अपबितर चाहे छुँत आलुम कंहड़ी के। 29हिना लःअय ईङ, जब ईङ के राअः लिङापे दो, एतान होः बेगर कंहड़ी ते हीःग नाईङ, नहाअः दो ईङ आपे के कुलीः दिपीईङ ची ईङ के एतान काम लःअय राअः तदियाँ पे।”
30चाईर दिन हुयाव ना निआँ बेरा रे, “ईङ अपन ओड़ाअ रे तीन बजे बिनती किनिङ ची फिट-फिट पुँड़ी गेन्दरअ सोलोंग उनी ईङ मड़ांग रे हीःग केते तिंगुअ नाय मेन केते कुरनेलियुस बेता लियाय। 31‘ए कुरनेलियुस! आम आला बिनती के आयुम तदाय, तेकर परमेसर आम आला दान के उईहार तदाय। 32हिना लःअय जाहें के याफा कुलगोःड केते, सिमोन के जेके पतरस बेताईयाकु रागी मे, हुनी समुदर दौंड़ी सिमोन हरता रेनअः धधंधाई मुची ओड़ाअ रे गुतिया एदानिया।’ 33तब ईङ तुरते आम दुबाःड़े होड़ कुलगोःड लिकुईंङ, तेकर बेस लअम ची आम हीःग नाम। नहाअः आले जामा नोआँड़े परमेसर मड़ांग रे एदान लेआ, जेकर से ची जे परभु आम तरअः कंहड़ी तदाय होना के आयुमेआले।”
पतरस आला उपदेस
34 #
कन 10:17
तब पतरस, “ईङ नहाअः दो सचे गी समझाव नाईङ ची परमेसर ओके लोः भेद-भाव काय दोहोया” मेन केते कंहड़ी लःअय। 35“बकिर जामा जाईतकु रे जे हुनी तरअः बो-राकु, तेकर धरम रेनअः काम कामीयाकु हुंकू के गरहन कुआय। 36परमेसर जे वचन के इसराइली के एम थिलाआय होना के आपे पड़ीआपे। जामेकु आली परभु ईसु ख्रीस्त तरअः जे जामाकु आली परभु हेके, सानती रअः बेस खभाईर सुनाव लःअय। 37बतिस्मा एमोई जोहन आला बचन रअः परचार तयोम गलील परदेस तरअः ईदी केते, गोटा जाहुदिया राईज रे जे बड़े घटना हुयाव नेना, होना बारे आपे पड़ीआपे। 38परमेसर ईसु नासरत रिनी के पबितर आतमा तेकर समरथ तरअः सिध लियाय। तेकर हुनी चाईरो चौगिरदा दांड़ा-दांड़ा भलाई काम कामी केनाय, तेकर सैतान तरअः सताव लिनकु के बेसकु केनाय, एता लःअय ची परमेसर हुनी लोः ताही नेनाय। 39हुनी जे पुरा जाहुदिया राईज तेकर जिरोसलेम रे कामी लःअय होना रेनअः गोवाह आले एदान लेआ। हुनी के हुंकू होड़कु कुरूस रेनअः काठ रे रकाःब केते गोएःग लियाकु। 40बकिर हुनी के परमेसर पे रोज रे जिवीःड बिरिःड लियाय, तेकर आले के दिसतार लियाय होओ। 41जामा होड़कु के कोवान, बकिर हुंकू गोवाहकु मड़ांग रे, जेके परमेसर पहिल तरअः चुनाव थिलकुआय, होना रेनअः गोवाह आले हेके, गोएःग उनकु मेसे जिवीःड बिरिडोः तयोम हुनी लोः आले जोम नु तदाले। 42तेकर हुनी आले के, होड़कु रे परचा-रेपे, तेकर गोवाही एमा कुपे, ची जेके परमेसर, जिवीःड कु तेकर गोएःग उनकु आली नेनेयायी नुई हिनी हेके, मेन केते हुकूम एमा तडलेआय। 43हुनी रअः बारे जामा आगमजानीकु गोवाह एमेआकु, ची जे हुनी तेङ रे बिसवासेआकु हुंकू के, हुनी आला नुमू रे पाप छमा भेटाव कोआ।”
एटाअ जाईतकु रे पबितर आतमा रअः अड़गुन
44पतरस नोःआँ बात के क-कंहड़ी केनाय गी, ची पबितर आतमा, बचन आ-आयुमकु जामे तेङ रे अड़गु नेना। 45पतरस लोः हीःग उनकु खतना उनकु बिसवासीकु, एटाअ जाईत के होः पबितर आतमा रअः बराकाईत भेटाव ताना नेल केते छकित नाकु। 46-47एता लःअय ची एटाअ जाईतकु के, एटाअ-एटाअ भाखा क-कंहड़ी, आउर परमेसर आला बा-बड़ाई आयुम लिकुआकु “नुकू के आबु लकान गी पबितर आतमा भेटाव ताना, दो एतान जाहें नुकू के दाअः तरअः बतिस्मा एमोअ तरअः रोकाव सकाव किकुआकु?” मेन केते पतरस कंहड़ी लःअय। 48तब पतरस हुंकू के ईसु ख्रीस्त आला नुमू रे बतिस्मा ईदी पे मेन केते, हुकूम एमा लिकुआय। आउर हुंकू, पतरस के “आले लोः थोड़ेक दिन आउर ताहिनमे” मेन केते गोहराव नेनाकु।
Currently Selected:
प्रेरित.कामी 10: ASR
Highlight
Share
Compare
Copy
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
