संत.जोहन 4

ईसु तेकर सामरी आउराईत

1फरीसीकु के खभाईर भेटाव नेना ची ईसु जोहन तरअः जादे चेला बनाव कुआय तेकर बतिस्मा एमा कुआय। 2ईसु खुदे कोवान बकिर हुनी आलकु चेला ताय बतिस्मा एमाकु केनाकु। 3जब ईसु के नोःआँ रेनअः बारे पता चलाव नेना, दो हिमीन रे हुनी जाहुदिया के बाई केते फिन गलील सेन नेनाय। 4हुनी के समारिया पखा तरअः सेनोः दरकार ताही नेना। 5#एहेः 33:19; जहो 24:32हिना लःअय हुनी समारिया रेनअः सुखार सहर सोदोर नेनाय। जे होना ओत हेनाःड एदनाआ जेके याकुब आएंग आली होपोन जोसेफ के एमा ताही लियाय। 6होनाःड़े याकुब आला डाड़ी एदनाआ, ईसु होरा डिंडोअ-डिंडोअ थकाव थिनाय, हिना लःअय हुनी डाड़ी दुबाःड़े दुड़ूः नाय। हिमीन बेरा दुपहरा हुयाव चुकाव थिना। 7निमने रे मियांड समारिया रिनी आउराईत दाअः पेरे:ग हीःग नेनाय, ईसु हुनी के बेता लियाय “ईङ के दाअः पियाईंङ में।” 8एता लःअय ची हुनी आलकु चेलातय सहर रे जोजमअ किकिरिङ सेन ताही नेनाकु। 9#एज 4:1–5; नहे 4:1,2जाहुदीकु समारिया रिनकु लोः एतान होः बेवहार काकु दोहोय केना। हिना लःअय समारिया रिनी आउराईत हुनी के बेता लियाय, “आम जाहुदी हुयाव केते ईङ समारिया रिनी आउराईत तरअः दाअः नुनू लःअय कोयाम?” 10ईसु कंहड़ी रूवाड़ोः लियाय “जदि आम परमेसर आला बराकाईत के पाड़ी केआम, आउर नोःआँ ओहो पाड़ी केआम ची ईङ के दाअः पियाईङमें कंहड़ीः दाय हुनी ओके हेके, दो आम हुनी तरअः कोय ताकेआम आउर हुनी आम के जिनगी राअः दाअः एमा केमेआय।” 11आउराईत हुनी के बेता लियाय, “हे परभु”, “आम दुबाःड़े दाअः पेरे:ग लःअय दो एतान होः कनोआँ, आउर डाड़ी गहीड़ा, दो फिन आम के होना जिनगी रअः दाअः ओकाःड़े तरअः भेटाव कोआ? 12आम आले आली बाबा याकुब तरअः बड़ेआम एतान? जे आले के नोःआँ डाड़ी एमा तदलेआय, हुनी खुदे होः आउर हुनी आलकु होपोन आउर हुनी आलकु मावेसीकु होः होना तरअः दाअः नुई केनाकु” 13ईसु हुनी के बेता लियाय “जाहें नोःआँ दाअः के नुयाय, हुनी के फिन तेंताङ आदा किया। 14बकिर जाहें होना दाअः तरअः नुयाय जेके ईङ हुनी के एमायीङ, हुनी के फिन कहियो तेंताङ एरे अदाईया, होना हुनी रे मियांड सोत पाड़ी कोआ जे जुग-जुग जिनगी लःअय बुहकाव एका कोआ।” 15आउराईत हुनी के बेता लियाय, “हे परभु” “होना दाअः ईङ के एमाईंग-में एता लःअय ची ईङ आलुईंग तेंताङोअ आउर ईङ के दाअः पेपेरे:ग नोआँड़े आलु हिजोअ पड़ाअ।” 16ईसु हुनी के बेता लियाय “सेन केते अपन हेरेल के नोआँड़े राअः अगुई में।” 17आउराईत बेता लियाय “ईङ आली ओके हेरेल होः कनिङा।” ईसु हुनी के कंहड़ी रूवाड़ोः लियाय, “आम सचे कंहड़ीः दाम ची ‘ईङ आली ओके हेरेल होः कनिङा।’ 18एता लःअय ची आम पाँच गोड़ हेरेल चुकाव नाम तेकर जेकर दुबाःड़े नहाअः ताहिनोआम, हुनी होः आम आली हेरेल नलागे, नोःआँ आम सचे गी कंहड़ी तदाम।” 19आउराईत हुनी के बेता लियाय, “हे परभु, आम आगमजानी हेके लकान ईङ के आदायोआ।” 20“आले आलकु पुरखाकु नोःआँ बुरु रे आराधनाय केनाकु, आउर आपे जिरोसलेम रेगी बि-बिनती चाही मेन गेआपे।” 21ईसु हुनी के बेता लियाय, “हे आउराईत ईङ आला बात रे बिसवासेमें ची, होना बेरा दराआ जब होड़ ना दो नोःआँ बुरु रे बाबा आला आराधना केआकु आउर ना जिरोसलेम रे। 22आपे जेकर आराधनायापे, हुनी के कापे पड़ीआ। आले जेकर आराधनायाले हुनी के पड़ीआले, एता लःअय ची उधार जाहुदीकु तरअः गी हीःग कोआ। 23बकिर होना बेरा दराआ, हीःग ना गी जब सचे आ-अराधना कु आतमा तेकर सचाई तरअः बाबा आला आराधना केआकु। बाबा नेकान गी आ-अराधना कु के नाम कुआय। 24परमेसर आतमा हेके। हुनी आलकु आ-आराधनाकु के चाही ची हुंकू आतमा आउर सचाई तरअः हुनी आला आराधनायाकु।” 25आउराईत बेता लियाय, “ईङ पड़ीईंग ची ख्रीस्त, जे मसी कहलाआय, हिजोई एदानिया। जब हुनी हीःग कोआय, दो आले के जामा उदूः केआय।” 26ईसु हुनी के बेता लियाय “ईङ जे आम लोः कंहड़ी तानिङ हिनी हेके।”

27हिमने रे हुनी आलकु चेला ताय हीःग नाकु तेकर हुनी आउराईत लोः बतियाव दाय के नेल केते अचरज नाकु, सेरे होः ओके होः “आम एतान चहाअ तनाम?” चाहे “एता लःअय हुनी लोः बतियाव दाम?” मेन केते काकु कुली लिया। 28हुनी आउराईत अपन घाईला हिनाःड़े बाईःग तु केते सहर रे सेनोः नाय, आउर होड़कु के बेताअः दिकुआय, 29“एला मियांड होड़ के नेलीपे जे ईङ के होना जामा ईङ ईया थिलीईंग उदूः लःअय। नीईगी ख्रीस्त दो नलागे?” 30हिना लःअय हुंकू होड़ ईसु लोः भेंटोः सहर तरअः उडुंग केते हीःग नेनाकु। 31नोःआँ ताला रे हुनी आलकु चेला ईसु लोः गोहराव नेनाकु “हे गुरू कटिःग जोम केमे।” 32बकिर ईसु हुंकू के बेता लिकुआय “जोजोम लःअय ईङ दुबाःड़े होना घोटो एदनाआ, जेकर बारे रे आपे एतान होः कापे पड़ीआ।” 33नोःआँ चलते चेलाकु आकु-आकु कंहड़ीः दाकु, “जाहें हुनी लःअय जोजोम लःअय जहान एमा थिलयाकु एतान?” 34नोःआँ रे ईसु बेता लिकुआय “जे ईङ के कुलगोःड तदिङाय, हुनी आला मरजी रे चलाअ तेकर हुनी आला कामी पुपुरा, नोःआँ ईङ आला घोटो हेके। 35ईरोअ लःअय नहाअः चाईर महिना बंचाव ताना मेन केते कापे कंहड़ीआ एतान? बकिर ईङ आपे के बेताअः दिपीईंग आपे बोहोअ बिरिःड केते ओत के नेलेपे। होना ईरोअ लःअय बिलीअ ना। 36ईरोई बानी नामेआय, तेकर का-अन्तोः जिनगी लःअय जोअ जवारेआय, जेकर से ची हेरोई तेकर ईरोई बनार मिलाव केते खुसी मनायाकिन। 37एता लःअय ची नोआँड़े नोःआँ कहावाइत ठीक मेल जोमेआय, मिहोंड़ हेरेआय तेकर एटाअ ईरेआय। 38ईङ आपे के होना ओत ईरोअ लःअय गुलगोःड लिपीईंग, जेकर रे आपे कापे मेहनाईत लआ, एटाअ होड़ मेहनाईत लअकु आउर आपे के होना रेनअः जोअ भेटाअः ताना।”

सामरीकु आला बि-बिसवास

39हुनी आउराईत बेता थिलकुआय, “हुनी जे ईङ के होना जामा जे ईङ ईया थिलीईंग के गोवाही एम तदाय,” नोःआँ चलते होना सहर रिनकु ढेर समारिया रिनकु ईसु रे बिसवास लअकु। 40हिना लःअय जब हुंकू समारिया रिनकु हुनी दुबाःड़े हीःग नेनाकु, दो आले दुबाःड़े तहिन में मेन केते हुनी तरअः गोहराअ तनाकु, तेकर हुनी होनाःड़े बरसिङ जगुत ताही नेनाय। 41ढेर एटाअ होड़ होः ईसु आला उपदेस आयुम केते बिसवास लअकु, 42आउर हुनी आउराईत के बेता लियाकु “नहाअः दो आले आम आला कंहड़ी रेगी काले बिसवास दा एता लःअय ची आले खुदे हुनी के आयुम किदयाले आउर आले पाड़ी केदाले ची हुनी सथेगी दुनिया रिनी उ-उधार अवला हेके।”

हाकिम आली होपोन

43फिन होना बरसिङ तयोम, हुनी होनाःड़े तरअः विदा केते गलील सेन नेनाय। 44#सं.मत्‍ती 13:57; सं.मर 6:4; सं.लुका 4:24ईसु आएंग खुदे गोवाही एम थिलाआय ची “आगमजानीकु के अपन राईज रे मरजाईद का भेटाआ।” 45#सं.जोह 2:23जब हुनी गलील रे हीःग नेनाय दो गलीलीकु खुसी-खुसी हुनी लोः भेंट नेनाकु, एता लःअय ची जेतना काम हुनी जिरोसलेम रे परब बेरा कामी थिलाआय, हुंकू होना जामा के नेल थिलाअकु एता लःअय ची हुंकू होः परब रे सेन थिनाकु।

46 # सं.जोह 2:1–11 हुनी फिन गलील रेनअः काना सहर सेन नेनाय, जे एड़े हुनी दाअः के अंगुर रस बनाव थिलाआय। कफरनहुम रे राजा आली मियांड हाकिम थिनाय, जेकर होपोन बेमार ताही नेनाय। 47हुनी ईसु जाहुदिया तरअः गलील रे हीःग नाय के आयुम केते हुनी दुबाःड़े हीःग नेनाय, तेकर दु सेन केते ईङ आली होपोन के चंगाई मे, एता लःअय ची हुनी गोजोअः लकान ताहिनाय मेन केते ईसु तरअः गोहराअ तनाय। 48ईसु हुनी के बेता लियाय “जब तक चिनहा आउर छकरित कामी कापे नेले जगुत, एरपे बिसवासेआ।” 49राजा आली हाकिम हुनी के बेता लियाय “हे परभु ईङ आली चेंगा गोजोअः तरअः पहिल दु।” 50ईसु हुनी के बेता लियाय “जु आम आली होपोन बेसोअ तनाय”, हुनी होड़ ईसु आला कंहड़ी लअः बात के बिसवास लःअय तेकर सेनोः नाय। 51हुनी होरा रेगी ताही नेनाय हिमने रे हुनी आलकु बंधाउवा भेंट नेनाकु तेकर बेताअः दियाकु “आम आली नांव छठिया कोड़ा बेसोअ तनाय।” 52हुनी हुंकू के कुली लिकुआय “ओकिन बेरा हुनी बेस एहेःब नेनाय।” हुंकू हुनी के बेता लियाकु “होला 1 बजे दिने जाईड़रा अड़गुअ ना।” 53तब आपाते समझाव नाय ची ठीक हिमीन बेरा ईसु हुनी के बेता ताही लियाय “आम आली होपोन ताम बेसोः तनाय”, तेकर हुनी अपन जामा ओड़ाअ रिनकु संहित बिसवास लअकु। 54नोःआँ ईसु आला दुसरा चिनहा-छकरीत काम ताही नेना जे हुनी जाहुदिया तरअः गलील रे हिजोअ तयोम देखाव लःअय।

Currently Selected:

संत.जोहन 4: ASR

Highlight

Compare

Copy