प्रेरित.कामी 13
13
बरनाबस आउर साऊल के चुचुनाव आउर कु-कुलगोःड
1अन्ताकिया रआ कलीसिया रे, थोड़ेक आगमजानी तेकर गुरू कु ताही नेना कु, हुंकू मेसे बरनाबस, तेकर सिमोन जेके नीगेर माने कड़िया कंहड़ी केनाकु, तेकर कुरेनी रिनी लुकियुस, तेकर साऊल, राजा हेरोद आली काठ बोको मनाहेम थिनाकिन, जेके राजा हेरोद आलकिन एंगा-आपा असुल-हरा थिलयाकिन, 2जब हुंकू उपास केते परभु आला अराधनाय केनाकु, दो “ईङ लःअय बरनाबस तेकर साऊल के, होना काम लःअय आलगे किनपे जेकर लःअय ईङ हुंकिन के राअः तडकिनिङ” मेन केते पबितर आतमा बेता लिकुआय।
3तब हुंकू उपास हेतरअ बिनती केते, तेकर हुंकिन तेङ रे तीः दोहो केते, हुंकिन के बिदा लिकनाकु।
साईप्रस रे साऊल आउर बरनाबस
4पबितर आतमा तरअः कुलगोःड लिनकिन, बरनाबस तेकर साऊल सिलुकिया सेन नेनाकिन, तेकर होनाःड़े तरअः दाअः जहाज रे रकाःब केते साईप्रस टापु तोराकिना। 5तेकर साईप्रस रआ टापु रेनअः उतर-पुरूब रेनअः बंदरगाह सहर सलमीस रे सोदोर केते, परमेसर आला बचन के जाहुदीकु आला बिनती ओड़ाअ रे सुनाय केनाकिन। जोहन आउर मरकुस होः हुंकिन लोः ताही केते से-सेवाई ताहीनाय।
6हुंकू गोटा टापु के दांड़ा यअते पाफुस हीःग नेनाकु, होनाःड़े बार-ईसु नुमू रिनी मियांड जाहुदी जादुवाहा, तेकर झुठा आगमजानी लोः भेंट नेनाकु। 7हुनी हाकिम सिरगियुस पौलुस आली संगी ताही नेनाय, जे हेरेल ताही नेनाय। हुनी बरनाबस तेकर साऊल के आएंग दुबाःड़े राअः केते, परमेसर आला बचन आ-आयुम नाम केनाय। 8बार-ईसु आला एटाअ नुमू इलीमास टोनहा थिना, एता लःअय ची निआँ हुनी आला नुमू रेनअः माने हेके, हुंकिन के बिरोधे किनकेनाय, तेकर हाकिम के बि-बिसवास तरअः रोरोकाव नाम केनाय। 9तब साऊल जेकर नुमू पौलुस होः हेके, पबितर आतमा तरअः पेरेःग केते, हुनी के नेल बिःड किदयाय। 10तेकर कंहड़ी लःअय, “ए जामा हिसंगाहा! तेकर जामा चलांक तरअः पेरेःग उनी सैतान आली होपोन, तेकर जामा बरन धरम रिनी बैरी परभु आला सोझ होरा के टेटेड़हा एरोम बाईया एतान? 11नहाअः दो नेलेमे परभु आला तीः आम के हुमाअ देमेआय, आम अंधरा केते मि-घड़ीक जगुत दिने रअः मरसल के एरोम नेल दड़ीआ।”
तेकर हेने घड़ीक हुनी तेङ रे धुंधरा तेकर अंधार ना, तेकर हुनी आला तीः ताय के सःब केते इदीयाकु मेन केते हुनी होनते-नोनते तुनुम दाय। 12तब हाकिम जे हुयाव ताही नेना, होना के नेल केते बेता लिकनाकु, तेकर परभु आला उपदेस रे छकित केते बिसवास लःअय।
फिसिदिया रआ अन्ताकिया रे पौलुस
13पौलुस तेकर हुनी आलकु गाती, पाफुस तरअः जहाज खोलाव केते, पंफुलिया राईज रेनअः पिरगा रे हीःग नेनाकु, तेकर जोहन आउर मरकुस हुंकू के बाईःग-तु केते जिरोसलेम रूवाड़ हीःग नेनाय। 14पौलुस तेकर बरनाबस पिरगा तरअः मड़ांग बढ़ाव केते, पिसिदिया रेनअः अन्ताकिया रे सोदोर नेनाकु, हुंकू सथाअ हिला बिनती ओड़ाअ रे सेन केते दुड़ूः नाकु। 15मुसा आला कनहुन तेकर आगमजानीकु आला पुथी तरअः पढ़ाव चबा केते, बिनती ओड़ाअ रिनी अगुवा हुंकिन दुबाःड़े कंहड़ी भेजाव लअकु ची, “ए बोकोकु, जदि आपे होड़कु लःअय ढाढ़स रेनअः आपे आला मन रे जहान बात एदनाअ दो कंहड़ी पे।” 16तब पौलुस तिंगु केते, तेकर तीः रे, अड़िःग केते,
“ए इसराइलीकु तेकर परमेसर तरअः बोर जामा एटाअ जाईतकु आयुमेपे मेन केते बेता लिकुआय! 17#उइठ 1:7; उइठ 12:51इसराइली परजा-पुत आली परमेसर आबु आलकु पुरखाकु के निबाड़ लिकुआय। तेकर हुंकू होड़ मिसर राईज रे परदेसी पाड़ी केते ताहिन केनाकु, हिमीन रे हुंकू के परमेसर बढ़ाव लिकुआय। आउर होना तयोम अपन महान तीः तरअः हुंकू के होंड़े तरअः उडुंग आगु लिकुआय, 18#गन 14:34; कन 1:31हुनी चालीस बरीस जगुत मरूभूमि रे हुंकू के देख-भाल लिकुआय। 19#कन 7:1; जहो 14:1तेकर हुनी कनान राईज रे सात गो जाईत के नास केते, आउर हुंकू आला ओत-खेता के परमेसर अपन आलकु पुरखाकु आला अधिकार रे एमा लिकुआय। 20#नेया 2:16; 1 समु 3:20नोःआँ बिताअः लःअय साढ़े चाईर साय बरीस लगाव नेना।”
“नोःआँ तयोम परमेसर, समुएल आगमजानी जगुत, आ-आगवाई लःअय नेनेयायकु के ठहराव लिकुआय। 21#1 समु 8:5; 1 समु 10:21नोःआँ तयोम हुंकू मियांड राजा कोय लियाकु, तब परमेसर बिनयामिन गोतोर तरअः मियांड होड़ किस आली होपोन साऊल के, चालीस बरीस लःअय हुंकू तेङ रे राजा ठहराव लियाय। 22#1 समु 13:14; 1 समु 16:12; सिरिंग 89:20होना तयोम, परमेसर साऊल के ओचोः केते ‘दाऊद के हुंकू आली राजा बनाव लियाय। तेकर हुनी बारे परमेसर गोवाही एम लःअय,’ नहाअः ईङ के ईङ आला मान रेनअः मोताबिक मियांड होड़ यिसै आली होपोन दाऊद भेटाव नेनाय। हिनी ईङ आला मन रेनअः जामा इकछा के पुराव केआय। 23परमेसर अपन वादा लअः मोताबिक, हिनी दाऊद आला बंसवाईर तरअः, इसराइल लःअय मियांड उ-उधार अवला, माने कि ईसु के कुलगोःड लियाय। 24#सं.मर 1:4; सं.लुका 3:3ईसु अपन से-सेवा कामी एएहे:ब तरअः पहिल, जोहन जामा इसराइल होड़कु रे पाप तरअः मन रूवाड़ेपे आउर बतिस्मा इदीपे मेन केते परचार थिलाआय। 25#सं.जोह 1:20; सं.मत्ती 3:11; सं.मर 1:7; सं.लुका 3:16; सं.जोह 1:27जोहन अपन काम पुपुरा वाला ताही नेनाय दो, ‘आपे ईङ के एतान समझाआपे? हुनी ईङ नलागे! बकिर नेलेपे ईङ तयोम हिजोअ वाला एदानिया, जेकर पाँव रेनअः खड़पा खो-खोलाव लकान होः, ईङ कनिङा,’ मेन केते हुनी बेता लिकुआय।”
26“ए बोकोकु, आपे जे अब्राहम आलकु बंसवाईर हेके, तेकर परमेसर तरअः बोर जामा होड़कु आबु दुबाःड़े नोःआँ उधार रआ बचन भेजाव लअः एदनाआ! 27जिरोसलेम रे ताहिन कु तेकर हुंकू आलकु अगुवाकु ईसु के काकु चिनहा लिया। जे सथाअ हिला पढ़ाव केते सुनायाकु, हुंकू आगमजानीकु आला कंहड़ी के काकु समझाव नेना। बकिर ईसु के दोसी ठहराव केते होना बात के पुरा लअकु। 28#सं.मत्ती 27:22,23; सं.मर 15:13,14; सं.लुका 23:21–23; सं.जोह 19:15हुनी रे गोगोएःग लकान एतान दोस होः काकु नाम लआ सेरे होः, हुंकू पिलातुस तरअः नुई के गोगोएःग एदनाअ मेन केते गोहराव नेनाकु। 29#सं.मत्ती 27:57–61; सं.मर 15:42–47; सं.लुका 23:50–56; सं.जोह 19:38–42हुंकू हुनी बारे जे कुछ लिखा लअः एदनाअ होना जामा पुरा केते, हुनी के कुरूस काठ तरअः अड़गु केते मारघटा रे दोहो लियाकु। 30बकिर परमेसर हुनी के गोएःग उनकु तरअः जिवीःड लियाय, 31#प्रे.कामी 1:3तेकर हुनी ढेर दिन जगुत हुंकू होड़कु लोः देखार नेनाय, जे आएंग लोः गलील तरअः जिरोसलेम हीःग ताही नेनाकु। नहाअः दो हिंकुगी जानता कु रअः मड़ांग रे हुनी आला गोवाह एदान कुआ। 32#सिरिंग 2:7आले आपे के होना बेस खभाईर के सुनायाले, जे आबु आलकु पुरखाकु लोः परमेसर वादा थिलाआय। 33परमेसर ईसु के जिवीःड केते, हिना करार के आबु लःअय पुराव लःअय। जे लकान ची दुसरा सिरिंग रे होः लिखा लेनअ एदनाअ,”
“‘आम ईङ आली होपोन हेके,
तिसिंग तरअः ईङ आम आली आपा हेके।’”
34 #
जसा 55:3
परमेसर हुनी के गोएःग उनकु तरअः जिवीःड लियाय, तेकर नहाअः दो हुनी ओका हिला होः एरे सेया योआ।
“‘नोःआँ बात रेनअः साबुत रे परमेसर कंहड़ी थिलाआय,
ईङ दाऊद तरअः जे पबितर आउर अटल करार थिलिईङ, होना के आपे लःअय पुरायीङ।’”
35 #
सिरिंग 16:10
हिना लकान मियांड एटाअ सिरिंग रे होः लिखा ताना,
“‘आम अपन पबितर होड़ के एरोम सेयाअ चिया।’”
36“एता लःअय ची दाऊद दो परमेसर आला मरजी रअः मोताबिक, अपन समाई रे सेवा केते गोएःग नाय। तेकर अपन पुरखाकु लोः सेन केते मिलाव नाय, तेकर सेया होः सेयाअ नाय। 37बकिर जेके परमेसर जिवीःड लियाय, हुनी काय सेया दाड़ी नेना। 38-39हिना लःअय ए बोकोकु आपे बेस केन पड़ीपे ची, ईसु तरअः गी पाप छमा रआ बेस खभाईर आपे के भेटाआ। तेकर जे बात रे आपे मुसा आला कनहुन तरअः पाप तरअः छुटकारा का भेटाव सकाअ केना, हिना जामा बात रे जामे झन ईसु रे बि-बिसवासकु हुनी तरअः बेकासुर ठहराआकु। 40हिना लःअय चाँवचीत ताहिन पे, नोकान आलु हुयाव कोओ ची जे आगमजानीकु आला पुथी रे लिखा तदाकु आपे एड़े होः आलु हीःग कोओ ची,”
41 #
हब 1:5
“‘ए नि-निन्दाकु, नेलेपे छकित केते मेटाव जुनोः पे।
ईङ आपे बेरा रे मियांड होना कामी पु-पुरा तोराईङा,
जेकर बारे रे जदि जाहें आपे के उदूः पेआकु दो,
सेरे होः कहियो एरपे बिसवासेआ!’”
42जब हुंकिन बिनती ओड़ाअ तरअः उड़ूंगोः केनाकिन, दो होड़कु पौलुस आउर बरनाबस तरअः, दराअ हपता सथाअ हिला, आले के नोःआँ कंहड़ी के फिन से सुनाय बेन, मेन केते गोहराव नेनाकु। 43जब बिनती ओड़ाअ रअः सभा चाबा केते उडुंग नाकु दो, ढेर जाहुदीकु, तेकर जाहुदी मत के मनाअ-कु भक्तकु मेसे, ढेर होड़ पौलुस तेकर बरनाबस पखी नेनाकु, आउर पौलुस तेकर बरनाबस हुंकू लोः बात लअकिन तेकर परमेसर आला दया रे डिड़ बनाव तहिनपे, मेन केते हुंकिन, हुंकू के समझाव लिकुआकिन।
पौलुस एटाअ जाईतकु रे प-परचार सुरू
44दोसरा हपता, सथाअ हिला सहर रिनकु जामाकु लकान, परभु आला बचन के आ-आयुम लःअय जवार नेनाकु। 45बकिर नुमिन बड़े तुन्दरा होड़ नेल केते, जाहुदीकु हिसंगा ते लोयोअ केनाकु; तेकर पौलुस के निन्दा केते, पौलुस आला बात रआ बिरोध रे कंहड़ी केनाकु 46तब पौलुस तेकर बरनाबस डिड़ केते हुंकिन जाहुदीकु के बेताअः दिकुआकिन ची, “पहिल रे आपे के परमेसर आला बचन के सुसुनाव जरूरी ताही नेना, बकिर आपे नोःआँ के कापे गरहनेआ। तेकर अपन के का-अन्तोः जिनगी लाईक कापे ठहराआ, हिना लःअय नहाअः दो आले एटाअ जाईतकु दुबाःड़े सेनाले। 47#जसा 42:6; 49:6एता लःअय ची परभु आले के नोःआँ हुकूम एमा तडलेआय,
“‘ईङ आम के एटाअ जाईतकु लःअय दीया ठहराव तडमे-ईंग,
जेकर से ची दुनिया रिनकु जामा होड़ उधार नामेकु।’”
48नोःआँ आयुम केते एटाअ जाईतकु रिझ नाकु, तेकर परभु आला बचन रआ बड़ाई दाकु; आउर जेतना का-अन्तोः जिनगी लःअय ठहराव लिनकु थिनाकु हुंकू बिसवास लअकु।
49तेकर परभु आला बचन होना गोटा राईज रे फैलाव ना। 50बकिर जाहुदीकु, नामी भक्त आउराईतकु के, आउर सहर रिनकु नेताकु के उकसाव लिकुआकु। तेकर पौलुस आउर बरनाबस रआ बिरोध रे झमेला चिअ केते, अपन सिमान तरअः हुंकिन के उडुंग किद किनाकु। 51#सं.मत्ती 10:14; सं.मर 6:11; सं.लुका 9:5; 10:11पौलुस तेकर बरनाबस, हुंकू के चेतावन एमोअ लःअय अपन तरवा रेनअः धुड़ी झड़ाव केते इकुनियुम सेनोः नाकिन। 52तेकर फिसिदिया रआ अन्ताकिया सहर रिनकु चेलाकु रिझ रे तेकर पबितर आतमा तरअः पेरेःग सेन नेनाकु।
Currently Selected:
प्रेरित.कामी 13: ASR
Highlight
Share
Compare
Copy
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
